1 Chronicles 17

Ichfɨ̂nɨ̀ zɨ̀ a Bôbo Fɨyini nɨn læ fu sɨ̂ Devìt

¹A n-læ nà ghɨ ta Devìt kàsi kfa ndù a ŋweyn a ntoʼ, a nà ghɨ achi a li-a, wu tum jàŋ Natàn ɨ fèʼtɨ̀ ighaʼnɨ, ɨ bè sɨ̂ ŋweyn na “Mà weyn afêyn, chî a ndo, ma ghɨ bàʼlɨ̀ nɨ̀ ɨ̀nkàʼ mɨ̀ sedà, mɨtì àntayntayn a mɨ̂kàyn nɨ̀ Bôbo Fɨyini-à ɨ chî a fɨtwò”.

²Natàn ɨ bè sɨ̂ ŋweyn Devìt na, “Ni nô mɨ ghà ta wà n-kfâʼtɨ̀ sɨ ni, bòm ta Bôbo nɨn ghɨ zɨ̂ ŋweyn amoʼ”. ³A ni nà ghɨ nɨ̀ntuʼ achi nâ ghè, Fɨyini fɨ gvi taŋi sɨ̂ Natàn, ɨ bè na;

⁴“Ndu bè sɨ̂ wul ɨ̀ felɨnɨ nɨ̀ mà, ɨ Devìt na Bôbo Fɨyini bè na à n-ghɨ wi vâ sɨ bàʼlɨ ndo na mà na ghɨ ateyn. ⁵Ma bû tìmi nà ghɨ a ndo kɨ̀ sɨ zɨ̀tɨ achi ta mɨ n-læ fvɨ̀sɨ ghelɨ Isìlæ̀ sɨ a ndo àkòs a Ijìb sɨ koʼ sɨ chem layn. Mɨ n-dyâŋ kɨ ɨ̀two nɨ̀ ɨ̀two, dyâŋ kɨ àlêʼ nɨ̀ àlêʼà. ⁶Nô mɨ àlêʼ à kà ta mà tìmi ndù ateyn ghesɨ̀ ghelɨ Isìlæ̀, ma bû tìmi chòʼ wùl ɨ̀tìsɨnɨ nɨ̀ àŋena nô ɨ̀mòʼ, nì nà bɨfɨ sɨ̂ ŋweyn na, “Bòm ghà ta wà bû bàʼlɨ̀ ndo sɨ̂ mà nɨ̀ ɨ̀nkaʼ mɨ sedà a?”’

⁷“Ndù læ̂ lvɨ̂yn ɨ bè sɨ̂ wùl ɨfelɨnɨ nɨ̀ mà, ɨ Devìt, na “Bôbo Fɨyini, ɨ bò ɨ̀dwaʼ ɨ̀ jɨ̀m bè na, Mɨ n-læ̀ jàŋ vâ wa chî nyamsɨ a ɨtwaʼ, na wà gvi nà saʼ ghelɨ ghem, ɨ ghelɨ Isìlæ̀. ⁸Mà lum ghɨ kɨ ghesɨ̀ và nô mɨ awo ta wà ndù, tɨm yɨ mbàynɨ̀sɨ̀ shyasɨ kɨ sɨjɨ̀m. Mɨ n-nì-à a ghɨ na kya và kɨ̀ mbzɨ ìjɨ̀m, kɨ̀ ighel ta ghɨ nî ghɨ nà kya ghelɨ ghɨ to. ⁹Mɨ n-fu àlêʼ sɨ̂ ghelɨ ghem, ma à ti ghelɨ Isìlæ̀, a àŋena baʼlɨ nà chi ateyn, a kelɨ kɨ nô àŋena, wùl ɨ fu wi nge sɨ̂ àŋena ateyn. Ghelɨ ghɨ bɨ nɨn læ̀ bu fì yeʼtɨ̂ wi àŋena ta ghɨ n-læ nà yeʼtɨ sɨ asɨ. ¹⁰Ghɨ n-læ meyn nà yeʼtɨ̂ àŋena kɨ̀ sɨ ɨtuʼ ta mɨ n-læ choʼtɨ ghelɨ na ghɨ na tisɨ̂ ghelɨ̀ ghem, Isìlæ̀. Mɨ n-zuetɨ̂ mbàynɨ̀ sisɨ, kɨ sɨjɨ̀m.

Mɨ n-fêʼtɨ̀ sɨ̂ zɨ̀ samoʼ na Bôbo Fɨyini nɨn bàʼlɨ ndô zɨ; ¹¹À læ̀ nà ghɨ ta wà lù meyn, ɨ̀ kfa yeyn ghɨ̀bo ghya, a mà lem wâyn vâ ɨ̀lvì a wa alèʼ, ɨ̀ fu adyaʼ sɨ̂ ŋweyn, a wù na saʼ ghelɨ ŋweyn. ¹²À n-ghɨ ŋweyn a ka wù læ̂ bàʼlɨ̀ ndo yem, a mà ni a tɨfôyntɨ̀ læ̂ nà lum fvɨ̂ kɨ ateynɨ̀ nɨ̀ woyn ŋweyn, nô ta ka ghɨ̀ læ̂ ghɨ̀. ¹³Mà nà ghɨ bæ̀ sɨ̂ ŋweyn, wu ghɨ wayn sɨ̂ mà. Mà læ̀ bêyn wì jɨm sɨ̂ ŋweyn ta mɨ n-læ bèyn sɨ̂ wùl vzɨ̀ a wà yɨ ndo ŋweyn. ¹⁴Mɨ n-lèm ŋweyn a wù na tisɨ̂ ghelɨ̀ ghem kɨ̀ sɨ a mɨlvɨ ɨ̀n jɨ̀m. Tɨfôyn tɨ̀ læ̀ nà lum fvɨ̀ kɨ a ŋweyn a ndo. ”

¹⁵Natàn nɨn læ meyn feʼtɨ̀ awo kì nô àjɨ̀m a Bôbo Fɨyini bè sɨ̂ ŋweyn sɨ̂ Devìt.

Devìt ɨ Jèm sɨ̂ Bôbo Fɨyini

¹⁶Natàn nɨn læ taŋi tî Devìt ɨ lu ndu zɨ a fɨndo nɨ̀ Bôbo Fɨyini, ɨ dùʼì a nse, ɨ jèm, ɨ bè na; Mà ti n-ghɨ nô ndà a Bôbo Fɨyini, nô ìsas i ndo nɨ̀ mà nɨn ghɨ nô ghà na wà na nì ìnkì awo yèynì sɨ̂ mà a? ¹⁷Wà bû nì kɨ awo nâ kèynà sɨ̂ mà, wa fi meyn chfɨ̀nɨ̀ nô àwo a juŋà sɨ̂ woyn ghem. Wà nì sɨ̂ mà têyn ta mɨ ghɨ kɨ nô wul.

¹⁸Bôbo Fɨyini feymfɨ, wul ɨ̀ felɨnɨ nɨ̀ và ti kàʼ wu fi bè nô na gha ma wà laysɨ meyn àwu a ŋweyn tèyn a, ¹⁹O Bôbo, bòm ìkoŋ ìzyæ sɨ̂ wul ɨ̀ fèlɨnɨ nɨ̀ và, wà ni meyn ìwo yi koʼnɨ-à, fì fu tɨchfɨ̂nɨ̀ tyatɨ tɨbemnɨ tèyntɨ̀ sɨ̂ ghès.

²⁰“Wùl nɨ̀n ghɨ wi ta vâ a Bôbo, Fɨyini fɨlifɨ ɨ ghɨ ta vâ, à n-ghɨ kɨ và, kɨ̀ ighel ta ghesɨ̀ yvɨ̀ meyn. ²¹Ghelɨ ghɨli ghɨ wi a mbzɨ ta ghelɨ Isìlæ̀ ghêyn a wa n-læ fvɨ̀sɨ a ndo àkòs ɨ lèm sɨ a ghelɨ nɨ̀ và ta ka àŋena na kòŋ và. Wà ni meyn àwo akayna, ɨ̀ jùm fvɨ̀sɨ̀ tɨ̀laʼ asɨ nɨ̀ ghelɨ̀ ghya, kɨ̀mɨ ta wa n-læ bœ̀sɨ àŋena a Ijìb. ²²Wà lì meyn ghelɨ Isìlæ̀ sɨ a wa ghêl a Bôbo, kɨ̀ samoʼ, nà ghɨ Fɨyin fɨ àŋena.

²³Ô Bôbo Fɨyini, ni læ̂ ìwo zɨ̀ a wà chfɨ̀nɨ̀ sɨ̂ mà ghesɨ̀ woyn ghem kɨ̀ sa mɨlvɨ ɨ̀n jɨ̀m. Ni kɨ ta wà chfɨ̀nɨ̀ meyn, ²⁴ta ka iwo ateyn i gayn a ghelɨ keli vâ kɨ̀ samoʼ, na taŋi-à, be na; “Bôbo Fɨyini, ɨ bò ɨ̀dwaʼ ɨ̀ jɨ̀m, ɨ Fɨyini fifɨ̀ a fɨ n-kelɨ nchìsɨ̀, nɨ̀n ghɨ Fɨyini fɨ ghelɨ Isìlæ̀. A ndô wùl ɨ̀ felɨnɨ nɨ̀ và faŋ nà koʼsɨ̂ kɨ và sɨ a mɨlvɨ ɨ̀n jɨ̀m. ²⁵“Fɨyini femfɨ, wà sɨ ghɨ ma wà dyeyn meyn bàynsɨ sɨ̂ wul ɨ̀ fèlɨnɨ nɨ̀ và na wa nì baʼlɨ̀ ndô ŋweyn. Mà ti keli meyn àdyaʼ lvɨ̂yn sɨ nà koʼsɨ vâ. ²⁶Ô Bôbo Fɨyini, wà n-ghɨ kɨ nô Fɨyini. Wà chfɨnɨ meyn àwo a juŋà sɨ̂ wùl ɨ̀fèlɨnɨ nɨ̀ và. ²⁷Wà choʼnɨ meyn sɨ boysɨ woyn wûl ɨ̀fèlɨnɨ nɨ̀ và na àŋena faŋ kɨ sa tɨ̂fòyn.Wà sɨ ghɨ ma wà boysɨ meyn ìsas i ndo nâ yèyni kɨ̀ samoʼ a Bôbo Fɨyini femfɨ.