Judges 21

Ghelɨ Isìlæ̀ ɨ fu ghɨ̀kì sɨ̂ ghelɨ Benjamìn.

¹À nà n-ghɨ jæ ta ka ghelɨ Isìlæ̀ ndu sɨ nu ghelɨ Benjamìn ma àŋena ndu meyn yvɨ̀ŋtɨ̀ a Mizbà ɨ yɨ mɨkâyn ɨ bè na, “Wùl sɨ̂ ghesɨ̀nà læ̀ fu wi wayn sɨ̂ wùl ɨ̀ Benjamìn sɨ a wi.”

²Iwoŋi mæ̀, àŋena koʼ a Betèl ɨ màʼ àsas asɨ nɨ̀ Fɨyini fɨ ɨ yisi dzɨ kɨ têyn sɨ chem aleŋ ɨlvɨ ikfa. Àŋena nà n-byal dzɨ̂ nô sɨ a ŋaŋ. ³Àŋena nà n-dzɨ̂ tì bɨfɨ sɨ̂ Bôbo na, “À gàyn ghà a Bôbo Fɨyini fɨ, ɨ va Fɨyini fɨ Isìlæ̀fɨ̀, na wà vìsi iwo yèynì gayn sɨ̂ ghelɨ Isìlæ̀ têyn a? A gàyn ghà na isas i ndo nɨ̀ ghelɨ Isìlæ̀ i li na bu a ghès antêynɨ̀ layn a?”

⁴Ɨtuʼ bɨs layn àŋena bàʼlɨ̀ abaŋ ifu ɨ fu tɨfu tɨ nyoʼnɨtɨ nɨ̀ tɨ̀fu tɨ litɨ sɨ nà chî nɨ̀ mbôynɨ̀.

⁵Àŋena nɨ̂n fù tî ɨ kæ bɨf na, “À n-læ faŋ isas i ndo ì kà antêynɨ̀ àsas a ndosɨ nɨ̀ ghelɨ Isìlæ̀ tɨ̀ fvɨ̀ tɨ̀ gvì asɨ nɨ̀ Bôbo Fɨyini a?” Àŋena nà n-bɨfɨ tì bòm ta àŋena nɨ̀n læ yɨ mɨ̀kâyn na à fàŋ nô mɨ ndà tɨ̀ fvɨ̀ tɨ̀ gvì asɨ nɨ̀ Bôbo Fɨyini a Mizbà, a ghɨ zue ŋweyn.

⁶Ghelɨ Isìlæ̀ ɨ nà sɨ koynsɨ̂ ìsuyn sɨ̂ woynà àŋena ghelɨ Benjamìn bê na, “Layn nɨ̀n ghɨ tèyn ma isas i ndo nɨ̀ ghelɨ Isìlæ̀ i li le meyn, ìmòʼ. ⁷Ghesɨ̀nà ti n-nì ghà sɨ fu ghɨ̀kì sɨ̂ ghelɨ Benjamìn ghì a ghɨ bu ghɨ ma ghesɨ̀na ti meyn yɨ̀ mɨkâyn asɨ nɨ̀ Bôbo Fɨyini na wùl sɨ̂ ghesɨ̀nà læ̀ fu wi wayn sɨ̂ wùl sɨ̂ àŋena sɨ a wi a?” ⁸Àŋena taŋi tì ɨ nà sɨ kayntɨ̂ nâ, à n-læ faŋ isas i ndo ì kà tɨ̀ ndù asɨ nɨ̀ Bôbo Fɨyini a Mizbà a, ɨ se sɨ kitɨ ɨ kæ keli na wùl nɨ̀n bu læ nà ghɨ afu ma wù fvɨ̀ isas i ndo nɨ̀ Jabesh Gilèd. ⁹Àŋena nɨn læ keli bòm ta ghɨ n-læ se sɨ taŋ ghelɨ a Misbà ɨ faŋ tɨ̀ yeyn nô wul ɨ̀mòʼ ta wù lù a Jabesh Gilèd.

¹⁰Ghelɨ Isìlæ̀ nɨn keli tî ɨ kæ tum sugèyʼsɨ̀ nkam njvàsɨ̀ bò na sɨ ndu a Jabesh Gilèd ɨ̀ zuètɨ nô ghelɨ ghɨ̀ jɨ̀m afu, baʼsɨ̂ nɨ̀ ghɨ̀kì nɨ̀ woynda. ¹¹Àŋena nɨ̂n bè sɨ̂ sugèyʼsɨ ateynsɨ na, “À ti iwo zɨ̀ a ka yì ndu nì. Yì ndu zuètɨ ghɨ̀lûmnɨ̀ nô ghɨ̀ jɨ̀m, ɨ̀ zuètɨ ghɨ̀kì nô ghɨ̀ jɨ̀m ɨ̀ vìsi kɨ̀ ɨghî a ghɨ bu duʼ tɨ̀ nà kya wùl ɨ lûmnɨ̀.” ¹²Àŋena ndu chem a Jabesh Gilèd ɨ zuetɨ ghelɨ nô ghɨ̀ jɨ̀m ɨ yeyn ngòynsɨ̀ afu ighɨ ì kæ̀ sɨ kya wi wùl ɨ lûmnɨ̀ ɨ li ndù nɨ̀ àŋena a Shilò a Kenàn.

¹³Nchɨ̀yntɨ ghelɨ Isìlæ̀ ɨ kæ tum ghelɨ na ghɨ ndu bè sɨ̂ ghelɨ Benjamìn ghì a ghɨ nà n-chi iwu i Limòn na ghɨ kàʼ a ghɨ kasi bàʼtɨ àwo nà chî nɨ̀ mbôynɨ̀. ¹⁴Ghelɨ Benjamìn ɨ ndu yvɨ ntum àteyn ɨ kasi kfa. Ghelɨ Isìlæ ɨ fu ghɨ̀kì ghî sɨ̂ àŋena a ghɨ tî faŋ tɨ̀ zuètɨ a Jabesh Gilèd ɨ̀ lì kfa nɨ̀ àŋena tî. Ghɨ n-gwòtɨ nô mɨ ghɨ̀kì ateyn sɨ̂ àŋena tî, ghɨ faŋ tɨ̀ kfeyn sɨ̂ àŋena ghɨ̀ jɨ̀m.

¹⁵Àŋena nà n-bu koynsɨ̂ kɨ ìsuyn sɨ̂ ghelɨ Benjamìn ta Bôbo Fɨyini nì isas i ndo nɨ̀ ghelɨ Isìlæ̀ i li na kɨŋ sɨ lè. ¹⁶Chyeʼsɨ Isìlæ̀sɨ̀ ɨ nà sɨ kayntɨ̂ nâ, ghɨ ti n-lì wo ghɨ̀kì sɨ fu sɨ̂ ghelɨ Benjamìn ghì a ghɨ bû kèli ghɨ̀kì, ma ghɨ zuetɨ meyn mèsì ghɨ̀ki a Benjamìn a? ¹⁷Chyeʼsɨ ateynsɨ ɨ kayntɨ tì ɨ kæ bè na, “Ghelɨ Benjamìn ghì a ghɨ faŋ nɨn kelɨ sɨ bzɨ woyn na ghɨ læ̂ yɨ ɨfwo àŋena, bu tì a yi na kêʼ na isas i ndo ifɨ̂blɨ̀-i le meyn. ¹⁸Ghesɨ̀nà kàʼ ghɨ bû fù woyn ghesɨ̀nà sɨ a ghɨ̂kì sɨ̂ ghelɨ Benjamìn bòm ta ghesɨ̀nà nɨn læ meyn yɨ mɨkâyn ɨ bè na, ‘À læ̀ fù nô mɨ ndà wayn sɨ a wul ɨ wi sɨ̂ wùl ɨ̀ Benjamìn a ngeʼ koli ŋweyn.’ ¹⁹Àŋena taŋi tì ɨ kasi kfàʼtɨ̀ na ayɨ a Bôbo Fɨyini kì à kɨ n-ghɨ a Shilò kɨ bèŋ sɨ̀ jɨ̀m tì nɨ̀n koʼ gvi-à. Shilò nɨn ghɨ atû Betèl, a dzɨ ghê a yì n-lû a Betèl kalì a Shekèm dzɨ abàs ghè a ɨchfɨ̂-iyvɨ i nɨn sal ateyn, isas i ntèʼ Lebonà.”

²⁰Chyeʼsɨ Isìlæ̀sɨ̀ ɨ kfàʼtɨ̀ tì ɨ kæ bè sɨ̂ ghɨlûmnɨ Benjamìn ghì a ghɨ nà n-bu duʼ tɨ̀ kèli ghɨ̀kì na, “Yì ndu lèytɨ̀ a gvêynsɨ mɨtàm, ²¹ɨ nà faytɨ ki-a. Ngòynsɨ Shilòsɨ nî fvɨ̀ gvì sɨ bɨyn, nô mɨ ndà ɨ nà tum fvɨ̀ ghal kɨ ɨ̀ mò sɨ a wi, nyɨŋ kfa nɨ̀ ŋweyn a Benjamìn. ²²Yi n-ghal tì, a ghɨ̀ bo àŋena nɨ̀ woynà àŋena se sɨ dzɨ sɨ̂ ghès a ghèsɨ̀ be kɨ̀ sɨ̂ àŋena na, ‘Yì koynsɨ isuyn sɨ̂ ghès ɨ̀ vìsi àŋena li wôyn ghɨ̂kì nâ ghèyn sɨ a ghɨ̂ki nɨ̀ àŋena bòm ta ghɨ tî tɨm mèsì ìwòŋ, ghèsɨ faŋ tɨ̀ kèli ghɨ̀kì sɨ fu sɨ̂ àŋena. Yì kæ visi, yi bû nà ghɨ na yi kolɨ meyn ìsaʼ i mɨ̂kàyn zɨ̀ a yì tî yɨ bòm ta à bû fù zɨ fù wôyn ghi sɨ̂ àŋena.’” ²³Ghelɨ Benjamìn ɨ ni kɨ ta ghelɨ Isìlæ̀ bè. Ngòynsɨ ateynsɨ ɨ ni se sɨ bɨyn, nô mɨ ndà ɨ nà tum fvɨ̀ ghal kɨ ìmòʼ sɨ a wi, nyɨŋ kfa nɨ̀ ŋweyn. Àŋena kfa ɨ kasi bàʼlɨ̀ ntèʼsɨ àŋena ɨ nà chî ateyn.

²⁴Ghelɨ Isìlæ̀ nɨ̀n læ meyn lù ɨlvɨ nâ ghè ɨ kasi kfa sɨ ɨlwèʼ nɨ̀ àŋena, nô mɨ ndà ɨ nà kasî ndû kɨ alèʼ nɨ̀ ghelɨ ndo nɨ̀ àŋena afî Fɨyini fɨ nɨn læ fu sɨ̂ isas i ndo nɨ̀ àŋena.

²⁵À n-læ nà ghɨ ɨtuʼ nâ ghè, ghelɨ Isìlæ̀ ɨ kelɨ wi fòyn, nô mɨ ndà ɨ nî kɨ ìwo zɨ̀ a wù n-kôŋ.