Psalms 5

Ijêm i wûl na Fɨyini fɨ na tisɨ̂ ŋweyn

Njàŋ ta Devìt nɨ̀n læ betɨ ɨ fu sɨ̂ nchfɨ̀ njàŋ na wù na fu-a ghɨ yema toŋ ndoŋsɨ.

¹Yvɨ gyâ yem a BÔBO

Toʼ ki mɨsɨ mèyn a ma asɨ.

²Yvɨ idzɨ̂ ì yemi ɨ gàmtɨ̀ mà.

Wà n-ghɨ Fɨyini femfɨ, wà n-ghɨ fòyn sɨ̂ mà,

À n-ghɨ ìjêm ì yemi sɨ̂ và.

³Ɨtuʼ nɨn layna a BÔBO wa yvɨ gyâ yem

Mɨ n-bɨs lalì-à ɨ̀ baʼtɨ ìfu ɨ̀ fù sɨ̂ và,

Ma nà sɨ yvɨtɨ̂ kɨ sɨ̂ và.

⁴Wà n-saŋlɨ̂ wì kûm àwo a bɨ-a;

Wà n-kôŋ wì sɨ yeyn wul àwo a bɨ-a.

⁵Wà n-kôŋ wì na wùl na fèlɨ̀ sɨ̂ và ghaŋsɨ̂ ɨ̀wuyn,

Wà n-kôŋ wì wul wu nî àwo a sœlɨnɨ-a.

⁶Wùl nɨ̀n wam ànkaŋ wa mèsi kɨ mesi ŋweyn;

Wà n-kôŋ wì sɨ yeyn wul, wu zue ghelɨ,

Wà n-kôŋ wì sɨ yeyn wul wu lɨsɨ̂ ghelɨ.

⁷Mɨtì ma mà kàʼ a mà zɨ a wa ndo,

Bòm ìkôŋ i mɨ̂kàyn nɨ̀ và,

Nà koʼsɨ̂ và fâyn và.

⁸Mbàynɨ̀ semsɨ nɨn dvɨ̂ kɨ tèyn a BÔBO,

Tisɨ ma mà na kasi saʼ kɨ̀ ta wà n-kɨŋ

Dyèyn dzɨsɨ àtì-ati nɨ̀ và sɨ̂ mà

⁹Àŋena nɨn yasì àchfɨ̂ a fvɨ̂ kɨ ànkaŋ;

Àŋena lum baʼtɨ̂ kɨ sɨ bebsɨ bebsɨ.

Achfɨ̂ a àŋena nɨn ghɨ ta tɨsê bula ghɨ tsɨyn;

Nô mɨ ta itaŋi àŋena nɨn fom.

¹⁰Saʼ àŋena a Fɨyini fɨ ɨ fu ngeʼ sɨ̂ àŋena.

Ni àŋena kasi fe kɨ̀ ɨtwam ghè a àŋena bèyntɨ̀.

Àŋena to meyn chwòsɨ̀ nɨ̀ àtu a,

Saŋ fvɨ̀sɨ àŋena sɨ a ilaʼ afêyn.

¹¹Mɨtì ɨ nì ghelɨ ghɨ̀ jɨ̀m ta ghɨ leʼ lèytɨ̀ a wa isas i tɨ̂wò na saŋlɨ-à;

Ni àŋena na lum yem kɨ yem njàŋsɨ̀ saŋlɨ-à.

Lèytɨ àŋena a wa isas i tɨ̂wò,

Ta ka ghelɨ ghì a ghɨ n-kôŋ vâ na dyala kûm và.

¹²Samoʼ a BÔBO, wà n-boysɨ̂ ghelɨ àtì-ati;

Ikôŋ ì zæ nɨn ghɨ ta nkyàsɨ iwòŋ sɨ̂ àŋena.