Judges 2

Nchì Bôbo Fɨyini ɨ ndù a Bokìm

¹Nchì Bôbo Fɨyini nɨ̀n lu meyn a Gilgàl ɨ koʼ a ntèʼ Bokìm ɨ bè sɨ̂ ghelɨ Isìlæ̀ na, “Mɨ n-læ meyn fvɨ̀sɨ̀ zɨ̀ sɨ a Ijìb ɨ gvì nɨ̀ zɨ̀ ilaʼ ghè a mɨ n-læ chfɨ̀nɨ sɨ fu sɨ̂ ghɨ̀bo ghi. Mɨ n-læ meyn bè na, ‘Mà læ̀ lêsɨ̀ wì mɨkâyn mzɨ̀ a mɨ n-læ yɨ ghesɨ̀nà; ²na ka yi n-læ̀ yɨ mɨkâyn zɨ̂ ghelɨ ilaʼ nâ ghèyn; na yi n-kelɨ sɨ bebsɨ ɨbyaŋ ifu nɨ̀ àŋena.’ Mɨtì yi faŋ tɨ̀ yvɨ. Yi n-yvɨnɨ̂ wì ma bòm ghà? ³Mɨ n-bê sɨ̂ zɨ̀ lvɨ̂yn na, mɨ n-sàŋ fvɨsɨ̀ wì ghelɨ ilaʼ nâ ghèyn sɨ a yi antêynɨ̀. Àŋena nɨn faŋ kɨ a yi antêynɨ̀ ta sùnjoŋnjoŋsɨ. Yì na mûtɨ̀ kɨ tèyn yi yeyn ma yì sɨ koʼsɨ̂ kɨ mɨyini mɨ̀ àŋena.”

⁴À nà n-ghɨ ta Nchì Fɨyini tàŋi awo nâ kèynà sɨ̂ ghelɨ Isìlæ̀, àŋena dzɨ̀ nô sɨ a ŋaŋ, ⁵ɨ toŋtɨ àlêʼ nâ kì na Bokìm, yi kfâʼtɨ̀ na, alêʼ idzɨ̀. Àŋena nɨn fu meyn tɨ̀fu sɨ̂ Bôbo Fɨyini afu.

Joshwà ɨ kfɨ

⁶À nà n-ghɨ ta Joshwà bè ghelɨ Isìlæ̀ gwôsɨ̀ ɨ̀ kàsi kfa, nô mɨ ghelɨ ndo ì kà ɨ ndù ɨ nà lî kɨ àlêʼ kì a Fɨyini fɨ nɨn læ fu sɨ̂ àŋena. ⁷Ghelɨ Isìlæ̀ nɨ̂n kàsi kfa tî ɨ faŋ ɨ nà koʼsɨ̂ kɨ Bôbo Fɨyini a mɨchi ghè a Joshwà nà n-saʼ ateyn. Joshwà ɨ læ kfɨ àŋena nà bu koʼsɨ̂ kɨ koʼsɨ ɨtuʼ nɨ̀ chyeʼ sìsɨ̀ a wù n-læ kfɨ sɨ nà bu ghɨ. Chyeʼsɨ ateynsɨ nɨn ghɨ ɨ sîsɨ̀ a sɨ n-læ yeyn awo a kaynɨ-a kì a Bôbo Fɨyini nɨ̂n læ nì sɨ̂ ghelɨ Isìlæ̀.

⁸Joshwà ɨ wâyn Nûn ɨ wul ɨ̀ felɨnɨ nɨ̀ Bôbo Fɨyini nɨn læ se sɨ kfɨ ghɨ bèŋ ɨvɨ nɨ̀ bèŋsɨ̀ ìvɨm. ⁹Wu n-læ kfɨ ghɨ gvɨ̀mì ŋweyn a Timnat Helès kɨ̀ alèʼ ghè a ghɨ n-læ fu sɨ̂ ŋweyn. Alêʼ ateyn a nà n-ghɨ ilaʼ i kfɨynsɨ a Eflèm dzɨ abàs ikuè a kfɨ̂yn Gâsh.

¹⁰A nà ghɨ ta ajâŋ a Joshwà kfɨ mèsì ɨ̀ ndù bàʼsɨ sɨ̂ ghɨ̀bo àŋena, ajâŋ a li-a ɨ koʼ, kya wi Bôbo Fɨyini, kya wi awo kì a Bôbo Fɨyini nì sɨ̂ ghelɨ Isìlæ̀.

Ghelɨ Isìlæ̀ ɨ nà bu koʼsɨ̂ wì Bôbo Fɨyini

¹¹Ghelɨ Isìlæ̀ nɨn læ meyn zɨ̀tɨ̀ ɨ nà sɨ nì àwo kɨ ghɨ wi àtì-ati asɨ nɨ̀ Bôbo Fɨyini, koʼsɨ̂ mɨyini mɨ̀ Bâl. ¹²Àŋena nɨn bu læ nà fî koʼsɨ̂ Bôbo Fɨyini, ɨ Fɨyini fɨ ghɨ̀bo àŋena fìfɨ̀ a fɨ n-læ fvɨ̀sɨ àŋena sɨ a Ijìb. Àŋena nɨn læ nà sɨ koʼsɨ̂ kɨ mɨyini mɨ̀ ghelɨ ghì a ghɨ nà n-chi baʼsɨ sɨ̂ àŋena. Iwo ateyn i ɨ nì Bôbo Fɨyini ɨ nà saŋlɨ̂ wì sɨ̂ àŋena, ¹³ta àŋena lèʼ nà bu koʼsɨ̂ wì ŋweyn, koʼsɨ̂ kɨ mɨyini mɨ̀ Bâl nɨ̀ ɨmzɨ̂ Ashtolèt. ¹⁴Bôbo Fɨyini nɨ̂n nyòʼsɨ ɨtoŋ sɨ̂ ghelɨ Isìlæ̀ tì ɨ visi ghelɨ ghɨ choŋnɨ ghɨ gvi nù àŋena ɨ lì ɨ lù nɨ̀ ɨ̀fwo àŋena. Wù n-læ meyn visi mbàynɨ̀ sìsɨ̀ a sɨ nà n-baʼsɨ afu sɨ bɨysɨ àŋena, àŋena nà bu kelɨ wi adyaʼ sɨ nu mbàynɨ̀ sɨ ateyn. ¹⁵Ghelɨ Isìlæ ɨ nà sɨ seʼ ìwoŋ, Bôbo Fɨyini ɨ ndu visi ghɨ tɨm yɨ kɨ yɨ àŋena kɨ̀ ighel ta wu nà n-sɨ ghɨ ma wù chfɨnɨ meyn. Àŋena nɨ̀n læ meyn yeyn ngeʼ nô sɨ a ŋaŋ.

¹⁶Bôbo Fɨyini ɨ læ kæ fu ghelɨ ghɨ saʼnɨ na ghɨ fsɨ ghelɨ Isìlæ̀ sɨ a awu nɨ̀ ghelɨ ghɨ choŋnɨ. ¹⁷Mɨtì, ghelɨ Isìlæ̀ ɨ nà yvɨnɨ̂ wì ghelɨ ghɨ saʼnɨ nâ ghì ɨ beyʼlɨ ngeŋsɨ àŋena sɨ̂ mɨyini mɨ̀ ɨ̀tum ɨ nà koʼsɨ-à. À nà n-ghɨ tì ma ghɨ̀bo àŋena nɨn læ meyn nà yvɨnɨ̂ Bôbo Fɨyini. Mɨtì ajâŋ nâ kèynà ɨ koʼ ɨ nyàŋsɨ̀ ɨ bèynlɨ kɨ têyn ɨ nà bu yvɨnɨ̂ wì ŋweyn a dzɨ afî a ghɨ̀bo àŋena nɨ̀n læ nà yvɨnɨ ateyn. ¹⁸Bôbo Fɨyini nà n-fu wul ɨ saʼnɨ sɨ̂ ghelɨ Isìlæ̀ nô mɨ ɨlvɨ gha, wu nà gâmtɨ̀ ŋweyn, wu fsɨ ghelɨ Isìlæ̀ sɨ ɨwu nɨ̀ mbàynɨ̀sɨ àŋena nô ta ka wùl ɨ̀ saʼnɨ nâ vzɨ̀ læ̂ kfɨ. Yi nà n-ghɨ tèyn bòm ta Bôbo Fɨyini nà n-koynsɨ isuyn sɨ̂ ghelɨ Isìlæ̀ sɨ a ngeʼ i kaynɨ ghê a àŋena nà n-yeyn awu nɨ̀ ghelɨ ghì a ghɨ nà n-yeʼtɨ àŋena. ¹⁹Mɨtì wùl ɨ saʼnɨ nâ vzɨ̀ nà n-kfɨ nô mɨ ɨlvɨ gha, ghelɨ ateyn bêynlɨ̀ ɨ̀ se sɨ ni awo a bɨ-a, ghɨ fi ni chwò ta ghɨ̀bo àŋena nɨn læ nà ni-à, koʼsɨ̂ mɨyini ɨ̂n lì fî felɨ̀ sɨ̂ ɨ̀mêyn. Àŋena nɨn leʼ meyn na ghɨ n-visî wì awo a bɨ-a ɨ leʼ na ghɨ n-visî wì atu a tonɨ-a.

²⁰Atu a tonɨ-a nɨ̀ àŋena nâ kì nɨ̂n læ meyn nì Bôbo ɨ nyòʼsɨ̀ ɨ̀toŋ sɨ̂ àŋena nô sɨ a ŋaŋ ɨ kæ bè na, “Ghelɨ gheyn bebsɨ meyn mɨ̀kâyn mzɨ̀ a ghesɨ̀ ghɨ̀bo àŋena nɨ̀n læ yɨ, ɨ̀ nà yvɨnɨ̂ wì ma. ²¹Mɨ n-bu fì sâŋ fvɨsɨ̀ wì ghelɨ tɨlaʼ ghì a Joshwà nɨn læ kfɨ ɨ visi ilaʼ nâ ghàyn. ²²Mɨ n-mòm ghelɨ Isìlæ̀ ɨ̀ visî ghelɨ nâ ghèyn ɨ̀ yeyn na àŋena na koʼsɨ̂ mà ta ghɨ̀bo àŋena nà n-koʼsɨ a.” ²³À ti iwo zɨ̀ a yi n-læ ni Bôbo visi ghelɨ tɨlaʼ nâ ghì ghɨ faŋ kɨ afu. Wù n-bu læ visi na Joshwà saŋ fvɨ̀sɨ̀ àŋena ghɨ̀ jɨ̀m kɨ ɨlvɨ ɨ̀mòʼ.