Leviticus 10

Nadàb ŋêyn Abihù ɨ kfɨtɨ

¹Woyn Alòyn ghɨ̀ bò, ɨ Nadàb ŋêyn Abihù nɨn læ meyn lì ɨ̀kfaŋ ileŋ, ɨ we ɨ̀kfêtɨ̀ ɨvɨ̀s ateyn nɨ̀ ìleŋ i ɨ nyòʼ asɨ nɨ̀ Bôbo Fɨyini mɨ̀tì isaʼ i dyêyn wì na àŋena nyoʼ. ²Ta àŋena nyòʼ tî, Bôbo Fɨyini ɨ tum ɨvɨs wu nyòʼ ɨ zuetɨ àŋena kɨ̀ afu. ³Mosìs ɨ kæ bè sɨ̂ Alòyn na, “Iwo nâ yèynì a yi gàyn têyn nɨ̀n ghɨ ìwo ma Bôbo Fɨyini nɨn læ meyn bè na,

“Mɨ nì dyêyn ìlayn ì yemi

sɨ̂ ghelɨ ghì a ghɨ n-felɨ̀ sɨ̂ mà,

Àŋena nì nà ngvɨmlɨ̂ mà,

asɨ nɨ̀ ghelɨ ghɨ̀ jɨ̀m.”

Wu n-læ taŋi tî, Alòyn ɨ chimi kɨ têyn moŋ.

⁴Alòyn nɨn læ chimi tî, Mosìs ɨ jàŋtɨ̀ Mishèl nɨ̀ Elzafàn ɨ woyn Uzìyèl, ɨ wâynà bò Alòyn ɨ bè sɨ̂ àŋena na, “Yì gvi bèʼi ɨ̀ lù nɨ̀ tɨ̀gvɨyn tɨ woynà ghi tèyntɨ̀ sɨ a alèʼ a laynɨ-a nɨ̀ Bôbo Fɨyini afêyn. Yì beʼi fvɨ̀ nɨ̀ nteyntɨ sɨ alèʼ ghàyn a ghelɨ Isìlæ̀ bɨ̀ ateyn tèyn.” ⁵Mosìs nɨn bè tî, woyn Uzèl ɨ gvi ɨ bèʼì ɨ fvɨ̀ nɨ̀ nteyntɨ, kɨ ighel ta wù bè, ndzɨsɨ fɨfâsɨ̀ nɨ̀ ngàŋsɨ ndô Fɨyinisɨ ɨ bu ghɨ kɨ àŋena ɨwùyn.

⁶Mosìs ɨ kæ bè sɨ̂ Alòyn ŋêyn woyn ŋweyn ghɨ li ghì ghɨ̀ bò ɨ Elezà ŋêyn Itamà na, “Ka yi n-vìsi ɨ̀tu ɨ̀ vzɨ bula yi shwaʼì. Ka yi n-bàytɨ̀ ndzɨ sisɨ bê na yi n-dzɨ̂ ìkfɨ i woynà ghi. Yì kæ sɨ mòm, a yì kfɨtɨ, a Bôbo Fɨyini nyoʼsɨ ɨtoŋ sɨ̂ ghelɨ Isìlæ̀ nô ghɨ̀ jɨ̀m. Mɨtì ghelɨ ghi, ma à ti ghelɨ Isìlæ nô ghɨ̀ jɨ̀m kàʼ a ghɨ dzɨ ikfɨ ighêl nâ ghèyn a Bôbo nyòʼ zuètɨ têyn. ⁷Ka yi n-lù sɨ ɨchfɨ fɨndo nɨ̀ Bôbo Fɨyini lvɨ̂yn bula tî a yì kfɨtɨ bòm ta ghɨ yisi meyn zɨ̀ sɨ a ngàŋsɨ ndô Fɨyini.” Mosìs nɨn læ taŋi tî, àŋena nì kɨ ta wù bè.

⁸Bôbo Fɨyini ɨ kæ be sɨ̂ Alòyn na, ⁹“Ka zɨ̂ wôyn ghya nɨ̂n læ̀ sesɨ zɨ a fɨndo nɨ̀ Bôbo Fɨyini ɨ̀ nyvɨ mɨlûʼ ɨn tô, kèsa à n-ghɨ nô mɨ ìnki i mɨ̂lùʼ ɨn to ɨ̀n kà, bu tì a yì kfɨtɨ. Isaʼ nâ yèynì nɨn faŋ kɨ faŋ sɨ̂ zɨ̀ nɨ̀ ɨ̀jwâŋ vzɨ̀ a wu n-læ̀ koʼ ibàm. ¹⁰Yi n-kelɨ sɨ nà ni têyn ta ka yì na kya ɨ̀fwo vzɨ̀ a ghɨ lèm sɨ a nyɨŋ sɨ̂ mà, nɨ ɨvzɨ̂ a ghɨ kàʼ a ghɨ ni nô mɨ ghà ateyn, kya ɨ̀fwo vzɨ̀ a wu n-layn ta isaʼ i nɨn dyêyn nɨ ɨvzɨ̂ a wu n-layn wi. ¹¹Yi n-kelɨ sɨ nà yeʼi ghelɨ Isìlæ̀ nɨ̀ tɨ̀saʼ tìtɨ̀ nô tɨ̀ jɨ̀m a Bôbo Fɨyini nɨ̀n læ fu sɨ̂ zɨ̀ toynɨ̂ a Mosìs.”

¹²Ta Bôbo tàŋi tî, Mosìs ɨ kæ bè sɨ̂ Alòyn ŋêyn woyn ŋweyn ghì ghɨ̀ bò a ghɨ n-læ faŋ tî, ma à ti Elezà ŋêyn Itamà na, “Yì li ifu ɨfwo ɨ yɨnɨ vzɨ̀ a ghɨ nì nyòʼ sɨ̂ Bôbo Fɨyini wu bɨsɨ tì, ɨ̀ lam abayn ateyn bula fɨ̀shɨ̀k, ɨ̀ dùʼì kɨ̀ a ngùŋ àbaŋ ifu, ɨ̀ yɨ bòm ta à n-ghɨ ɨ̀fwo ɨ yɨnɨ, layn kfeynɨ-à. ¹³Ɨfwo nâ wèyn a wu bɨ̀sɨ têyn nɨn kelɨ và zɨ̂ woyn ghya, kelɨ sɨ yɨ kɨ alèʼ a layna bòm ta ghɨ nyoʼ meyn sɨ a ifu sɨ̂ Bôbo Fɨyini. À ti isaʼ zɨ̀ a Bôbo Fɨyini nɨn læ fu sɨ̂ mà. ¹⁴Mɨtì, zɨ̂ woyn ghya ghɨ lûmnɨ̀ nɨ ghɨ ki kàʼ a ghɨ kfɨl nkumtɨ zɨ̀ a ghɨ làysɨ iyvɨ sɨ a ifu, nɨ̀ àbî kì a ghɨ fù sɨ ifu sɨ̂ Bôbo Fɨyini tì kɨ̀ alèʼ a laynɨ-a. Ɨlwêʼ ɨ nyâm nâ vzɨ̀ nɨn kelɨ zɨ̂ woyn ghya a ifu afî a ghelɨ Isìlæ̀ nɨn fu sɨ̂ Bôbo Fɨyini sɨ nà chi nɨ̀ mbôynɨ̀. ¹⁵Ghɨ n-kelɨ sɨ gvi nɨ̀ àbî a nyâm kì a ghɨ fù sɨ̂ Bôbo Fɨyini tì nɨ̀ nkumtɨ zɨ̀ a ghɨ làysɨ̀ iyvɨ sɨ a ifu sɨ̂ Bôbo Fɨyini tì, baʼsɨ̂ nɨ̀ ìso i nyâm zɨ̀ a ghɨ fu sɨ a ifu i nyoʼnɨ-i tî, na wà laysɨ iyvɨ sɨ a ifu sɨ̂ Bôbo Fɨyini. Ghɨ na fu ìfu nô mɨ ɨlvɨ gha, ɨlwêʼ nâ vzɨ nà kelɨ zɨ̂ woyn ghya, kɨ ighel ta Bôbo Fɨyini bè.”

¹⁶A nà n-ghɨ ta Mosìs bɨf bzɨ zɨ̀ a ghɨ nì fu na Bôbo Fɨyini lesɨ fu mbɨsɨ ghelɨ Isìlæ̀ tì, ghɨ bê na ghɨ ni meyn nyòʼ, wu nyòʼsɨ̀ ɨ̀toŋ sɨ̂ Elezà ŋêyn Itamà, ɨ woyn Alòyn ghì a ghɨ fàŋ tî, ɨ bɨf na, ¹⁷“Bòm ghà ta yì nì faŋ tɨ̀ kfɨl njwo ifu nâ zɨ̀ a ghɨ nì fu na Fɨyini fɨ lesɨ fù mbɨsɨ ghêl abe a ndô Fɨyini a? À n-ghɨ ìfu yi layn kfeynɨ-à ta Bôbo Fɨyini fù sɨ̂ zɨ̀ sɨ su zɨ na yì layn, a ghɨ nchwæ na wù chyeʼsɨ meyn mbɨsɨ ghelɨ Isìlæ̀. ¹⁸Yì nà ghɨ sɨ kfɨl bzɨ àteyn a ngùŋ àbaŋ ifu kɨ̀ ighel ta mà tî bè na yì ni, bòm ta ghɨ bu tî zɨ nɨ̀ mɨ̀luŋ mɨ̀ àteyn alèʼ a laynɨ-a.”

¹⁹Alòyn ɨ bèynsɨ̀ ɨ bè sɨ̂ Mosìs na, “À nì nà ghɨ layn ghelɨ Isìlæ̀ ɨ fu ìfu na Bôbo Fɨyini lesɨ fu mbɨsɨ àŋena, nɨ̀ ìfu i nyoʼnɨ-i, mɨtì ngeʼ yèyn koli mà. A Bôbo Fɨyini ti nà n-kâʼ a wù na saŋlɨ-à ɨlvɨ ta mà kfɨl njwò nâ zɨ̀, ɨ̀ yɨ ɨfwo ɨ yɨnɨ nâ vzɨ̀ ma ghɨ gvì sɨ fu na wù lesɨ fù mbɨsɨ ghelɨ Isìlæ̀ a?” ²⁰Wu n-læ taŋi tî Mosìs ɨ yvɨ iwo ateyn ɨ nà saŋlɨ-à.