1 Samuel 12

Samwèl ɨ taŋi ɨ gòʼsɨ̀ sɨ̂ ghelɨ

¹Samwèl nɨ̀n be meyn sɨ̂ ghelɨ Isìlæ̀ nô ghɨ̀ jɨ̀m na “Ma ni meyn nô mɨ ghà vzɨ̀ a yì tî bè na mà ni. Ma choʼ meyn fòyn na wù na saʼ zɨ̀. ²Sɨ zɨ̀tɨ lvɨ̂yn sɨ ndù asɨ à n-ghɨ ŋweyn vzɨ̀ a ka wù nà saʼ zɨ̀. Mà sɨ ghɨ ma ma lema meyn, atu à kema fɨf, woyn ghem ghɨ̀bò ɨ ghɨ afêyn zɨ̂ àŋena, ma ma tisɨ meyn zɨ̀ kɨ̀ sɨ zɨ̀tɨ sɨ a wayndà sɨ koʼ sɨ chem lvɨ̂yn. ³Yi n-faytɨ̂ kya mà. Ta ghesɨ̀nà nɨn ti afêyn asɨ nɨ̀ Bôbo nɨ̀ fòyn vzɨ̀ a wù choʼ meyn, wùl nɨ̀n ghɨ a zɨ̀ antêynɨ̀ a wù kàʼ a wù feʼtɨ iwo i bzɨ-i ta mà nì-a? Wùl nɨ̀n ghɨ afêyn a mà tìmi ghal fsɨ mbòŋ ŋweyn kèsa njàkâs ŋweyn a? Wùl nɨ̀n ghɨ afêyn a mà tìmi fsɨ afo a ŋweyn a? Ma timi meyn nì ìwo i bzɨ-i sɨ̂ wùl a? A wùl ti kàʼ a wù be na yi timi meyn yùyntɨ mà na mà saʼ fù nsaʼ sɨ̂ ŋweyn a? Mà kæ sɨ nà ghɨ ma ma timi meyn nì iwo i bzɨ-i sɨ̂ wùl a mà faytɨ.”

⁴Ghelɨ Isìlæ̀ ɨ bè na, “Wà bû tìmi lɨ̀sɨ wul. Wà bû tìmi nà yeʼtɨ̂ ghès. Wà bû tìmi ghal fsɨ afo a wûl.”

⁵Samwèl ɨ kæ be sɨ̂ àŋena na, “Bôbo ti n-ghɨ nchwò nsaʼ lvɨ̂yn na yi fe meyn. Fòyn vzɨ̀ a wù choʼ ɨ ghɨ kɨmɨ nchwò nsaʼ layn na ma bû tìmi ghal fsɨ afo a wul sɨ̂ zɨ̀.” Àŋena bè na, “Bôbo nɨn kya na wà bû tìmi nì bebsɨ ìwo sɨ̂ ghès.”

⁶Samwèl ɨ fi bè na, “À n-læ choʼ Bôbo ɨ choʼ Mosìs ŋêyn Alòyn na ghɨ na tisɨ̂ ghɨ̀bo ghi. Wu n-læ toynɨ a àŋena sɨ fvɨ̀sɨ ghɨ̀bo ghi sɨ a ndô àkòs ilaʼi Ijìb. ⁷Yì faytɨ yvɨ̀tɨ bòm ta mɨ n-baynsɨ̂ ìsas ì zɨ-i asɨ nɨ̀ Bôbo lvɨ̂yn. Mɨ n-dyèyn nchwæ na yi ni meyn mbɨ. Mɨ ni-à a yì kasî bètɨ̀ àwo a jûŋ kì a Bôbo nɨn læ ni sɨ bœ̀sɨ zɨ zɨ̂ ghɨ̀bo ghi.”

⁸“À nà n-ghɨ ta Jàkôb ŋêyn ghelɨ ŋweyn lù ndù ilaʼi Ijìb ghelɨ Ijìb ɨ nà fu ngeʼ sɨ̂ àŋena. Ghɨ̀bo ghi dzɨ̀ sɨ̂ Bôbo wu tum Mosìs ŋêyn Alòyn àŋena fvɨ̀sɨ̀ ghɨ̀bo ghi sɨ afu ɨ gvi lèm àŋena afêyn.”

⁹“Mɨtì ghɨ̀bo ghi lèsɨ̀ Bôbo Fɨyini fɨ àŋena, fɨ fu àŋena sɨ̂ àtu a sugeyʼsɨ nɨ̀ ntèʼ Hazò kì a ghɨ nà n-toŋtɨ na Siselà. Wu tɨm yɨ àŋena. Ghelɨ Fìlisìyà ɨ fi boŋ tɨm yɨ àŋena. Fòyn Mowàb nɨ̀ sugèyʼsɨ ŋweynsɨ fi tɨm yɨ kɨmɨ àŋena. ¹⁰Mbàynɨ̀sɨ nà n-yɨ àŋena mɨ ɨlvɨ gha, àŋena dzɨ̀ ìkumi iwùyn ɨ bè sɨ̂ Bôbo na, ‘Ghèsɨ ni meyn mbɨ. Ghès bu fì koʼsɨ̂ wì vâ a Bôbo. Ghèsɨ̀ sɨ kwo koʼsɨ̂ kɨ ɨnfyèʼsɨ mɨyini tèyn ta Bâl ŋêyn Ashtolèt. Mɨtì ma wà kæ sɨ bœ̀sɨ ghes sɨ awu nɨ̀ mbàynɨ̀ seysɨ a ghèsɨ̀ na felɨ̀ kɨ sɨ̂ và.’ ¹¹Àŋena nà n-dzɨ̂ tèyn mɨ ɨlvɨ gha Bôbo bèynsɨ̀ ìjêm i àŋena ɨ tum wul na wù gvi gàmtɨ̀ àŋena. Wù n-læ meyn tum Gidìyòn nɨ̀ Balàk nɨ̀ Jeftà, à na sɨ ghɨ lvɨ̂yn ma wù tum meyn mà ɨ Samwèl. Ɨlvɨ nà n-gvî kfeyn mɨ ɨlvɨ gha wu bœ̀sɨ̀ zɨ̀ sɨ awu nɨ̀ mbàynɨ̀ sisɨ kɨ ɨbwàs ɨ̀ jɨ̀m. Wù nà n-bœ̂sɨ̀ tì wu nì yi nà chî nɨ̀ mbôynɨ̀, wùl ɨ bu fu wi ngeʼ sɨ̂ zɨ̀.”

¹²“Mɨtì à ti nà ghɨ ta yì yeyn Nahàsh ɨ fòyn Amòn ta wù n-gvî sɨ nu zɨ yi bê sɨ̂ mà na, ‘Ghès bu kôŋ wì sɨ na chi-a bula fòyn. Ghès nɨn be na wà choʼ fòyn wù na saʼ ghès.’ Bôbo ti nà ghɨ fòyn sɨ̂ zɨ̀ mɨtì yi faŋ tɨ̀ bɨ̀mi na wù kàʼ a wù gamtɨ zɨ. ¹³À n-ghɨ fòyn vzɨ̀ a yì chòʼ lvɨ̂yn tèyn, kɨ̀ nô ɨvzɨ̂ a yì tî bɨf. Bôbo fu meyn fòyn lvɨ̂yn na wù na saʼ zɨ̀. ¹⁴Yì kæ sɨ nà n-gvɨmlɨ̂ Bôbo, yvɨnɨ̂ ŋweyn fî felɨ̀ sɨ̂ ŋweyn, chas wi awo kì a wu n-bê na yì na ni-a, mɨtì zɨ̂ fòyn àteyn ɨ chɨ̂yntɨ̀ jûmtɨ̀ kɨ ŋweyn, a yi na jofà. ¹⁵Mɨtì ma yì kæ faŋ tɨ̀ yvɨ̀nɨ ŋweyn ɨ̀ kwo chas tɨsaʼ tɨ ŋweyn, a wù fu ngeʼ sɨ̂ zɨ̀ kɨ ighel ta wù n-læ fu sɨ̂ ghɨ̀bo ghi.”

¹⁶“Yì faytɨ ki yeyn iwo i kaynɨ-i zɨ̀ a ka Bôbo ni. ¹⁷Ba lvɨ̂yn nɨ̀n ghɨ ɨ̀lvɨ vzɨ̀ a ghɨ n-kfi asaŋ a wît ateyn? Lvɨ̂yn nɨ̀n ghɨ nɨ̀ lùm, mɨtì ma ghɨ sɨ jèm na Bôbo tum ivɨ i byalnɨ-i fì nì na ivɨ i sùʼi ta ka yì keli iwo i bzɨ-i zɨ̀ a yì ti nì sɨ bè na Bôbo choʼ fòyn sɨ̂ zɨ̀.”

¹⁸Samwèl ɨ taŋi tì nô mɨ ɨlvɨ gha ɨ jèm sɨ̂ Bôbo wu tum ivɨ ibyalɨnɨ-i ɨ fi suʼsɨ ìvɨ. Bôbo nɨ̂n læ meyn nì ivɨ i nà byaytɨ-à achi nâ ghè fî suʼi-à. No mɨ ɨlvɨ gha achvɨ̂-à ɨ yum ghelɨ nô ghɨ̀ jɨ̀m, àŋena nà fâyn Bôbo fî fâyn Samwèl.

¹⁹Àŋena nà sɨ chwôtɨ̂ Samwèl bê na, “Jèm sɨ̂ Bôbo Fɨyini fyafɨ wù lesɨ fu mbɨ̂ seysɨ ka ghès kfɨtɨ. Ghès nɨn ghɨ felɨnɨ nɨ̀ và. Jèm na ka wû n-zuètɨ ghès. Ghès nɨn fayn na ghès nɨn kfɨtɨ à bòm ta ghes ɨ ni meyn àwo a bɨ-a kɨ dvɨ̂ kɨ tèyn ɨ̀ fì nì nô ibemnɨ-i ta ghès tî bè sɨ̂ và na wà choʼ fòyn wù na saʼ ghès.”

²⁰Mɨtì Samwèl ɨ bè sɨ̂ àŋena na, “Ka yi n-fàyn. Yi n-ghɨ samoʼ na yi ni meyn àwo a bɨ-a nâ kèynà, mɨtì ka yi n-fì bèyn jɨm sɨ̂ Bôbo. Yì na kwo felɨ kɨ sɨ̂ ŋweyn lvɨ̂yn nɨ̀ àtem à ki-a à jɨ̀mà. ²¹Ka yi n-vìsi Bôbo ɨ̀ ndù nà felɨ̀ sɨ̂ ɨ̀nfyèʼsɨ̀ ayùŋ ayuŋ. Ɨ̀nfyèʼsɨ̀ ateyn kàʼ wu bû gàmtɨ̀ zɨ̀. Wu kàʼ wu bû bœ̀sɨ̀ zɨ̀ sɨ awu nɨ̀ mbàynɨ̀ sisɨ bòm ta wu n-kelɨ wi adyaʼ a li-a. ²²Bôbo kàʼ wu bû màʼì ghelɨ ŋweyn kɨ̀ nô bòm ìzɨ̀yn ighaʼnɨ-i nɨ̀ ŋweyn. Yi n-ghɨ tèyn bòm ta Bôbo nɨn læ meyn nà saŋlɨ̂ sɨ li zɨ sɨ a ghêl nɨ̀ ŋweyn. ²³Sɨ̂ mà, jèm kàʼ yi bu læ̀ chɨ̀ na mà na bu fì jêm wì sɨ̂ zɨ̀. Mà kæ sɨ mòm a mà na ghɨ ma ma ni meyn mbɨ sɨ̂ Bôbo. Mɨ n-yeʼi zɨ̀ nɨ̀ ìwo zɨ̀ a yi n-jofɨ̀ fî ghɨ àti-ati. ²⁴Yi n-kelɨ sɨ nà fayn Bôbo fî felɨ̀ sɨ̂ ŋweyn kɨ̀ nô nɨ̀ àtem à ki-a à jɨ̀mà. Yì na kfâʼtɨ̀ àwo a kaynɨ-a kì a wù nì meyn sɨ̂ zɨ̀. ²⁵Yì kæ faŋ nà nî kɨ àwo a bɨ-a a Bôbo visi a mbàynɨ̀ sisɨ tɨm yɨ̀ zɨ ɨ̀ lì zɨ̀ sɨ ɨkòs baʼsɨ̂ kɨ nɨ̀ fòyn vzɨ.”