Nehemiah 6

Sànbalàt ɨ nà bu choʼ kɨ àvɨ a Nèhèmayà.

¹À nà n-ghɨ ta Sànbalàt nɨ̀ Tobayà nɨ̀ Gheshèm ɨ wul ɨ̀ Alàb nɨ̀ mbàynɨ̀ seysɨ sɨ lisɨ yvɨ na ghèsɨ baʼlɨ meyn mèsì mbàyn àteyn ayemi a na bu ghɨ wi nô mɨ ta mɨ nà n-bu duʼ tɨ̀ ghàŋsɨ achfɨ̂ a mbàyn. ²Sànbalàt ŋêyn Geshèm ɨ tum bè sɨ̂ mà na mà gvi ghesɨ̀ àŋena koynɨ a ntèʼ ì lì ibal i Onò.

Àŋena nà n-bê tì, kalɨ mɨ̀nàŋ sɨ nì iwo i bzɨ-i sɨ̂ mà. ³Ma tum ɨ bè sɨ̂ àŋena na, “Mɨ nî ìfêl yi to nô sɨ a ŋaŋ. Mà kàʼ ma bû vìsi ìfêl sɨ kàlì sɨ yeyn zɨ.” ⁴Àŋena nɨn tum meyn ntum nâ yèyn sɨ̂ mà ìngal ì kæ̀, tum mɨ ɨlvɨ gha ma bêynsɨ kɨ ta mà nì bèynsɨ̀ sɨ asɨ.

⁵Wul ɨ̀ felɨnɨ nɨ̀ Sànbalàt ɨ se fì sɨ gvì na à na ghɨ ìngal ì tâyn, ɨ gvì nɨ̀ ŋwàʼlɨ̀ yi ghɨ àzɨ̀ azɨ ɨ fu sɨ̂ mà. ⁶Ŋwàʼlɨ̀ àteyn nà n-ghɨ ma ghɨ nyàʼ ateyn na

“Ghelɨ tɨlaʼ ghèyn a mbæ̀sɨ Jèlusalèm yvɨ meyn na, zɨ̂ ghelɨ Jûsɨ̀ nɨn baʼtɨ sɨ nu fòyn, à ti iwo zɨ̀ a yi n-kasi bâʼlɨ mbàyn Jèlusalèm. Iwo zɨ̀ a àŋena nɨn bê nɨn dyêyn na wà n-kɨŋ sɨ nà ghɨ fòyn àŋena. ⁷Ghɨ n-bê kɨmɨ na wà lem meyn nfèʼtɨ̀ sɨ ghaʼnɨsɨ a Jèlusalèm ta ka àŋena na jàŋ bê na, “Fòyn nɨn ghɨ a Judà.” Fòyn nɨn yvɨ ìwo nâ yèynì. Yi n-jofɨ̀ na wà gvi ghesɨ̀và duʼi ɨ̀ bèsɨ̀ ìwo nâ yèynì.”

⁸Ma tum ɨ bè sɨ̂ ŋweyn na, “Wà n-faytɨ̂ kɨ faytɨ awo nâ kèynà, nô ìwo-i ɨ ghɨ wi ateyn samoʼ.”

⁹Àŋena nà n-kɨŋ sɨ fàynsɨ ghes kfâʼ na ghès nɨn faynà njèŋsɨ àkœ ɨ̀ faŋ tɨ̀ mèsi ifêl ateyn.

Ma jèm ɨ bè na Bôbo Fɨyini fu adyaʼ sɨ̂ mà.

¹⁰A nà ghɨ achi a li-a ma ndù sɨ taŋi sɨ̂ Shèmayà ɨ wâyn Dèlayà ɨ wâyn Mèhetabèl wu ghɨ a ŋweyn a ndo ma ghɨ kɨŋ meyn fò. Wu bè sɨ̂ mà na, “Ghesɨ̀và ndu lèytɨ̀ a ndô Fɨyini, ɨ̀ kɨ̀ŋ achfɨ̂ a ndosɨ bòm ta mbàynɨ̀ shyasɨ nɨn baʼtɨ̂ sɨ gvì sɨ zue vâ nɨ̀ntuʼ. Àŋena nɨn gvì nɨ̀ntuʼ sɨ zue vâ.”

¹¹Ma bèynsɨ ɨ bɨf sɨ̂ ŋweyn na, “A wùl tèyn ta ma kàʼ a wù na leʼ ngeʼ a? A wùl a ma aleŋ kàʼ a wù na leʼ ìkfɨ ndû sɨ lèytɨ̀ a ndô Fɨyini a? Mɨ n-mòm wì!” ¹²Ma se sɨ kfâtɨ̀ ɨ keli na iwo nâ yèyni bû lù sɨ̂ Fɨyini fɨ. Mɨtì wu bê ìwo nâ yèynì sɨ̂ mà bòm ta Tòbayà ŋêyn Sànbalàt yuyntɨ meyn ŋweyn. ¹³Ghɨ n-yùyntɨ ŋweyn na wù faynsɨ ma mà ni mbɨ àŋena bebsɨ ìzɨyn ì yemi nà chyeʼa lûʼsɨ̀ mà.

¹⁴Ma jèm na Fɨyini femfɨ fu ngeʼ sɨ̂ Tòbayà ŋêyn Sànbalàt bòm awo kèynà a àŋena nì sɨ̂ mà têyn. Fu kɨmɨ ngeʼ sɨ̂ Nòwàdayà ɨ nfèʼtɨ̀ ì ghaʼnɨ i ki yèyn nɨ̀ nfèʼtɨ̀ sɨ lisɨ sìsɨ̀ a sɨ tî nà mômsɨ̀ sɨ nì na mà na faynà.

Ghɨ bàʼlɨ mèsì mbàyn Jèlusalèm

¹⁵À n-læ nà ghɨ a mɨchi mɨ̀vɨm ɨ̀m bò njvàsɨ̀ tâyn a njôŋ Elùl ifêl ateyn i ɨ mæ̀. Ifêl ateyn i nɨn læ lì mɨchi mɨ̀vɨm ɨ̀n tâyn njvàsɨ̀ bò. ¹⁶A nà ghɨ ta mbàynɨ seysɨ nɨ̀ tɨ̀laʼ tìtɨ̀ a tɨ jɨ̀ŋ kàli ghes yvɨ na ghèsɨ baʼlɨ meyn mèsì mbàyn Jèlusalèm, àŋena nà faynà fî wumi-à bòm ta àŋena nô ghɨ̀ jɨ̀m yeyn meyn na à fu Fɨyini adyaʼ ghèsɨ nî ifêl ateyn.

¹⁷À nà n-ghɨ kɨmɨ a mɨchi nâ ghè, chyeʼsɨ Judàsɨ̀ ɨ nyâʼ ŋwàʼlɨ̀sɨ̀ tum sɨ̂ Tòbayà, Tòbayà ɨ kasi nyâʼ bêynsɨ̀ sɨ̂ àŋena. ¹⁸Ghelɨ Judà ghɨ dvɨnɨ nà n-ti ibàm nɨ̀ Tòbayà bòm ta wu nà n-ghɨ lûm wâyn Shèkànayà ɨ wâyn Alà. A ghɨ tì ma wâyn ŋweyn Jèhòhanàn li meyn wâyn Meshulàm ma à ti wâyn wâyn Bèlèkayà sɨ a wi. ¹⁹Ghelɨ Judà nà n-timî a ma asɨ ghɨ nà fêʼtɨ̀ àwo a jûŋa kì a Tòbayà nì, yvɨtɨ̂ ɨ̀chfɨ̂ wom kasî ndû fêʼtɨ sɨ̂ ŋweyn. Ghɨ nà n-ndû fêʼtɨ̀ tì, Tòbayà ɨ nà sɨ nyàʼ ŋwàʼlɨ̀sɨ̀ tum sɨ fâynsɨ ma.