1 Chronicles 16
1Ghɨ n-læ gvi nɨ̀ àntayntayn a mɨ̂kàyn nɨ̀ Bôbo Fɨyini nâ kì tî, ɨ lèm a fɨ̂twòtɨ̂ afî a Devìt nɨn læ bàʼlɨ na ghɨ gvi lèm ateyn, ghɨ fu tɨfu tɨ nyoʼnɨ tɨ, nɨ̀ tɨ̀fu tɨ ta ka Fɨyinifɨ lesɨ fu àŋena. 2Devìt nɨn læ fu mèsɨ tɨfu tɨ ateyn, ɨ boysɨ ghelɨ Isìlæ̀ sɨ a izɨyn nɨ̀ Bốbo Fɨyini. 3A nà n-ghɨ ta wù bòysɨ mèsi àŋena, wu nà fu kɨ ìghef abayn ìmòʼ sɨ̂ wùl, baʼsɨ̂ nɨ̀ àlêʼ a njwò-a, nɨ̀ àbayn a lesìn a nyoʼna. Wu n-læ fu sɨ̂ ghelɨ Isìlæ̀ kɨ ghɨ̀ jɨ̀m, ghɨ lûmnɨ̀ nɨ ghɨki. 4Wu n-læ meyn choʼtɨ ghelɨ ndo nɨ̀ Levì ghɨli na ghɨ na fèl alèʼ ghè antayntayn a mɨ̂kàyn nɨ̀ Bôbo Fɨyini-à nɨn læ nà ghɨ ateyn, koʼsɨ̂ Fɨyini, fu àyòŋnɨ̀ sɨ̂ Bôbo Fɨyini, ɨ Fɨyinɨ̀ fɨ Isìlæ̀, nì. 5Asàf nà n-ghɨ wul ɨ̀tìsɨnɨ, ànkùmtɨ̀ a ŋweyn a ghɨ Sàkàliyà. Ghelɨ ghɨli ghì a ghɨ n-gvî a ibàm nɨ̀ àŋena ɨ ghɨ Jàziyèl nɨ̀ Shèmìlamòt nɨ̀ Jehizèl nɨ̀ Màtìtayà nɨ̀ Eliyàb nɨ̀ Bènayà nɨ̀ Obed Edòm nɨ̀ Jeyèl. Àŋena nà n-kelɨ sɨ nà toŋ ndoŋsɨ, buʼ tɨ̀luŋ, Asàf ɨ chwaʼ tɨ̀chaʼ acha. 6Bènayà ŋêyn Jàhaziyèl, ɨ ngàŋsɨ ndô Fɨyini ɨ mûtɨ̀ kɨ tèyn toŋ ìsoŋ asɨ antayntayn nɨ̀ Bôbo Fɨyini. 7A nà n-ghɨ achi nâ ghè, Devìt ɨ choʼ Asàf ŋêyn ghelɨ ghì a ka ghɨ na gàmtɨ̀ ŋweyn, sɨ asɨ, na àŋena na koʼsɨ̂ Bôbo Fɨyini, yem na;
8Yì na koʼsɨ̂ Bôbo Fɨyini, ghaʼsɨ̂ ìzɨyn i ŋweyn;
Fêʼtɨ̀ àwo kì a wù nì sɨ̂ tɨ̀laʼtɨ a mbzɨ.
9Yì na yem njàŋsɨ̀, koʼsɨ̂ ŋweyn;
Yì feʼtɨ awo akayna kì a wù nì kɨ àjɨ̀m.
10Yì na saŋlɨ-à bòm ta yi n-ghɨ woyn ŋweyn;
Nô mɨ ndà na wù n-koʼsɨ̂ ŋweyn na saŋlɨ-à.
11Yì na yeʼtɨ̂ kɨ adyaʼ nɨ̀ ŋweyn;
Yì na koʼsɨ̂ ŋweyn kɨ̀ mɨlvɨ ɨ̀n jɨ̀m.
12Ka yi n-læ̀ lèsɨ̀ àwo akayna kì a wù nì;
Ka yi n-læ̀ lèsɨ̀ àwo ɨchfɨ̀ ɨyumnɨ kì a wù nì, nɨ̀ tɨ̀saʼ tɨ àtì-ati nɨ̀ ŋweyn.
13Zɨ̀ woyn Isìlæ̀, ɨ wul ɨ̀ fèlɨnɨ nɨ̀ ŋweyn,
O woyn Jàkôb, ɨ ghî a wù chòʼ meyn lèm.
14Wù n-ghɨ Bôbo Fɨyini, ɨ Fɨyini fɨ ghesɨ̀nà,
Tɨsaʼ tɨ ŋweyn tɨ nɨn ghɨ kɨ sɨ̂ mbzɨ ìjɨ̀m.
15Wù læ̀ lesɨ̀ wì mɨkâyn mzɨ̀ a wu n-læ yɨ ŋêyn ghelɨ ŋweyn,
Læ̀ faŋ tɨ lèsɨ̀ ichfɨ̂nɨ̀ zɨ̀ a wu n-læ ni sɨ̂ woyn ghi nô ghɨ̀ jɨ̀m,
16ɨ mɨkâyn mzɨ̀ a ŋêyn Abɨ̀làhâm nɨn læ yɨ,
ichfɨ̂nɨ̀ zɨ̀ a wu n-læ nì sɨ̂ Yisàk.
17Wu n-læ meyn ni kɨmɨ ìchfɨnɨ nâ yèynì sɨ̂ Jàkôb,
wu n-læ yɨ mɨkâyn ŋêyn Isìlæ̀ kɨ̀ samoʼ.”
18Wu n-læ meyn bè sɨ̂ ŋweyn na “Mà læ̀ fu ìlaʼ i Kenàn sɨ̂ và, a na kelɨ kɨ nô và.”
19Wu n-læ nà taŋî tì ghelɨ Isìlæ bu læ̂ kɨ tèyn,
àŋena nà læ nà bu ghɨ kɨ mɨ̀ ghêytɨ̀ tèyn, ɨtum fyesɨ kɨ ateyn.
20àŋena nà n-zɨ̂ kɨ ìlaʼ nɨ̀ ìlaʼi,
zɨ̂ kɨ àlêʼ nɨ̀ àleʼ à.
21Mɨtì Bôbo faŋtɨ̀ vìsi na wul ɨ̀ yeʼtɨ àŋena,
Kɨ̀ bòm àŋena, Bôbo ɨ fu nfàsì-fàsì sɨ̂ tɨ̀fôyntɨ̀, ɨ bè na,
22“Ka wùl nɨ̂n læ̀ fù ngeʼ sɨ̂ ghelɨ ghèyn a mà choʼ têyn , ka wùl nɨn læ̀ kùm nfèʼtɨ̀ sɨ ghaʼlɨnɨ nɨ̀ mà.”
23Nô ghelɨ ghɨ̀ jɨ̀m a mbzɨ na yem njàŋsɨ̀, koʼsɨ̂ Bôbo Fɨyini;
yì na fèʼtɨ̀ sɨ̂ ghelɨ kɨ mɨ̀chi ɨ̀n jɨ̀m na à bœ̀sɨ̀ ŋweyn bœ̀sɨ̀ àŋena.
24Yì na fêʼtɨ̀ ìbayn iŋweyn kɨ̀ sɨ̂ ghelɨ ghɨ̀ jɨ̀m a mbzɨ,
Yì na fèʼtɨ̀ àwo akayna kì a wù nì sɨ̂ àŋena.
25Bòm ta Bôbo Fɨyini nɨ̀n koʼnɨ kfeynɨ na ghɨ na koʼsɨ̂ ŋweyn,
ngvɨmlɨ̂ ŋweyn chwo ta ghɨ n-ngvɨmlɨ nô mɨyini ɨ̀n jɨ̀m.
26Mɨ̀yìnì nô ɨ̀n jɨ̀m a mbzɨ nɨn ghɨ kɨ ɨ̀nfyèʼsɨ̀,
à n-ghɨ kɨ Bôbo Fɨyini a wu n-faytɨ iyvɨ nɨ̀ ɨ̀fwo vzɨ̀ a wu n-ghɨ ateyn.
27Wù n-kel ìŋwâʼ, nɨ̀ àdyaʼ àjɨ̀m à,
Adyaʼ a ŋweyna nɨ̀ ìsaŋlɨ iŋweyni nɨn ghɨ ma yi luyn meyn a ŋweyn a ndo.
28Zɨ̀ ghelɨ ghɨ̀ jɨ̀m a mbzɨ na koʼsɨ̂ izɨyn i Bôbo Fɨyini,
yì na beyn ŋweyn.
29Yì na fu ɨ̀kfɨm vzɨ̀ sɨ̂ Bôbo Fɨyini a wu n-kfeynɨ,
Yì gvi nɨ̀ ìfu i sɨ̂ ŋweyn;
Yì na koʼsɨ̂ ŋweyn antêynɨ̀ ìŋwàʼ nɨ̀ ŋweyn.
30Mbzɨ ìjɨ̀m fe a ŋweyn asɨ nà chɨŋa!
Wù faytɨ meyn ghalɨ̀ mbzɨ, ma afo-a kàʼ kɨ bû nèʼsɨ̀.
31Ɨfwo vzɨ̀ a wu n-ghɨ a iyvɨ, nɨ ɨvzɨ̂ a wu n-ghɨ a nse na koʼsɨ̂ Fɨyini nɨ̀ ìsaŋlɨ i;
fêʼtɨ̀ sɨ̂ tɨ̀laʼ tɨ̀ jɨ̀m tɨ̀ na Bôbo Fɨyini nɨ̀n ghɨ Fòyn.
32Jvasɨ ghaʼlɨ nɨsɨ nɨ̀ ɨ̀fwo vzɨ̀ a wu n-ghɨ ateyn nô ɨ̀ jɨ̀m na koʼsɨ̂ ŋweyn;
gveynsɨ, baʼsɨ̂ nɨ̀ ɨfwo vzɨ̀ a wu n-ghɨ ateyn na saŋlɨ-à.
33Ɨ̀nkàʼ mzɨ̀ a mɨ n-ghɨ a mɨ̂kù na yema, koʼsɨ̂ ŋweyn
mɨ̀ na yem njàŋsɨ̀, saŋlɨ-à, koʼsɨ̂ Bôbo Fɨyini,
bòm ta wù læ̀ saʼ mbzɨ yèyn.
34Yì na fu àyòŋnɨ̀ sɨ̂ Bôbo Fɨyini bòm ta wù n-jofà,
ikôŋ iŋweyni faŋ meyn kɨ̀ samoʼ.
35Yì na byalɨ bè sɨ̂ ŋweyn na, “Ô Fɨyini fɨ, mbœ̀sɨ̀ yes, bœ̀sɨ ghes;
fsɨ ghes sɨ awu nɨ̀ ghelɨ mbzɨ, ɨ yvɨ̀ŋtɨ̀ ghès,
ta ka ghèsɨ̀ na fu àyòŋnɨ̀ sɨ̂ va, fî koʼsɨ̂ ìzɨyn ìzyæ zɨ̀ a yi n-layn kfeynɨ.
36Yì na koʼsɨ̂ Bôbo Fɨyini, ɨ Fɨyini fɨ Isìlæ̀,
kɨ̀ sɨ a mɨlvɨ ɨ̀n jɨ̀m.
Ghɨ na koʼsɨ̂ mesɨ̀ Bôbo Fɨyini, nô ghelɨ ghɨ̀ jɨ̀m ɨ bè na “Àmèyn”, ɨ Koʼsɨ Bôbo Fɨyini.
37Devìt nɨn læ meyn lù ɨ vɨsi Asàf asɨ antayntayn a mɨ̂kàyn nɨ̀ Bôbo Fɨyini ŋêyn ghelɨ ghì a ghɨ nà n-gâmtɨ ŋweyn, na àŋena na ni ìfêl afu kɨ̀ ta isaʼi nɨn dyêyn. 38Wu n-læ meyn visi kɨmɨ Obèd Edòm ŋêyn ghelɨ ghɨli mɨ̀vɨm ntufa, nɨ̀ ghelɨ nfama na ghɨ na gàmtɨ̀-à.Obed-Edòm, ɨ wâyn Jedutùn, baʼsɨ̂ nɨ̀ Hosà nà n-chî àntayntayn a mɨ̂kàyn. 39Devìt nɨn læ meyn lem kɨmɨ Zadòk, ɨ ngàŋ ndô Fɨyini, ŋêyn ngàŋ sɨ ndô Fɨyini sɨ lisɨ sisɨ̀ a ŋêyn àŋena nà n-felɨ̀ a fɨndo nɨ Bôbo Fɨ̀yini fɨ a Gibìyòn, 40na àŋena na fu tɨ̀fu tɨnyoʼnɨtɨ sɨ̂ Bôbo Fɨyini atu àbaŋ ifu, kɨ̀ mɨchi ɨ̀n jɨ̀m; fu nɨ̀ bisì bisì, fu aleŋ ɨlvɨ ikfa, kɨ̀ ta isaʼi Bôbo Fiyini zɨ̀ a wu n-læ nyaʼ fu sɨ̂ Isìlæ nà n-dyêyn. 41Hemàn ŋêyn Jedutùn, læ nà ghɨ kɨmɨ afu, baʼsɨ̂ nɨ̀ ghelɨ ghɨli ghì a ghɨ n-læ choʼtɨ na ghɨ na fu àyòŋnɨ̀ sɨ̂ Bôbo Fɨyini, bòm ta ikoyn iŋweyni faŋ meyn kɨ̀ samoʼ. 42Hemàn ŋêyn Jedutùn nɨn læ nà kelɨ sɨ nà toŋ isoŋ, chwaʼ àmbaʼ, fî buʼ kɨmɨ ɨ̀fwo ɨlvɨ ta ka ghɨ na yem njàŋsɨ̀ ateyn. Ghɨ n-læ lèm woyn Jedutùn a ɨchfɨ mbàyn. 43Ghi n-læ nà mesì nô mɨ ɨvɨ gha, ghelɨ gwòsɨ̀ nô ghɨ̀ jɨ̀m; nô mɨ ndà ɨ kasî kfâ sɨ a ŋweyn a ndo. Devìt i kasi ɨ kfa sɨ jèm sɨ̂ isas i ndo nɨ̀ ŋweyni.