Joshua 8

Ghelɨ Isìlæ̀ ɨ tɨm yɨ Ntèʼ Ây

¹Bôbo nɨn be meyn sɨ̂ Joshwà na, “Ka wa n-fàyn nô sakos. Li sugèyʼsɨ̀ nô sɨ̀ jɨ̀m yì koʼ ndù nù Ây. Mɨ n-gàmtɨ̀-à, a yì tɨm yɨ fòyn Ây nɨ̀ ghelɨ ŋweyn ɨ̀ fì lì ntèʼ àteyn. ²Yi n-kelɨ sɨ bebsɨ Ây nɨ̀ fòyn àŋena kɨ̀ ighel ta yì tî bèbsɨ Jèlikò nɨ̀ fòyn àŋena. Mɨtì ma yì kàʼ a yì li ɨfwo afu tèyn ta nyamsɨ mbòloʼ nɨ̀ njɨ̀sɨ̀. Yì baʼtɨ ɨ̀ gvɨ̀tɨ̀ fvɨ̀ kɨ̀ fvɨ a ntèʼ afu ɨ̀ zɨ̀tɨ̀ ìnû.”

³Bôbo nɨn tàŋi tî, Joshwà ɨ lù ŋêyn sugèyʼsɨ̀ kɨ sɨ̀ jɨ̀m sɨ ndù sɨ nu ntèʼ Ây. Wu n-chòʼtɨ sugèyʼsɨ tosɨ nɨ̀ ŋweyn nkam mɨ̀vɨm ɨ̀n tal ɨ tsɨynsɨ àŋena nɨ̀ntuʼ. ⁴Àŋena nɨn se sɨ lù, Joshwà ɨ bè sɨ̂ àŋena na, “Yì faytɨ yvɨ̀tɨ. Yi ndu bàʼsɨ a ntèʼ afu ɨ̀ lèytɨ̀ nà gvɨ̂tɨ̀ sɨ nù. ⁵Ghesɨ̀ ghelɨ̀ ghem nɨn jèl sɨ chem a ntèʼ Ây, a sugèyʼsɨ àŋenasɨ fvɨ sɨ kèʼ ghes ta sɨ tî fvɨ̀ sɨ asɨ, a ghèsɨ̀ kasi kɨ nɨ̀ ìnyɨŋ i, ⁶ɨ̀ lɨ̀sɨ àŋena a ghɨ nyɨŋ fvɨ̀ ntèʼ nâ zɨ̀, kfâʼ na ghès nɨn leʼ àŋena ta ghès tî lèʼ sɨ asɨ. Ghesɨ nî se sɨ nyɨŋ, ⁷yi fvɨ̀ sɨ alèʼ ghè a yì lèytɨ̀ ateyn ɨ lì ntèʼ àteyn. Bôbo Fɨyini Fifɨ nɨn gâmtɨ̀-à a yì tɨm yi ntèʼ àteyn. ⁸Yi tɨm yɨ ntèʼ àteyn, yi nyòʼ kɨ ighel ta Bôbo sɨ ghɨ ma wù bê meyn. Yì ni kɨ̀ ta mà bè.”

⁹Joshwà nɨn taŋi tî ɨ tsɨynsɨ sugèyʼsɨ ateyn nkam mɨ̀vɨm ɨ̀n tal àŋena ndu lèytɨ̀ baʼsɨ a ntèʼ Ây ighami nɨ̀ Betèl abàs ghè a ɨchfɨ̂-iyvɨ i nɨn sœ ateyn a Ây. Mɨtì Joshwà ŋêyn ghelɨ ŋweyn ɨ chi kɨ alèʼ ghè a àŋena nɨn bɨ̀ ateyn.

¹⁰Ɨtuʼ layn Joshwà ɨ yvɨ̀ŋtɨ̀ sugèyʼsɨ ŋweyn ŋêyn ghelɨ ghɨ tisɨnɨ a Isìlæ̀ ɨ nà jelɨ̀ ndû asɨ, koʼ ndû a ntèʼ Ây. ¹¹Sugèyʼ sɨ̀ jɨ̀m ta sɨ nà n-ghɨ ŋêyn Joshwà ɨ koʼ ndù ɨ baʼsɨ a ntèʼ Ây. Àŋena nɨn baʼsɨ a ntèʼ afu ɨ faytɨ àlêʼ a àŋena dzɨ abàs ikuè ɨ bɨ̀ àteyn, ma afoŋlɨ a gwosɨ meyn àlêʼ ateyn nɨ̀ ntèʼ Ây. ¹²À nà n-ghɨ tì ma Joshwà choʼtɨ meyn sugèyʼsɨ̀ sɨ koʼ ndû nkam sɨ̀ tâyn ɨ̀ tum sɨ ndû lèytɨ̀ abàs ighami nɨ̀ Betèl ŋêyn ntèʼ Ây abàs ghè a ɨchfɨ iyvɨ i nɨn sœ ateyn a Ây. ¹³Ghɨ lèm sugèyʼsɨ̀ sɨ nà gvɨ̂tɨ̀-à ɨchfɨ iwòŋ, ɨsîsɨ̀ a sɨ nà n-ghɨ alèʼ ghè a ghɨ bɨ̀ ateyn ɨ ghɨ dzɨ abàs ikuè, ɨsîsɨ̀ a sɨ lèytɨ̀ ɨ ghɨ dzɨ abàs ghè a ɨchfɨ-iyvɨ nɨn sœ ateyn a Ây. Joshwà ɨ kasi zɨ dzɨ afoŋlɨ nɨ̀ntuʼ achi nâ ghè.

¹⁴A nà sɨ ghɨ ta fòyn Ây yeyn sugèyʼsɨ Isìlæ̀, ŋêyn sugèyʼsɨ ŋweynsɨ ɨ ni nyàŋsɨ fvɨ kɨ nɨ̀ bɨsì bɨsì sɨ ndù sɨ kòynɨ nɨ̀ ɨ̀nseynsɨ injɨyn i Alabà sɨ nu àŋena afu. Mɨtì fòyn kya wi na sugèyʼsɨ dvɨnɨsɨ leytɨ meyn bàʼsɨ a ntèʼ. ¹⁵Joshwà ŋêyn sugèyʼsɨ Isìlæ̀sɨ̀ ɨ nà sɨ kem nì na àŋena nɨn leʼ leʼ, nyɨŋ ndû dzɨ a nse iyum. ¹⁶Fòyn ɨ jàŋtɨ̀ nô ghelɨ ghɨ̀ jɨ̀m na ghɨ fvɨ ɨ̀ nyɨ̀ŋ a àŋena ibam. Àŋena se sɨ nyɨŋ ibam nɨ̀ Joshwà tì ɨ fvɨ visi ntèʼ Ây. ¹⁷Nô ghelɨ ghɨ̀ jɨ̀m ɨ fvɨ̀ sɨ a ntèʼ Ây nɨ̀ Betèl ɨ nà nyɨŋ ibàm nɨ̀ ghelɨ Isìlæ̀. Àŋena nɨn se sɨ nyɨŋ tî ɨ fàŋ tɨ̀ kɨ̀ŋ ɨchfɨ mbàyn zɨ̀ a yì jɨ̀ŋ kàli ntèʼ Ây.

¹⁸Bôbo ɨ bè sɨ̂ Joshwà na, “Soʼ ntèʼ Ây nɨ̀ ìwoŋ ì zæ bòm ta mɨ nì-à a wà tɨm yɨ ntèʼ àteyn.” Joshwà ɨ sòʼ ntèʼ àteyn nɨ̀ ìwoŋ i ŋweyni. ¹⁹Joshwà ɨ nà sôʼ gvî kɨ tèyn, sugèyʼ sìsɨ̀ a sɨ nì lèytɨ̀ tî ɨ nyaŋsɨ fvɨ kɨ fvɨ ɨ zɨ a ntèʼ nâ ghè ɨ tɨm yɨ ntèʼ àteyn ɨ nyòʼ kɨ nyoʼ.

²⁰Sugèyʼsɨ Aysɨ̀ ɨ se sɨ kasi sɨ ki ntèʼ àŋena ɨ yeyn kɨ ta mbàʼ fɨ̀leʼ nɨn koʼ. Aleʼa nà bu ghɨ wi ta ka àŋena leʼ lèytɨ̀ ateyn bòm ta sugèyʼsɨ Isìlæ̀ sìsɨ̀ a sɨ nyɨŋ ndù dzɨ a nse iyum nɨn kasi meyn kèʼ àŋena. ²¹A nà sɨ ghɨ ta Joshwà ŋêyn ghelɨ Isìlæ̀ yèyn na sugèyʼ sìsɨ̀ a sɨ nì lèytɨ̀ tî li meyn ntèʼ àteyn, fì yèyn ta fɨleʼfɨ nɨn fvɨ koʼ a ntèʼ afu, àŋena bèynlɨ̀ ɨ kèʼ sugèyʼsɨ Ây. ²²Sugèyʼ sìsɨ̀ a sɨ nyoʼ ntèʼ àteyn tì ɨ boŋ fvɨ̀ ɨ kèʼ sugèyʼsɨ Ây sɨ nà sɨ ghɨ kɨ antêynɨ̀ àntêynɨ̀. Sugèyʼsɨ Isìlæ̀sɨ̀ ɨ zuetɨ àŋena nô wul ɨ̀mòʼ ɨ faŋ tɨ̀ leʼ. ²³Àŋena nɨn læ visi kɨ fòyn ɨ li ndù nɨ̀ ŋweyn sɨ̂ Joshwà.

²⁴À nà n-ghɨ ta sugèyʼsɨ Isìlæ̀sɨ zuètɨ mèsì ghelɨ Ây a nse ìyum afî a ghɨ nì gùf ndù nɨ̀ àŋena ateyn tì, àŋena ɨ kasi ndù a Ây ɨ zuetɨ mèsì ghelɨ ghì a ghɨ nà n-bu ghɨ a ntèʼ afu. ²⁵Ghelɨ Ây nɨn chɨ̀yntɨ kfɨtɨ achi nâ ghè nkam njvàsɨ̀ bò, ghɨ̀lûmnɨ̀ nɨ̀ ghɨ̀ki. ²⁶Joshwà nɨn bu læ suʼsɨ iwoŋ zɨ̀ a wu n-soʼ ntèʼ Ây ateyn nô sɨ chem ta ka ghɨ zuetɨ mèsì ghelɨ ateyn. ²⁷Ghelɨ Isìlæ̀ ɨ lì nyamsɨ nɨ̀ ɨfwo vzɨ̀ a wu n-faŋ a ntèʼ Ây kɨ ighel ta Bôbo nɨ̂n bè sɨ̂ Joshwà.

²⁸Sugèyʼsɨ Isìlæ̀sɨ nɨn nyoʼ meyn ɨ bebsɨ ntèʼ Ây nô ì jɨ̀m yi faŋ kɨ sɨ a alèʼ a maʼinɨ-a sɨ koʼ sɨ chem layn. ²⁹Joshwà nɨn bè ghɨ zue fòyn Ây ɨ ghaŋsɨ ìgvɨyn i ŋweyn a fɨ̂kàʼ ɨ visi kɨ afu sɨ chem aleŋ ɨlvɨ ikfa. A ni nà ghɨ a mbol àbè wu bè na ghɨ suʼsɨ igvɨyn ateyn ɨ̀ màʼ ɨchfɨ mbàyn afî a yi nà n-zɨ a ntèʼ ɨ̀ bàʼtɨ ngòʼsɨ̀ atu àteyn. Ikuʼ i ngòʼsɨ ateyn i bu ghɨ kɨ afu sɨ koʼ sɨ chem layn.

Joshwà ɨ bètɨ̀ mɨ̀kâyn mɨ̀ Bôbo sɨ̂ ghelɨ Isìlæ̀ a kfɨ̂yn Ebàl

³⁰À n-læ meyn nà ghɨ achi a li-a, Joshwà ŋêyn ghelɨ ŋweyn ɨ bàʼlɨ̀ àbaŋ ifu sɨ̂ Bôbo Fiyini Fɨ Isìlæ̀ a kfɨyn Ebàl. ³¹Àŋena nɨn bàʼlɨ kɨ ighel ta Mosìs ɨ wùl ɨ̀ fèlɨnɨ nɨ̀ Bôbo nà n-sɨ ghɨ ma wu be meyn sɨ̂ ghelɨ Isìlæ̀. Ŋwàʼlɨ̀ ìsaʼ nɨ̀ Mosìs nɨ̀n bè na, “Ghɨ n-kelɨ sɨ bàʼlɨ abàŋ ifu nɨ̀ ngòʼsɨ bula ghɨ chuyn, bula ghɨ kûm nɨ̀ àfo àkasa.” Àŋena bàʼlɨ tì ɨ fu tɨfu tɨ nyoʼnɨtɨ nɨ̀ tɨ̀futɨ sɨ nà chî nɨ̀ mbôynɨ̀ sɨ̂ Bôbo Fɨyini. ³²Joshwà nɨn nyàʼ tɨsaʼ tɨ Mosìs atû ngòʼ kɨ̀ nô asɨ nɨ̀ ghelɨ Isìlæ̀ a kfɨyn afu. ³³Nô ghelɨ Isìlæ̀ ghɨ̀ jɨ̀m sɨ ibzɨ nɨ̀ ɨghî a ghɨ gvì gvi a Isìlæ̀ nɨ̀ chyeʼsɨ nɨ̀ ghelɨ ghɨ tisɨnɨ nɨ̀ ghelɨ ghɨ saʼnɨ ɨ timi inôyn ì bò ɨ kèʼnɨ̀ àntayntayn a mɨ̂kàyn nɨ̀ Bôbo, asɨ nɨ̀ ngàŋsɨ ndo Fɨyini sisɨ̀ a sɨ n-fvɨ̀ ɨntweŋ ndo nɨ̀ Levì, ma sɨ beʼi meyn àntayntayn a mɨ̂kàyn nɨ̀ Bôbo. Anôyn a li-a nà n-ghɨ ma kɨ tìmi a ngùŋ kfɨyn Gelizìm, a li-a timi a ngùŋ kfɨ̀yn Ebàl kɨ̀ ighel ta Mosìs nà n-ghɨ ma wù n-be meyn nô sɨ asɨ nɨ̀ Joshwà na ŋêyn ngàŋ sɨ ndo Fɨyinisɨ̀ nɨn kelɨ sɨ boysɨ ghelɨ Isìlæ̀. ³⁴Joshwà ɨ jàŋ tɨ̀saʼ tɨ ateyn nô tɨ̀ jɨ̀m, ma à ti tɨboysɨ nɨ̀ ndòyn sîsɨ̀ a sɨ n-ghɨ ateyn kɨ̀ ighel ta Mosìs nɨn læ nyàʼ. ³⁵Joshwà nɨn jàŋ kɨ tɨsaʼ tɨ̀ jɨ̀m ɨ faŋ tɨ̀ vìsi nô ìmòʼ ta Mosìs nɨn læ fu sɨ̂ ghelɨ Isìlæ̀. Ghɨ̀ki nɨ̀ woynda baʼsɨ̂ nɨ̀ ghelɨ ghɨ gvinɨ nà n-ghɨ ateyn.