Leviticus 20

Ngeʼ sìsɨ̀ a wùl ɨ̀ nî mbɨ sɨ koli ŋweyn

¹Bôbo Fɨyini nɨ̀n bê meyn sɨ̂ Mosìs na, ²“Bè sɨ̂ ghelɨ Isìlæ̀ na, nô mɨ wul ɨ̀ Isìlæ̀ ɨ̀ kfà kèsa à n-ghɨ wul àtum ta wù n-chi a Isìlæ̀ kæ sɨ fu nô mɨ wâyn ŋweyn ɨ̀ kfà sɨ a ifu sɨ̂ fɨyini fifɨ̀ a ghɨ n-toŋtɨ na Molèk, a ghɨ na kelɨ sɨ zue ŋweyn. Wùl kæ mòm, a ghelɨ Isìlæ̀ na kelɨ sɨ tɨmlɨ sɨ zue ŋweyn nɨ̀ ngòʼsɨ̀. ³À fù nô mɨ ndà wayn ŋweyn sɨ̂ Molèk, a mà beyn jɨm sɨ̂ ŋweyn, ɨ̀ sàŋ fvɨ̀sɨ̀ ŋweyn sɨ a antêynɨ̀ nɨ̀ ghelɨ̀ ghem. Mɨ n-nì tèyn bòm ta wù bèbsɨ meyn ndô yem ɨ̀ wumsɨ mà, ɨ Fɨyini fɨ laynɨfɨ. ⁴Mɨtì ma wùl kæ sɨ fu wâyn ŋweyn ɨ̀ lvɨ̀ sɨ̂ Molèk, ghelɨ Isìlæ̀ yeyn, ɨ̀ lèm na àŋena bû yeyn ɨ̀ faŋ tɨ̀ zue wul àteyn, ⁵a mà beyn jɨm sɨ̂ wùl nâ vzɨ̀ nɨ̀ ìsas i ndo nɨ̀ ŋweyn i, baʼsɨ̂ nɨ̀ ghelɨ ghì a ghɨ jùmtɨ̀ ŋweyn nà koʼsɨ̂ Molèk nô ghɨ jɨ̀m, ɨ̀ fvɨ̀sɨ̀ àŋena sɨ a antêynɨ̀ nɨ̀ ghelɨ̀ ghem.

⁶“Mɨ n-bèyn jɨm sɨ̂ wùl vzɨ̀ a wù n-seʼ fyeŋ awo sɨ̂ ghelɨ mɨ̂nyaʼ, fî seʼ kɨŋ awo sɨ̂ ghelɨ ghì a ghɨ n-bɨf awo sɨ̂ nkfɨsɨ nsesɨ, jûmtɨ̀ àŋena koʼsɨ̂ mɨyini. Mɨ nì fvɨsɨ̀ ŋweyn sɨ antêynɨ̀ nɨ̀ ghelɨ Isìlæ̀.”

⁷“Yì lem ngêŋ sisɨ sɨ a nyɨŋ nà layna, bòm ta à n-ghɨ mà Bôbo Fɨyini, ɨ Fɨyini fifɨ. ⁸Yì na yvɨnɨ̂ tɨ̀saʼ temtɨ, jelɨ̀ kɨ ta tɨ n-bê. À n-ghɨ mà Bôbo Fɨyini, ɨ Fɨyini fîfɨ̀, a mɨ n-nî na yì na layna.”

⁹“À kæ te nô mɨ nda nà ŋweyn kèsà wù te Bò ŋweyn a ghɨ na kelɨ sɨ zue ŋweyn. Wùl ɨ̀ kæ te nà ŋweyn kèsa bò ŋweyn a à na ghɨ ma à kɨ̀ŋ kɨ̀ ŋweyn ikfɨ i ŋweyn nɨ̀ àwu a ŋweyn a.”

¹⁰“Wùl kæ sɨ chi nɨ̀ wî wùl a ghɨ na kelɨ sɨ zue ŋweyn baʼsɨ̂ kɨ nɨ̀ wùl ɨwi àteyn.”

¹¹“Wùl kæ sɨ chi nɨ̀ wî bò ŋweyn a à na ghɨ ma wù wumsɨ meyn bò ŋweyn, a ghɨ na kelɨ sɨ zue ŋweyn baʼsɨ̂ nɨ̀ wùl ɨwi àteyn, a ghɨ tì ma à kɨŋ kɨ àŋena kɨ̀ŋ ikfɨ i àŋena.”

¹²“Wùl ɨ̀ kæ sɨ chi nɨ̀ wî wâyn ŋweyn a à na ghɨ ma wù kwo meyn nkfɨm ghɨ kelɨ sɨ zue ŋweyn baʼsɨ̂ nɨ̀ wùl ɨwi àteyn, a ghɨ tì ma à kɨŋ kɨ àŋena kɨ̀ŋ ikfɨ i àŋena.”

¹³“Wùl ɨ lûmnɨ̀ ti kæ kasi chi nɨ̀ wùl ɨ lûmnɨ̀, a à na ghɨ ma àŋena nî meyn ìwo yi chaʼnɨ-à, ghɨ kelɨ sɨ zue àŋena kɨ ghɨ̀ jɨ̀m, a ghɨ ma à kɨŋ kɨ àŋena kɨ̀ŋ ikfɨ i àŋena.”

¹⁴“Wùl ɨ̀ kæ li wul sɨ a wi, ɨ̀ fì lì wâyn ŋweyn, a à na ghɨ kɨ nô ìwo i bzɨ-i. Yi kæ gàyn tî a ghɨ na kelɨ sɨ nyòʼ àŋena ɨvɨ̀s ta ka awo a bɨ-a nâ kì mæ sɨ a yi antêynɨ̀.”

¹⁵“Wùl ɨ̀lûmnɨ̀ kæ sɨ chi nɨ̀ nyàm, a ghɨ na kelɨ sɨ zue ŋweyn sɨ zue kɨmɨ nyam àteyn.”

¹⁶“Wul ɨwi kæ sɨ nì nyàm chi nɨ̀ ŋweyn a ghɨ na kelɨ sɨ zue wul ɨ wi àteyn baʼsɨ̂ kɨ nɨ̀ nyàm nâ zɨ̀, a ghɨ ma à kɨŋ kɨ àŋena ikfɨ i àŋena.”

¹⁷“Wul ɨ̀ kæ lì jêmtɨ̀ ŋweyn sɨ a wi kèsa a à n-ghɨ jêmtɨ̀ ŋweyn ɨlvâ ɨ̀mòʼ ma wâyn bò ŋweyn a, ɨ̀ chi nɨ̀ ŋweyn a à na ghɨ ìwo i wuminɨ-i. Wùl kæ mòm iwo nâ yèynì a ghɨ na kelɨ sɨ fu ngeʼ sɨ̂ ŋweyn, sɨ fì sɨ sàŋ sɨ fvɨ̀sɨ àŋena sɨ antêynɨ̀ nɨ̀ ghelɨ Fɨyini.”

¹⁸“Wùl ɨ̀ ti kæ chi nɨ̀ wùl ɨwi wu ghɨ ɨlvɨ nɨ̀ ŋweyn, a à na ghɨ ma àŋena dyeyn meyn àlêʼ kì a mɨ̀lûŋ nɨn fvɨ̂ ɨwuyn nɨ̀ wùl ɨwi àteyn, ghɨ kelɨ sɨ sàŋ sɨ fvɨsɨ àŋena sɨ a antêynɨ̀ nɨ̀ ghelɨ̀ Fɨyini.”

¹⁹“Ka wùl nɨn læ̀ chi nɨ̀ wâynà nà ŋweyn kèsa nɨ̀ jêmtɨ̀ bò ŋweyn bòm ta wù mòm a à na ghɨ ma wù wumsɨ meyn wul ìsas i ndo nɨ̀ àŋena, ghɨ kelɨ sɨ fu ngeʼ sɨ̂ àŋena.”

²⁰“Wùl ɨ̀ kæ chi nɨ̀ wî wâynà bò ŋweyn a à na ghɨ ma wù wumsɨ meyn wâynà bò ŋweyn. Wùl mòm iwo nâ zɨ̀ a ghɨ na kelɨ sɨ fu ngeʼ sɨ̂ ŋweyn na wùl sɨ ateyn læ̂ faŋ tɨ̀ bzɨ wayn nô ta ka àŋena læ̂ kfɨ̀tɨ.”

²¹“Wùl ɨ̀ kæ lì wî wâynà ŋweyn sɨ a wi, a à na ghɨ ma wù ni meyn ìwo yi layn wi ta isaʼi nɨn dyêyn, fì wùmsɨ wâynà ŋweyn. Wul mòm, a ŋêyn wul ɨ wi nâ vzɨ̀ læ̂ faŋ tɨ̀ bzɨ wayn nô ta ka àŋena læ̂ kfɨ̀tɨ.”

²²“Yì na yvɨnɨ̂ tɨ̀saʼ têmtɨ nô tɨ̀ jɨ̀m nî kɨ ta tɨ n-bê ta ka ilaʼ zɨ̀ a mɨ n-lî zɨ nɨ̀ zɨ̀ ateyn læ faŋ tɨ̀ mò zɨ. ²³Yi n-kelɨ wi sɨ nà chî nchînɨ̀ sìsɨ̀ a ghelɨ tɨlaʼ ghèyn a mɨ n-sàŋ fvɨ̀sɨ a yi asɨ tèyn nɨn chi. Mɨ n-bâyn àŋena bòm àwo a bɨ-a nâ kèynà. ²⁴Mɨtì ma chfɨnɨ meyn sɨ̂ zɨ̀ na, ilaʼ i àŋena læ̀ nà kelɨ zɨ̀, na mɨ n-fsɨ ìlaʼ ateyn ɨ̀ fù sɨ̂ zɨ̀ a à na kelɨ kɨ nô zɨ̀. À n-ghɨ ìlaʼ jofà ɨfwo ɨ yɨnɨ ɨ koʼ ateyn nô a jûŋ. À n-ghɨ mà Bôbo Fɨyini, ɨ Fɨyini fifɨ fì a fɨ chòʼ zɨ na yì na ghɨ sɨ a nyɨŋ antêynɨ̀ tɨ̀laʼ tɨ litɨ a mbzɨ.”

²⁵“Yi n-kelɨ sɨ nà kya nyam sìsɨ̀ a sɨ n-layn kfeynɨ wi, kya ɨsîsɨ̀ a sɨ layn n-layn kfeynɨ ta isaʼi nɨn dyêyn. Yì n-kelɨ kɨmɨ sɨ nà kya mɨnyuyn mzɨ̀ a mɨ̀ n-layn kfeynɨ, kya ɨmzɨ̂ a mɨ̀ n-layn kfeynɨ wi ta isaʼi nɨn dyêyn. Ka yi n-læ̀ kfɨ̀l nyam kèsa fɨnyuyn, kèsa nô mɨ ghà ta kɨ n-ŋâŋlɨ̀ atû nse sɨ bebsɨ ngêŋ sisɨ wu layn wi ta isaʼi nɨn dyêyn. ²⁶Yi n-kelɨ sɨ nà layna, bòm ta nô mà Bôbo Fɨyini nɨn layna. Ma choʼ meyn lèm zɨ̀ sɨ a nyɨŋ antêynɨ̀ tɨ̀laʼ tɨ litɨ a mbzɨ na yì na ghɨ ghelɨ̀ ghem.”

²⁷“Yi n-kelɨ sɨ tɨmlɨ sɨ zue nô mɨ wùl ɨ lûmnɨ̀ ɨ̀kfà, kèsa à n-ghɨ wul ɨ wi a yi antêynɨ̀ ta wù fyeŋ fɨnyaʼ kèsa wù n-bɨf àwo sɨ̂ nkfɨ sɨ nse sɨ. Ghɨ n-zue-a a à na ghɨ ma a kɨŋ kɨ àŋena ikfɨ-i àŋena nɨ̀ ɨwu àŋena.”