Numbers 34

Tɨghami tɨ ilaʼ i Kenàn

¹Bôbo Fɨyini nɨn be meyn sɨ̂ Mosìs na, ²“Bè sɨ̂ ghelɨ Isìlæ̀ na, ‘Yi ndù zɨ̂ ilaʼ i Kenàn afî a mɨ n-fu sɨ̂ zɨ̀ a tɨghami titɨ na ghɨ a dzɨ ghâyn:

³“‘Ighami ì zɨ-i abàs itsɨyn nɨn lù a nse ìyum a Zîn ndù chèm a ighami i Edòm, a à na ghɨ abàs ghè a ɨchfɨ̂-iyvɨ i nɨn sal ateyn, a ighami ì zɨ-i zɨtɨ a jvâ fɨ̀ngvaŋ abàs itsɨyn, ⁴ɨ̀ lù afu ɨ̀ dyàŋ dzɨ abàs itsɨyn a Skobiyon Bâs ɨ̀ ndù tòynɨ a nse ì yum a Zîn a Kadesh Banìyà abàs itsɨyn ɨ̀ kæ ndù a Haza Adà ɨ̀ lù afu ɨ̀ ndu chem a Azmòn. ⁵Ighami ateyn nà n-lû a Azmòn yi ngol ndu chem afoŋlɨ a Ijìb ɨ kæ ndù sɨ gòʼsɨ̀ a jvâ Mèdìtèlenìyà.’”

⁶“‘Ighami ì zɨ-i abàs ghè a ɨchfɨ̂-iyvɨ i nɨn sœ ateyn na ghɨ a mbæ̀ jvà Mèdìtèlenìyà.’”

⁷“‘Ighami ì zɨ-i abàs ikuè na lù a jvâ Mèdìtèlenìyà ndû chem a kfɨ̂yn Hôl, ⁸lû a kfɨ̂yn Hôl yi ndu chem a Lebo Hamàt ɨ dyaŋ ndù a Zedàd. ⁹Ighami ateyn nà n-lû a Zedàd ndû a Ziflòn ndû gôʼsɨ̀ a Haza Enàn. À ti ta ighami ì zɨ-i na ghɨ abàs ikuè.’”

¹⁰“‘Ighami ì zɨ-i abàs ghè a ɨchfɨ̂-iyvɨ i nɨn sal ateyn na zɨ̂tɨ̀ a Haza Enàn ndû chem a Shefàm. ¹¹Yi n-lù a Shefàm ɨ̀ kàlì a Liblà abàs ghè a ɨchfɨ̂-iyvɨ i nɨn sal ateyn a Ayìn, ɨ̀ chwò ɨwuyn kfɨyn abàs ghè a ɨchfɨ̂-iyvɨ i nɨn sal ateyn a jvâ Kinelèt. ¹²Ighami ateyn i nɨn lù afu, ɨ̀ kàlì dzɨ a mbæ̀ jvà Jodàn ɨ̀ ndù gòʼsɨ̀ a Jvâ Fɨ̀ngvaŋ.’”

“À ti tɨghami tɨ ilaʼ nɨ̀ zɨ̀ têyn tɨ̀ kæ̀.”

¹³Mosìs ɨ kæ bè sɨ̂ ghelɨ Isìlæ̀ na, “À ti ilaʼ zɨ̀ a Bôbo Fɨyini nɨn fu sɨ̂ zɨ̀. Yi n-kelɨ sɨ tɨm bèyʼ sɨ keli ɨlwêʼ vzɨ̀ a ka ghɨ fu sɨ̂ àsas a ndosɨ kèyn bulamòʼ nɨ̀ ghelɨ isas i ndo nɨ̀ Mànasè ghɨ li kɨ̀ ighel ta Bôbo Fɨyini bè na ghɨ fu sɨ̂ àŋena. ¹⁴Yi n-ghɨ tèyn bòm ta ghelɨ isas i ndo nɨ̀ Lubèn nɨ̀ ghelɨ isas i ndo Gâd nɨ̀ ghelɨ isas i ndo nɨ̀ Mànasè ghɨ li nà n-sɨ ghɨ ma ghɨ keli meyn ɨ̀lweʼ àŋena. ¹⁵Asas a ndosɨ nâ kèyna à bò nɨ̀ ghelɨ isas i ndo nɨ̀ Mànasè ghɨ li nà n-sɨ ghɨ ma ghɨ keli meyn ɨ̀lweʼ àŋena abàs a Jodàn ghè a ɨchfɨ̂-iyvɨ i nɨn sal ateyn injɨyn i Jèlikò.”

¹⁶Bôbo Fɨyini nɨ̀n bê meyn sɨ̂ Mosìs na, ¹⁷“Akeynà nɨn ghɨ àzɨyn a ghelɨ ghì a ghɨ n-kelɨ sɨ gwòtɨ ɨlwêʼ sɨ̂ zɨ̀ na à na kelɨ kɨ nô zɨ̀. À n-ghɨ Elezà ɨ ngàŋ ndô Fɨyini nɨ̀ Joshwà ɨ wâyn Nûn. ¹⁸Choʼ wul ɨ tisɨnɨ ɨ̀moʼ ɨ̀mòʼ nô mɨ isas i ndo ì kà àŋena na gàmtɨ̀ sɨ gwòtɨ ɨlwêʼ ateyn. ¹⁹Azɨyn a àŋena nɨn ghɨ:

Kalèb ɨ wâyn Jefunè

ɨ wul ìsas i ndo nɨ̀ Judà,

²⁰nɨ̀ Shemwèl ɨ wâyn Amihùd

ɨ wul ìsas i ndo nɨ̀ Simìyòn,

²¹nɨ̀ Elidàd ɨ wâyn Kislòyn

ɨ wul ìsas i ndo nɨ̀ Benjamìn,

²²kɨ̀mɨ nɨ̀ Bukì ɨ wâyn Joglì

ɨ wul ɨ̀ tisɨnɨ isas i ndo nɨ̀ Dân,

²³nɨ̀ Hanèl ɨ wâyn Efòd

ɨ wul ɨ tisɨnɨ isas i ndo nɨ̀ Mànasè ɨ wâyn Josèf,

²⁴nɨ̀ Kemwèl ɨ wâyn Shiftàn

ɨ wul ɨ tisɨnɨ isas i ndo nɨ̀ Eflèm ɨ wâyn Josèf,

²⁵nɨ̀ Elizafàn ɨ wâyn Banàk

ɨ wul ɨ tisɨnɨ isas i ndo nɨ̀ Zebulòn, ²⁶kɨ̀mɨ nɨ̀ Baltìyèl ɨ wâyn Azàn

ɨ wul ɨ̀ tisɨnɨ isas i ndo nɨ̀ Isakà,

²⁷nɨ̀ Amihùd ɨ wâyn Shèlomì

ɨ wul ɨ tisɨnɨ isas i ndo nɨ̀ Ashà,

²⁸nɨ̀ Bèdahèl ɨ wâyn Amihùd

ɨ wul ɨ̀ tisɨnɨ isas i ndo nɨ̀ Naftalì.”

²⁹À ti ghelɨ ghì a Bôbo Fɨyini nɨn læ bè na àŋena na gwôtɨ̀ ɨ̀lwêʼ sɨ̂ ghelɨ Isìlæ̀ ilaʼ i Kenàn.