Psalms 53
This book is a draft. It has been translated but has not yet finished checking, and is published here so the community can read and respond to it.
Ghelɨ ghɨ li nɨn kya wi Fɨyini
Njàŋ ìkòynsɨ isuyn ta Devìt nɨ̀n læ betɨ ɨ fu sɨ̂ nchfɨ̀ njàŋ
1Ɨ̀ngu nɨn lêm kɨ a àŋena ikfàʼtɨ̀ na,
“Fɨyini fɨ̀ lum zɨ̂ wì a wùl iwo.”
Àŋena lum ngvɨynɨ̂ kɨ ngvɨynɨ awo. Àŋena lum kwô kɨ nkfɨmsɨ awo;
Wùl sɨ ateyn lum nî wì iwo i àtì-ati.
2Fɨyini fɨ̀ nɨn ghɨ iyvɨ ki suʼsɨ̂ nɨ̀ mbzɨ,
Ki sɨ yeyn na wùl nɨ̀n ghɨ a mbzɨ a wù n-kya iwo, fâyn Fɨyini a.
3Ghelɨ le meyn dzɨ nô ghɨ̀ jɨ̀m,
Nô mɨ ndà sɨ ngvɨynɨ̂ kɨ ngvɨynɨ awo;
Wùl sɨ ateyn lum nî wì iwo i àtì-ati, nô ɨ̀mòʼ.
4Ghelɨ awo a bɨ-a ti n-ghɨ na ghɨ læ̀ yeʼî wì iwo ma?
Àŋena nɨn ghaytɨ̂ fsɨ kɨ ɨ̀fwo sɨ̂ ghelɨ̀ ghem. Ghelɨ̀ ghem sɨ ghɨ kɨ gveynsɨ sɨ̂ àŋena.
Ghelɨ awo a bɨ-a lum bɨfɨ wi iwo sɨ̂ Fɨyini fɨ̀.
5Àŋena tî nà nî kɨ tì, tî nà sɨ kêʼ kɨ tèyn, ifayn ì ɨ ndû kɨ sɨ zue àŋena,
Alèʼ, iwo i ghɨ wi ateyn sɨ nà faynà,
Bòm ta Fɨyini fɨ̀ ti meyn gvâsɨ̀ kɨ̀ gvasɨ ghelɨ ghì a ghɨ tî nà nû zɨ̀;
Yi ti meyn wumsɨ àŋena bòm ta Fɨyini fɨ ti meyn mo àŋena.
6Mɨ n-lutɨ̂ sû jêm kɨ nô jem na, ibœ-ì lu a Zayòn gvì sɨ̂ Isìlæ̀!
Bôbo Fɨyini læ̂ kàsi fu ɨfwo ghelɨ ŋweyn,
Woyn Jàkôb ɨ nà saŋlɨ-à, Ghelɨ Isìlæ̀ ɨ dyala.