1 Kings 21

Jezebèl ɨ zue wul bòm gveyn ŋweyn

¹Nabòt nà n-ghɨ wul ɨ̀ ntèʼ Jezlèl kelɨ gvêyn mɨ̀tam nɨ̀ ŋweyn a mbæ̀ ntoʼ nɨ̀ Ahàb zɨ̀ a yì nà n-ghɨ a Sàmalìyà. ²A læ nà ghɨ achi a li-a, Ahàb ɨ bè sɨ̂ Nabòt na, “Fu gvêyn mɨ̀tam nɨ̀ và yèyn sɨ̂ mà mà yel ɨnfûʼ mêm ateyn. Gvèyn nâ yèyn nɨn ghɨ a mbæ̀ ntoʼ ma ghɨ sɨ fu gveyn mɨ̀tàm ɨ yîlù sɨ̂ và. Wà na kôŋ wì gveyn ɨ yîlù a mà faytɨ làʼ ɨ̀kwo gvêyn wèyn sɨ̂ và.”

³Mɨtì Nabòt ɨ bè sɨ̂ Ahàb na, “Fɨyini fìfɨ̀ a mɨ n-koʼsɨ bu bìmi na mà li afo kì a ghɨ̀bo ghem nɨn læ fu na mà na kelsɨ afo nɨ̀ mà ɨ̀ fu sɨ̂ và.”

⁴Ahàb ɨ kadi ndù a ntoʼ, iwo ateyni ɨ dɨ̂l a ŋweyn ɨwùyn nô sɨ a ŋaŋ, ɨtoŋ ŋweyn ɨ fî yafa bòm ìwo zɨ̀ a Nabòt ɨ wul ɨ̀ ntèʼ Jezlèl bè sɨ̂ ŋweyn na, “Mɨ n-lì wì afo kì a ghɨ̀bo ghem nɨn læ fu na mà na kela sɨ afo nɨ̀ mà ɨ̀ fù sɨ̀ và.” Wu nyìŋì ɨkuyn ɨ bèyn jɨm ɨ teyn na wu n-yɨ wi.

⁵Wî ŋweyn Jezebèl ɨ zu ndù ɨ bɨf iwo zɨ̀ a yi n-fu ngeʼ sɨ̂ ŋweyn na wù na ghɨ wi sɨ yɨ.

⁶Wu bèynsɨ̀ ɨ bè sɨ̂ wî ŋweyn na, “À n-ghɨ bòm ta mà nì bè sɨ̀ Nabòt ɨ wul ɨ̀ ntèʼ Jezlèl wèyn na, mɨ n-yuyn gvêyn mɨ̀tam nɨ̀ ŋweyn yèyn wù na kôŋ wì na mà fu gvêyn mɨ̀tàm ɨyîlù sɨ̂ ŋweyn. Wu bè sɨ̂ mà na, “Mɨ n-fu wi gveyn mɨ̀tàm nɨ̀ mà sɨ̂ và.”

⁷Jezebèl ɨ bè na, “Ba wà lesɨ meyn na wà n-ghɨ fòyn, saʼ ìlaʼ i Isìlæ̀ ma? Lali iyvɨ ɨ yɨ afo ɨ nà kêʼ a jûŋ. Mɨ n-nì-à a wà keli gvêyn Nabòt nâ yèyn.”

⁸Ta wù tàŋi tî, ɨ nyàʼ ŋwàʼlɨ̀sɨ̀ ɨ lèm ìzɨyn i fòyn ateyn ɨ chɨl nɨ̀ fɨ̀nchaʼ fɨ adyaʼ nɨ̀ fòyn fɨ ɨ tum sɨ̂ ghelɨ ghɨto ghì a àŋena nɨn ghɨ a Jezlèl. ⁹Wu nyàʼ a ŋwàʼlɨ̀ nâ ghè na, “Yì feʼtɨ achi sɨ̂ ghelɨ wùl ɨ ghɨ wi sɨ yɨ afo nô sakos. Yì fêʼtɨ̀ yi jàŋtɨ̀ ghelɨ àŋena gvi yvɨ̀ŋtɨ̀ alèʼ ghè a ghɨ nî ghɨ nà yvɨ̂ŋtɨ̀ ateyn. Ghɨ n-yvɨ̂ŋtɨ̀ afu, a yì be a wù chwo dùʼì asɨ. ¹⁰Yì kɨŋ ghelɨ àyùŋ-ayuŋ ghɨ̀ bò, àŋena duʼ kèʼnɨ̀ Nabòt ɨ̀ wam ɨkfaŋ atu nɨ̀ ŋweyn na, “Wà bê meyn àwo a bɨ-a kûm Fɨyini, fì bè àwo a bɨ-a kûm fòyn.” ¹¹Ghelɨ ghɨ to ghì a àŋena nɨn ghɨ a ntèʼ Jezlèl ɨ nì kɨ ighel ta Jezebèl bè a ŋwàʼlɨ̀ afî a wù nyàʼ tum sɨ̂ àŋena. ¹²Àŋena nɨn feʼtɨ meyn àchi wùl ɨ faŋ tɨ̀ yɨ afo sakoʼ, ɨ jàŋ ghelɨ ghɨ gvi yvɨ̀ŋtɨ̀ ɨ bè Nabòt ɨ chwò ɨ dùʼì asɨ. ¹³Ghelɨ àyùŋ-ayuŋ ghɨ̀ bò ɨ wam ɨ̀nkfaŋ atu nɨ̀ ŋweyn na wù be meyn àwo a bɨ-a kûm Fɨyini, ɨ̀ bè àwo a bɨ-a kûm fòyn, tèyn ghɨ li fvɨ̀ nɨ̀ ŋweyn ndù tɨ̀mlɨ zue nɨ̀ ngòʼsɨ̀. ¹⁴Ghɨ tum fèʼtɨ̀ sɨ̂ Jezebèl na ghɨ zue meyn Nabòt, ¹⁵wu yvɨ nô mɨ ɨlvɨ gha ɨ ndu bè sɨ̂ Ahàb na, “Nabòt kfɨ meyn. Ndù læ̂ ɨ lì gvêyn mɨ̀tam zɨ̀ a wù tî teyn na yi n-beyʼlɨ̂ wì sɨ̂ và ɨ nà kela. ¹⁶Kɨ̀ ta wù bè, Ahàb ɨ lù ɨ ndu lì gveyn àteyn ɨ nà kelɨ-a sɨ a ŋweyn a gvêyn.

¹⁷Bôbo ɨ bè sɨ̂ Elajà ɨ nfèʼtɨ̀ i ghaʼnɨ ma yì lù a ntèʼ Tishbè na, ¹⁸“Ndù a ngùŋ nɨ̀ Ahàb a Sàmalìyà. Wa ndù yeyn ŋweyn a gvêyn mɨ̀tam nɨ̀ Nabòt wu kɨŋ sɨ li gveyn àteyn sɨ nà kelɨ-a. ¹⁹Bè sɨ̂ ŋweyn na, “Tèyn nɨn ghɨ ìwo zɨ̀ a Bôbo bè, ‘Wà zue meyn meyn nà sɨ kɨŋ sɨ lì afo a ŋweyn sɨ nà kelɨ-a. Ɨ ma Bôbo, ma be meyn na bɨsɨ nɨn lo mɨ̀luŋ myâ kɨ̀ alèʼ ghè a sɨ tî lò mɨluŋ mɨ̀ Nabòt ateyn. ²⁰Ahàb ɨ yeyn Elajà ɨ bɨf sɨ̂ ŋweyn na, “Mbàynɨ̀ yem, wà kɨŋ meyn yèyn ma læ̂? Elajà ɨ bè na ma yeyn meyn. Wà n-ghɨ tèym ma wà lem meyn sɨ nà ni awo kì a kɨ n-ghɨ wi àtì-ati asɨ nɨ̀ Bôbo. ²¹Yeyna, tèyn nɨn ghɨ ìwo zɨ̀ a Bôbo bè, “Mɨ n-zue và baʼsɨ̂ nô mɨ nɨ̀ wùl ɨ lûmnɨ̀ ɨ̀ kfà vzɨ̂ a wù n-ghɨ isas i ndo nɨ̀ và kèsa wù n-læ̂ kèsa wù n-ghaʼ a. Mɨ n-yès ìsas i ndo nɨ̀ và nô ì jɨ̀m. ²²Mɨ n-yès ìsas i ndo nɨ̀ và kɨ̀ ta mà tî yès isas i ndo nɨ̀ fòyn Jèlobòwàm ɨ wâyn Ahijà bòm ta wà ni meyn ɨtoŋ wom yaf fì nì ghelɨ Isìlæ̀ ni mbɨ.

²³Sɨ̂ Jezebèl, Bôbo bè na, “Bɨsɨ nɨn kfɨlɨ ìgvɨyn i Jezebèl antêynɨ̀ ntèʼ Jezlèl.

²⁴Nô mɨ ndà isas i ndo nɨ̀ Ahàb vzɨ̀ a wu n-kfɨ bula wù fvɨ̂ sɨ a ntèʼ, bɨsɨ nɨn kfɨlɨ ìgvɨyn i ŋweyn, a ɨvzɨ̂ a wù kfɨ ma ghɨ fvɨ meyn ntèʼ a ìŋòʼingumi kfɨl igvɨyn i ŋweyn.”

²⁵Wùl bu læ nà ghɨ ma wù lem meyn sɨ nà ni awo kì a kɨ n-ghɨ wi àtì-ati asɨ nɨ̀ Bôbo têyn ta Ahàb vzɨ̀ a wi nà n-tsfɨtɨ. ²⁶Wu nà n-nî àwo a nyelɨnɨ-a a bemnɨ-a, koʼsɨ̂ ɨ̀nfyèʼsɨ̀ kɨ̀ ta ghelɨ ghì aghɨ nà n-chi a Kenàn a ghɨ ghelɨ ghì a Bôbo nɨn læ saŋ fvɨ̀sɨ asɨ nɨ̀ ghelɨ Isìlæ̀.

²⁷Ahàb ɨ yvɨ awo nâ kèynà a Elajà tàŋi, ɨ ghal bàs ndzɨsɨ ɨwuyn nɨ̀ ŋweyn ɨ tɨm fɨ̀ntsɨ ɨwuyn nɨ̀ ŋweyn ɨ nà chî kɨ nɨ̀ ɨnfeynfɨ ɨwùyn, bu yɨ wi afo, jelɨ̀ chwô koynsɨ̂ kêʼ kɨ keʼ bu ghɨ wi a ŋweyn itof.

²⁸Bôbo bè sɨ̀ Elajà ɨ nfèʼtɨ̀ ì ghaʼnɨ zɨ̀ a yì lù a ntèʼ Tishbè na, ²⁹“Yeyna, ba wà n-yeyn dzɨ zɨ̀ a Ahàb sùʼsɨ ngêŋ ŋweyn ateyn asɨ nɨ̀ mà. Bòm ta wù sùʼsɨ meyn ngêŋ ŋweyn asɨ nɨ̀ mà, mɨ nì wì ngeʼ zɨ̀ a mɨ n-ghɨ sɨ nì a mɨchi nɨ̀ ŋweyn. Mɨ n-kwo nì-à a mɨchi nɨ̀ wayn ŋweyn. À ti ɨlvɨ vzɨ̀ a ka mà yes isas i ndo nɨ̀ ŋweyn ateyn.”