1 Chronicles 11

Devìt ɨ koʼ ɨfôyn a Isìlæ̀

¹A n-læ nà ghɨ ta ghɨ dzɨ̀ meyn mèsi ikfɨ i Sôl, ghelɨ Isìlæ̀ ɨ ndu bè sɨ̂ Devìt na, “Wà n-ghɨ tèyn ghɨ kɨ nô wâynà wes sɨ a ibzɨ. ²A n-læ nà ghɨ nô mɨ a ɨtuʼ nɨ̀ fòyn Sôl, a lum lì seʼ kɨ và nɨ̀ ghelɨ Isìlæ̀ a ɨtwaʼ iwòyn. Wa n-læ nà ni tì bòm ta Bôbo Fɨyini nɨn læ meyn bè sɨ̂ và na, ‘Wà læ̀ nà ghɨ fòyn ghelɨ Isìlæ̀, ɨ ghelɨ̀ ghem, fî tisɨ̂ àŋena.’” ³Àŋena nɨn læ taŋi tî nô mɨ ɨlvɨ gha, ghɨ̀bo ntèʼsɨ Isìlæ̀ ɨ ndù sɨ̂ Devìt a ndô Fɨyini a Heblòn, ɨ yisi ŋweyn sɨ a fòyn kɨ̀ ighel ta Bôbo Fiyini nɨn læ chfɨ̀nɨ sɨ̂ Samwèl. ⁴Devìt ŋêyn ghelɨ Isìlæ̀ nɨn læ meyn ndù sɨ nu ghelɨ ntèʼ a Jèlusalèm. A n-læ nà ghɨ tì ghelɨ Jebùs ghì a ghɨ n-læ ku ntèʼ Jelusalèm ɨ bu chî kɨ afu. ⁵Àŋena nɨn be meyn sɨ̂ Devìt na, “Wà læ̀ zɨ̂ wì a ntèʼ afêyn.” Mɨtì Devìt ɨ tɨm yɨ ntèʼ Zayòn, ɨ kfɨnɨ ɨ̀zɨyn ateyn ghɨ nà sɨ jàŋ na Nteʼ Devìt. ⁶A nà ghɨ tì ma Devìt be meyn sɨ̂ ghelɨ ŋweyn na à timi nô mɨ ndà asɨ, ghɨ tɨm yɨ̀ Jebùs, a yì koʼsɨ ŋweyn sɨ atu a sugèyʼsɨ̀. Jowàb nɨn læ meyn tɨmi asɨ, ghɨ tɨm yɨ, fòyn Devìt ɨ lèm ŋweyn sɨ atu a sugèysɨ̀. ⁷A n-læ nà ghɨ ta Devìt ŋêyn ghelɨ ŋweyn tɨm yɨ ntèʼ Jebùs nô mɨ ɨlvi gha, wu ndu nà sɨ chi afu, ghɨ nà sɨ toŋtɨ̂ ntèʼ ateyn na ntèʼ Devìt. ⁸Devìt nɨn læ meyn bè ghɨ kasi bàʼlɨ̀ ntèʼ ateyn, kɨ̀ sɨ zɨ̀tɨ̀ alèʼ ghè a ghɨ n-læ kfɨ̀ysɨ a ighami, sɨ ndù sɨ chem a mbàyn afî a yì nà n-jɨ̂ŋ kal ntèʼ. A n-læ kasi làysɨ Jowàb ŋêyn ghelɨ ŋweyn ɨ̀ làysɨ̀ àbas a ntèʼ Jebùs a li-a. ⁹Adyaʼ a Devìt a nɨn læ meyn nà kfeynsɨ̂ ndu kɨ ndu, bòm ta Bôbo Fɨyini fɨ ghaʼnɨ fɨ nɨn læ nà gamtɨ ŋweyn.

Ghelɨ iwòŋ ghɨ bemnɨ nɨ̀ Devìt

¹⁰Ighêyn nɨn ghɨ ɨ̀tu sugèyʼsɨ ɨbemnɨ nɨ̀ Devìt a wzɨ̀ a wu n-læ chɨ̀yntɨ ŋêyn ghelɨ Isìlæ̀, ɨ lèm Devìt sɨ a fòyn, ɨ fi gàmtɨ̀ na wù na saʼ kɨ ìlaʼ ìjɨ̀m, kɨ̀ ighel ta Bôbo nɨn læ chfɨ̀nɨ. ¹¹Akeynà nɨn ghɨ àzɨyn a ghelɨ iwòŋ ghɨ bemnɨ nɨ̀ Devìt; Atu àŋena nà n-ghɨ Jashobìm ɨ wul ɨ̀ Hakmonì, ma wu n-læ meyn nù ghelɨ ighɨ ìtal achi a li-a, ɨ zuetɨ kɨ ghɨ̀ jɨ̀m. ¹²Wùl vzɨ̀ a wu nà n-kûmtɨ̀ sɨ̂ ŋweyn nà n-ghɨ Èlizà, ɨ wâyn Dodày, ɨ wul ɨ̀ Ahòwà. ¹³Èlizà nɨn læ nà ghɨ ŋêyn Devìt achi ghè a ghelɨ Fìlisyà gvì sɨ nu ghelɨ Isilæ a Bas Damìm, a gvêyn balì, sugèyʼsɨ Isilæ sɨ nyɨŋnɨ. ¹⁴Mɨtì, Èlizà ŋêyn Devìt ɨ timi ɨ kèʼ ghelɨ Fìlisyà, Bôbo ɨ gàmtɨ̀, àŋena tɨm yɨ ghelɨ Fìlisyà.

¹⁵Devìt nɨn læ nà kelɨ sugèyʼsɨ tosɨ mɨ̀vɨm ɨ̀ntal antêynɨ̀ sugèyʼsɨ nɨ̀ ŋweyn. A n-læ meyn nà ghɨ achi a li-a, sugèyʼ sɨ lisɨ ateyn sɨ̀tal ɨ lu ndù ɨ yeyn Devìt a ifò ghè a wu n-læ leytɨ̀ ateyn, baʼsɨ̂ a ntèʼ Adulàm. A n-læ nà ghɨ tì, sugèyʼsɨ Fìlisyà sɨ ghɨ ma sɨ ndu meyn bɨ̀ a Lefèm. ¹⁶Devìt nɨn læ nà ghɨ alèʼ aleytɨna nâ ghè tì, anoyn a ghelɨ Fìlisyà ɨ ghɨ ma kɨ gvi meyn nà chi a Betɨ̀lèhêm. ¹⁷A n-læ meyn nà ghɨ achi a li-a, ɨtoŋ mu ɨ yum Devìt, wu kæ sɨ bè na, “Ndà sebtɨ mu a ibɨ imu a ɨchfɨ ntèʼ Jèlusalèm, ɨ̀ fu mà nyvɨ a!” ¹⁸Wu n-læ dzɨ̀ ɨtoŋ mu tî, sugèyʼsɨ tosɨ nɨ̀ ŋweyn sì sɨ̀ tal ɨ ndu, ɨ nù, ɨ teynɨ chwò antêynɨ̀ nɨ̀ ghelɨ Fìlisyà, ɨ ndu tu mu a ibɨ imu nâ ghè a ɨchfɨ ntèʼ Jèlusalèm, ɨ gvi fu sɨ̂ Devìt na wù nyvɨ. Devìt ɨ fsɨ mu mɨ̀ àteyn ɨ faŋ tɨ̀ nyvɨ mɨtì ɨkwo sfɨ̀s a nse sɨ̂ Bôbo Fɨyini sɨ a ifu. ¹⁹Wu n-læ nà ni tì, bê na, “Mà kaʼ ma bû mòm sɨ nyvɨ mu nâ mèyn, mà kæ nyvɨ, a yi na kèʼ ta ma nyvɨ meyn mɨ̀luŋ mɨ̀ ghelɨ̀ ghem ghèyn bòm ta àŋena nu meyn bæ̀ sɨ kfɨtɨ, jæ ta ka àŋena tu mu nâ mèyn.” À ti tɨ̀nkì tɨ awo a bemnɨ-a kì a ghelɨ ghɨ to nɨ̀ Devìt nâ ghì ghɨ̀tal tì nɨn læ nà ni. ²⁰Àbishày ɨ waynà Jowàb nɨn læ nà ghɨ àtu a ghelɨ ghɨtonɨ nâ ghì mɨ̀vɨm ntal, bòm ta wu n-læ zuetɨ ghelɨ Fìlisyà ighɨ ìtal, mɨtì bula wù nî àwo kì a ghelɨ nâ ghèyn ghɨtal nɨn læ nì. ²¹A n-læ nà ghɨ antêynɨ̀ ghelɨ ghɨ to nâ ghì mɨ̀vɨm ɨ̀ntal, Àbishày ɨ ngaŋtɨ̂ chwo àŋena kɨ ghɨ̀ jɨ̀m nô mɨ ta wu nà n-ghɨ wi antêynɨ̀ nɨ̀ ghelɨ nâ ghì ghɨ̀tal.

²²Wâyn Jèhoyadà, ɨ Bènayà nɨn læ nà ghɨ kɨmɨ wul ɨ̀tonɨ ɨ̀lvì, ma wù fvɨ̀ a ntèʼ Kabzìl, môm àwo a bemnɨ-a. Wu n-læ meyn zuetɨ sugèyʼ sɨ Mowàb sɨ bemnɨsɨ . A læ nà ghɨ achi a li-a, ma iyvɨ i suʼi meyn, ɨlwêʼ na leyna, wu zɨ kàlì a ibɨ, ɨ zue bzɨ̀kem. ²³A n-læ meyn nà ghɨ kɨ mɨ achi a li-a, wu leŋ zue wul ɨ̀ Ijìb ɨlvì wu dyêyf iyvɨ, chem ndù ntàm sɨ̀tal, kelɨ ìwoŋ awu yi dyeyfɨ̀ bema. Mɨtì Bènayà ɨ kèʼ ŋweyn kɨ nɨ̀ mbàŋ, ɨ ghalɨ fsɨ iwoŋ nâ zɨ̀ a ŋweyn awu, ɨ chuʼ zue ŋweyn nɨ̀ ìnyeyni. ²⁴À ti awo abemnɨ kì a Bènayà nɨn læ nà ni. Wu nà n-boŋ to àdyaʼ kɨ̀ ta ghelɨ ghɨ bemnɨ ghì ghɨ̀tal. ²⁵Wu n-læ nà ghɨ kɨ mɨ wul àdyàʼ ɨlvì antêynɨ̀ nɨ̀ ghelɨ ghɨ bemnɨ ghì mɨ̀vɨm ɨ̀ntal, mɨtì ghɨ wi antêynɨ̀ nɨ̀ ghelɨ ghì ghɨ̀tal. Devìt nɨn læ meyn lì ŋweyn sɨ a ŋweyna nchì. ²⁶Ghelɨ iwòŋ ghɨ bemnɨ nɨ̀ Devìt nâ ghì nɨn læ nà ghɨ Asahèl, ɨ wâynà Jowàb, nɨ̀ Elhanàn, ɨ wâyn Dodò a Betɨ̀lèhêm. ²⁷Ɨlvi n-læ nà ghɨ Shamòt, ɨ wul ɨ̀ Halòd, nɨ̀ Helèz, ɨ wul ɨ̀ Belòn, ²⁸nɨ̀ Ilà, ɨ wâyn Ikèsh a ntèʼ Tekowà, nɨ̀ Àbiyezà, ɨ wul ɨ̀ Anàt. ²⁹Kɨ̀mɨ nɨ̀ Sibekay ɨ wul ɨ̀ Hushà, nɨ̀ Ilay, ɨ wul ɨ̀ Ahowà. ³⁰Mahalày, ɨ wul ɨ̀ Netofà nɨn læ nà ghɨ kɨmɨ ɨlvì, nɨ̀ Helèd ɨ wâyn Banà, ɨ wul ɨ̀ Netofà, ³¹nɨ̀ Itày, ɨ wâyn Libày a ntèʼ Benjamìn, nɨ̀ Benayà ɨ wul ɨ̀ Bilatòn, ³²nɨ̀ Hulày vzɨ a wu nà n-chi a ibali Gâsh, nɨ̀ Abiyèl, ɨ wul ɨ̀ Albà, ³³nɨ̀ Azmavèt, ɨ wul ɨ̀ Bahalùm, nɨ̀ Eliyabà, ɨ wul ɨ̀ Shalbòn. ³⁴Woyn Hashèm, ɨ wul ɨ̀ Gizòn, nɨn læ meyn nà ghɨ kɨmɨ ateyn, nɨ̀ Jònatàn, ɨ wâyn Shagì, ɨ wul ɨ̀ Halà, ³⁵nɨ̀ Ahiyàm, ɨ wâyn Sakà, ɨ wul ɨ̀ Halà, nɨ̀ Elifàl, ɨ wâyn Ûl. ³⁶Hefà, ɨ wul ɨ̀ Mekelà nà n-ghɨ kɨmɨ ateyn, nɨ̀ Àhijà ɨ wul ɨ̀ Belòn, ³⁷nɨ̀ Hezlo ɨ wul ɨ̀ Kamèl, nɨ̀ Nalày, ɨ wâyn Ezbày, ³⁸nɨ̀ Jowèl, ɨ wâynà Natàn, nɨ̀ Mibhà, ɨ wâyn Haglì, ³⁹nɨ̀ Zelèk,ɨ wul ɨ̀ Amòn, nɨ̀ Nahalày, ɨ wul ɨ̀ Belòt vzɨ̀ a wu n-læ nà beʼi ɨfwo iwòŋ nɨ̀ Jowàb, ɨ wâyn Zelùyà. ⁴⁰Ilà ŋêyn Galèb, ɨ ghelɨ Jatì nɨn læ nà ghɨ kɨmɨ anòyn nâ ghè, ⁴¹nɨ̀ Uliyà, ɨ wul ɨ̀ Hît, nɨ̀ Zabàd, ɨ wâyn Ahlày, ⁴²nɨ̀ Àdinà, ɨ wâyn Shizà, ɨ wul ɨ̀ Lubèyn, a ghɨ àtu a sugèyʼsɨ a Lubèyn, tisɨ̂ sugèyʼsɨ̀ mɨ̀vɨm ɨ̀ntal. ⁴³Hanàn, ɨ wâyn Makà, nɨn læ nà ghɨ kɨmɨ ateyn, nɨ̀ Joshafàt, ɨ wul ɨ̀ Mitnà, ⁴⁴nɨ̀ Uziyà, ɨ wul ɨ̀ Ashtaròt, nɨ̀ Shamà ŋêyn Jeyèl, ɨ woyn Hotàm, ɨ wul ɨ̀ Alowà, ⁴⁵nɨ̀ Jediyæ̀l ɨ wâyn Shimlì, nɨ̀ wâynà ŋweyn Johà, ɨ wul ɨ̀ Tîz, ⁴⁶nɨ̀ Eliyèl, ɨ wul ɨ̀ Mahavà, nɨ̀ Jelibày ŋêyn Jòshàvayà, ɨ woyn Elnàm, baʼsɨ̂ nɨ̀ Itmà, ɨ wul ɨ̀ Mowàb. ⁴⁷Eliyèl nɨ̀ Obèd nɨ̀ Jasiyèl, ɨ wul ɨ̀ Mezobà, nɨn læ nà ghɨ kɨmɨ anòyn nâ ghè.