1 Samuel 11

Sôl ɨ tɨm yɨ ghelɨ ntèʼ Amòn

¹Nahàsh ma à ti fòyn Amòn nɨ̀n li meyn ghelɨ iwòŋ nɨ̀ ŋweyn ɨ ndù nɨ̀ àŋena a ntèʼ Jabèsh abàs ilaʼ ghè a ghɨ nà n-toŋtɨ na Gilèd. Ta wù ndù tî ɨ jɨŋ kali ìlaʼ nâ zɨ̀-ì. Ghelɨ Isìlæ̀ ghì a ghɨ nà n-chi a ntèʼ Jabèsh ɨ tum bè sɨ̂ ŋweyn na, “Wà na koŋà wa yɨnɨ ghesɨ̀nà ta ka ghès faŋ tɨ̀ fì tɨ̀ nu zɨ ɨ̀ nà kwo yvɨ kɨ sɨ̂ và.”

²Mɨtì fòyn Nahàsh nâ wèyn ɨ bè na ghɨ ndu bè sɨ̂ àŋena na, “Mà kàʼ a mà bɨmi iwo zɨ̀-ì a yì bè ɨlvɨ ta yì bɨ̀mi na mà bòʼ fvɨ̀sɨ̀ àsɨ ɨkœ ɨ two nɨ̀ ghelɨ Isìlæ̀ nô ghɨ̀ jɨ̀m a ntèʼ afêyn. Mà kæ sɨ ni têyn a mà wumsɨ ghelɨ Isìlæ̀ nô ghɨ̀ jɨ̀m.”

³Ghelɨ ghɨ tisɨnɨ a ntèʼ Jabèsh ɨ yvɨ iwo nâ yèynì ɨ tum na ghɨ ndu bè sɨ̂ fòyn Nahàsh na, “Fu ghes nɨ̀ mɨ̀chi nsòmbo ghès tum loyn igâmtɨ̀ sɨ̂ ghelɨ Isìlæ̀ nô ghɨ̀ jɨ̀m. Ghès kæ tum wùl faŋ tɨ̀ gvì sɨ gàmtɨ ghes, a ghès fe kɨ̀ a yi asɨ.”

⁴A nà sɨ ghɨ ta ghelɨ ntum nâ ghì ndù chèm a ntèʼ nɨ̀ Sôl a Gibìyà ɨ̀ fèʼtɨ̀ ìwo ateyn sɨ̂ ghelɨ ntèʼ nâ ghì, ghelɨ ateyn ɨ fe kɨ nɨ̀ ìdzɨ-ì. ⁵Kɨ̀ têyn Sôl ɨ lù a ŋweyn a gvêyn ɨ nà kasi kfa gvi-à, leŋtɨ̂ kfâ gvî nɨ̀ mbòŋsɨ ŋweynsɨ ɨ bɨf sɨ̂ ghelɨ ghì afu na, “À n-gâyn ghà? Ghelɨ nɨn bɨ̂ dzɨ̂nɨ̀ ghà teyn a?” Ghelɨ ateyn ɨ fèʼtɨ̀ ntum zɨ̀ a ghelɨ Jabèsh gvì nɨ̀ ɨ̀nyeyn.

⁶Sôl ɨ yvɨ iwo ateyn Ayvɨs a Fɨyini-à ɨ nèʼ ŋweyn, ɨtoŋ ŋweyn ɨ yaf nô sɨ a ŋaŋ. ⁷Wu lì mbòŋsɨ ŋweyn sɨ lisɨ ɨ sɨ ɨ kaʼtɨ kɨ a tɨ̂kàʼ a tɨ̂kàʼ ɨ fu na ghelɨ ntum jel dyèyn tɨ̀kaʼ tɨ ateyn sɨ̂ ghelɨ Isìlæ̀ nô ghɨ̀ jɨ̀m ɨ̀ bè sɨ̂ àŋena na, “À ti iwo zɨ̀-ì a ka yi gayn nô mɨ sɨ̂ mbòŋsɨ nda sɨ ɨlvɨ ta wù faŋ tɨ̀ jùmtɨ Sôl ŋêyn Samwèl na ghɨ ndu nù ghelɨ Amòn.” Ghelɨ ateyn yvɨ ntum nâ zɨ̀ Fɨyini fɨ nì àŋena nà fayn nô sɨ a ŋaŋ bòm ta àŋena yèyn na Fɨyini fɨ fu meyn àdyaʼ sɨ̂ Sôl, nô mɨ ɨlvɨ gha ɨ fvɨ gvì kɨ ghɨ̀ jɨ̀m ŋêyn ghɨ̀ Sôl ɨ seʼ alèʼ iwòŋ. ⁸Sôl ɨ ndu yvɨ̀ŋtɨ̀ ghelɨ a Bezèk ɨ taŋ, ghelɨ Isìlæ̀ ɨ fvɨ̀ nkam ighɨ ìtal, ghelɨ Judà ɨ fvɨ̀ nkam mɨ̀vɨm ɨ̀n tal.

⁹Sôl ɨ kasi tum ghelɨ ntum ghì a ghɨ lù gvì a ntèʼ Jabèsh na ghɨ ndu bè sɨ̂ ghelɨ afu na, “À læ̀ nà ghɨ a libɨs ɨlvɨ ta chuè bayn to a ghès gvi gàmtɨ̀ fsɨ zɨ sɨ awu nɨ̀ mbàynɨ̀ sisɨ.” Ghelɨ ateyn ɨ ndu làʼì ntum àteyn sɨ̂ ghelɨ ntèʼ Jabèsh. Àŋena nà saŋlɨ̂ nô sɨ a ŋaŋ. ¹⁰Ghelɨ ntèʼ Jabèsh ɨ tum na ghɨ ndu bè sɨ̂ ghelɨ ntèʼ Amòn na, “À læ̀ nà ghɨ a libɨs a ghès ɨ̀ gvi fu ngeŋ seysɨ sɨ̂ zɨ̀, a yì ni iwo zɨ-ì a yi n-koŋ nɨ̀ ghès.”

¹¹Ɨtuʼ ɨ layn Sôl ɨ gwòsɨ̀ ghelɨ ŋweyn inôyn ì tal. A ni nà ghɨ a nlâyn ɨ̀tùʼ àŋena zɨ alèʼ ghè a ghelɨ Amon nà n-ghɨ ateyn ɨ zɨ̀tɨ̀ sɨ zuetɨ àŋena ɨ ni zuetɨ kɨ têyn chuè ɨ ni bayn to àŋena zuetɨ̂ kɨ zuetɨ. Ɨghî a ghɨ faŋ ɨ leʼnɨ ɨ ndu kɨ ɨlwèʼ ɨlwèʼ, nô mɨ ndà ɨ leʼ ndû kɨ ŋweyn nìnyɨŋ.

¹²Ghelɨ Isìlæ̀ ɨ bɨf sɨ̂ Samwèl na, “Ghelɨ ghì ba a ghɨ tî nà bê na Sôl nɨn kelɨ wi sɨ nà ghɨ fòyn wes tî a? Yì li gvì nɨ̀ àŋena ɨ̀ fù ghèsɨ̀ zuetɨ.”

¹³Mɨtì Sôl ɨ bè sɨ̂ ghelɨ ateyn na, “Ɨ̀ngaŋ. Wùl nɨn zue wi wul layn nô ɨ̀mòʼ bòm ta layn nɨ̀n ghɨ àchi kì a Fɨyini fɨ bœ̀sɨ ghelɨ Isìlæ̀ ateyn.”

¹⁴Samwèl ɨ kæ be sɨ̂ ghelɨ ateyn na, “Ghesɨ̀nà ndu a ntèʼ Gilgàl ɨ̀ fì jemtɨ na Sôl nɨ̀n ghɨ kɨ nô fòyn ghesɨ̀nà.” ¹⁵Nô ghelɨ ghɨ̀ jɨ̀m ɨ ndù a ntèʼ Gilgàl asɨ nɨ̀ Bôbo Fɨyini ɨ fi lèm Sôl sɨ a fòyn. Àŋena lèm tì ɨ sɨ nyam ɨ fu sɨ̂ Fɨyini fɨ sɨ baʼtɨ ichi ɨ chɨ̀yntɨ̀ ɨ kfɨl njwò ateyn. Sôl ŋêyn ghelɨ Isìlæ̀ nô ghɨ̀ jɨ̀m ɨ chɨ̀yntɨ yɨ ayɨ a ghaʼnɨ-a achi nâ ghè.