Judges 19

Wùl ɨ̀ ndo nɨ̀ Levì ŋêyn wi ìbam nɨ̀ ŋweyn

¹À n-læ nà ghɨ ɨtuʼ nâ ghè, ghelɨ Isìlæ̀ ɨ kelɨ wi fòyn.

Wùl ɨ̀ ndo nì Levì ɨ̀ lvɨ̀, wu chî alèʼ ɨtwaʼ a li-a ilaʼ i kfɨynsɨ a Eflèm ɨ nà lêm wul ɨ wi ɨ̀ lvɨ̀ ma wù lù a ntèʼ Betɨ̀lèhêm a Judà. ²Wu n-lì tî wùl ɨ wi nâ vzɨ̀ ɨ chitɨ kɨ têyn ŋêyn lûm ŋweyn ɨ nà sɨ befa ta wù n-jelɨ̀. Wu kasi ndù sɨ a àŋena abe a Betɨ̀lèhêm a Judà. Wu n-dù tî, a nà ghɨ ibàm i njoŋ sɨ̀ kæ̀, ³lûm ŋweyn ɨ kɨŋ ndù nɨ̀ ŋweyn sɨ chwotɨ na wù kasi gvì, ɨ se sɨ ndu tî ɨ lì wul ɨ̀ fèlɨnɨ nɨ̀ ŋweyn baʼsɨ̂ nɨ̀ njàkâysɨ̀ sɨ̀ bò. Wù n-jelɨ meyn ɨ nà zɨ̂ ndû kɨ tèyn, wî ŋweyn ɨ lì ɨ zɨ nɨ̀ ŋweyn a ndo nɨ̀ bò ŋweyn. Bò ŋweyn ɨ fsisɨ ŋweyn kɨ̀ nô a jûŋ, ⁴ɨ ghaytɨ ŋweyn na wù chitɨ. Wu chi mɨchi ɨ̀n tal, yɨ-a fî nyvɨ-a.

⁵A se sɨ nà ghɨ a mɨchi ɨ̀n kæ̀ àŋena bɨs làlì wu nà sɨ baʼtɨ̂ ɨ̀fwo na ŋêyn wî ŋweyn lu, bo wi nɨ̀ ŋweyn ɨ bè nà, “Yɨ afo jæ na wà lu.” ⁶Àŋena dùʼì ɨ yɨ. Bò wi nɨ̀ ŋweyn ɨ fi be kɨ sɨ̂ ŋweyn na, “Yi n-jôf na wà fî chi ta ka wà faytɨ yɨ ɨwuyn vâ.” ⁷Wùl ɨ̀ ndo nɨ̀ Levì nâ vzɨ̀ ɨ làli kɨ lali ɨ nà sɨ kɨŋ sɨ lù. Bò wi nɨ̀ ŋweyn ɨ fi be kɨ na wù chi. Wu fi chi achi nâ ghè. ⁸Ɨtuʼ ɨ layn, na à na sɨ ghɨ mɨchi ɨ̀n tâyn, wu nà sɨ kɨŋ sɨ lù. Bò wi nɨ̀ ŋweyn ɨ fi be kɨ na, “Dùʼi yɨ afo ɨ ni lù a mbol àbè.” Àŋena fi dùʼì ɨ yɨ.

⁹A nà ghɨ ta wù làlì sɨ lu ŋêyn wî ŋweyn nɨ̀ wùl ɨ̀ felɨnɨ nɨ̀ ŋweyn, bò wi nɨ̀ ŋweyn ɨ bè na, “Ɨtuʼ sɨ jɨ gvì-à, yì chi ɨ̀ yɨ ɨwuyn ɨ̀vzɨ ɨ̀ læ̀ bɨsɨ lù a libɨs ɨ̀ nà kfâ.” ¹⁰Mɨtì wùl ɨ̀ ndo nɨ̀ Levì nâ vzɨ̀ ɨ na bu fì kôŋ wì sɨ chi. Ŋêyn wî ŋweyn ɨ kul ɨfwo atû njàkâysɨ̀ afî sɨ̀ bo ɨ lù ɨ ndù dzɨ a Jebùs, ma à ti dzɨ a Jèlusalèm.

¹¹Àŋena ni jèlɨ kɨ têyn ɨ ndu chem a Jebùs ma à sɨ ghɨ aleŋ ɨlvɨ ikfa, wùl ɨ̀ felɨnɨ nɨ̀ ŋweyn ɨ bè sɨ̂ ŋweyn na, “Yi n-jofɨ̀ na ghesɨ̀nà chi a ntèʼ nɨ̀ ghelɨ Jebùs afêyn.”

¹²Bò ìfel nɨ̀ ŋweyn ɨ tuynsɨ ɨ bè na, “Ɨ̀ngaŋ, ghesɨ̀nà nɨn chi wì a ntèʼ nɨ̀ ghelɨ ɨtum. Ntèʼ nâ yèyn nɨ̀n ghɨ wi ntèʼ Isìlæ̀. Ghesɨ̀nà chwo ndù chi a Gibìyà.” ¹³Wu n-bè tî ɨ fi kfeynsɨ na, “Ghesɨ̀nà momsɨ jèl ndù chi a Gibìyà kèsa ndù chi a Lamà.” ¹⁴Àŋena chwò ɨ nà sɨ jelɨ̀ ndû kɨ ndu ɨ ni nà sɨ baʼsɨ̂ ndû a Gibìyà a Benjamìn ma ɨchfɨ iyvɨ i sɨ sœ̂ ndu à. ¹⁵Àŋena bɨ̀ sɨ chi a ntèʼ nâ ghàyn ɨ ndu dùʼì ayisi, mɨtì wùl ɨ faŋ tɨ̀ li àŋena na ghɨ ndu chi a ŋweyn a ndo.

¹⁶Wul ɨ̀lwema ɨ̀ lvɨ̀ ɨ ni kasi nà kfâ gvî a gvêyn aleŋ ɨlvɨ ikfa, a ghɨ wul ìlaʼ i kfɨynsɨ a Eflèm, mɨtì chî a Gibìyà alèʼ ghè a ghelɨ Benjamìn nà n-chi ateyn, ¹⁷ɨ yeyn wul ɨ̀ gvinɨ̀ wu duʼ ayisi ɨ bɨf sɨ̂ ŋweyn na, “Wà lù wo nà ndû wo?”

¹⁸Wùl àteyn ɨ bè na, “Ghèsɨ̀ lù a Betɨ̀lèhêm ilaʼ i Judà ɨ̀ nà kfâ ndû alèʼ ɨtwaʼ a li-a ilaʼ i kfɨynsɨ a Eflèm. Ghèsɨ̀ tî ndù chèm a Betɨ̀lèhêm a Judà ɨ̀ nà sɨ kasî kfâ ndû a ndo nɨ̀ Bôbo Fɨyini. Ghèsɨ duʼi meyn afêyn mɨtì wùl bû lì ghès na ghesɨ̀ kfa chi ghesɨ̀ àŋena. ¹⁹Ghès nɨn kelɨ ɨ̀fwo ɨ yɨnɨ sɨ̂ njàkâs seysɨ, fî kelɨ ɨ̀fwo ɨ yɨnɨ nɨ̀ mɨ̀lûʼ ta ghesɨ̀ wùl ɨ wi nɨ̀ mà nɨ̀ wayndà ɨkùŋ wêyn kàʼ a ghɨ yɨ. Ghès nɨn wo wi afo.”

²⁰Wùl ɨlwema nâ wèyn ɨ bè na, “Yì gvi ghesɨ̀nà kfa chi. Mɨ n-fu nô mɨ ghà sɨ̂ zɨ̀ ta yi n-kɨŋ. Ka yi n-chi ayisi afêyn.” ²¹Wu n-tàŋi tî ɨ kæ lì sɨ zɨ nɨ̀ àŋena a ŋweyn a ndo sɨ fu ɨfwo ɨ yɨnɨ sɨ̂ njàkâs sɨ àŋenasɨ. Àŋena ni sù ɨ̀vɨ àŋena, wu fu afo àŋena yɨ.

²²Ghelɨ nâ ghèyn ɨ ni nà sɨ duʼ a ndo saŋlɨ-à. Ghelɨ ghɨ bɨ ghɨ li ɨ fvɨ̀ a ntèʼ nâ ghè ɨ gvi jɨŋ kali ndo ɨ nà kfɨ̂yn ɨ̀chfɨ ndo nô sɨ a ŋaŋ byaytɨ̂ bê sɨ̂ wùl ɨlwema nâ vzɨ̀ na, “Fvɨ̀sɨ gvi nɨ̀ wùl vzɨ̀ a wù zɨ a wa ndo tì ghèsɨ̀ chi nɨ̀ ŋweyn.”

²³Bò ndo nâ vzɨ̀ ɨ fvɨ̀ ɨ be sɨ̂ àŋena na, “Ɨ̀ngaŋ a woynà ghem. Ka yi n-mòm ìnkì iwo nâ yèynì sɨ̂ ŋweyn. À n-ghɨ wul ɨ̀ gvinɨ nɨ̀ mà. Ka yi n-mòm ìnkì iwo i wuminɨ-i nâ yèynì. ²⁴Wâyn wi nɨ̀ mà nɨn ghɨ afêyn bu duʼ tɨ nà kya wùl ɨ lûmnɨ̀, wî wùl nâ wèyn ɨ ghɨ kɨmɨ afêyn. Mɨ n-fvɨ̀sɨ̀ àŋena fu a yì ni nô mɨ ghà ta yi n-kôŋ sɨ ni nɨ̀ àŋena. Mɨtì ka yi n-mòm ìwo i wuminɨ-i yeynì sɨ̂ wùl nâ wèyn.”

²⁵Mɨtì ghelɨ ghɨ bɨ nâ ghì ɨ teyn na ghɨ n-yvɨ wi iwo zɨ̀ a wù bè. Mɨtì wùl ɨ̀ ndo nɨ̀ Levì nâ vzɨ̀ ɨ lì wî ŋweyn ɨ fu fvɨsɨ̀ sɨ̂ àŋena abe, àŋena ni chi kɨ nɨ̀ ŋweyn sɨ adyaʼ têyn ɨtuʼ ni layn, àŋena kæ visi. ²⁶A ni nà ghɨ a n-layn ɨ̀tùʼ, wùl ɨ wi àteyn ɨ kasi nà zɨ̂ ndû a ndo ghè a lûm ŋweyn nà n-ghɨ ateyn ɨ se sɨ zɨ ɨ fe kɨ ɨchfɨ ndo, ɨchfɨ̂-iyvɨ ɨ ni sal wu bu nyɨŋ kɨ afu.

²⁷Lum ŋweyn ɨ ni bɨs làlì ɨ dzɨ̀sì ɨ̀chfɨ ndo ɨ nà sɨ fvɨ̀ sɨ lù ɨ yeyn wî ŋweyn ta wù fe ɨchfɨ ndo, ɨwu ŋweyn ɨ ghɨ ɨchfɨ awùf. ²⁸Wu bè sɨ̂ ŋweyn na “Làli ghɨ lu.” Mɨtì wu faŋ tɨ̀ bè iwo. Wul àteyn ɨ chàʼsɨ̀ wul ɨ wi àteyn ɨ koʼsɨ atû njàkâs ɨ lù ɨ nà kfâ.

²⁹Wu kfa zɨ ɨ lì fɨ̀nyuè ɨ teyntɨ ìgvɨyn i wul ɨ wi nɨ̀ ŋweyn ɨbyâs njvàsɨ̀ bò ɨ tum kɨ ɨlwêʼ ɨ̀ jɨ̀m a Isìlæ̀. ³⁰Nô mɨ ndà nà n-yeyn ìwo nâ yèynì wu be kɨ na, “Ghɨ bû tìmî yeyn ìnkì iwo tèyn. Wùl bû tìmi mòm ìnkì iwo nâ yèyni nô sɨ ɨtuʼ ta ghelɨ Isìlæ̀ nɨn læ fvɨ̀ sɨ a Ijìb. Yi n-bem nô abɨ. Yì yvɨtɨ læ̂ ìwo nâ yèynì nô sɨ a yi a ngeŋsɨ. Yì tôʼ kfàʼtɨ ìwo ateyn. A n-kelî kɨ zɨ̀ iwo zɨ̀ a ka ghesɨ̀nà ni.”