1 Chronicles 12

Sugèyʼsɨ Devìt sisɨ̀ a sɨ n-læ fvɨ̀ a ntèʼ Benjamìn

¹Akeynà nɨn ghɨ àzɨyn a sugèyʼ sisɨ̀ a sɨ n-læ ndù a ibàm nɨ̀ Devìt ɨtuʼ ghê a Sôl, ɨ wâyn Kîsh, sàŋ ŋweyn, wù leʼ ndù nà chî a Ziklag. Àŋena nà n-ghɨ anòyn a sugèyʼsɨ̀ afî a sɨ nà n-gamtɨ Devìt. ²Àŋena nà n-kelɨ mɨ̀nchya, kya sɨ tɨm awoŋ, fî kya sɨ tɨm ngòʼsɨ̀ kɨ nɨ̀ àkœ à jɨ̀mà. A nà n-ghɨ ghelɨ isas i ndo nɨ̀ Sôl, ma ghɨ fvɨ̀ a ɨchfɨ ndo nɨ̀ Benjamìn. ³Ghelɨ ghì a ghɨ nà n-tisɨ àŋena nà n-ghɨ woyn Shemà; ɨ Àhizà ŋêyn waynà ŋweyn Jòwâsh. Shemà nà n-ghɨ wul ɨ̀ ntèʼ Gibìyà. Ghelɨ ghɨ tisɨnɨ ghɨli nà n-ghɨ woyn Azmavèt, ɨ Jeziyèl nɨ̀ Belèt nɨ̀ Bèlakà, baʼsɨ̂ nɨ̀ Juhù, ɨ wul ɨ̀ Anatòt. ⁴Ishmayà, ɨ wul ɨ̀ Gibiyòn nà n-ghɨ kɨ mɨ anòyn nâ ghè, a ghɨ wul ɨ̀mòʼ antêynɨ̀ nɨ̀ ghelɨ ghɨ to afî mɨ̀vɨm ɨ̀ntal, ghɨ kɨmɨ sɨ a wul ɨ̀tisɨnɨ ɨ̀lvì ateyn. Ghɨli nà n-ghɨ Jèlìmayà nɨ̀ Jahazèl nɨ̀ Johanàn nɨ̀ Jozabàd, ɨ wul ɨ̀ Gedelà. ⁵Eluzày nà n-ghɨ kɨmɨ ateyn, nɨ̀ Jelimòt nɨ̀ Beliyà nɨ̀ Shèmaliyàm ŋêyn Shèfàtaya, ɨ wul ɨ̀ Halìf. ⁶Ghɨli nà n-ghɨ Elkanà nɨ̀ Ìshayà nɨ̀ Azalè nɨ̀ Jowezè, ŋêyn Jashobìm, ɨ wul ɨ̀ Kolà. ⁷Ghɨli nà n-fî ghɨ Jowelà ŋêyn Zebàdayà, ɨ woyn Jèlohàm, ɨ wul ɨ̀ Gedò. ⁸Ghelɨ Gâd ghɨli nɨn læ leʼ Sôl, ɨ ndu sɨ̂ Devìt alèʼ ghè a wù n-læ lèytɨ ateyn, ase ɨ yum. A n-læ̀ nà ghɨ sugèyʼsɨ, sɨ to àdyaʼ, kya sɨ tɨm iwoŋ, lum duʼ nô mɨ ɨlvɨ gha, gvɨ̂tɨ̀ kɨ sɨ nù. Àŋena nà n-kelɨ àdyaʼ a bzɨ̀kem, ɨwuyn i àŋena nyâŋsɨ̀ kɨ tèyn, àŋena nyɨŋ a kfɨynsɨ ta mɨchue. ⁹A n-læ nà ghɨ Ezè atu àŋena, Òbàdayà ɨ ghɨ ànkùmtɨ̀, Eliyàb ɨ ghɨ àntùmtɨ̀ a li-a. ¹⁰Mishmanà nà n-ghɨ kɨmɨ àntùmtɨ̀, ¹¹Atày ɨ ghɨ a li-a, nɨ̀ Eliyèl, ¹²nɨ̀ Jòhanàn nɨ̀ Elzabàd, ¹³nɨ̀ Jèlìmayà na ìvɨm, baʼsɨ̂ nɨ̀ Makbanày na . ¹⁴Ghelɨ Gâd nâ ghèyn nɨn læ nà ghɨ kɨ ɨ̀tu ɨ sugèyʼsɨ̀ ghɨ̀ jɨ̀m; wùl vzɨ̂ a wù læ gòʼsɨ̀ ateyn ɨ kelɨ àdyà sugèyʼsɨ̀ ɨvɨ, ɨvzɨ̂ a wù to gòʼsɨ̀ ɨ kelɨ àdyaʼ a sugèyʼsɨ̀ nkam kɨ̀ ŋêyn nìnyɨŋ. ¹⁵A n-læ nà ghɨ a bêŋ ilì, sugèyʼ nâ sèynsɨ̀ ɨ dyàŋ jvâ Jodàn a njoŋ ɨyî àsɨ, ma yì to meyn nà bema, ɨ ndu nù nô mɨ ndà ta wu nà n-chi a ijɨyn i jvâ afu, kɨ̀ sɨ zɨ̀tɨ̀ abàs ghè a ɨchfɨ̂ iyvɨ i nɨn sal ateyn, sɨ ndù sɨ chem abàs ghè a yi n-sœ ateyn. ¹⁶Ghelɨ ntèʼ Benjamìn ghɨli nɨn læ meyn boŋ leʼ ndu kɨmɨ sɨ̂ Devìt alèʼ nâ ghè a wu nà n-lêytɨ̀ ateyn. ¹⁷A n-læ nà ghɨ ta àŋena ndu tî wu làli fvɨ gvì sɨ a ifò afî a wu nà n-lêytɨ̀ ateyn ɨ taŋi sɨ̂ àŋena, ɨ bè na; “Yì kæ sɨ nà ghɨ tèyn ma yì gvì kɨ̀ nô nɨ̀ mbôynɨ̀ sɨ gàmtɨ ma, a ghesɨ̀nà na ghɨ kɨ sɨ afo àmoʼ, mɨtì ma yì kæ sɨ nà kɨŋ sɨ beʼlɨ ma sɨ̂ mbàynɨ̀ semsɨ nɨ̀ ɨ̀wu ɨ̀wom àzɨ-azɨ tèyn, a mà na jêm na à saʼ kɨ Fɨyini fɨ ghɨbo ghesɨ̀nà, sàʼ zɨ. ¹⁸Devìt nɨn læ taŋi tî, ayvɨs a Fɨyini-à ɨ kùm Amsày, kɨ̀mɨ àtu a sugèyʼ sisɨ̀ mɨ̀vɨm ɨ̀ntal a li-a, wu kæ sɨ be sɨ̂ Devìt na, “O, Devìt, ghèsɨ̀ nɨn ghɨ ghelɨ̀ ghya, ghèsɨ̀ na fèlɨ̀ sɨ̂ và a wâyn Jesì. Mɨ n-jêm nà Fɨyini fɨ̀ gamtɨ vâ, ɨ̀ gàmtɨ̀ ghelɨ̀ ghya, yì na ghalɨ mɨ ghà sɨ nì, yi nà ndû kɨ nɨ̀ àsɨ-a”. ¹⁹A n-læ nà ghɨ ta Devìt chɨ̀yntɨ̀ ŋêyn ghelɨ Fìlisìyà, ɨ̀ ndù sɨ nu Sôl, ghelɨ Mànasè ghɨli ɨ bèynlɨ̀ ɨ nà sɨ kwo tòʼ Devìt. Devìt ŋêyn ghelɨ ŋweyn nɨn bu læ gàmtɨ nô mɨ ghelɨ Fìlisiyà bòm ta ghelɨ Devìt nɨn læ meyn ki yeyn na, ghɨ kàʼ a ghɨ wuetɨ àŋena, ɨlvɨ ta Devìt kàsɨ leʼ ndù sɨ̂ Sôl, ɨ wul vzɨ̀ a wu nà n-felɨ̀ sɨ̂ ŋweyn. ²⁰A n-læ nà ghɨ ta Devìt kàsi leʼ ndù a Ziklàk, ghelɨ Mànasè ghêyn ɨ kasi leʼ gvì sɨ̂ ŋweyn; ɨ Adnà nɨ̀ Jozabàd nɨ̀ Jediyèl nɨ̀ Mikèl nɨ̀ Jozabàd nɨ̀ Eliyù, ŋêyn Zilèta, nô mɨ ndà ateyn nà ghɨ a Mànasè, tisɨ̂ sugèyʼsɨ̀ nkam. ²¹Àŋena nô ghɨ̀ jɨ̀m nɨn læ nà ghɨ sugèyʼsɨ̀, kelɨ àdyaʼ, tisɨ̂ sugèyʼ sɨ lisɨ, fî gâmtɨ̀ Devìt sɨ nu sugèyʼ sɨ lisɨ ɨlvɨ ta sɨ zɨ gvì sɨ fu ngeʼ. ²²Sugèyʼsɨ nà n-gvî kɨ achi nɨ̀ àchi a sɨ gàmtɨ Devìt, anoyn a sugèyʼsɨ nɨ̀ ŋweyna læ lema kɨ têyn, ɨ nà sɨ dvɨ̀ bema; ghɨ kɨ nô ta sugèyʼsɨ Fɨ̂yìnì.

Sugèyʼ sɨ lisɨ gvi kfeynsɨ sɨ̂ Devìt a Heblòn

²³Akeynà nɨn ghɨ àzɨyn a sugèyʼ sɨ lisɨ ta sɨ n-læ gvi kfeynsɨ sɨ̂ Devìt a Heblòn, ma àŋena baʼtɨ meyn ngeŋsɨ àŋena, nà gvɨ̂tɨ̀ kɨ sɨ nù sɨ fsɨ ɨfôyn ɨ Sôl, sɨ fù sɨ̂ Devìt, kɨ̀ ighel ta Bôbo nɨn læ bè; ²⁴Ighî a ghɨ n-læ fvɨ̀ a Judà nà n-ghɨ nkamsɨ ntufa nɨ ghelɨ ighɨ nfama, ma ghɨ beʼi meyn kyàsɨ iwòŋ nà gvɨtɨ̀ kɨ sɨ nù, ²⁵nɨ̀ sugèyʼsɨ Simìyòn sɨ̀ nkamsɨ nsòmbo nɨ̀ sugèyʼsɨ̀ ɨvɨ. ²⁶Sɨlisɨ n-læ lù a ntèʼ Levì nkam sɨ̀ kæ̀ nɨ̀ sugèyʼsɨ̀ ɨ ghɨ ntufa, ²⁷baʼsɨ̂ nɨ̀ Jèhoyadà, ɨ atu a sugèyʼsɨ a ntèʼ Alòyn ŋêyn sugèyʼsɨ̀ nkam sɨ̀ tal nɨ̀ sugèyʼsɨ̀ ighɨ nsòmbo. ²⁸Zadòk nɨn læ meyn nà ghɨ kɨ mɨ ateyn, ɨ wayndà, a ghɨ sugèyʼ, to-a, baʼsɨ̂ ŋêyn ghelɨ isas i ndo nɨ̀ àŋena ghɨli mɨ̀vɨm ɨ̀mbò. ²⁹Ghɨli nɨn læ fvɨ̀ a ntèʼ Benjamìn nkamsɨ̀ tal, a ghɨ ghelɨ Sôl ghì a ghɨ n-læ faŋ isas nɨ̀ ŋweyn sɨ koʼ sɨ chem ɨtuʼ nâ ghè. ³⁰Ghɨli nà n-ghɨ ghelɨ ntèʼ Eflèm mɨ̀vɨm ɨ̀mbo, a ghɨ sugèyʼsɨ̀, to àdyà, ghɨ kya kya àŋena a ntèʼ. ³¹Ghɨ̀lûmnɨ̀ læ fvɨ̀ a Mànasè nkam njvàsɨ̀ nfama, kelɨ àdyaʼ, ma ghɨ chòʼtɨ kɨ̀ azɨyn azɨyn na àŋena gvi lèm Devìt sɨ a fòyn ³²Ghɨli ghɨ tisɨnɨ ghɨli nɨn læ fvɨ gvi kɨmɨ a ntèʼ Yisakà ighɨ ì bò, bàgsɨ̂ ghelɨ ghì a ghɨ n-læ nà ghɨ àŋena isas isaʼ nô ghɨ̀ jɨ̀m, kya àwo kì a kɨ nà n-gâyn ɨtuʼ nâ ghè nô àjɨ̀m, kya ìwo zɨ̀ a ghelɨ Isìlæ̀ kàʼ a ghɨ ni. ³³Ghelɨ nɨn læ fvɨ̀ a ntèʼ Zebulùn nkam mɨ̀vɨm ɨ̀n tâyn, a ghɨ sugèyʼsɨ̀ kya ìwoŋ, gvɨ̂tɨ̀ sɨ nu nô mɨ ɨlva, kelɨ tɨnkì tɨ ɨfwo ighòŋ kɨ tɨ̀ jɨ̀m sɨ gàmtɨ Devìt ateyn. ³⁴Ɨtu ɨ sugèyʼsɨ ɨlvi nɨn læ fvɨ̀ a ntèʼ Naftalì nkam, baʼsɨ̂ nɨ̀ sugèyʼ sɨ lisɨ nkam mɨ̀vɨm ɨ̀ntal, njvàsɨ̀ nsòmbo, ma ghɨ beʼi meyn nkyàsɨ iwòŋ, baʼsɨ̂ nɨ̀ àwoŋa. ³⁵Ɨghî a ghɨ n-læ fvɨ̀ a ntèʼ Dân nɨn læ nà ghɨ nkam mɨ̀vɨm ɨ̀mbo, njvàsɨ̀ nfama nɨ̀ ghelɨ ighɨ ntufa. ³⁶Sugèyʼ sɨ lisɨ nà n-ghɨ ma sɨ lù a Ashè nkam mɨ̀vɨm ɨ̀n kæ̀, faytɨ̂ kya kɨ nô sɨ tɨm iwoŋ, ³⁷ghɨli lû dzɨ a Jodàn, abàs ghè a ɨchfɨ ɨyvɨ-i nɨn sal ateyn, nkam ɨvɨ nɨ̀ nkam mɨ̀vɨm ɨ̀mbò; a ghɨ ghelɨ Lubèyn nɨ̀ nɨ̀ ghelɨ Gâd, baʼsɨ̂ kɨmɨ nɨ̀ ghelɨ Mànasè ghɨli. ³⁸Ghelɨ nâ ghèyn nô ghɨ̀ jɨ̀m tèyn nɨn læ nà ghɨ kɨ sugèyʼsɨ̀ ta sɨ choʼnɨ sɨ toʼ Devìt. Àŋena nɨn læ sesɨ gvì a Heblòn ma àŋena baʼtɨ meyn na ghɨ n-lèm Devìt sɨ a fòyn a Isìlæ̀. Ghelɨ Isìlæ nô ghɨ̀ jɨ̀m nɨn læ nà bòŋ ghɨ ma ghɨ choʼnɨ meyn, ɨ̀ tìmi kɨ̀ sɨ ɨchfɨ ɨ̀mòʼ na Devìt nɨn koʼ ɨfôyn. ³⁹Ghelɨ ateyn nɨn læ chi mɨchi ɨ̀ntal afu ŋêyn Devìt, yɨ kɨ yɨ, nyvɨ-a, bòm ta ghelɨ àŋena nà n-ghɨ ma ghɨ gvi meyn nɨ̀ ɨ̀fwo ɨ yɨnɨ sɨ̂ àŋena. ⁴⁰Ghelɨ ghɨli nɨn læ meyn lu kɨmɨ a ntèʼ sɨ lisɨ a ndyèn tèyn ta ntèʼ Yisakà nɨ̀ ntèʼ Zebulùn nɨ̀ ntèʼ Naftalì, ɨ ɨ̀fwo ɨ yɨnɨ atû njàkâysɨ̀, nɨ̀ Kàmêlsɨ̀, nɨ̀ nyamsɨ kfaŋsɨ, nɨ sɨ mbòloʼsɨ, ɨ gvi fu sɨ̂ sugèyʼ nâ sèynsɨ̀. Ɨfwo ɨ yɨnɨ nà n-dvɨ-à, kɨ tɨ̀nki tɨ̀ jɨ̀m, baʼsɨ̂ nɨ̀ mɨlùʼ nɨ̀ nyamsɨ, nɨ̀ bzɨsɨ. Ghelɨ Isìlæ̀ nô ghɨ̀ jɨ̀m nɨn læ meyn nà saŋlɨ̂ nô sɨ a ŋaŋ.