Leviticus 2
Ifu i nyoʼnɨ-i
Ifu ɨfwo ɨ yɨnɨ
1Bôbo Fɨyini nɨ̀n bê meyn sɨ̂ Mosìs na, “Wùl ɨ̀ se sɨ gvi nɨ̀ ìfu i sɨ̂ Bôbo Fɨyini, a ghɨ ifu i ɨfwo ɨ yɨnɨ, a nà ghɨ ɨ̀nkfɨ̂ŋ ma wù gvâ meyn mɨ̀ faytɨ kfɨ, wù we mɨ̀vɨl mɨ̀ olìfsɨ̀ baʼsɨ̂ nɨ̀ ìleŋ i atû àteyn. 2Wù we wu lì ɨ ndù nɨ̀ ɨ̀mêyn sɨ̂ woyn Alòyn ma à ti ngàŋsɨ ndô Fɨyini. Wu n-dù-à, a ngàŋ ndô Fɨyini ì lì myeytɨ awu ɨnkfɨ̀ŋ nâ kì a ghɨ we mɨvɨl baʼsɨ̂ nɨ̀ ìleŋ i nô ì jɨ̀m, ɨ̀ nyòʼ abaŋ ifu sɨ dyèyn na ifu ateyn i nô ì jɨ̀m nɨn kelɨ Bôbo Fɨyini, a ghɨ ìfu ta ghɨ nyòʼ, yi lɨ̂mtɨ̀ fom sɨ̂ ŋweyn. 3Abes ifu ɨfwo ɨ yɨnɨ nâ kì-à na kelɨ Alòyn ŋêyn woyn ŋweyn, a ghɨ àbâs ifu ɨfwo ɨ yɨnɨ kì a ghɨ nyòʼ sɨ a ifu sɨ̂ Bôbo Fɨyini, kɨ layn kfeynɨ-a.
4“Wùl na gvî nɨ̀ ìfu i ɨfwo ɨ yɨnɨ-i a ghɨ àbayn ma ghɨ nyòʼ nyoʼ, ɨ̀nkfɨ̂ŋ mɨ̀ àteyn nà ghɨ ma ghɨ gva meyn mɨ̀ faytɨ kfɨ. Abayn ateyn a nɨn kelɨ sɨ nà ghɨ bula ghɨ we fɨ̀shɨ̀k ateyn, ma ghɨ fyes nɨ̀ mɨ̀vɨ̂l mɨ̀ olìfsɨ̀, ɨ̀ nyòʼ ichɨ i bomnɨ-i kɨ ghɨ a tɨ̂ghef, kèsa kɨ n-ghɨ a mɨ̂bàŋnɨ̀ a mɨ̂bàŋnɨ̀ a ɨ̀ yoʼ mɨvɨl mɨ̀ olìfsɨ̀ ateyn. 5Ifu ateyn i kæ nà ghɨ àbayn ma ghɨ nyòʼ ikaŋ, a nà ghɨ àbayn bula fɨ̀shɨ̀k, ma ghɨ gvâ meyn ɨ̀nkfɨ̂ŋ mɨ̀ àteyn mɨ̀ faytɨ kfɨ, ɨ̀ fyes mɨvɨl ateyn. 6Wùl ɨ̀ vzɨ̀ a wù n-fu ifu abayn nyôʼ àbayn ateyn, wu beyʼlɨ, ɨ we mɨ̀vɨl ateyn. À n-ghɨ ìfu ɨfwo ɨ yɨnɨ. 7Ifu ateyn i kæ nà ghɨ àbayn ma wù nyòʼ ikaŋ, a nà ghɨ ma wù nyòʼ nɨ̀ ɨ̀nkfɨ̂ŋ ma ghɨ gva meyn mɨ̀ faytɨ kfɨ, ɨ̀ we mɨ̀vɨl mɨ̀ olìfsɨ̀ ateyn. 8Wù gvî nɨ̀ ìfu ɨfwo ɨ yɨnɨ nâ yèynì sɨ̂ Bôbo Fɨyini ma wù fàytɨ nɨ̀ ɨ̀fwo nâ wèyn, wu fu sɨ̂ ngàŋ ndô Fɨyini wù ndu nɨ̀ ìnyeyni abaŋ ifu. 9Ngàŋ ndô Fɨyini ndû yi myèytɨ̀ ɨn lì ɨ nyòʼ sɨ dyèyn na ifu ateyn i nô ì jɨ̀m nɨn kelɨ Bôbo Fɨyini, a ghɨ ìfu ta ghɨ nyòʼ, yi lɨ̂mtɨ̀ fom sɨ̂ Bôbo Fɨyini. 10Abes ifu ɨfwo ɨ yɨnɨ nâ kì-à nɨn kelɨ Alòyn ŋêyn woyn ŋweyn, a ghɨ àbâs ifu ɨfwo ɨ yɨnɨ kì a ghɨ nyòʼ sɨ a ifu sɨ̂ Bôbo Fɨyini, kɨ layn kfeynɨ-a.
11“Ka wùl nɨ̂n læ̀ fu ifu ɨfwo ɨ yɨnɨ sɨ̂ Bôbo Fɨyini ma wù we meyn fɨ̀shɨ̀k ateyn bòm ta ghɨ n-kelɨ wi sɨ we fɨ̀shɨ̀k kèsa ɨlû ɨfwo ɨ yɨnɨ ifu ta ghɨ n-nyôʼ sɨ̂ Bôbo Fɨyini. 12Wùl kàʼ a wù gvi nɨ̀ fɨ̀shɨ̀k fɨ̀ nɨ̀ ɨ̀lû sɨ a mɨtam mɨ̀ àsɨ nɨ̀ ŋweyn, mɨtì ma ghɨ kàʼ ghɨ bû nyòʼ ɨ̀fwo nâ wèyn atû àbaŋ ifu ta ifu zɨ̀ a yi n-jofɨ̀, lɨ̂mtɨ̀ fom sɨ̂ Bôbo Fɨyini. 13Wùl ɨ̀ lî ìfu ɨfwo ɨ yɨnɨ nô mɨ ì kà sɨ fu sɨ̂ Bôbo Fɨyini, wu we fɨ̀ngvaŋ ateyn bòm ta fɨngvaŋ fɨ nɨn ghɨ nchwæ mɨ̀kàyn mzɨ̀ a Fɨyini fifɨ nɨ̂n yɨ zɨ̂ àŋena. Ka yi n-læ̀ lèsɨ sɨ we fɨngvaŋ a yi ifu.
14“Wùl ɨ̀ se sɨ fu ifu ɨfwo ɨ yɨnɨ sɨ̂ Bôbo Fɨyini nɨ̀ mɨ̀tam mɨ̀ àsɨ, a ghɨ àsaŋ, wu kaŋ ɨ gvà. 15Wù gvâ, wù we mɨ̀vɨl mɨ̀ olìfsɨ̀ baʼsɨ̂ nɨ̀ ìleŋ i atû àteyn, à n-ghɨ ìfu ɨfwo ɨ yɨnɨ. 16Ngàŋ ndô Fɨyini nɨn kelɨ sɨ myèytɨ ɨnkfɨ̂ŋ ɨ̀n lì mzɨ̂ a ghɨ fyes mɨvɨl ateyn baʼsɨ̂ nɨ̀ ìleŋ i nô ì jɨ̀m sɨ nyòʼ sɨ dyèyn na à n-kelɨ Bôbo Fɨyini ifu ateyn i nô ì jɨ̀m, a ghɨ ìfu ta ghɨ nyòʼ sɨ̂ Bôbo Fɨyini.