Judges 11

¹Wùl ɨ̀ Gilèd ɨlvɨ̀ nɨn læ meyn nà ghɨ izɨyn i ŋweyni ɨ ghɨ Jeftà, a ghɨ nô sugèyʼ i bemnɨ. Ghɨ nà n-toŋtɨ̂ bò ŋweyn na Gilèd, nà ŋweyn ɨ ghɨ wul ɨ wi ɨ̀ jelɨnɨ. ²Gilèd nà n-kelɨ kɨmɨ woyn ghɨ lûmnɨ̀ ghɨ li ŋêyn wi ŋweyn. Woyn wî Gilèd nâ ghì ɨ læ lema ɨ jùm Jeftà ɨ bè sɨ̂ ŋweyn na, “Bò wes læ̀ kfɨ-a, a wà faŋ tɨ̀ kèli nô àfo a ŋweyn àmòʼ bòm ta wà n-ghɨ wayn ma ghɨ n-læ bzɨ vâ salû.” ³Jeftà ɨ leʼ ɨ visi woyn bò ŋweyn ɨ ndu nà chî ilaʼ i Tôb, nchînɨ̀ ŋweyn ɨ nì, ghelɨ nchînɨ̀sɨ tosɨ ghɨ li gvi koli ŋweyn, ŋêyn àŋena nà jelɨ̀ môm àwo a bɨ-a.

⁴A læ nà ghɨ achi a li-a, ghelɨ Amòn ɨ gvì sɨ nu ghelɨ Isìlæ̀, ⁵chyeʼsɨ Gilèdsɨ̀ ɨ ndù ilaʼ i Tôb sɨ li Jeftà, ⁶ɨ kæ be sɨ̂ ŋweyn na, “Gvi wa ghɨ àtu a sugèyʼsɨ̀ sɨ̂ ghès ta ka ghesɨ̀nà keli sɨ nu ghelɨ Amòn.”

⁷Jeftà ɨ bè sɨ̂ àŋena na, “Yì tî nà bâyn mà, ɨ̀ jùm mà sɨ abe nɨ̀ bò wom. Ngeʼ gvî lvɨ̂yn yi na gvì sɨ li ma bòm ghà?”

⁸Chyeʼsɨ Gilèd nâ sìsɨ̀ ɨ bè sɨ̂ ŋweyn na, “Ghèsɨ̀ gvì sɨ li vâ lvɨ̂yn na ghesɨ̀nà ndu nù ghelɨ Amòn. Wà kæ chem asɨ, ghesɨna tɨm yɨ̀ ghelɨ Amòn, a ghèsɨ̀ lem vâ a wà na saʼ Gilèd nô ì jɨ̀m.”

⁹Jeftà ɨ bɨf sɨ̂ àŋena na, “Mà ti kæ kasi ndù lvɨ̂yn Fɨyini fɨ gâmtɨ̀ ma tɨm yɨ ghelɨ Amòn, a yì visi kɨ̀ nô na mà na saʼ zɨ̀ a?”

¹⁰Chyeʼsɨ Gilèdsɨ̀ ɨ bè na, “Bôbo Fɨyini nɨn ghɨ nchwò nsaʼ sɨ iwo nâ ghàyn a ghèsɨ̀ bè. Ghès kàʼ ghɨ bû faŋ tɨ̀ ni kɨ ta ghèsɨ̀ bè.”

¹¹Jeftà ɨ kæ kasi sɨ kfa ŋêyn chyeʼsɨ Gilèd nâ sìsɨ̀, ghɨ lèm ŋweyn sɨ a wûl ɨ saʼnɨ, wu nà fî ghɨ kɨmɨ àtu a sugèyʼsɨ̀. Jeftà ɨ timi asɨ nɨ̀ Bôbo a ntèʼ Mizbà ɨ fi kùmtɨ kɨ awo kì nô à jɨ̀m a wù nì bè sɨ̂ chyeʼsɨ a Tôb.

¹²Jeftà ɨ taŋi tì ɨ kæ tum ghelɨ na ghɨ ndu bɨ̀f sɨ̂ fòyn Amòn na, “Ghèsɨ̀ bèbsɨ ghà sɨ̂ zɨ̀ na yì na nù ghès a?”

¹³Fòyn Amòn ɨ bèynsɨ̀ ɨ bè sɨ̂ ghelɨ ntum nɨ̀ Jeftà nâ ghì na, “Ghelɨ Isìlæ̀ nɨ̀n læ fvɨ̀ a Ijìb ɨ gvi lì nse yem kɨ̀ sɨ zɨ̀tɨ̀ a jvâ Alnòn sɨ ndù sɨ chem a jvâ Jabòk sɨ fì sɨ kàlì sɨ chem a jvâ Jodàn. Yì kasi fù nse nâ zɨ̀ kɨ a bol a bol.”

¹⁴Jeftà ɨ fi kasi tum ghelɨ ntum nâ ghì sɨ̂ fòyn Amòn, ¹⁵àŋena ndu bè na, “Jeftà bè na ghelɨ Isìlæ nɨn bu læ lì nsê ghelɨ Mowàb kèsa nse ghelɨ Amòn. ¹⁶A nà n-ghɨ ta àŋena fvɨ̀ sɨ a Ijìb, àŋena jèl ɨ toynɨ a nse iyum ɨ dyaŋ jvâ ì baŋnɨ ɨ kæ chem a Kadèsh. ¹⁷A nà ghɨ ta àŋena ndù chèm a Kadèsh ɨ tum ghelɨ ntum sɨ̂ fòyn Edòm na ghɨ ndu bè sɨ̂ ŋweyn na, ‘Visi ghèsɨ̀ toynɨ a wa ilaʼ,’ mɨtì wu tuynsɨ. Àŋena fi tum kɨmɨ ntum nâ zɨ̀ sɨ̂ fòyn Mowàb, wu fi tuynsɨ kɨ tuynsɨ. Ghelɨ Isìlæ̀ ɨ kæ faŋ kɨ a Kadèsh. ¹⁸Àŋena nɨ̂n lù afu ɨ jèl ɨ toynɨ a nse ìyum ɨ leʼ sɨ chwò a Edòm nɨ̀ Mowàb, ɨ bòlɨ chwo kɨ ighami a Mowàb dzɨ abàs ghè a ɨchfɨ̂ iyvɨ i nɨn sal ateyn ɨ ndu bɨ̀ injɨyn i jvâ Alnòn. Àŋena nɨn bu læ zɨ a Mowàb bòm ta ighami nà n-ghɨ a jvâ Alnòn. ¹⁹A nà ghɨ ta àŋena bu ghɨ kɨ injɨyn i jvâ Alnòn ɨ kæ tum ghelɨ ntum sɨ̂ Sihòn ɨ fòyn Amò vzɨ̀ a wu nà n-saʼ a Heshbòn ɨ bè sɨ̂ ŋweyn na, ‘Ghès nɨn chwotɨ̂ na wà visi ghès toynɨ a wa ilaʼ ɨ̀ ndù a ghès ilaʼ.’ ²⁰Sihòn nɨ̀n bu læ nà bɨmî na ghelɨ Isìlæ̀ kàʼ a ghɨ chwo a ŋweyn ilaʼ bula ghɨ nî ngeʼ, ɨ yvɨ̀ŋtɨ̀ sugèyʼsɨ ŋweyn ɨ lèm a ntèʼ Jahàz, sɨ nu ghelɨ Isìlæ̀.”

²¹“Bôbo Fɨyini ɨ Fɨyini fɨ ghelɨ Isìlæ̀ fɨ̀ ɨ fu adyaʼ àŋena tɨm yɨ fòyn Sihòn ŋêyn sugèyʼsɨ ŋweynsɨ nô sɨ̀ jɨ̀m. Ghelɨ Isìlæ̀ ɨ lì nse zɨ̀ a ghelɨ Amò nà n-chi ateyn ilaʼ nâ ghàyn nô ì jɨ̀m ɨ nà kelɨ-a. ²²Àŋena nɨn læ fsɨ nse àteyn kɨ ì jɨ̀m kɨ̀ sɨ zɨ̀tɨ kɨ a jvâ Alnòn sɨ ndù sɨ chem a Jabòk fî zɨ̂tɨ̀ a nse iyum ndû chem a jvâ Jodàn.

²³“Lvɨ̂yn ta à n-læ sàŋ Bôbo Fɨyini, ɨ Fɨyini fɨ ghelɨ Isìlæ̀ ɨ saŋ ghelɨ Amò ɨ fu nsê àŋena sɨ̂ ghelɨ Isìlæ̀, wà n-kelɨ àdyaʼ à kà sɨ kasi sɨ sfɨ a? ²⁴Yì li læ̂ nse zɨ̀ a Chemòs ɨ fɨyini fifɨ fù sɨ̂ zɨ̀, ghèsɨ̀ li nse zɨ̀ a Bôbo Fɨyini ɨ Fɨyini feyfɨ fù sɨ̂ ghès. ²⁵Wà n-chwô wì Balàk ɨ wâyn Zibò ma à ti fòyn Mowàb. Wu n-bu læ sèʼ inû sɨ̂ ghelɨ Isìlæ̀ nô achi àmòʼ ɨ faŋ tɨ̀ yòlɨ ŋêyn àŋena. ²⁶Ghelɨ Isìlæ̀ chi meyn a ntèʼ Heshbòn nɨ̀ ntèʼ Alowà nɨ̀ ntèʼ sɨ li sìsɨ̀ a sɨ jɨ̀ŋ kàli ntèʼ Alnòn sɨ a bèŋsɨ̀ ighɨ ì tal. Àŋena nà n-chi-à, yi ghal fsɨ wi ɨlwêʼ nâ wèyn bòm ghà? ²⁷Ma bû nì bèbsɨ ìwo sɨ̂ và, à kwo bèbsɨ và iwo nà nû mà. Bôbo Fɨyini ma à ti saʼ à nchɨl, nɨn saʼ ghelɨ Isìlæ̀ ŋêyn ghelɨ Amòn ɨ̀ dyèyn na à n-ghɨ nda àtì-ati a.” ²⁸Ghɨ nà n-taŋî mɨtì, fòyn Amòn ɨ yvɨtɨ̂ wì iwo zɨ̀ a Jeftà tum na ghɨ laʼi sɨ̂ ŋweyn.

²⁹Ayvɨs a Bôbo Fɨyini à ɨ kæ fu adyaʼ sɨ̂ Jeftà na wù jel ɨ̀ tòynɨ ilaʼ i Gilèd ɨ̀ fì tòynɨ a ntèʼ ghè a ghelɨ Mànasè nà n-chi ateyn, ɨ toynɨ kɨ̀mɨ a ntèʼ Misbà a Gilèd, ɨ lù sɨ afu ɨ ndu nù ghelɨ Amòn. ³⁰Jeftà ɨ lèm ìchfɨ̂nɨ̀ sɨ̂ Bôbo Fɨyini ɨ bè na, “Wà kæ nì ma tɨm yɨ̀ ghelɨ Amòn, ³¹ɨ̀ kàsi se sɨ kfa, à fvɨ̂ nô mɨ ndà a ma ndo sɨ asɨ sɨ toŋtɨ ma ta mà seʼ tɨm yɨ, a à na kelɨ Fɨyini wul àteyn, a mà sɨ ŋweyn ɨ̀ fù sɨ ifu i nyoʼnɨ-i sɨ̂ Bôbo.”

³²Jeftà nɨ̂n tàŋi tî ɨ lù ɨ ndù sɨ nu ghelɨ Amòn, Bôbo Fɨyini ɨ gàmtɨ̀ wu tɨm yɨ àŋena. ³³Wù n-læ meyn bebsɨ ntèʼsɨ mɨ̀vɨm ɨ̀m bò kɨ̀ sɨ zɨ̀tɨ̀ a ntèʼ Alowà sɨ ndù sɨ chem abàs a ntèʼ Minìt sɨ fì sɨ ndù sɨ chem a Abel Kelamìm. À ti ta ghelɨ Isìlæ̀ nɨn læ tɨm yɨ ghelɨ Amòn, iwo i nà bu ghɨ wi a àŋena ɨchfɨ̀.

³⁴Jeftà nɨ̀n læ kasi kfa ɨ nà zɨ̂ gvî kɨ a ŋweyn abe a Mizbà tèyn, a fvɨ gvi kɨ wâyn ŋweyn ɨ wi sɨ toŋtɨ ŋweyn, buʼ nchùm cheŋà! Jeftà nà n-kelɨ kɨ wayn nâ wèyn ɨ̀mòʼ. ³⁵A nà ghɨ ta wù yèyn ta wayn ŋweyn nɨn fvɨ̂ gvî sɨ toŋtɨ ŋweyn tì, wu bàs ndzɨsɨ ŋweyn ɨ dzɨ̀ ɨ bè na, “Wâyn wom, wà mòm ghà sɨ̂ mà teyn a? Wà kolɨ meyn ɨ̀kœ wom. Ma chfɨnɨ meyn ìwo sɨ̂ Bôbo ma mà kàʼ bû kfɨ̀nɨ.”

³⁶Wayn ŋweyn ɨ bè na, “Bò wom, à sɨ ghɨ ìwo ma wà chfɨnɨ meyn sɨ̂ Bôbo Fɨyini. Ni kɨ ta wà chfɨ̀nɨ̀ bòm ta Bôbo Fɨyini sɨsɨ meyn ìwo zɨ̀ a mbàynɨ̀ shyasɨ ma à ti ghelɨ Amòn nì sɨ̂ và. ³⁷Mɨ n-chwotɨ̂ kɨ nà wà ni iwo ìmòʼ sɨ̂ mà. Visi mà koʼ ɨ̀ jèl ɨ̀ dzɨ̀ a kfɨynsɨ ghesɨ̀ ghelɨ ijèl nɨ̀ mà sɨ a njoŋ sɨ̀ bò bòm ta mɨ n-kfɨ-a tɨ̀ màla.”

³⁸Jeftà ɨ bɨmi ɨ bè sɨ̂ ŋweyn na, “Ndù a.” Wu ndù ɨ yeyn ghelɨ ijèl nɨ̀ ŋweyn, ŋêyn àŋena ɨ koʼ ɨ jèl ɨ dzɨ̀ a kfɨynsɨ sɨ a njoŋsɨ̀ bò bòm ta wu nà n-ghɨ sɨ kfɨ tɨ̀ màla. ³⁹Njoŋ nâ sìsɨ̀ sɨ̀ bò ɨ chwò, wu kasi ndù. Bò ŋweyn ɨ ni kɨ ta wù tî chfɨ̀nɨ̀. À nà n-ghɨ tì wu kya wi wùl ɨ lûmnɨ̀.

Iwo nâ zɨ̀ ɨ kasi sɨ a nchînɨ̀ ìlàʼ nɨ̀ ghelɨ Isìlæ̀ na ⁴⁰ngòynsɨ Isìlæ̀sɨ̀ na fvɨ̀ nô mɨ a bêŋ ì kà sɨ jèl ɨ dzɨ̀ a kfɨynsɨ sɨ a mɨchi ɨ̀n kæ̀ sɨ kfàʼtɨ wâyn Jeftà ɨ wul ɨ̀ Gilèd nâ vzɨ̀.