1 Kings 16

¹Bôbo ɨ taŋi sɨ̂ wâyn Hànanì ɨ nfèʼtɨ̀ ì ghaʼnɨ ɨ tum ŋweyn na wù ndu bè sɨ̂ Bashà na, ²“Wà bu tî nà ghɨ àfo. Ta ma ti meyn làynsɨ̀ và kòʼsɨ lèm và na wà saʼ ghelɨ Isìlæ̀, a ghɨ ghelɨ̀ ghem, wà na nî kɨmɨ àwo abɨ-a kì a bò vâ Jèlobòwàm nɨn læ nà nî, ɨ̀ nì ghelɨ̀ ghem ɨ ghelɨ Isìlæ̀ nî mbɨ, ɨtoŋ wom yafɨ meyn. ³Mɨ n-yès và bàʼsɨ nɨ̀ ìsas i ndo nɨ̀ và nô ì jɨ̀m kɨ̀ ighel ta mà tî nì sɨ̂ Jèlobòwàm ⁴Nô mɨ wul ìsas nɨ̀ và ɨ̀ kfà vzɨ̂ a wù kfɨ a ntèʼ, bɨsɨ nɨn kfɨlɨ ìgvɨyn i ŋweyn, ɨvzɨ̂ a wù se sɨ kfɨ ma wù fvɨ meyn sɨ a ntèʼ, ìŋòʼingumi nɨn kfɨlɨ ìgvɨyn i ŋweyn.”

⁵Nô mɨ ghà ta Bashà nɨn læ ni nɨ akî a wù n-læ ni bòm ta wù n-chɨli nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ mɨ̀ tɨ̀fòyn tɨ Isìlæ̀. ⁶Bashà ɨ kfɨ ghɨ gvɨ̀mì ŋweyn a Tilzà, wâyn ŋweyn Elà ɨ koʼ achɨ isas nɨ̀ ŋweyn ta fòyn.

⁷Ntum zɨ̀ a Bôbo nɨn læ tum Jehù ɨ wâyn Hànanì ɨ nfèʼtɨ̀ ì ghaʼnɨ na wù gvi làʼì sɨ̂ Bashà nɨ̀ ìsas i ndo nɨ̀ ŋweyni nà n-ghɨ bòm àwo kì a wù n-læ nà nî asɨ nɨ̀ Bôbo kɨ ghɨ wi àtì-ati. Wu nà n-nî kɨmɨ àwo kì a isas i ndo nɨ̀ Jèlobòwàmi nà n-nî. À ti nà fî ghɨ kɨ ŋweyn sɨ zuetɨ isas i ndo nɨ̀ Jèlobòwàm kɨ ì jɨ̀m. Awo nâ kèynà ɨ nì ɨtoŋ Bôbo ɨ yaf nô sɨ a ŋaŋ.

Elà ɨ nà ghɨ fòyn a Isìlæ̀

⁸Elà ɨ wâyn Bashà nɨn læ se sɨ koʼ achɨ sɨ nà ghɨ fòyn a Isìlæ̀ chî a Tilzà ma Asà sɨ ghɨ fòyn a Judà sɨ a bèŋ mɨ̀vɨm ɨ̀n bò njvàsɨ̀ ntufa. Elà ɨ saʼ sɨ a bèŋsɨ̀ bò.

⁹Zimlì nà n-ghɨ bò ndo ìwoŋ nɨ̀ ŋweyn ɨ̀lvɨ̀, tî sugèyʼ sìsɨ̀ a sɨ n-tɨm nɨ̀ mɨtù mɨ̀ ìwòŋ ma ghɨ gwo meyn sugèyʼ sɨ ateyn antêynɨ̀ àntêynɨ̀ wù na tisɨ̂ àbâs àmòʼ. Wu gvì, ma Elà nyvɨ meyn mɨ̀lûʼ a ndo nɨ̀ Alzà vzɨ̀ a wù n-ghɨ nchì ntoʼ a Tilzà, mɨ̀ ku. Zimlì ɨ kɨŋ dzɨ ta ka ghɨ zue Elà. ¹⁰Zimlì ɨ zɨ a ndo nâ ghè ɨ zue Elà ɨ lì àchɨ a ŋweyn ɨ nà sɨ ghɨ fòyn a Isìlæ̀. Yi n-gàyn têyn ma Asà sɨ ghɨ fòyn a Judà sɨ a bèŋ mɨ̀vɨm ɨ̀n bò njvàsɨ̀ nsòmbo.

¹¹Zɨmlì ɨ zɨ̀tɨ sɨ saʼ ta fòyn nô mɨ ɨlvɨ gha, ɨ yès ìsas i ndo nɨ̀ Bashà kɨ ì jɨ̀m ɨ faŋ tɨ̀ vìsi nô wul ɨ̀lûmnɨ̀ ɨ̀ mòʼ ateyn kèsa wul ta ka wù sɨsɨ ngeʼ kèsa wul ìjèl. ¹²Tèyn nô mɨ gh̀a ɨ gàyn kɨ̀ ighel;ta Bôbo nɨn taŋi ɨ toynɨ a Jehù ɨ nfèʼtɨ̀ ì ghaʼnɨ kûm Bashà. Zimlì ɨ zuetɨ ghelɨ isas i ndo nɨ̀ Bashà kɨ ghɨ̀ jɨ̀m. ¹³Yi n-gàyn têyn bòm àwo a bɨ-a kì a Bashà ŋêyn wâyn ŋweyn Elà nɨn nì, yi nì ghelɨ Isìlæ̀ ghɨli ɨ nì mbɨ sɨ nà koʼsɨ ɨ̀nfyèʼsɨ̀, ɨtoŋ Fɨyini fɨ ɨ yaf nô sɨ a ŋaŋ.

¹⁴Nô mɨ ghà ta Elà nɨn læ ni nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ mɨ̀ tɨ̀fòyn tɨ Isìlæ̀.

Zimlì ɨ nà ghɨ fòyn a Isìlæ̀

¹⁵Zimlì nɨ̀n læ koʼ achɨ sɨ a fòyn ma Asà sɨ ghɨ fòyn a Judà sɨ a bèm mɨ̀vɨ̀ ɨ̀n bò njvàsɨ̀ nsòmbo. Wu koʼ ɨ saʼ sɨ a mɨchi nsòmbo chî a Tilzà. A ghɨ tì ma sugèyʼsɨ Isìlæ̀sɨ̀ gemtɨ meyn jɨ̀ŋ kàli nɨ̀ ntèʼ Gibetòn a kelɨ ghelɨ Fìlisìyà. ¹⁶Bò ndo ìwoŋ nɨ̀ sugèyʼsɨ Isìlæ nâ sìsɨ̀ ɨ hɨ Omlì. A nà n-ghɨ ta ghɨ yvɨ alèʼ ghè a ghɨ yvɨ̀ŋtɨ̀ dùʼì ateyn na, “Zimlì kɨŋ meyn dzɨ̀ ɨ̀ zue fòyn,” ghelɨ Isìlæ̀ ghɨ̀ jɨ̀m kɨ̀ ɨlvɨ nâ ghè alèʼ nâ ghè ɨ lèm Omlì ɨ bò ndo ìwòŋ sɨ a fòyn Isìlæ̀. ¹⁷Omlì ɨ lì sugèʼsɨ Isìlæ̀ ŋêyn ɨ̀nseynsɨ ɨ lù sɨ a ntèʼ Gibetòn ɨ ndu gàmtɨ̀ ɨ jɨŋ kali nɨ̀ ntèʼ Tilzà. ¹⁸A nà ghɨ ta Zimlì yeyn na ghɨ ku meyn ntèʼ àteyn, wu nyɨŋ zɨ a ntoʼ alèʼ ghè a kɨ n-ghɨ ma ghɨ faytɨ meyn kɨ̀ŋtɨ̀ ɨ nyòʼ kɨ fɨ baʼsɨ kɨ nɨ̀ ŋweyn. ¹⁹Yi ti n-gàyn têyn bòm àwo abɨ-a kì a wù nì asɨ nɨ̀ Bôbo a ghɨ kɨmɨ àwo kì a Jèlobòwàm tî nà ni-à, yi nì ghelɨ Isìlæ̀ ɨ nì mbɨ ɨtoŋ Bôbo ɨ yaf nô sɨ a ŋaŋ.

²⁰Nô mɨ ghà ta Zimlì nɨ̀n læ ni baʼsɨ nɨ̀ dzɨ sìsɨ̀ a wù nà n-lî sɨ nì ngeʼ ateyn, nɨ̀n ghɨ ma ghɨ nyaʼ meyn a ŋwàʼlɨ mɨ̀tɨtɨ̂ mɨ̀ tɨ̀fòyn tɨ Isìlæ̀.

Omlì ɨ nà ghɨ fòyn a Isìlæ̀

²¹A nà sɨ ghɨ ta Zimlì kfɨ̀ meyn, ghelɨ Isìlæ̀ ɨ nà ghɨ ɨnkfâʼtɨ̀ ɨ̀ bwò. Abâs a li-a nà n-tôʼ Tibnì ɨ wâyn Genàt na wù na ghɨ fòyn, a li-a ɨ tôʼ Omlì. ²²Mɨtì ɨghî a ghɨ nà n-tôʼ Omlì ɨ to chwò ghelɨ ghì a ghɨ nà n-tôʼ Tibnì ɨ wâyn Ginàt, ghɨ zue Tibnì, Omlì ɨ koʼ sɨ a fòyn.

²³Omlì nɨn læ zɨ̀tɨ sɨ saʼ ta fòyn Isìlæ̀ ma Asà sɨ ghɨ fòyn a Judà sɨ a bèŋ mɨ̀vɨm ɨ̀n tal nɨ̀ bèŋ ìmòʼ. Omlì ɨ saʼ sɨ a bèŋ njvàsɨ̀ bò nɨ̀ njoŋsɨ ntufa chî a Tilzà. ²⁴Omlì ɨ yuyn kfɨyn zɨ̀ a ghɨ n-toŋtɨ lvɨ̂yn na kfɨ̂yn Sàmalìyà. Wu n-yuyn nɨ̀ ɨ̀kwo akas a aso ɨkwo a fɨfâ wu lætɨ̂ sɨ nà ghɨ ɨkfaŋ ɨ̀ kfæ̀. Wu n-yuyn kfɨyn àteyn sɨ̂ Shemè. A nà sɨ ghɨ ta wù bàʼlɨ̀ meyn ɨ̀ fàytɨ kɨ̀ŋtɨ̀ ɨ chfɨ ìzɨyn ateyn na Sàmalìyà ma wù ti lì ìzɨyn nɨ̀ wùl ɨ̀ vzɨ̀ a wù tî nà kelɨ kfɨyn àteyn.

²⁵Omlì nà n-nî àwo kì a kɨ n-ghɨ wi àtì-ati asɨ nɨ̀ Bôbo ɨ nì mbɨ chwô nô ghelɨ ghì a ghɨ tî nà ghɨ achɨ jæ ta ka wù koʼ. ²⁶Wu nà n-nî kɨmɨ àwo a bɨ-a kì a Jèlobòwàm ɨ wâyn Nebàt tî nà ni-à a ghɨ àwo kì a kɨ tî nì ghelɨ Isìlæ̀ nî mbɨ sɨ nà koʼsɨ ɨ̀nfyèʼsɨ̀, bòm tèyn, ɨtoŋ Bôbo ɨ Fɨyini fɨ Isìlæ̀ ɨ yaf nô sɨ a ŋaŋ.

²⁷Nô mɨ ghà ta Omlì nɨn læ nì baʼsɨ̂ nɨ̀ àdyaʼ inù nɨ̀ ŋweyn a bemnɨ-a nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ mɨ̀ tɨ̀fòyn tɨ Isìlæ̀. ²⁸Omlì ɨ kfɨ ghɨ gvɨ̀mì ŋweyn ŋêyn ghɨ̀bo ŋweyn a Sàmalìyà, wâyn ŋweyn Ahàb ɨ koʼ achɨ isas nɨ̀ ŋweyn.

Ahàb ɨ nà ghɨ fòyn a Isìlæ̀.

²⁹Ahàb ɨ wâyn Omlì nɨn læ zɨ̀tɨ sɨ saʼ ta fòyn a Isìlæ̀ ma Asà sɨ ghɨ fòyn a Judà sɨ a bèm mɨ̀vɨm ɨ̀n tal njvàsɨ̀ nfama. Omlì ɨ saʼ ta fòyn a Isìlæ̀ sɨ a bèŋ mɨ̀vɨm ɨ̀n bò njvàsɨ̀ bò chî a Samalìyà. ³⁰Ahàb ɨ wâyn Omlì ɨ nà nî àwo kì a kɨ n-ghɨ wi àtì-ati asɨ nɨ̀ Bôbo ɨ ni chwò nô ghelɨ ghì a ghɨ tî nà ghɨ achɨ jæ ta ka wù koʼ. ³¹Wu ni fe kèʼ nô ta wù kèsɨ kesɨ awo kì a Jèlobòwàm ɨ wâyn Nebàt tî nà ni-à, ɨ ndu lì Jezebèl ɨ wâyn Etbàl ɨ fòyn ìlaʼ i Sidòn sɨ a wi nɨ̀ ŋweyn ɨ nà sɨ koʼsɨ̂ Bâl, ³²ɨ bàʼlɨ̀ ndô Bâl a Samalìyà nɨ̀ àbaŋ kì a ka wù na koʼsɨ̂ Bâl ateyn a ndo nâ ghè. ³³Ahàb ɨ faytɨ ànfèʼsɨ̀ kì a ghɨ n-toŋtɨ na Ashelà ɨ tom. Wu n-ni awo kɨ̀ sɨ idvɨ̀ kɨ bef cheô akî a ghelɨ ghì a ghɨ tî nà ghɨ achɨ jæ ta ka wù koʼ, ɨtoŋ Bôbo ɨ Fɨyini fɨ Isìlæ fɨ̀ ɨ nà yaf nô sɨ a ŋaŋ.

³⁴A nà ghɨ a mɨchi ghè a Ahàb nɨn saʼ ta fòyn Hiyèl ɨ wul ɨ̀ ntèʼ Betèl ɨ nà kasî bâʼlɨ̀ gvî nɨ̀ mbàyn Jèlikò. Wu we kɨ achɨ kì a ka ghɨ baʼlɨ mbàyn nâ yèyn atu, wayn àsɨ nɨ̀ Abilàm ɨ kfɨ. A nà ghɨ ta wù bàʼlɨ̀ nà sɨ tomtɨ̂ àchhfɨ̂, àngòʼsɨ̀ a wayn nɨ̀ ŋweyn ɨ Segùb ɨ kfɨ. Yi n-gayn kɨ ta Bôbo nɨn læ taŋi sɨ̂ Joshwà ɨ wâyn Nûn ma ndyèyn dyefɨ meyn sɨ ɨtuʼ ta wù tàŋi.