Judges 17

Mikà ɨ faytɨ ànfyèʼsɨ̀

¹Wùl ɨ̀ lvɨ̀ nɨn læ meyn nà ghɨ ilaʼ i kfɨynsɨ a Eflèm izɨyn i ŋweyni ɨ ghɨ Mikà. ²A læ nà ghɨ achi a li-a, wu bè sɨ̂ nà ŋweyn na, “Mɨ n-læ meyn yvɨ ta wà tè wul vzɨ̀ a wù choŋ aso ɨkwo a fɨfâ nɨ̀ và kì kɨ chem ndû kilùsɨ̀ njvàsɨ̀ tal tì. À n-læ lì ma. Kɨ bu ghɨ sɨ̂ mà.”

Na ŋweyn ɨ bè sɨ ŋweyn na, “Bôbo Fɨyini nɨn boysɨ vâ a wâyn wom.”

³A nà ghɨ ta Mikà kàsi fu aso ɨkwo ateyn sɨ nà ŋweyn, wu bè na, “Mɨ n-fu àso ɨ̀kwo nɨ̀ mà kêyn sɨ̂ Bôbo Fɨyini kɨ nɨ̀ àtem à kema à jɨ̀mà sɨ lìsi ndi sɨ atu nɨ̀ wâyn wom. Kasi kù a, wayn wom. Wa n-faytɨ̂ ànfèʼsɨ̀ ɨ̀ lom nɨ̀ àso ɨkwo nâ kèynà.”

⁴Mikà nɨ̀n læ meyn kàsi fu aso ɨkwo nâ kì sɨ̂ nà ŋweyn. Nà ŋweyn ɨ choʼ a li-a kɨ chwô kilù sɨ̀ bò ɨ fu sɨ̂ bò àlàm na wù faytɨ ànfèʼsɨ̀ ateyn ɨ̀ lom nɨ̀ àso ɨkwo a fɨfâ nâ kì, ghɨ lem a ndo nɨ̀ Mikà.

⁵Mikà nà n-kelɨ àlêʼ a jemnɨ-a a ŋweyn a ndo ma wù faytɨ meyn ɨ̀nfyèʼsɨ̀ ɨ̀ lèm ateyn, ɨ̀ tas awaf sɨ̂ wâyn ŋweyn ɨ̀ lèm ŋweyn sɨ a ngàŋ a ndô mɨyini nɨ̀ ŋweyn nâ ghè. ⁶A n-læ nà ghɨ ɨtuʼ nâ ghè, ghelɨ Isìlæ̀ ɨ kelɨ wi fòyn, nô mɨ ndà ɨ nî kɨ ìwo zɨ̀ a wù n-kôŋ.

⁷A læ nà ghɨ achi a li-a, wayndà ɨ̂kuŋ ɨ̂lvɨ̀, a ghɨ wul ɨ̀ ndo nɨ̀ Levì chî a Betɨ̀làhêm ilaʼ i Judà, ⁸ɨ lù sɨ a Betɨ̀làhêm ɨ nà jelɨ̀ kɨŋ àlêʼ a kɨlu-à sɨ nà chi ateyn, ɨ jèl kɨ têyn ɨ ndu zɨ a ndo nɨ̀ Mikà, ilaʼ i kfɨynsɨ a Eflèm.

⁹Mikà ɨ bɨf sɨ̂ wùl ateyn na wù lù wo a.

Wu bè na, “Mɨ n-ghɨ wul isas i ndo nɨ̀ levì ma mà lù a Betɨ̀làhêm ilaʼ i Judà. Mɨ n-jelɨ̀ kɨŋ àlêʼ sɨ nà chi ateyn.”

¹⁰Mikà ɨ bè sɨ̂ ŋweyn na, “Dùʼi afêyn ghesɨ̀và na chi-à, wa ghɨ ta bò wom fî ghɨ ngàŋ ndô fɨyini sɨ̂ mà. Mà nà fu àso ɨkwo a fɨfâ sɨ̂ và a bêŋ kɨ chem ndû àbeʼ a kilù fî fu ndzɨsɨ sɨ̂ và baʼsɨ̂ nɨ̀ ɨ̀fwo ɨ yɨnɨ.” ¹¹Wul ɨ̀ ndo nɨ̀ Levì nâ vzɨ̀ ɨ bɨmi sɨ nà chi ŋêyn Mikà, ɨ nâ sɨ ghɨ kɨ ta wâyn ŋweyn ɨ lûmnɨ̀ ɨ̂lvɨ̀. ¹²Mikà ɨ lèm wayndà ɨ̀kùŋ nâ wèyn sɨ a ngàŋ ndô fɨyini nɨ̀ ŋweyn, wu nà chî kɨ a ŋweyn a ndo. ¹³Mikà ɨ kæ bè na, “Mɨ n-kya samoʼ na Bôbo Fɨyini nɨn dyèyn àtem a juŋà sɨ̂ mà lvɨ̂yn bòm ta wùl ɨ̀ ndo nɨ̀ Levì wèyn sɨ ghɨ ngàŋ ndô fɨyini nɨ̀ mà.”