Joshua 4

¹A nà n-ghɨ ta ghelɨ Isìlæ̀ nô ghɨ̀ jɨ̀m dyàŋ mèsì jvâ Jodàn, Bôbo bè sɨ̂ Joshwà na, ²“Choʼtɨ ghelɨ njvàsɨ̀ bò kɨ asas a ndo nɨ̀ ghelɨ Isìlæ̀ à jɨm, choʼ kɨ ɨ̀mòʼ isas i ndo ³ɨ bè sɨ̂ àŋena na, ghɨ beʼi ngòʼsɨ̀ njvàsɨ̀ bò antêynɨ̀ antêynɨ̀ a jvâ Jodàn. Àŋena beʼi kɨ̀ alèʼ ghè a ngàŋ sɨ ndô Fɨyinisɨ̀ nɨn ti ateyn ɨ̀ ndù nɨ̀ nseynsɨ alèʼ ghè a yi n-kelɨ sɨ chi ateyn.” ⁴Joshwà ɨ kæ sɨ jaŋ ghelɨ Isìlæ̀ ghì njvàsɨ̀ bò a wù chòʼtɨ kɨ ɨ̀moʼ ɨ̀mòʼ isas i ndo tì ⁵ɨ bè sɨ̂ àŋena na, “Yì zɨ ndù asɨ antayntayn a mɨ̂kàyn nɨ̀ Bôbo Fɨyini fifɨ antêynɨ̀ antêynɨ̀ a jvâ Jodàn. Yi zɨ ndù nô mɨ ndà ɨ bèʼì ngòʼ a ŋweyn a mbèʼ kɨ̀ ta asas a ndosɨ nɨ̀ ghelɨ Isìlæ̀ nɨn ghɨ njvàsɨ̀ bò. ⁶Ngòʼ nâ sèynsɨ nɨn kelɨ sɨ nà bêtɨ̀ iwo zɨ̀ a yi gàyn sɨ̂ zɨ̀ layn. Wôyn ghi kæ læ̀ bɨf na, ‘Ngòʼ sèynsɨ̀ nɨn ndyêyn ghà?’ ⁷Yi bè sɨ̂ àŋena na, à n-ghɨ ta Bôbo Fɨyini nɨn læ teyn jvâ Jodàn ta ngàŋsɨ ndô Fɨyinisɨ̀ nɨn dyâŋ jvâ Jodàn nɨ̀ àntayntayn a mɨ̂kàyn nɨ̀ Bôbo Fɨyini. Ghelɨ Isìlæ̀ na lum yeyn ngòʼ nâ sèynsɨ nô mɨ ɨlvɨ gha, ghɨ kfàʼtɨ̀ ìwo zɨ̀-ì a yi n-gàyn afêyn.” ⁸Ghelɨ Isìlæ̀ nâ ghì ɨ bèʼi ngòʼsɨ̀ njvàsɨ̀ bò antêynɨ̀ jvà kɨ̀ ta Joshwà nɨn bè. Àŋena nɨn bèʼi kɨ ta asas a ndosɨ nɨ̀ ghelɨ Isìlæ̀ nɨn ghɨ njvàsɨ̀ bò kɨ ighel ta Bôbo nɨ̂n bè sɨ̂ Joshwà. Àŋena dyàŋ jvâ Jodàn nɨ̀ ɨ̀nseynsɨ ɨ ndu lèm alèʼ ghè a àŋena nɨn bɨ̀ ateyn. ⁹Joshwà nɨ̀n bè meyn kɨmɨ na ghɨ tomtɨ ngòʼ sɨ lisɨ njvàsɨ̀ bò antêynɨ̀ antêynɨ̀ a jvâ Jodàn kɨ alèʼ ghè a ngàŋsɨ ndô Fɨyini sìsɨ̀ a sɨ tî bèʼi àntayntayn a mɨ̂kàyn nɨ̀ Bôbo ti nà ti ateyn tì, ngòʼsɨ ateynsɨ na bu ti kɨ afu sɨ koʼ sɨ chem layn.

¹⁰Ngàŋsɨ ndô Fɨyini sìsɨ̀ a sɨ n-bèʼi àntayntayn a mɨ̂kàyn nɨ̀ Bôbo nɨn tìmi kɨ a kî jvà sɨ chem ta ka ghelɨ Isìlæ̀ ni mèsì àwo kì a Bôbo bè sɨ̂ Joshwà na ghɨ ni. Awo nâ kèynà nà n-ghɨ kɨmɨ ta akî a Mosìs nɨn læ bè sɨ̂ Joshwà na wù ni. Ghelɨ Isìlæ̀ ɨ nyàŋsɨ dyàŋ. ¹¹A nà ghɨ ta àŋena dyàŋ meyn nô ghɨ̀ jɨ̀m, ngàŋsɨ ndô Fɨyini sìsɨ̀ a sɨ n-bèʼi àntayntayn a mɨ̂kàyn nɨ̀ Bôbo ɨ nà dyaŋà, ghelɨ ki ta àŋena nɨn dyâŋ. ¹²Ghelɨ ndo nɨ̀ Lubèn nɨ ɨ ghɨ ndo nɨ̀ Gâd nɨ̀ ghelɨ ndo nɨ̀ Mànasè ghɨli nɨ̂n dyàŋ sɨ asɨ nɨ̀ ghelɨ Isìlæ̀ ghɨli ma ghɨ beʼi meyn ɨ̀fwo iwòŋ kɨ ighel ta Mosis nɨn læ bè. ¹³Ghelɨ Isìlæ̀ nà n-koʼ ndû nkamsɨ mɨ̀vɨm ɨ̀n kæ̀ gvɨ̂tɨ̀ sɨ nù, ɨ dyàŋ ɨ ndù asɨ antayntayn a mɨ̂kàyn nɨ̀ Bôbo ibal i Jèlikò sɨ nù.

¹⁴A nà n-ghɨ achi nâ ghè ta Bôbo dyèyn sɨ̂ ghelɨ Isìlæ̀ na Joshwà nɨn ghɨ wul ɨ̀ tisɨnɨ ɨ̀ jùŋ, àŋena nà sɨ ngvɨmlɨ̂ Joshwà nô a jûŋ nô ta ka wù læ kfɨ, kɨ̀ ighel ta àŋena nà n-gvɨmlɨ Mosìs.

¹⁵Bôbo bè sɨ̂ Joshwà na, ¹⁶“Bè sɨ̂ ngàŋsɨ ndo Fɨyini sìsɨ̀ a sɨ̀ bèʼi àntayntayn a mɨ̂kâyn nɨ̀ Bôbo na àŋena fvɨ sɨ antêynɨ̀ jvà.” ¹⁷Joshwà ɨ kæ be sɨ̂ ngàŋsɨ ndô Fɨyini nâ sìsɨ̀ na, “Yi fvɨ kòʼ sɨ a jvâ.”

¹⁸Ngàŋsɨ ndô Fɨyini nâ sìsɨ̀ ɨ kæ bèʼì sɨ fvɨ nɨ̀ àntayntayn a mɨ̂kàyn nɨ̀ Bôbo Fɨyini nâ kì-à sɨ a jvâ. Àŋena nà fvɨ̂ gvî kɨ tèyn, jvà àteyn ɨ kasi ɨ luyn ɨ nà kalì kɨ ta yì nà ghɨ.

¹⁹Ghelɨ Isìlæ̀ nɨn dyàŋ jvâ Jodàn a mɨchi ìvɨm a njoŋ ɨ yî àsɨ ɨ bɨ̀ a ntèʼ Gilgàl injɨyn i ntèʼ Jèlikò. ²⁰Joshwà ɨ bè àŋena tomtɨ ngòʼ sìsɨ̀ a àŋena nɨn fvɨsɨ a jvâ Jodàn a ntèʼ afu, ²¹ɨ bè sɨ̂ ghelɨ Isìlæ̀ na, “Wôyn ghi kæ læ̀ bɨ̀f sɨ̂ zɨ̀ nâ ngòʼ sêynsɨ̀ nɨn ndyêyn na gha? ²²Yi fèʼtɨ̀ sɨ̂ àŋena na, jvâ Jodàn nɨ̀n læ meyn teyna ghelɨ Isìlæ̀ ɨ dyàŋ kɨ a ki jvà. ²³Bôbo Fɨyini Fifɨ nɨn teyn jvâ Jodàn ta ka nô zɨ ghɨ̀ jɨ̀m dyaŋ kɨ̀ nô a ki jvà. Wu n-ni kɨmɨ ighel ta wu n-læ nì jva ì baŋnɨ gwòsɨ̀, nô ta ka ghesɨ̀ dyaŋ. ²⁴Wu ni têyn ta ka nô mɨ ndà a mbzɨ na kya na Bôbo nɨn kelɨ àdyaʼ ma kɨ kfeynɨ meyn ɨ̀ na n-gvɨmlɨ Bôbo Fɨyini Fifɨ.”