Obadiah 1
1Akeynà nɨn ghɨ àwo kì a Bôbo Fɨyini fɨ̂fɨ̀ a fɨ ngàŋtɨ chwò nɨ̀n læ dyèyn a ndayn sɨ̂ mà, Obadaya, kùm ghelɨ ilaʼ i Edom.
Ntum gvi meyn sɨ̂ ghès ma yì lù sɨ̂ Bôbo Fɨyini.
Bôbo nì fu ngeʼ sɨ̂ ghelɨ Edòm
Wùl ɨ̀ ntum nɨ̀ Bôbo Fɨyini gvi meyn nɨ̀ ntum ma yì lù sɨ̂ Bôbo
ɨ̀ nà ndû sɨ̂ ghelɨ tɨ̂laʼ tɨ mbzɨ bê na,
“Yì lali ghesɨ̀nà seʼ iwoŋ ɨ̀ ndù nù Edòm
2Bôbo Fɨyini bè sɨ̂ ghelɨ Edòm na,
Yì na kya na mɨ n-ni-à, a yì fvɨ sɨ a ghelɨ ghì a ghɨ læ gòʼsɨ̀ antêynɨ̀ nɨ̀ ghelɨ mbzɨ.
Nô mɨ ndà læ̀ nà ki zɨ̀, kesɨ̂ kɨ kesɨ.
3Yì koʼ bàʼlɨ̀ ntoʼ zɨ atu ìwù ɨ̀ nà ghaŋsɨ̂ ɨ̀wuyn,
lɨsɨ̂ ngeŋ sisɨ bɨf na,
‘A n-suʼsɨ̂ ndà ghes a nse a?’
4Yi n-tâyn mɨ iyvɨ tî ta mbuʼ àwùmawum,
ma ghɨ sɨ suʼsɨ zɨ a nse.
À n-taŋî mà Bôbo Fɨyini.
5“Yì na kya na iwo i nɨn kolî zɨ.
Ba ghelɨ choŋnɨ kæ gvì a yi a ndosɨ nɨ̀ntùʼ,
ɨ̀ kòytì ndô sisɨ,
a àŋena li kɨ̀ ɨfwo vzɨ̀ a àŋena nɨn kôŋ ɨ vɨ̀si ɨvzɨ a ghɨ n-kôŋ wi.
Ba ghelɨ kæ kœ mɨtam, nì mɨ ghà,
a ghɨ visi ɨ̀nlɨ̀ atû fɨ̀kàʼ sɨ ilæ ta ka jèŋ kæ yaf wul a wù boŋ sàyntɨ ɨ̀ kfɨl?
6Mɨtì mbàynɨsɨ ghelɨ ndo nɨ̀ Esòsɨ̀ læ̀ gvi-à ɨ̀ se sɨ ghaytɨ sɨ fsɨ ɨfwo àŋena ɨ̀ sàs ɨ̀lwêʼ ɨ̀ kùmtɨ nô mɨ ghà.
Afo a juŋà læ̀ lêytɨ̀ wì alèʼ.
7Ghɨ n-chyeʼ zɨ̀ bê na yi n-kfâʼ na yi n-tofa mɨti wùl sɨ̂ zɨ̀ ɨ kya wi iwo. No mɨ ìlaʼ ɨkà ta zɨ̂ àŋena nɨn ghɨ nɨ̀ ɨ̀suyn lvɨ̂yn læ̀ kasî kêʼ zɨ̀.
Àŋena læ nyɨŋ a yi ibam̀ ndù vɨ̀si kɨ zɨ a yi ighami.
Ghelɨ læ lɨsɨ̂ zɨ̀ ɨ̀ kàsî kùtɨ zɨ̀, ghɨ tì ma zɨ̂ àŋena nɨ̂n læ nà yɨ kɨ amoʼ.
8À n-taŋî mà Bôbo Fɨyini.
Ghelɨ Edom nɨn n-kfâʼ na ghɨ n-tofa. A læ̀ nà ghɨ achi nâ ghè, a mà mesi kɨ mesi àŋena. Mà læ̀ bebsɨ̂ ghelɨ nô ghɨ̀ jim a Edom,
mà læ̀ bebsɨ̂ ghelɨ ghì a ghɨ koʼ dùʼi atû kfɨ̀ynsɨ a Esò, nà kfâʼ na àŋena nɨn yeyn kelî àwo kì a kɨ n-gâyn.
9Mɨ n-bê sɨ̂ và a Teman na, Sugèyʼ shyasɨ læ̀ yeyn ìwo i kaynɨ-i achi nâ ghè.
À læ̀ nà ghɨ achi (ikfɨ) nâ ghè,
a ghɨ mesɨ̀ ghelɨ sɨ atû kfɨ̀yn a Esò nô ghɨ̀ jɨ̀m
10Yi n-læ nà ghaytɨ̂ fsɨ ɨ̀fwo ghelɨ ndo nɨ̀ Jàkôb sɨ adyaʼ fî zuetɨ̂ àŋena, àŋena ghɨ woynà ghi.
Bòm tèyn, ma na bê na, mɨ nì ni-à a ghɨ faŋ nà boŋ zuetɨ̂ kɨ zuetɨ zɨ.
Iwumi nɨn faŋ a yi atu kɨ̀ samoʼ
11A n-læ meyn nà ghɨ ɨtu nâ ghè,
mbàynɨ̀sɨ àŋenasɨ gvì ɨ kòl mbàyn ɨ zɨ nà choŋ ɨ̀fwo àŋena, tɨm bèyʼ atû àteyn gwôtɨ-à, beʼì fvɨ̂ nɨ̀ ɨ̀ŋweyn ma yi bàs meyn ɨwuyn nà ti ki kɨ ki.
Yi n-læ nà n-laynsɨ̂ ghɨ kɨmɨ ta mbàynɨ̀sɨ àŋena nâ sìsɨ̀.
12Ngeʼ nɨn bû læ nà ghɨ sɨ koli woynà ghi a Juda tì na yì ki iwo ateyn yi fom fom.
Ghɨ n-bû læ nà ghɨ sɨ nà zuetɨ̂ àŋena, yi saŋlɨ̂ sàŋlɨ.
Àŋena nɨn bû læ nà ghɨ sɨ nà dzɨ-à, yi chyeʼ chyeʼ.
13Zɨ̀ ghelɨ Edom nɨn bû læ nà ghɨ sɨ zɨ a ntèʼ nɨ̀ ghelɨ̀ ghem
achi a ngeʼ nɨ̀ àŋena.
Ngeʼ i ghaʼnɨ nɨ̀n bû læ nà ghɨ sɨ koli àŋena achi nâ ghè na yì na kesɨ̂ àŋena.
Yi n-bû læ nà ghɨ sɨ nà ghaytɨ̂ sfɨ ɨfwo àŋena achi a ngeʼ nɨ̀ àŋena.
14Yi n-bû læ nà ghɨ sɨ timi afàf na àŋena se sɨ leʼnɨ yì na ghal zuetɨ̂ àŋena.
Yi n-bû læ nà ghɨ sɨ nà ghaytɨ̂ àŋena afu kasî fu sɨ̂ mbàynɨ̀sɨ àŋena.
Ngeʼ ighaʼnɨ nɨ̀n bû læ nà ghɨ sɨ̀ koli àŋena achi nâ ghè na yi na mom àwo nâ kèynà sɨ̂ àŋena.
15Achi a nsaʼ nɨ̀ Bôbo Fɨyini-à sɨ baʼsɨ̂ gvi-à,
wu ghɨ sɨ saʼ nô ghelɨ tɨ̂laʼ tɨ mbzɨ tɨ̀ jɨ̀m.
Wà n-læ nì mɨ ghà sɨ̂ àŋena, BÔBO ghɨ sɨ læ̀ sɨ kasi sɨ ni sɨ̂ và.
Wà n-læ meyn nì àwo sɨ̂ àŋena kɨ ghɨ sɨ kasi sɨ gayn sɨ̂ và.
16Mɨ n-læ meyn dyèyn ìwo sɨ̂ zɨ̀ a kfɨyn i laynɨ nɨ̀ mà,
yi yvɨ ilûm ɨ nà ku ta yì nyvɨ mɨlûʼ.
Mɨ n-se sɨ fu bôm mɨ̀lûʼ mɨ̀ ngeʼ nâ zɨ̀ sɨ̂ ghelɨ tɨ̂laʼ tɨ mbzɨ tɨlitɨ lvɨ̂yn
ɨ̀ nì a yì ku àŋena sɨ a nyɨŋ.
17Mɨtì ngeʼ nâ zɨ̀ nɨn læ̀ se sɨ koli àŋena, a ghelɨ ghì a ghɨ n-ghɨ atû kfɨ̂yn Zayòn bœ,
a kfɨyn ateyn kàsi nà ghɨ kfɨyn i laynɨ nɨ̀ mà.
Ghelɨ isas i ndo nɨ̀ Jàkôb læ̂ kàsi fsɨ ilaʼ i àŋena sɨ̂ ghelɨ ghì a ghɨ n-læ ghalɨ sfɨ.
18Ghelɨ ndo nɨ̀ Jakob læ̀ nà nyôʼtɨ̀ ɨ̀lweʼ ta ɨvɨs.
Ghelɨ ndo nɨ̀ wayn ŋweyn Josèf læ̀ nà fɨ ta ilemi ɨvɨ̀s.
Àŋena læ̀ nyôʼ ghelɨ ndo nɨ̀ Eso, a àŋena na fɨ ta ɨwi.
Nô wùl ɨ̀ mòʼ læ̀ faŋ wi antêynɨ̀ nɨ̀ àŋena bula ɨvɨs na vzɨ nyôʼ mèsì kɨ̀ mesi ŋweyn.
A n-taŋî mà Bobo Fɨyini
19Ghelɨ̀ ghem ghì a ghɨ nchi a nse iyum a Negèv læ̀ ghaytɨ̂ fsɨ
ɨ̀lwêʼ vzɨ̀ a ghelɨ Eso nɨn chi ateyn atu kfɨ̀ynsɨ.
Ghelɨ̀ ghem ghì a ghɨ n-chi isas kfɨynsɨ a Juda læ̀ ghaytɨ̂ fsɨ
tɨ̀baltɨ ghelɨ Fìlisiya ɨ̀ fsɨ̀tɨ gveynsɨ ghelɨ ndo nɨ̀ Efèlem a Samiliya.
Ghelɨ ndô Benjamin nɨ̀ ma læ̀ ghal sfɨ nse Gilèd.
20Ghelɨ Isìlæ̀ ghì a ghɨ n-læ ghaytɨ ndù nɨ̀ àŋena a tɨlaʼ tɨ lûtɨ̀ læ̀ kasî kfâ
ɨ ghal sfɨ Fonisiya kɨ̀ sɨ lù abàs ichɨyn sɨ koʼ sɨ chem a Zalefàd abàs ikuè.
Ghelɨ Isìlæ ghì a ghɨ n-læ ghaytɨ a Jelusalem ɨ li ndù nɨ̀ àŋena a tɨ̀laʼ tɨlûtɨ̀
læ̀ kasî sfɨtɨ̂ ntèʼ sîsɨ̀ a sɨ n-ghɨ abàs ichɨyn a Negèv.
21Ghelɨ Isìlæ̀ læ̀ yɨ-a ɨ̀ lù koʼ atû kfɨ̀yn a Jelusalem
ɨ̀ na saʼ ɨ̀lwêʼ vzɨ̀ a ghelɨ isas i ndo nɨ Eso nɨn chi ateyn.
Bôbo Fɨyini læ̀ nà ghɨ fòyn sɨ̂ ghelɨ ghì a n-chi ɨlwèʼ nâ ghàyn.