1 Chronicles 15

Devìt ɨ li ndù nɨ̀ àntayntayn a Mɨ̂kàyn a Jèlusalèm

¹A n-læ nà ghɨ ta Devìt bàʼlɨ̀ mèsɨ̀ ntoʼ ŋweyn, wu faytɨ àlêʼ ta ka ghɨ gvi lèm àntayntayn a Mɨ̂kàyn ateyn, ɨ bàʼlɨ̀ fɨ̀twotɨ̂ fɨ ateyn afu. ²Devìt nɨn læ bàʼlɨ fɨtwotɨ̂ fɨ ateyn tì, ɨ kæ chwòsɨ isaʼ sɨ bè na; “À na bèʼì kɨ ghelɨ ndo nɨ̀ Levì antayntayn a mɨ̂kàyn nɨ̀ Fɨyini fɨ̀ bòm ta Bôbo Fɨyini læ meyn choʼ àŋena na ghɨ na bèʼì à, fî fèlɨ̀ sɨ̂ ŋweyn kɨ̀ sɨ a mɨlvɨ ɨ̀n jɨ̀m. ³Devìt nɨn læ meyn yvɨ̀ŋtɨ̀ ghelɨ Isìlæ̀ nô ghɨ̀ jɨ̀m a Jèlusalèm na ghɨ ndu lì gvì nɨ̀ àntayntayn a mɨ̂kàyn nɨ̀ Bôbo ɨ̀ lèm sɨ alèʼ ghè a wu n-læ faytɨ na ghɨ gvi lèm ateyn. ⁴Wu n-læ meyn yvɨ̀ŋtɨ̀ ghelɨ ndo nɨ̀ Alòyn basɨ̂ nɨ̀ ghelɨ ndo nɨ̀ Levì: ⁵A n-læ nà ghɨ ajàŋ nɨ̀ Kohàt, wu choʼ Yuliyèl sɨ a wul ɨ̀tisɨnɨ, baʼsɨ̂ nɨ̀ woynà ŋweyn ghɨli ɨvɨ nɨ̀ ghelɨ mɨ̀vɨm ɨ̀mbò. ⁶Wu n-læ ndù a isas i ndo nɨ̀ Mèlalì ɨ choʼ Ìsayà sɨ a wul ɨ̀tìsɨnɨ, baʼsɨ̂ nɨ̀ ghelɨ ighɨ ì bò nɨ̀ ghelɨ mɨ̀vɨm mbò. ⁷ɨ choʼtɨ ghelɨ ndo nɨ̀ Geshòn ɨvɨ nɨ̀ ghelɨ mɨ̀vɨm ɨ̀ntal, ɨ choʼ Juwèl sɨ atu isas i ndo afu. ⁸ɨ jàŋ ghelɨ ndo nɨ̀ Elizafàn ɨ ghɨ ìbò nɨ̀ Shemayà sɨ awul ɨtisɨnɨ nɨ̀ àŋena. ⁹Wu n-læ ndù a isas i ndo nɨ̀ Heblòn ɨ choʼtɨ ghelɨ mɨvɨm nfama, ɨ lèm Eliyèl sɨ a wul ɨtɨsɨnɨ. ¹⁰ɨ ndù a isas i ndo nɨ̀ Uliyèl, ɨ choʼtɨ ghelɨ ɨvɨ, nɨ̀ ghelɨ njvàsɨ̀ bò, ɨ lèm Àminadàd sɨ a wul ɨtɨsɨnɨ. ¹¹Devìt nɨn læ ni tî ɨ jàŋ Zadòk ŋêyn Àbiyatà, ɨ ngàŋsɨ ndo Fɨyini, baʼsɨ̂ nɨ̀ Uliyèl nɨ̀ Asayà nɨ̀ Jowèl nɨ̀ Shemayà nɨ̀ Eliyèl ŋêyn Àminadàb, baʼsɨ̂ nɨ̀ ghelɨ ndo nɨ̀ Levì. ¹²Wu n-læ jàŋtɨ àŋena tî ɨ bè sɨ̂ àŋena na “Yi n-ghɨ ɨ̀tu asas a ndo nɨ̀ Levì, zɨ̂ ghelɨ̀ ghi nɨn kelɨ sɨ lem ngeŋ sisɨ nɨ̀ ìlayni sɨ ndu sɨ li sɨ gvi nɨ̀ àntayntayn a Mɨ̂kàyn nɨ̀ Bôbo Fɨyini kì a Fɨyini fɨ ghelɨ Isìlæ̀ sɨ lèm alèʼ ghè mà fàytɨ na ghɨ lem ateyn. ¹³Bôbo Fɨyini, ɨ Fɨyini fɨ ghesɨ̀nà fɨ tî yàbsɨ ɨ̀toŋ sɨ̂ ghesɨ̀nà sɨ asɨ bòm ta a butî ndù zɨ̀ ghelɨ ndo nɨ̀ Levì sɨ li sɨ koʼ nɨ̀ ànkeyna. Ghesɨna butî bɨ̀f dzɨ zɨ̀ a Bôbo tî nà kɨŋ na ghɨ li koʼ nɨ̀ ànkeyna ateyn. ¹⁴Wu n-læ taŋi tî, ngàŋsɨ ndô Fɨyini, baʼsɨ̂ nɨ ghelɨ ndo nɨ̀ Levì ɨ lèm ngeŋsɨ àŋena nɨ̀ ìlayni sɨ ndù sɨ lì sɨ koʼ nɨ̀ àntayntayn a mɨ̂kàyn nɨ̀ Bôbo Fɨyini, ɨ Fɨyini fɨ Isìlæ̀. ¹⁵Ghelɨ ndo nɨ̀ Levì nɨn læ ndu bèʼi a àŋena mbèʼsɨ̀, ɨ ghal a mbàŋsɨ̀ afî a ghɨ tuŋ chwosɨ̀ a mɨ̂kol mɨ̀ àteyn, kɨ̀ ighel ta Bôbo Fɨyini nɨn læ tum Mosìs, wu bè. ¹⁶Devìt nɨn læ meyn bè sɨ̂ ghelɨ ghì a ghɨ n-tisɨ ghelɨ ndo nɨ̀ Levì na ghɨ choʼtɨ ghelɨ ndo nɨ̀ àŋena ghɨli sɨ a ghelɨ njàŋsɨ̀, ghɨ na yem njàŋsɨ̀, sàŋlɨ-à, buʼ tɨ̀luŋtɨ tɨ̂seʼ, fî chwaʼ àmbaʼ. ¹⁷Ghelɨ ghɨtisɨnɨ nâ ghì ɨ choʼ Hemàn, ɨ wâyn Juwèl nɨ̀ ghelɨ ndo nɨ̀ àŋena ghɨli, a ghɨ Asàf, wâyn Bèlìkayà ŋêyn Etàn, ɨ wâyn Kùshayà, ɨ ghelɨ ndo nɨ̀ Melalì. ¹⁸Àŋena nɨn n-choʼtɨ meyn kɨmɨ ghelɨ ndo nɨ̀ àŋena, a ghɨ Sàkàliyà nɨ̀ Jaziyèl, nɨ̀ Shemilamòt nɨ̀ Jehiyèl nɨ̀ Unì nɨ̀ Eliyàb nɨ̀ Bènayà nɨ̀ Màsiyà nɨ̀ Màtitiyà nɨ̀ Elifèleyù nɨ̀ Mikìneyà nɨ̀ Obed Edòm, baʼsɨ̂ nɨ̀ Jeyiyèl, sɨ a ghelɨ ghì a ka ghɨ na chì ndô Fɨyini. ¹⁹Ghelɨ njàŋsɨ têyn ta Hemàn nɨ̀ Asàf nɨ̀ Etàn nɨn læ nà kelɨ sɨ nà chwaʼ tɨ̀chaʼacha ma ghɨ faytɨ nɨ̀ ìdyani. ²⁰Sàkàliyà ŋêyn Aziyèl nɨ̀ Shemilamòt nɨ̀ Jehiyèl nɨ̀ Unì nɨ̀ Èliyèl nɨ̀ Màseyà ŋêyn Bènayà ɨ kelɨ sɨ nà toŋ tɨsoŋ kɨ ta isaʼ i njàŋsɨ-i nà n-dyêyn. ²¹Màtìtayà nɨ̀ Elifeleyù nɨ̀ Mìkneyà nɨ̀ Obèd-Edòm nɨ̀ Jeyèl nɨ̀ Àzaziyà ɨ kelɨ sɨ nà toŋ tɨsoŋ kɨ̀ ta isaʼ i njàŋsɨ-i nà n-dyêyn. ²²Ghɨ n-læ choʼ Kenanayàn atu a isas i ndo nɨ̀ Levì, na wù na tisɨ̂ ìyem i njàŋsɨ̀, bòm ta wu nà n-kya sɨ faytɨ sɨ yem njàŋsɨ̀. ²³Bèlìkayà ŋêyn Èlkanà nà n-ghɨ sɨ nà chi fɨtwotɨ̂ fìfɨ̀ a àntayntayn a mɨ̂kàyn a nɨn læ nà ghɨ ateyn. ²⁴Shèbànayà nɨ̀ Joshafàt nɨ̀ Nètaniyèl nɨ̀ Àmasàyì nɨ̀ Sàkàliyà nɨ̀ Benayà nɨ̀ Èlizà, ɨ ngàŋ ndô Fɨyini, nà n-kelɨ sɨ nà toŋ ndu nɨ̀ tɨ̀soŋtɨ asɨ antayntayn a mɨ̂kàyn nɨ̀ Fɨyini fɨ.Obed-Edòm ŋêyn Jehiyà nà n-kelɨ kɨmɨ sɨ nà chi fɨtwotɨ̂ fìfɨ̀ a àntayntayn a mɨ̂kàyn a nà n-ghɨ ateyn. ²⁵Ghɨ n-læ baʼtɨ mèsi nô mɨ ɨlvɨ gha, Devìt ŋêyn chyeʼsɨ Isìlæ̀ sɨ̀, nɨ̀ ɨ̀tu ɨ sugèyʼsɨ̀ vzɨ a wu n-tisɨ sugèyʼsɨ nkam nkam tì ɨ lu ndù sɨ lì sɨ gvi nɨ̀ àntayntayn a mɨ̂kàyn nɨ̀ Bôbo Fɨyini-à a ndo nɨ̀ Obèd-Edòm kɨ̀ nô nɨ̀ ìsaŋlɨ i. ²⁶Ghɨ n-fu meyn ìlum inyamsɨ mbòloʼ nsòmbo nɨ̀ ɨywaʼɨ kɨ̀mɨ nsòmbo sɨ a ifu sɨ̂ Bôbo Fɨyini, bòm ta wu n-læ meyn gàmtɨ̀ ghelɨ ndo nɨ̀ Levì ghi a ghɨ n-læ bèʼi àntayntayn a mɨ̂kàyn nɨ̀ ŋweyn. ²⁷Devìt nà n-ghɨ ma wù lafɨ meyn kɨ̀ no adàla ì jùŋ, ŋêyn ghelɨ ndo nɨ̀ Levì ghì nô ghɨ̀ jɨ̀m a ghɨ n-læ bèʼi antayntayn a mɨ̂kàyn, kɨ̀mɨ nɨ̀ ghelɨ njàŋsɨ, nɨ̀ Kènaniyà vzɨ̀ a wu nà n-tisɨ inôyn zɨ̀ a yi nà n-yem njàŋsɨ̀. Devìt nà n-ghɨ ma wù maʼ meyn kɨ̀mɨ ndzɨsɨ ngàŋsɨ ndô Fɨyini. ²⁸À ti dzɨ zɨ̀ a ghelɨ Isìlæ nô ghɨ̀ jɨ̀m nɨn læ li koʼ nɨ̀ àntayntayn a mɨ̂kàyn nɨ̀ Bôbo Fɨyini ateyn, byatɨ̂ yem njàŋsɨ̀, toŋ ndoŋsɨ, toŋ tɨ̀soŋ, buʼ tɨ̀luŋ, fî chwaʼ ɨ̀bwaʼ. ²⁹A n-læ nà ghɨ nô mɨ ɨlvɨ gha ta ghɨ n-zɨ gvî nɨ̀ àntayntayn ateyn a a ntèʼ nɨ̀ Devìt tèyn, Mikàl, ɨ wâyn Sôl, ɨ ki fvɨ̀sɨ̀ ndù a wundù, ɨ yeyn ta fòyn Devìt nɨ̀n saŋlɨ, bɨyna, nkèyn ɨ nà sɨ ku ŋweyn sɨ̂ Devìt.