Judges 7

Gidìyòn ɨ tɨm yɨ ghelɨ Midìyàn

¹Ɨtuʼ nɨ̀n bɨs meyn layn, Jelub-Bâl ma à ti Gidìyòn ɨ lù ŋêyn ghelɨ ŋweyn nô ghɨ̀ jɨ̀m ɨ ndu bɨ̀ a ngùŋ ìsɨ i lɨmàlɨ̀mà i Halòd. Ghelɨ Midìyàn nà n-ghɨ ma ghɨ bɨ̀ abàs ikuè afoŋlɨ a mbæ̀ kfɨ̀yn Molè. ²Bôbo Fɨyini ɨ bè sɨ̂ Gidìyòn na, “Sugèyʼ shyasɨ nɨn dvɨ̂ chwôsɨ̀-à. Mɨ n-kɨŋ wi sugèyʼsɨ̀ sɨ idvɨ̀ sɨ jæ sɨ tɨm sɨ yɨ ghelɨ Midìyàn. Mà kæ visi sɨ seʼ ɨtwaʼ iwòŋ sɨ̀ jɨ̀m, a ghelɨ Isìlæ̀ faŋ tɨ̀ yeyn adyaʼ à kema, nà ghaŋsɨ̂ ɨ̀wuyn kfâʼ na ghɨ tɨm yɨ nɨ̀ àdyaʼ a àŋena. ³Bè sɨ̂ sugèyʼ shyasɨ na, ‘Alɨmalɨma na bâytɨ̀ mɨ ndà, wu faynà, wu lù sɨ a kfɨ̂yn Gilèd afêyn ɨ kasi nà kfâ.’” Wu n-bè tî sugèyʼsɨ̀ ɨ kasi kfa nkam mɨ̀vɨm ɨ̀m bò njvàsɨ̀ bò, a faŋ kɨ sugèyʼsɨ̀ nkamsɨ ìvɨm.

⁴Bôbo Fɨyini ɨ kæ bè sɨ̂ Gidìyòn na, “Sugèyʼ shyasɨ bu dvɨ̂ kɨ dvɨ. Kàli nɨ̀ àŋena a jvâ, mà tetɨ fvɨ̀sɨ̀ ɨghî a ka zɨ̂ àŋena ndu amoʼ. Ma kæ bè na, ‘Wùl ɨ̀ wèyn nɨn ndù zɨ̂ ŋweyn,’ a wù ndu, ɨ̀ kæ bè na, ‘Ɨwêyn nɨn ndù wì zɨ̂ ŋweyn,’ wù bû ndù.”

⁵Gidìyòn ɨ lì ghelɨ ateyn, ŋêyn àŋena kàlì a jvâ. Bôbo ɨ bè sɨ̂ ŋweyn na, “Wà yeyn wùl ɨ̀ nyvɨ mu nɨ̀ ìlemi ta bɨ, wa lèm ŋweyn abàs àmoʼ, ɨ yeyn wù tɨm alvɨ a nse jæ sɨ nà nyvɨ-a, wa lèm abàs a li-a.” ⁶Ghelɨ ɨ sef mu nɨ̀ ɨ̀wu, ighɨ ì tal ɨ nyvɨ, ghɨli ghì nô ghɨ̀ jɨ̀m ɨ suʼi tɨm alvɨ a nse ɨ nyvɨ nɨ̀ àchfɨ-à.

⁷Bôbo Fɨyini ɨ bè sɨ̂ Gidìyòn na, “Mɨ n-nì-à, a zɨ̂ ghelɨ ghì ighɨ ì tal a ghɨ nyvɨ̀ mu nɨ̀ ɨ̀wu tî ndu tɨm yɨ̀ ghelɨ Midìyàn, a ghelɨ ghì a ghɨ nyvɨ nɨ̀ àchfɨ-à tî kasi nà kfâ.” ⁸Ghelɨ ghì ighɨ ì tal ɨ fsɨtɨ ɨ̀fwo ɨ yɨnɨ nɨ̀ tɨ̀soŋtɨ sɨ̂ ghelɨ ghɨ li ghì a ghɨ nì nyvɨ̀ mu nɨ̀ àchfɨ-à tî. Gidìyòn ɨ bè ghelɨ nâ ghì a ghɨ fsɨ̀tɨ ɨfwo sɨ̀ àŋena tî ɨ kasi nà kfâ.

À nà n-ghɨ tì ma ghelɨ Midìyàn nì gvì bɨ̀ ɨfyàyn abàs itsɨyn.

Jèm ɨ chɨ sugèyʼ Midìyàn

⁹À nà n-ghɨ nɨ̀ntuʼ achi nâ ghè, Bôbo Fɨyini ɨ bè sɨ̂ Gidìyòn na, “Làli ɨ kàli ndù alèʼ ghè a ghelɨ Midìyàn bɨ̀ ateyn ɨ nù àŋena. Mɨ n-nì-à a wà tɨm yɨ àŋena. ¹⁰Wà na fàynà, wa lì wul ɨ̀ felɨnɨ nɨ̀ và, ɨ Bulà, zɨ̂ ŋweyn kali alèʼ ghè a ghelɨ Midìyàn bɨ̀ ateyn, ¹¹ɨ̀ yvɨ̀tɨ ìwo zɨ̀ a àŋena nɨn bê. Wa n-yvɨ ìwo ateyn ɨ̀ kèli àdyaʼ sɨ nu àŋena. Gidìyòn ŋêyn Bulà ɨ kàli ndù a ngùŋ àlèʼ ghè a sugèyʼsɨ Midìyànsɨ̀ bɨ̀ ateyn. ¹²Ghelɨ Midìyàn nɨ̀ ghelɨ Amalèk nɨ̀ ghelɨ ghì a ghɨ n-lù abàs ghè a ɨchfɨ-iyvɨ nɨn sal ateyn nɨ̂n læ bɨ̀ ɨfyàyn ɨ nà ŋefà kɨ ta ngumisɨ, kàmêlsɨ àŋenasɨ ɨ dvɨ̂ chwô àsese a mbæ̀ jvà.”

¹³Gidìyòn nɨ̀n læ kàli ɨ nà baʼsɨ̂ ndû kɨ alèʼ nâ ghè tèyn ɨ yvɨ ta wùl nɨ̀n fêʼtɨ̀ jem sɨ̂ wùl ìjèl nɨ̀ ŋweyn bê na, “Jèm tî kfa chɨ̀ ma, ma yeyn ìghef i balì, yi bɨŋlɨ̂ kàlì gvì alèʼ ghè a ghelɨ Midìyàn bɨ̀ ateyn, ɨ̀ kàlì gvì tì ɨ̀ kfɨ̀yn ɨ̀two nô sɨ a ŋaŋ, wu bɨsà fe.”

¹⁴Wul ìjèl nɨ̀ ŋweyn nâ vzɨ̀ ɨ bè na, “Jèm nâ yèyn nɨ̀n dyêyn wì iwo i li a bu kɨ na Gidìyòn ɨ wâyn Jòwâsh ɨ wul ɨ̀ Isìlæ̀ wèyn nɨn gvì tɨm yɨ ghesɨ̀nà. Fɨyini fɨ fu meyn àdyaʼ sɨ̂ ŋweyn na wù tɨm yɨ̀ ghelɨ Midìyàn nô ghɨ̀ jɨ̀m nô mɨ nɨ̀ ndà ɨlvɨ̀ vzɨ̂ a wù gvì bɨ̀ alèʼ ghàyn.”

¹⁵Gidìyòn ɨ yvɨ jem àteyn nɨ̀ ìwo zɨ̀ a yì n-dyêyn ɨ koʼsɨ Fɨyini ɨ kasi koʼ ndù alèʼ ghè a ghelɨ Isìlæ̀ gvì bɨ̀ ateyn ɨ byal bè na, “Yì lali! Bôbo Fɨyini fu meyn ghelɨ Midìyàn a ghesɨ̀nà awu.” ¹⁶Ta wù tàŋi tî ɨ gwòsɨ̀ sugèyʼ sìsɨ̀ ighɨ ì tal, inôyn ì tal, ɨ fu tɨsoŋ nɨ̀ ntòyn sɨ yumsɨ sɨ̂ àŋena, ɨ fi fu kɨmɨ nkɨsɨ ɨwu nɨ̀ àŋena.

¹⁷Wu n-fu tî ɨ bè sɨ̂ àŋena na, “Yì na yvɨ kɨ sɨ̂ mà. Ma ndû bàʼsɨ alèʼ ghè a àŋena bɨ̀ ateyn ɨ̀ nì nô mɨ ghà, yi ni kɨ tî.” ¹⁸Ma kæ toŋ isoŋ ghesɨ̀ ghelɨ ghì a ghesɨ̀ àŋena nɨn ghɨ nô ghɨ̀ jɨ̀m, yi ti nô mɨ wo, yi boŋ toŋ kɨ toŋ ɨ titɨ ɨ byal bè na, “Gidìyòn nɨn yɨ-a a Bôbo Fɨyini yɨ.”

¹⁹Gidìyòn ŋêyn ghelɨ ŋweyn ghì ɨvɨ nɨ̀n læ ndu baʼsɨ alèʼ ghè a sugèyʼsɨ Midìyànsɨ̀ bɨ̀ ateyn ma ghelɨ ghì a ghɨ nì nà chî ɨlwêʼ kùʼ kfa kɨ̀ kfa antêynɨ̀ àsɨ, ghɨli gvî lì ɨ̀lweʼ àŋena. Gidìyòn ŋêyn ghelɨ ŋweyn ɨ toŋ tɨsoŋ ɨ zuelɨ ntòyn sîsɨ̀ a sɨ nà n-ghɨ ɨwu nɨ̀ àŋena.

²⁰Inôyn nâ zɨ̀ ì tal ɨ chɨ̀yntɨ toŋ tɨsoŋ tɨ àŋena kɨ̀ ɨlvɨ nà ghè ɨ zuelɨ ntòyn sîsɨ̀. Nô mɨ ndà ɨ ghal nkɨsɨ nɨ̀ àwu ɨkœ nɨ̂nkœ̀ à, ɨ ghal isoŋ sɨ toŋ nɨ̀ àwu ɨkœ ɨ two ɨ zɨ̀tɨ̀ ɨ nà byal bê na, “Ghesɨ̀na tɨm yɨ, Bôbo Fɨyini fsɨ ɨkfɨm ateyn, Gidìyòn boŋ fsɨ!” ²¹Àŋena nà n-byal tì nô mɨ ndà ɨ ti kɨ alèʼ ghè a wù nì gvì tìmi ateyn. Ghelɨ Midìyàn ɨ zɨ̀tɨ̀ ɨ nà dzɨ̂nɨ̀-à, leʼnɨ-à.

²²Ghelɨ ghì ighɨ ì tal nɨn læ toŋ tɨsoŋ tɨ àŋena tî, Bôbo ɨ nì ghelɨ Midìyàn ghì a ghɨ gvì bɨ̀ alèʼ nâ ghè nô ghɨ̀ jɨ̀m ɨ kasi nà chuʼlɨ̂ zuetɨ̂ kɨ ngeŋsɨ àŋena. Ɨghî a ghɨ faŋ ɨ leʼ ndù a Bet Shità dzɨ a abàs a Zelelà. Àŋena nɨn leʼ meyn ɨ kasi ndu chem nô alèʼ ghè a Abel Mèholà nà n-lêm ighami ateyn a ngùŋ Tabàt.

²³Gidìyòn ɨ jàŋtɨ̀ sugèyʼsɨ Isìlæ̀ sìsɨ̀ nô sɨ̀ jɨ̀m a sɨ nà n-ghɨ a Naftalì nɨ̀ ɨsîsɨ̀ sɨ nà n-ghɨ Ashà kɨ̀mɨ nɨ̀ ɨsîsɨ̀ a sɨ nà n-ghɨ a Mànasè, àŋena fvɨ̀ ɨ nyɨŋ ibàm nɨ̀ ghelɨ Midìyàn. ²⁴Gidìyòn ɨ tum ghelɨ na ghɨ jel kɨ ilaʼ i kfɨynsɨ a Eflèm ì jɨ̀m ɨ̀ bè sɨ̂ ghelɨ na, “Yì kali gvì ghɨ nyɨŋ tèyn ghelɨ Midìyàn ɨlwèʼ ghè a ghɨ n-dyâŋ jvâ Jodàn ateyn ka àŋena dyaŋ ɨ̀ lèʼnɨ. Ghesɨ̀nà nyɨŋ ndù teyn àŋena ɨlwèʼ nâ ghè nô ɨ̀ jɨ̀m sɨ ndù sɨ chem a Bet Balà”

Ghɨ jàŋtɨ̀ ghelɨ Eflèm nô ghɨ̀ jɨ̀m àŋena nyɨŋ teyn ghelɨ Midìyàn ɨlwèʼ ghè a ghɨ n-dyâŋ jvâ Jodàn ateyn sɨ ndù sɨ chem a Bet Balà. ²⁵Àŋena nɨ̀n læ meyn ghaytɨ tɨ̀fôyn tɨ Midìyàn tɨ̀ bò, ɨ Olèb ŋêyn Zîb, ɨ lì Olèb ɨ ndu zue iwu i Olèb, ɨ ndu zue Zîb alèʼ nɨ̀ ŋweyn ghè a ghɨ nà n-nûʼ mɨtam, faytɨ̂ mɨ̀lûʼ ateyn a Zîb. Àŋena nɨ̂n zuetɨ tî ɨ nyɨŋ sàŋ ghelɨ Midìyàn, ɨ ni kasi kfa nɨ̀ àtu a Olèb à nɨ̀ a kɨ Zîb à ɨ fu sɨ̂ Gidìyòn a mbæ̀ jvà Jodàn.