1 Kings 4

Ghelɨ ghɨ felɨnɨ nɨ̀ Sòlomòn

¹Fòyn Sòlomòn læ nà saʼ ìlaʼ i Isìlæ̀ kɨ ì jɨ̀m. ²Ghelɨ ghèyn teyn nà n-ghɨ ghlɨ ghɨ felɨnɨ nɨ̀ ŋweyn: Azalìyà ɨ wâyn Zadòk nà n-ghɨ ngàŋ ndô Fɨyini.

³Elihelèf ŋêyn Ahijà ɨ woyn Shishà nà n-ghɨ ghelɨ ghɨ nyaʼnɨ, Jèhoshafàt ɨ wâyn Ahilùd nà n-ghɨ ntum fòyn.

⁴Bò ndo ìwoŋ nà n-ghɨ Bènayà ɨ wâyn Jèhòyadà, Zadòk ŋêyn Abiyatà ɨ ghɨ ngàŋsɨ ndô Fɨyini. ⁵Azalìyà ɨ wâyn Natàn nà n-ghɨ àtu sɨ̂ ghelɨ ghɨ felɨnɨ, Zabùd ɨ wâyn Natàn ɨ ghɨ ngàŋ ndô Fɨyini fî ghɨ wul ɨ vzɨ̀ a wù n-tebtɨ fòyn. ⁶Ahishà ɨ wâyn Natàn nà n-ghɨ wul ɨ vzɨ̀ a wù n-kini ɨfwo ntoʼ, Adonilàm ɨ wâyn Abdà ɨ kinî ghelɨ ghì a ghɨ nà n-kâyn àŋna felɨ-à.

⁷Ɨbyâs ilaʼ i Isìlæ̀ nà n-ghɨ njvàsɨ̀ bò ma Sòlomòn lem meyn ghelɨ na ghɨ na saʼ ɨ̀lwêʼ nâ wèyn. Ɨtu nâ wèyn nà n-kelɨ sɨ nà fsɨtɨ ɨfwo ɨ yɨnɨ sɨ̂ ghelɨ ɨbyàs ilaʼ nâ wèyn, ghɨ gvì ɨ fu sɨ̂ fòyn ŋêyn ìsas i ndo nɨ̀ ŋweyn. Abâs ilaʼ àmòʼ nà n-fu njoŋ ìmòʼ a bêŋ./ Ɨbyâs ilaʼ i Isìlæ̀ nà n-ghɨ njvàsɨ̀ bò ma Sòlomòn lem meyn ghelɨ na àŋena na ghɨ ɨ̀tu ɨlweʼ nâ ghàyn. Nô mɨ àtu abàs ilaʼ à kà nà n-klɨ sɨ fsɨtɨ ɨfwo ɨ yɨnɨ abàs ilaʼ nɨ̀ ŋweyn sɨ gvì sɨ fu sɨ̂ fòyn ŋêyn ìsas i ndo nɨ̀ ŋweyni. Abâs ilaʼ à mòʼa nà n-fu njoŋ ìmòʼ a bêŋ. ⁸Tèyn nɨn ghɨ àzɨyn a ghlɨ kì a ghɨ nà n-ghɨ ɨtu ɨbyàs ilaʼ. Ben-Hùl nà n-ghɨ àtu abàs a Eflèm a ghɨ ìlaʼ i kfɨynsɨ. ⁹Ben-Dekà ɨ ghɨ àtu abàs afî a ntèʼ Makàz nɨ̀ ntèʼ Shalbìm nɨ̀ Betshemèsh nɨ̀ Elòn nɨ̀ Bet Hanàn nɨn ghɨ ateyn. ¹⁰Ben Hesèf ɨ ghɨ àtu abàs afî a ntèʼ Alubòt nɨ̀ Socò nɨ̀ Hefà nɨn ghɨ ateyn. ¹¹Be Abinadàb ɨ ghɨ àtu abàs afî a ntèʼ Nafot Dô nɨn ghɨ ateyn. Wî ŋweyn nà n-ghɨ Tafat a ghɨ wâyn Solomòn. ¹²Banà ɨ wâyn Ahilùd ɨ ghɨ àtu abàs afî a ntèʼ Tanàk nɨ̀ Megidò nɨ̀ Bet Shàn ì jɨ̀m zɨ̀ a yi n-baʼsɨ ndû a Zaletàn, nɨn ghɨ ateyn. Abâs nâ kèynà ɨ ghɨ isas i ntèʼ Jezlèl ɨlvɨ ta wà lù a Bet Shàn nà ndû a Abel Mèholà injɨyn i Jokmìm. ¹³Ben Gebà ɨ ghɨ àtu abàs afî a ntèʼ Lamòt zɨ̀ a yì n-ghɨ a Gilèd nɨn ghɨ ateyn. Wu nà n-ghɨ àtu sɨ̂ ntèʼ sîsɨ̀ a Jayì ɨ wâyn Mànasè nà n-kelɨ sɨ ghɨ a Gilèd. A nà n-klɨ ŋweyn abâs ilaʼ kì a ghɨ n-toŋtɨ na Agòb. Abâs a ilaʼ nâ kèynà ɨ ghɨ a Bashàn kelɨ ntèʼ sɨ ghaʼlɨnɨsɨ mɨ̀vɨm ntufa ma ghɨ baʼlɨ meyn mbàynsɨ̀ ateyn ɨ̀ we mbàŋsɨ̀ ɨkwàs ɨ bùlûns achfɨ̀ ateyn. ¹⁴Ahinadàb ɨ wâyn Idò ɨ ghɨ àtu a Màhanayìm. ¹⁵Ahimàz nà n-ghɨ àtu a Naftalì. Wu nà n-ghɨ ma wù li meyn Sòlomòn sɨ a wi izɨyn i ŋweyni ɨ ghɨ Basimàt. ¹⁶Banà ɨ wâyn Hushày ɨ ghɨ àtu a Ashà nɨ̀ Belòt. ¹⁷Jèhoshafàt ɨ wâyn Balùwà ɨ ghɨ àtu a Isakà. ¹⁸Shimèl ɨ wâyn Elà ɨ ghɨ àtu a Benjamìn. ¹⁹Gebà ɨ wâyn Ulì ɨ ghɨ àtu ilaʼ i Gilèd a ghɨ ìlaʼ ma à nà n-saʼ ghelɨ Sihòn ŋêyn Ôg. Sihòn nà n-ghɨ fòyn saʼ ghelɨ Amò, Ôg ɨ saʼ ghelɨ Bashàn nô mɨ ta ɨbyâs nâ wèyn njvàsɨ̀ bò nà n-ghɨ kelɨ ɨ̀tu vzɨ̀ a wu n-tisɨ , a nà n-ghɨ kɨ wul ɨ̀ mòʼ atu sɨ̂ ìlaʼ ì jɨ̀mì.

Ighaʼ nɨ̀ ìtof i fòyn Sòlomòn

²⁰Ghelɨ Judà nɨ̀ ɨghɨ Isìlæ̀ nà n-ghɨ ma ghɨ dvɨ meyn nà ghɨ ta asese a jvâ ì ghaʼnɨ. Àŋena nà n-saŋlɨ-à, yɨ-a fî nyvɨ-a. ²¹Sòlomòn nà n-ghɨ àtu sɨ̂ tɨ̀fôyntɨ̀ nô tɨ̀ jɨ̀m sɨ zɨ̀tɨ kɨ a jvâ Yuflèt sɨ ndù sɨ chem ilaʼ nɨ̀ ghelɨ Fìlisìyà sɨ fì sɨ ndù sɨ chem ighami nɨ̀ Ijìb. Tofôyn nâ t̀yntɨ nà n-gvî nɨ̀ tɨ̀futɨ sɨ̂ Sòlomòn ɨ faŋ kɨ isas adyaʼ nɨ̀ Sòlomòn sɨ chem a ngòʼsɨ. ²²Ɨfwo ɨ yɨnɨ vzɨ̀ a ghɨ nà n-gvî nɨ̀ ŋweyn achi àmòʼ sɨ̂ fòyn Sòlomòn nɨ̀ ghelɨ ŋweyn nà n-ghɨ nkwò sɨ gvɨmalù sɨ ɨnkfɨ̀ŋ ntufa, ma ghɨ gvâ meyn mɨ̀ faytɨ kfɨ nɨ̀ sɨ lisɨ njvàsɨ̀ bò bula mɨ̀ tôʼ kfɨ, ²³nɨ̀ nyamsɨ ìvɨm ma ghɨ yɨsɨ nɨ̀ àsaŋ nɨ̀ sɨ lisɨ mɨ̀vɨm ɨ̀m bò ma ghɨ yɨsɨ ɨtwaʼ, nɨ̀ njɨ̀sɨ̀ ɨvɨ weʼa, nɨ̀ nyamsɨ ɨtwaʼsɨ têyn ta mɨchue nɨ̀ ngwosɨ nɨ̀ tɨ̀nkì tɨ ngwo tɨlitɨ nɨ̀ ngvɨsɨ. ²⁴Sòlomòn ɨ nà saʼ tɨ̀laʼ nô tɨ̀ jɨ̀m abàs a jvâ Yuflèt ghè a ɨchfɨ̂ iyvɨ i nɨn sœ ateyn, zɨtɨ̀ kɨ a ntèʼ Tifsà sɨ ndù sɨ chem a Gazà. Tifôyn tɨ̀ jɨ̀m ɨlwèʼ nâ ghàyn nà n-ghɨ kɨ isas isaʼ nɨ̀ ŋweyn ŋêyn tɨ̀laʼ tìtɨ̀ a tɨ n-baʼsɨ ɨ nà chî nɨ̀ mbôynɨ̀. ²⁵Sòlomòn læ chi ta fòyn ɨ chem a ngòʼsɨ bula iwo i gâyn sɨ fu ngeʼ sɨ̂ ìlaʼ i Isìlæ̀ sɨ zɨ̀tɨ kɨ a ntèʼ Dân abàs ikuè sɨ kàlì sɨ chem a ntèʼ Beshebà abàs itsɨyn. Wùl nà n-duʼ nô mɨ isas i fɨ̂kàʼ fɨ fɨ̂ksɨ̀ kèsa isas i fɨ̂kàʼ fɨ gɨ̀lêbsɨ̀ wu nà dêŋsɨ̀ duʼ kɨ duʼ.

²⁶Sòlomòn nà n-kellɨ ɨ̀lwêʼ nkam mɨ̀vɨm ɨ̀n kæ̀ ta wù fàytɨ lèm nyamsɨ kfaŋ sìsɨ̀ a sɨ n-gûf mɨtù mɨ̀ ìwòŋ, kelɨ ghelɨ ghì a ghɨ n-nu iwoʼ atû nyàmsɨ̀ kfaŋ nkam njvàsɨ̀ bò.

²⁷A nà n-ghɨ nô mɨ a njoŋ ì kà, atu abàs ilaʼ àmòʼ antêynɨ̀ ɨ̀byàs ilaʼ njvàsɨ̀ bò, kɨ gvì nɨ̀ ɨfwo ɨ yɨnɨ sɨ̂ fòyn wu kfeynɨ̂ ta ka wù yɨsɨ ghelɨ baʼsɨ̂ nɨ̀ ɨghî a ghɨ gvì a ntoʼ. ²⁸Àŋena nà n-gvî kɨmɨ nɨ̀ ɨ̀fwo ɨ yɨnɨ nɨ̀ nyamsɨ ghɨ toŋtɨ̂ na balè. Nô mɨ nda nà n-gvî kɨ ɨfyèʼ ghè a ghɨ fù sɨ̂ ŋweyn./ Àŋenaa nà n-gvî kɨmɨ nɨ̀ ɨ̀fwo ɨ yɨnɨ sɨ̂ nyamsɨ kfaŋsɨ nɨ̀ isîsɨ̀ a ghɨ nu iwoŋ nɨ̀ nseynsɨ, ghɨ lèm ɨlwèʼ ghè a ghɨ bè. Ɨfwo ɨ yɨnɨ nɨ̀ nyamsɨ nâ wèyn nà n-ghɨ asɨ asɨ ghɨ toŋtɨ̂ na balè baʼsɨ̂ nɨ̀ ɨywaŋsɨ asaŋ kɨ ɨfyèʼ ghè a ghɨ fù sɨ̂ wùl.

²⁹Fɨyini fɨ ɨ fu itof sɨ̂ Sòlomòn nô sɨ a ŋaŋ ɨ nì ata a ŋweyna nà bayn sɨ ni awo kɨ dvɨ̂ chwò àsese a mbæ̀ jvà ìghaʼnɨ. ³⁰Itof i Sòlomòn nâ yèynì nà n-chwô ìtof i ghêl nô ghɨ̀ jɨ̀m ghì a ghɨ n-chi abàs ghè a ɨchfɨ̂ iyvɨ i nɨn sal ateyn fî chwô ìtof i ghêl nô ghɨ̀ jɨ̀m ghì a ghɨ n-chi a Ijìb. ³¹Wu na n-tof chwô nô mɨ ndà. Wu nà n-tof chwô Etàn, tof chwô Ezla nɨ̀ Hemàn nɨ̀ Kalcòl nɨ̀ Dadà, nɨ̀ woyn Mahòl ɨ tɨlaʼ tìtɨ̀ a tɨ n-baʼsɨ ɨ yvɨ kûm ìbem i ŋweyn. ³²Sòlomòn nɨn nyaʼ meyn àwo a tofɨnɨ-a a dzɨ ngàynsɨ̀ nkamsɨ̀ tal, fi nyàʼ njàŋsɨ̀ nkam nɨ̀ njàŋsɨ̀ tâyn. ³³Wu n-taŋi meyn kùm tɨ̀nkì tɨ ɨfwo ɨ jɨ̀m vzɨ̀ a wu n-fvɨ̂ a nse wu nà lemâ tèyn ta ɨnkâʼ mɨ̀ ìlaʼ i Lebanòn, nɨ̀ ɨ̀fwo vzɨ̀ a wu n-fvɨ̂ azɨ a ndo wu nà lemâ. Wu n-taŋi meyn kùm nyamsɨ nɨ̀ mɨ̀nyûyn mɨ̀ mbamsɨ nɨ̀ sfɨsɨ. ³⁴Tɨfôyntɨ tɨlaʼ tɨ litɨ yvɨ saʼgha kûm ìtof i Sòlomòn ɨ tum ghelɨ na àŋena gvi yvɨ̀tɨ./Tɨfôyntɨ tɨlaʼ tɨ mbzɨ nô tɨ̀ jɨ̀m tìtɨ̀ a tɨ yvɨ iwo kûm ìtof i Sòlomòn ɨ tum ghelɨ na àŋena gvi yvɨ̀tɨ.