1 Kings 3
Sòlomòn ɨ jèm sɨ keli itof
1Fòyn Sòlomòn nɨn læ nà kɨŋ na ŋêyn fòyn ìlaʼ i Ijìb na yɨnɨ-à ɨ mala wâyn ntoʼ Ijìb. Wu n-læ ndu lì wul ɨ wi àteyn ɨ gvì nɨ̀ ŋweyn a ntèʼ ghè a ntoʼ Devìt nɨn ghɨ ateyn/Jèlusalèm. Wu faŋ kɨ afu sɨ chem ta ka Sòlomòn baʼlɨ mèsì ntoʼ, ɨ̀ bàʼlɨ̀ mèsì ndô Fɨyini baʼsɨ̂ nɨ̀ mbàyn zɨ̀ a yì jɨ̀ŋ kàli Jèlusalèm. 2Mɨtì ghelɨ nà bu fu tɨ̀fu ɨbwaŋ tɨfu ɨlwèʼ ɨ koʼsɨnɨ ɨlvɨ bòm ta ghɨ nà n-bu duʼ tɨ̀ bàʼlɨ ndo zɨ̀ a ka ghɨ na koʼsɨ̂ Bôbo ateyn. 3Sòlomòn ɨ nà kôŋ Bôbo ɨ faŋ nà nî kɨ àwo à jɨ̀m kì a bò ŋweyn Devìt nɨn læ bè na wù ni. Yi n-ghɨ kɨ na wu n-læ meyn nà bu ndù fu tɨ̀fu ɨbwaŋ ɨlwèʼ ɨ koʼsɨnɨ ɨlvɨ, nyôʼ ɨ̀fwo ɨlɨmtɨnɨ. 4Gibìyòn nà n-ghɨ àlêʼ ato-a kì a ghɨ nà n-fu tɨfu ateyn. A læ nà ghɨ achi a li-a, fòyn Sòlomòn ɨ ndù afu ɨ fu tɨfutɨ nyoʼnɨtɨ nkam abaŋ ifu. 5Sòlomòn ɨ nà bu ghɨ kɨ a Gibìyòn, Bôbo ɨ ni kfa fvɨ̀ ikèʼ nɨ̀ ŋweyn nɨ̀ntuʼ a jem ɨ bè sɨ̂ ŋweyn na, “Wà n-kôŋ na mà fu gha sɨ̂ và a? Bɨf a ka mà fu sɨ̂ và.” 6Sòlomòn ɨ bèynsɨ̀ ɨ bè na, “Wà dyêyn meyn ìkôŋi bemnɨ-i sɨ̂ wùl ɨ̀ felɨnɨ nɨ̀ và Devìt ɨ bò wom. Wù tî nà samsɨ̂ và chî a dzɨ afî a yì n-layn asɨ nɨ̀ và, fî nî àwo kì a kɨ n-ghɨ àtì-ati asɨ nɨ̀ và fvɨ̂ kɨ nô atem nɨ̀ ŋweyn. Awo nâ kèyna nî wà tôʼnɨ̀ nɨ̀ ŋwyn a dzɨ i bemnɨ ɨ lì wayn ŋweyn ɨ lèm sɨ a fòyn lvɨ̂yn.
7Ta wù nì meyn tèyn a Bôbo Fɨyini femfɨ, mɨ n-ghɨ kɨ ta wayn ɨtwelâ nô mɨ ta wà lèm meyn wul ɨ̀ felɨnɨ nɨ̀ và alèʼ nɨ̀ Devìt ɨ bò wom, mɨ n-kelɨ wi itof sɨ tisɨ ghelɨ/sɨ saʼ ghelɨ. 8À n-ghɨ mà têyn ɨ wul ɨ̀ felɨnɨ nɨ̀ và antêynɨ̀ nɨ̀ ghelɨ, ɨghî a wà chòʼ sɨ a ghêl nɨ̀ và. Àŋena nɨn dvɨ-à ma ghɨ kàʼ ghɨ bû taŋ. 9Bòm tèyn ma na loyn na wà ni atu à kema na bayna ma kelî sɨ saʼ ghelɨ nâ ghèyn fî kya sɨ yeyn sɨ keli iwo i juŋì nɨ̀ izɨ-ì a yi n-befɨ. Atu à kema kæ nà bayn wi, mɨ n-bû kèli sɨ saʼ ghelɨ ghya nâ ghèyn a ghɨ n-bem têyn.”
10Iwo zɨ̀ a Sòlomòn bɨf, yi nì Bôbo nà saŋlɨ-à. 11Fɨyini fɨ ɨ bè sɨ̂ ŋweyn na, “Wà bɨf na mà ni wà toʼ chi, wà bû bɨf na mà fu ighaʼ i bemnɨ-i sɨ̂ và, wà bû bɨf na mà zuetɨ mbàynɨ̀ shyasɨ, wà bû bɨf awo nâ kèynà. Mɨtì wà bɨf na mà ni atu à kya kɨ na bayna ta ka wà na yeyn kelî ìwo i juŋì. 12Yeyna, mɨ n-nì kɨ ighel ta wà bɨf. Mɨ ni-à a wà na tofɨ chwô nô mɨ wul ɨ̀ tofɨnɨ ɨ̀ kfà vzɨ̂ a wu n-læ nà ghɨ nô mɨ nɨ̀ ɨvzɨ̂ a ghɨ læ̀ jæ bzɨ. 13Sɨ kfeynsɨ, mɨ n-fu àfo sɨ̂ và bula wà nî bɨf. mɨ n-nì-à a wà na kelɨ ìghaʼ, ghelɨ fî ngvɨmlɨ̂ và sɨ chem ta ka wà læ̂ chi ndù gòʼsɨ̀. Fòyn ɨlvɨ̀ læ̀ nà ghɨ wi a mbzɨ bem t̀yn ta vâ. 14Wà kæ nà yvɨnɨ ma, lêm tɨ̀saʼ temtɨ, nî àwo kì a mà bè kɨ ighel ta bò vâ Devìt nà n-nî, a mà ni a wà toʼ chi nô sɨ a ŋaŋ.” 15Sòlomòn ɨ chɨl ɨ gvɨ̀tɨ̀ ɨ yeyn na à n-ghɨ jem ta Fɨyini fɨ tàŋi sɨ̂ zɨ̀ ateyn. Wu kasi ndù a Jèlusalèm ɨ ndu timi asɨ a fɨntayntayn fɨ mɨ̂kàyn nɨ̀ Bôbo ɨ fu tɨfu tɨ nyoʼnɨtɨ nɨ̀ ɨtɨ yɨnɨntɨ. A nà sɨ ghɨ sɨ ibàm ateyn, wu fu ɨfwo ɨ yɨnɨ sɨ̂ ghlɨ ghɨ felɨnɨ nɨ̀ ŋweyn nô ghɨ̀ jɨ̀m.
Sòlomòn ɨ nì ìwo i tofɨnɨ-i/Sòlomòn ɨ saʼ nɨ̀ ìtof i
16À n-læ nà ghɨ achi a li-a ɨ̀kfàlà ɨ gvì ɨ̀bwò ɨ timi asɨ nɨ̀ fòyn Sòlomòn. 17Àkfàlà a li-a ɨ bè na, “Mbæ̀, mɨ n-chwotɨ̂ và, ghesɨ̀ wùl ɨ wi wèyn nɨn chî kɨ a ndo ìmòʼ, ma tî bzɨ wayn wu ghɨ a ndo. 18Ta mà bzɨ tî, mɨ̀chi chwô ɨ̀n bò wù boŋ bzɨ. Ghesɨ̀ ŋweyn ɨ ghɨ a ndo kɨ ghɨ̀ bò bula wul ɨlvɨ̀ fî zɨ. 19À nî nà ghɨ nɨ̀ntuʼ ɨ wul ɨ wi wèyn nyiŋì yèʼtɨ wâyn ŋweyn wù kfɨ, 20Wù nî làlì antêyɨ̀ nɨ̀n tuʼ ɨ̀ gvì chàʼsɨ̀ wâyn wom a ngùŋ nɨ̀ mà ma bunî bùni. Ta wù chàʼsɨ̀ tî, ɨ̀ lì àkfɨ a wayn nɨ̀ ŋweyn nâ kì ɨ gvì nyɨ̀ŋsɨ̀ a ngùŋ nɨ̀ mà ɨ̀ ndù nyɨ̀ŋsɨ̀ wâyn wom a ngùŋ nɨ̀ ŋweyn. 21Ma nî làlì nɨ̀ bɨsì bɨsì na sɨ kɨŋ sɨ nyoŋsɨ wâyn wom yeyn ma wù kfɨ meyn. Ma se sɨ tòʼ sɨ ki ta abe-a làynì mèsì, ɨ̀ yeyn a ghɨ wi wayn vzɨ̀ a mà tî bzɨ.” 22Mɨtì wùl ɨ wi ɨ̀lvɨ̀ ɨ bè na, “Ngaŋ! Wâyn ɨ̀ kfɨnɨ nɨn ghɨ wâyn vâ, wayn ɨtwo wèyn ɨ ghɨ wâyn wom. Wùl ɨ wi vzɨ̀ asɨ ɨ bè na, “Ngaŋ! wayn ɨ kfɨnɨ nɨ ghɨ wâyn vâ, ɨtwo wèyn ɨ ghɨ ɨ wôm.” Àŋena faŋ ɨ nà gûmnɨ̀ kɨ gumnɨ asɨ nɨ̀ fòyn.
23Fòyn Sòlomòn ɨ yvɨtɨ tèyn ɨ bè na, “Wùl ɨ̀ mòʼ nɨn bê na wayn ɨtwo wèyn nɨn ghɨ wâyn wom, ɨ kfɨnɨ wèyn ɨ ghɨ wâyn vâ, ɨ̀lvɨ̀ ɨ bê na, wayn ɨ kfɨnɨ wèyn nɨn hɨ wâyn vâ ɨtwo wèyn ɨ ghɨ wâyn wom.”
24Tèyn, li fu fɨ̀nyuè sɨ̂ mà. Ghɨ lì fɨ̀nyuè ɨ fu sɨ̂ fòyn. 25Fòyn ɨ be sɨ̂ ghelɨ ghɨ felɨnɨn nɨ̀ ŋweyn na, “Sɨ teyn wayn ɨtwo wèyn kɨ̀ antêynɨ̀ àntêynɨ̀ ɨ fu abâs àmòʼ sɨ̂ wùl ɨ̀ mòʼ ɨ fu ali-a sɨ̂ wùl ɨ̀lvɨ̀.”
26Nà wàyn vzɨ̂ a wayn ŋweyn nà n-ghɨ ɨtwo ɨ chwotɨ fòyn ɨ bè na, “Mbæ̀, mɨ n-kôŋ wayn wèyn nô sɨ a ŋaŋ. Ka n-zuè wayn àteyn. Fu ndu sɨ̂ ŋweyn. Wùl ɨ wi ɨ̀lvɨ̀ ɨ byal ɨ bè na, “Sɨ kɨ ta wà nà kɨŋ sɨ sɨ a mbæ̀, ghèsɨ̀ lɨm wayn àteyn ghɨ̀jɨ̀m.
27Sòlomòn ɨ bè na, “Ka yi n-zuè wayn àteyn. Yì fu wayn àteyn sɨ̂ wùl ɨwi àsɨ vzɨ̀. Wù n-ghɨ nà wàyn nâ wèyn.
28Ghelɨ Isìlæ̀ ɨ yvɨ dzɨ zɨ̀ a fòyn saʼ teyn, iwo nâ yèynì ateyn, àŋena nà ngvɨmlɨ̂ fòyn nô sɨ a ŋaŋ bòm ta àŋena nɨn yeyn meyn na wù teyn meyn nsaʼ nâ yèyn nɨ̀ ìtof i ma à fu Fɨyini.