Leviticus 22

¹Bôbo Fɨyini nɨn fi meyn bè sɨ̂ Mosìs na, ²“Bè sɨ̂ Alòyn ŋêyn woyn ŋweyn na, ka àŋena nɨ̂n wùmsɨ ìzɨyn ì yemi. Àŋena na tôʼnɨ̀ nɨ̀ tɨ̀fu tɨ laynɨ tìtɨ̀ a ghelɨ Isìlæ̀ nɨn gvî nɨ̀ ɨ̀nteyntɨ sɨ̂ mà. À n-ghɨ mà Bôbo Fɨyini.”

³“Bè sɨ̂ àŋena na, ‘À na koʼ nô mɨ àjâŋ à kà, ka wùl sɨ ateyn nɨ̂n kùm ìfu ta ghelɨ Isìlæ̀ gvì nɨ̀ ìnyeyni sɨ̂ mà layn wi ta isaʼi nɨn dyêyn. Wù kæ kùm, ka wu n-læ̀ fì kɨ̀ŋtɨ bàʼsɨ a ngùŋ àbaŋ ifu. À n-ghɨ mà Bôbo Fɨyini.’”

⁴“Wul ìsas i ndo nɨ̀ Alòyn na kelɨ ànsàsì, kèsa à n-fvɨ̂ musɨ ɨwuyn ɨ wul ɨ lûmnɨ̀ nɨ̀ ŋweyn, ka wu n-yɨ afo ma ghɨ fu meyn sɨ̂ mà nô ta ka wù to. Ngàŋ ndô Fɨyini kæ kùm afo kɨ layn wi têyn ta igvɨyn i wûl, kèsa wù sfɨ̀s mu mɨ̀ wàyn a, a wù na layn wi. ⁵Wù kæ kùm nô mɨ àfo a ŋaŋlɨnɨ-a, kɨ nî na wù na layn wi ta isaʼi nɨn dyêyn, kèsa wù kùm wul wu layn wi, kèsa nô mɨ ghà ta kɨ n-nî na wù na layn wi, a wù na layn wi ta isaʼi nɨn dyêyn. ⁶Ngàŋ ndô Fɨyini kæ kùm afo antêynɨ̀ ɨ̀fwo nâ ghàyn, a wù na layn wi sɨ chem aleŋ ɨlvɨ ikfa. Wù n-kelɨ wi sɨ yɨ ɨfwo ɨ yɨnɨ nɨ̀ ngàŋsɨ ndô Fɨyinisɨ̀ nô ta ka wù nî sù ɨ̀wuyn. ⁷Wu n-sù ɨ̀wuyn ŋweyn, a ɨchfɨ-iyvɨ nî sœ a wù na sɨ layn kfeynɨ-à ma wù kàʼ a wù yɨ ifu i laynɨ-i nâ zɨ̀-ì bòm ta à n-ghɨ ɨ̀fwo ɨ yɨnɨ nɨ̀ àŋena. ⁸Ngàŋ ndô Fɨyini nɨn kelɨ wi sɨ kfɨl njwò ma nyàm àteyn kfɨ̀ kfɨ kèsa ma à zuè nyam ɨ̀twaʼ, wù kfɨ̀l nô mɨ ɨlvɨ gha, a wù na layn wi ta isaʼi nɨn dyêyn. À n-ghɨ mà Bôbo Fɨyini.”

⁹“Ngàŋsɨ ndô Fɨyini sɨ̀ nɨn kelɨ sɨ nà lêm tɨsaʼ temtɨ bula tì a àŋena ni mbɨ, ɨ̀ kfɨ̀tɨ bòm ta àŋena bû yvɨ̀nɨ tɨ̀saʼ temtɨ. À n-ghɨ mà Bôbo Fɨyini, a nî mà na àŋena na layna.”

¹⁰“Wùl na ghɨ wi wul ìsas i ndo nɨ̀ ngàŋ ndô Fɨyini, ka wu n-læ̀ yɨ ɨfwo ɨ yɨnɨ nɨ̀ ngàŋsɨ ndô Fɨyini. À na ghɨ nô mɨ wul ɨ̀ gvinɨ, kèsa wul ɨ̀ felɨnɨ a ŋweyn a ndo ka wu n-yɨ. ¹¹Mɨtì ma ngàŋ ndô Fɨyini kæ yuyn akôs kèsa ghɨ bzɨ àkôs ateyn a ŋweyn a ndo, a akôs ateyn a na ghɨ ma kɨ kàʼ a kɨ yɨ ɨfwo ɨ yɨnɨ nâ wèyn. ¹²Wâyn ngàŋ ndô Fɨyini kæ bɨmi lum, bula wù fvɨ̂ isas i ndo nɨ̀ ngàŋ ndô Fɨyini, wù kaʼ wu bû fì yɨ ɨfwo ɨ yɨnɨ ɨ laynɨ nâ wèyn. ¹³Mɨtì wâyn ngàŋ ndô Fɨyini kæ fvɨ̀ lum kèsa lum àteyn kfɨ̀ kfɨ ŋêyn ŋweyn ɨ kelɨ wi woyn, wù kasi ndù nà chî abe nɨ̀ bò ŋweyn, wù kaʼ a wù yɨ ɨfwo ɨ yɨnɨ nɨ̀ ngàŋsɨ ndô Fɨyini kɨ ta wu nà n-lum yɨ. Wùl nɨ̀n kelɨ wi sɨ yɨ ɨfwo ɨ yɨnɨ nâ wèyn a ghɨ wi wul ìsas i ndo nɨ̀ ngàŋ ndô Fɨyini.”

¹⁴“Wùl ɨ̀ kæ jas yɨ ɨfwo ɨ yɨnɨ ɨ laynɨ, a wù na kelɨ sɨ kasi sɨ laʼ afo kì a wù yɨ sɨ̂ ngàŋ ndô Fɨyini sɨ fì sɨ lì a li-a sɨ gwòtɨ̀ ɨlwêʼ ɨ̀ twâyn sɨ li alêʼ àmoʼ sɨ fu sɨ yomtɨ atu àteyn. ¹⁵Ngàŋsɨ ndô Fɨyinisɨ̀ nɨn kelɨ wi sɨ nà nyablɨ nɨ̀ tɨfu tɨ laynɨ tìtɨ̀ a ghelɨ Isìlæ̀ nɨn gvî nɨ̀ nteyntɨ sɨ̂ Bôbo Fɨyini, ¹⁶sɨ nà visi-à ghelɨ bɨm yɨ ɨ̀fwo ɨ yɨnɨ ateyn kelɨ wi sɨ yɨ. Àŋena nì tî, a à na ghɨ ma ghɨ nî meyn mbɨ yì gvî nɨ̀ ngeʼ sɨ̂ àŋena, àŋena kelɨ sɨ làʼ. À n-ghɨ mà Bôbo Fɨyini, a nî mà na àŋena na layna.”

Tɨfu tìtɨ̀ a Bôbo nɨn bɨmi wi

¹⁷Bôbo nɨ̀n fi meyn bè sɨ̂ Mosìs na, ¹⁸“Taŋi sɨ̂ Alòyn ŋêyn woyn ŋweyn nɨ̀ ghelɨ Isìlæ̀ nô ghɨ̀ jɨ̀m ɨ bè sɨ̂ àŋena na, ‘Wùl ɨ̀ Isìlæ̀ kèsa wul ma wù gvì gvi a Isìlæ̀ na se sɨ fu ifu i nyoʼnɨ-i sɨ̂ Bôbo Fɨyini, a ghɨ ìfu sɨ luynsɨ ichfɨ̂nɨ̀ i ŋweyn kèsa ifu ta wù chòʼnɨ sɨ fu-a, ¹⁹a nà ghɨ nyam kèsa bzɨ i lûmnɨ̀ yi kelɨ wi nseʼi ma wù fvɨ̀sɨ̀ anòyn a nyamsɨ mbòloʼ kèsa anòyn a bzɨsɨ nɨ̀ ŋweyn, ta ka mà fsɨ ifu ateyn alèʼ nɨ̀ ŋweyn. ²⁰Ka wùl nɨ̂n gvì nɨ̀ nyàm sɨ a ifu yi kelɨ nseʼi bòm ta wù gvì a Bôbo faŋ tɨ̀ fsɨ̀ ifu ateyn. ²¹Wùl kæ nà gvî nɨ̀ ìfu i sɨ̂ Bôbo Fɨyini sɨ nà chi nɨ̀ mbôynɨ̀ kèsa sɨ luynsɨ ichfɨ̂nɨ̀, kèsa ifu ta wù chòʼnɨ, a nà ghɨ nyam ma wù fvɨ̀sɨ̀ anòyn a nyâmsɨ̀ kèsa bzɨ ma wù fvɨ̀sɨ̀ anòyn a bzɨsɨ nɨ̀ ŋweyn yi kelɨ wi nseʼi ta ka ma fsɨ ifu ateyn. ²²Ka wùl nɨn læ̀ gvì nɨ̀ nyàm sɨ fu sɨ̂ Bôbo ma yì fef meyn kèsa yì lvɨ̀ŋ lvɨŋ kèsa ghɨ yàʼ yaʼ kèsa yì n-kelɨ àdzɨ̀ kɨ lum yum wi-a, nɨ̀ nkàysɨ̀ kèsa à ku ighasàghàsà. Ka wùl nɨ̂n læ̀ lem ìnki nyâm tèyn atû àbaŋ ifu sɨ fu sɨ̂ Bôbo Fɨyini sɨ ifu ma ghɨ nyòʼ nyoʼ. ²³Wùl kàʼ a wù fu mbòŋ kèsa njɨ̀ ma yì lvɨŋ meyn kèsa yì kfɨ̀s kfɨs sɨ ifu ta wù chòʼnɨ sɨ fu, mɨtì ma wù fù sɨ ifu sɨ luynsɨ ichfɨ̂nɨ̀ ma bû fsɨ. ²⁴Ka wùl nɨn læ̀ fu ifu sɨ̂ Bôbo Fɨyini nɨ̀ nyàm yi kelɨ àlemtɨ a fyeŋsɨ ajì kèsa ghɨ ghɨ yàʼ yaʼ. Ka yi n-læ̀ mòm ìnkì iwo tèyn a yi ilaʼ. ²⁵Ka wùl nɨ̂n læ̀ fu ifu ɨfwo ɨ yɨnɨ nɨ̀ nyàm ma wù fsɨ̀ sɨ̂ wul àtum. Wù fu, ma bû fsɨ bòm ta yì n-kelɨ nseʼi.’”

²⁶Bôbo Fɨyini nɨn be meyn kɨmɨ sɨ̂ Mosìs na, ²⁷“Bzɨ na bzɨ̂ wayn kèsa a bzɨ nyam mbòloʼ, wayn àteyn ɨ faŋ kɨ a ngùŋ nɨ̀ nà ateyn sɨ a mɨchi nsòmbo. À na ghɨ a mɨchi nfama a wayn nyàm àteyn na kfeynɨ-à sɨ fu sɨ ifu ma ghɨ nyòʼ nyoʼ sɨ̂ Bôbo Fɨyini. ²⁸Ka wùl nɨ̂n læ̀ sɨ̀ nyâm mbòloʼ kèsa njɨ̀ nɨ̀ wàyn àteyn sɨ ifu achi àmòʼ.”

²⁹“Wùl na gvî nɨ̀ nyàm sɨ fu àyòŋnɨ̀ ateyn sɨ̂ Bôbo Fɨyini wu fu a dzɨ ghè a isaʼi nɨn dyêyn ta ka Bôbo Fɨyini fsɨ ifu ateyn. ³⁰Wù fu ghɨ kfɨl njwò àteyn nô ì jɨ̀m kɨ̀ achi nâ ghè, ka ɨtuʼ nɨn layn kòli àlêʼ ateyn. A n-ghɨ mà Bôbo Fɨyini.”

³¹“Yì na yvɨnɨ̂ tɨ̀saʼ temtɨ nî kɨ ta tɨ n-bê. À n-ghɨ mà Bôbo Fɨyini. ³²Ka yi n-wùmsɨ mà. Ghelɨ Isìlæ̀ nô ghɨ̀ jɨ̀m nɨn kelɨ sɨ nà kya na mɨ n-layna. À n-ghɨ mà Bôbo Fɨyini a nî mà na yì na layna. ³³À n-læ fvɨ̀sɨ ma zɨ sɨ a Ijìb sɨ nà ghɨ Fɨyini fifɨ. À n-ghɨ mà Bôbo Fɨyini.”