1 Kings 15

Abijà ɨ fòyn Judà

¹Jèlobòwàm ɨ wâyn Nebàt vzɨ̀ a wu nà n-ghɨ fòyn a Isìlæ̀ nɨn læ nà sɨ ghɨ achɨ sɨ a bèŋ njvàsɨ̀ nfama, Àbijà ɨ koʼ achɨ sɨ nà ghɨ fòyn a Judà. ²Wu n-koʼ tî ɨ saʼ a Jèlusalèm sɨ a bèŋsɨ̀ tal izɨyn i nà ŋweyni nà n-ghɨ Makà ɨ wâyn Abishalòm.

³Wu nà n-nî kɨmɨ àwo a bɨ-a kì a bò ŋweyn tî nà nî, nî wì awo kì a kɨ n-ghɨ àtì-ati asɨ nɨ̀ Bôbo ɨ Fɨyini fɨ ŋweyn ta bò bò ŋweyn Devìt nɨn læ nà ni-à, ⁴ɨ nà nî nô mɨ tì bòm ìkôŋ zɨ̀ a Bôbo ɨ Fɨyini fɨ ŋweyn nà n-kelɨ sɨ̂ Devit, fɨ fu ibayn sɨ̂ ŋweyn a Jèlusalèm a ghɨ wayn vzɨ̀ a ka wù ko;achɨ isas nɨ̀ ŋweyn ɨ̀ lèm mbôynɨ̀ a Jèlusalèm/kɨ̀ŋtɨ̀ Jèlusalèm. ⁵A ghɨ bòm ta Devìt tî nà nî awo kì a kɨ n-ghɨ àtì-ati asɨ nɨ̀ Bôbo, ɨ læ chi ndu mèsì bula wù timi faŋ tɨ̀ nì iwo zɨ̀ a Bôbo bè na wù a bu kɨ ìwo zɨ̀ a wù n-læ nî sɨ̂ Yulìyà ɨ wul ìlaʼ i Hît.

⁶Lehobòwàm ŋêyn Jèlobòwàm nà n-lum ghɨ mɨlvɨ ɨ̀n jɨ̀m nû kɨ nu/tɨm kɨ ìwoŋ. ⁷Nô mɨ ghà ta Abijà nɨn læ ni nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ mɨ̀ tɨ̀fòyn tɨ Judà (Abijà ŋêyn Jèlobòwàm nà n- n-tɨm kɨ ìwoŋ a mɨchi nɨ̀ Abijà nô ɨ̀n jɨ̀m) ⁸Abijà ɨ kfɨ ghɨ gvɨ̀mì ŋweyn ŋêyn ghɨ̀bo ŋweyn a ntèʼ ntoʼ nɨ̀ Devìt. Asà ɨ wâyn ŋweyn ɨ koʼ achɨ isas nɨ̀ bò ŋweyn.

Asà ɨ fòyn Judà

⁹Jèlobòwàm nɨn læ à ghɨ achɨ sɨ a bèŋ mɨ̀vɨm ɨ̀n bò ta fòyn Isìlæ̀, Asà ɨ koʼ achɨ ɨfòyn a Judà. ¹⁰Wu n-koʼ tî ɨ saʼ sɨ a bèŋ mɨ̀vɨm ɨ̀n kæ̀ nɨ̀ bèŋ ìmòʼ. Izɨyn i nà ŋweyni nà n-ghɨ Makà ɨ wâyn Abishalòm.

¹¹Asà nà n-nî àwo kì a kɨ n-ghɨ àtì-ati asɨ nɨ̀ Bôbo kɨ̀ ta bò ŋweyn Devìt nɨ̀n læ nà ni-à. ¹²Asà ɨ sàŋ ɨ fvɨ̀sɨ̀ ìlaʼ i ghelɨ ghì a ghɨ nyiŋì chi nɨ̀ ghɨ̀ki asɨ ɨnfyèʼsɨ̀ sɨ koʼsɨ ɨ̀nfyèʼsɨ̀ ateyn fî kumtɨ̂ ɨ̀nfyèʼsɨ̀ vzɨ̀ a ghɨbò ŋweyn tî fàytɨ. ¹³Fòyn Asà ɨ kfɨ̀m àdyaʼ kì a nà ŋweyn tî nà kela ta nà fòyn bòm ta wu nà n-ghɨ ma wù tom meyn ànfèʼsɨ̀ kì a ghɨ n-toŋtɨ na Ashelà a ghɨ àfo a nyelɨnɨ-a. Asà ɨ chàʼsɨ̀ ɨ suʼsɨ àfo ateyn ɨ nyòʼ a ibal i Kidlòn. ¹⁴Asà nà n-yvɨnɨ̂ Bôbo a mɨchi nɨ̀ ŋweyn nô ɨ̀njɨ̀m nô mɨ ta wu n-bu læ bebsɨ mèsi ɨlwêʼ ikoʼsɨ ɨ ngaŋtɨnɨ. ¹⁵Wu n-læ meyn lì ɨ̀fwo vzɨ̀ nô ɨ̀ jɨ̀m a bò ŋweyn nà n-ghɨ ma wù lèm sɨ a nyɨŋ sɨ̂ Fɨyini fɨ ɨ zɨ nɨ̀ ɨ̀ŋweyn a ndô Fɨyini baʼsɨ̂ nɨ̀ àso ɨkwo nɨ̀ ɨ̀fwo akas a aso ɨkwo a fɨfâ vzɨ̀ a wù lèm sɨ a nyɨŋ sɨ̂ Fɨyini fɨ.

¹⁶Asà ɨ fòyn Judà ŋêyn Bashà ɨ fòyn Isìlæ̀ nà n-lum ghɨ mɨlvɨ ɨ̀njɨ̀m kɨ̀ iwòŋ sɨ chem a ngòʼsɨ mɨ̀chi nɨ̀ àŋena. ¹⁷A nà ghɨ achi a li-a, Bashà ɨ fòyn Isìlæ̀ ɨ seʼ iwoŋ a Judà ɨ tɨm ɨ lì ntèʼ Lamà ɨ bàʼlɨ̀ ɨ wesɨ àdyaʼ ateyn ta ka yi na boynɨ̂ wì ta ka wul ɨ̀ fî fvɨ̀ kèsa zɨ a Judà.

¹⁸Tèyn, Asà ɨ lì ɨ̀kwo ɨ aso ɨkwo a fɨfâ nɨ̀ àso ɨkwo kì a kɨ n-faŋ a ndo nɨ̀ Bôbo baʼsɨ̂ nɨ̀ ɨ̀fo vzɨ̀ a wu n-faŋ a ntoʼ ɨ tum ghelɨ ghɨ felɨnɨ nɨ̀ ŋweyn na ghɨ ndu fu a Dàmascùs sɨ̂ Ben-Hadàd ɨ fòyn Alàm, bò ŋweyn ɨ ghɨ Tablimòn, bò Tablimòn ɨ ghɨ Hezìyòn ɨ bè sɨ̂ ŋweyn na, ¹⁹“Mɨ n-kɨŋ na ghesɨ̀và yɨ mɨkâyn kɨ̀mɨ ta ghɨ̀bo ghesɨ̀nà tî nà yɨ-a. À n-ghɨ ɨ̀fwo tèyn ta mà tum na ghɨ gvi fù sɨ̂ và. Ma tum meyn ɨ̀kwo ɨ aso ɨkwo a fɨfâ, nɨ̀ àso ɨkwo na ghɨ fu sɨ̂ và. Bebsɨ mɨkâyn mzɨ̀ a wà tî yɨ̀ zɨ̂ Bashà ɨ fòyn Isìlæ̀ ta ka wù fvɨ sɨ a nse nɨ̀ mà. ²⁰Ben-Hadàd ɨ bɨmi sɨ nì iwo zɨ̀ a fòyn Asà bè ɨ taŋi sɨ̂ ghɨ̀bo ndo ìwoŋ nɨ̀ ŋweyn. Àŋena nù Isìlæ̀ ɨ tɨm yɨ ntèʼ Ijòn nɨ̀ Dân nɨ̀ Abèl nɨ̀ Bet Makà nɨ̀ ilaʼ i Naftalì kɨ ì kɨ̀m kɨ̀mɨ nɨ̀ àbâs ilaʼ a Kenelèt à. ²¹Bashà ɨ yvɨ iwo zɨ̀ a yi gàyn, ɨ visi ìfêl zɨ̀ a ntèʼ Lamà a wù nà nî sɨ wesɨ adyaʼ ikɨ̀ŋtɨ̀ ateyn ɨ lù ɨ ndu dùʼì a ntèʼ Tilzà. ²²Fòyn Asà ɨ taŋi sɨ̂ ghelɨ nô ghɨ̀ jɨ̀m basɨ̀ wì wul, ɨ bè àŋena bèʼì ngòʼɨ̀ baʼɨ̂ nɨ̀ àdyaʼ ikɨ̀ŋtɨ̀ a ntèʼ Lamà. Wu lì ɨ̀fwo ateyn ɨ bàʼlɨ̀ sɨ wesɨ adyaʼ ikɨ̀ŋtɨ̀ a ntèʼ Misbà nɨ̀ Gebà, a ghɨ ntèʼ àbàs ilaʼ i Benjamìn.

²³Nô mɨ ghà ta fòyn Asà nɨn læ ni, ɨ nì bòm ta wu nà n-chili, nɨ̀ ntèʼ sisɨ̀ a wu n-læ bàʼlɨ sɨ wesɨ adyaʼ ikɨ̀ŋtɨ̀ ateyn nà n-ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ mɨ̀ tɨ̀fòyn tɨ Judà. Mɨtì a nà sɨ ghɨ ta wù lèma meyn ɨ̀ dvɨ̀yn ikoʼi ku àvɨ a ŋweyn wù lvɨŋ, ²⁴Asà ɨ kfɨ ghɨ gvɨ̀mì ŋweyn ŋêyn ghɨ̀bo ŋweyn a ntèʼ ntoʼ nɨ̀ Devìt. Wâyn ŋweyn Jèhochafàt ɨ koʼ achɨ isas nɨ̀ ŋweyn.

Nadàb ɨ nà ghɨ fòyn a Isìlæ̀.

²⁵Asà nɨn læ nà sɨ ghɨ ànkùmtɨ̀ a bêŋ nɨ̀ ŋweyn achɨ ta fòyn Judà, Nadàb ɨ zɨ̀tɨ̀ sɨ saʼ ta fòyn a Isìlæ̀, ɨ saʼ Isìlæ̀ sɨ a bèŋsɨ̀ bò. ²⁶Wu n-læ meyn nì àwo kɨ ghɨ wi àtì-ati asɨ nɨ̀ Bôbo ɨ nà nî kɨmɨ àwo a bɨ-a kì a bò ŋweyn tî nà ni-à. Awo a bɨ-a nɨ̀ ŋweyn a ɨ nì ghelɨ Isìlæ̀ ɨ boŋ nì mbɨ.

²⁷Bashà ɨ wâyn Ahijà nà n-ghɨ ma wù fvɨ̀ isas i ndo nɨ̀ Isakà. Wu n-kɨŋ dzɨ ɨ zue Nadàb a nèʼ Gibetòn ilaʼ i Fìlisìyà. A nà n-ghɨ ma Nadàb ŋêyn Sugèyʼsɨ Isìlæ̀sɨ gemtɨ meyn ntèʼ Gebetòn ɨ̀ jɨ̀ŋ kàli. ²⁸Bashà nɨn zue ŋweyn tì ɨ lì àchɨ a ŋweyn ɨ nà sɨ ghɨ fòyn a Isìlæ̀. Yi n-gàyn ma Asà sɨ ghɨ achɨ sɨ a bèŋsɨ̀ tal a Judà.

²⁹Bashà nɨn dùʼi mèsi gvi achɨ nô mɨ ɨlvɨ gha, ɨ zɨ̀tɨ kɨ sɨ zuetɨ ghelɨ isas i ndo nɨ̀ Jèlobòwàm kɨ̀ ighel ta Bôbo nɨn læ tum Ahijà ɨ wul ɨ̀ felɨnɨ nɨ̀ ŋweyn ɨ nfèʼtɨ̀ ì ghaʼnɨ zɨ̀ a yi n-lù a Shilò na yì gvi tàŋi. Wu n-zuetɨ meyn ghelɨ isas i ndo nɨ̀ Jèlobòwàm nô ghɨ̀ jɨ̀m, ɨ̀ mòʼ ɨ faŋ tɨ̀ bɨ̀sɨ. ³⁰Yi n-læ gàyn têyn bòm ta awo a bɨ-a nɨ̀ ŋweyn a nɨn nî meyn na ghelɨ Isìlæ̀ ni mbɨ ɨ̀ nì ɨtoŋ Bôbo Fɨyini fɨ Isìlæ̀ ɨ yaf nô sɨ a ŋaŋ.

³¹Nô mɨ ghà ta Nadàb nɨ̀n læ ni nɨ̀n ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ mɨ̀ tɨ̀fòyn tɨ Isìlæ̀. ³²Asà ɨ fòyn Judà ɨ nà lum tɨm kɨ ìwoŋ mɨlvɨ ɨ̀njɨ̀m ŋêyn Bashà ɨ fòyn Isìlæ̀ sɨ chem a ngòʼsɨ nɨ̀ àŋena.

Bashà ɨ nà ghɨ fòyn a Isìlæ̀

³³Asà ɨ nà sɨ ghɨ achɨ ta fòyn a Judà, Bashà ɨ kæ koʼ achɨ ta fòyn a Isìlæ̀. Bashà ɨ saʼ ta fòyn ghɨ a ntèʼ Tilzà sɨ a bèŋ mɨ̀vɨm ɨ̀n bò njvàsɨ̀ kæ̀. ³⁴Mɨtì ɨ nì àwo kì a kɨ n-ghɨ wi àtì-ati asɨ nɨ̀ Bôbo. Wu nà n-nî kɨmɨ àwo a bɨ-a kì a bò ŋweyn Jèlobòwàm nɨn læ nà ni à, a ghɨ àwo kì a kɨ nì na ghelɨ Isìlæ̀ ni mbɨ.