1 Samuel 24

Devìt ɨ leʼ na yi n-zue wi Sôl

¹À nà n-ghɨ ta Sôl nyɨŋ ibàm nɨ̀ ghelɨ Fìlisìyà kàsi kfa, wu yvɨ na Devìt nɨ̀n ghɨ a nse ìyum a En Gedì. ²Sôl ɨ yvɨ tî ɨ choʼtɨ ghelɨ iwòŋ ghɨ to a Isìlæ̀ nkamsɨ̀ tal ŋêyn àŋena ɨ fvɨ̀ ɨ ndu nà kɨŋ Devìt ŋêyn ghelɨ ŋweyn a ngùŋ tɨ̀wù afî a bzisɨ twaʼsɨ nà n-chi ateyn.

³Sôl ɨ jêl ɨ ndu chem alèʼ a li-a, mbàynɨ̀sɨ njɨ̀sɨ ɨ ghɨ a mbæ̀ dzɨ̀, ifô ili ɨ ghɨ afu, wu zɨ ìkfɨ̂l ateyn. A ghɨ tì ma Devìt ŋêyn ghelɨ ŋweyn ni meyn zɨ lèytɨ̀ kɨ̀mɨ ifò nâ ghè nô antêynɨ̀. ⁴Ghelɨ Devìt ɨ yeyn Sôl ɨ bè sɨ̂ Devìt na, “Layn nɨn ghɨ kɨ nô àchi kì a Bôbo tî nà bê. Wù tî bè na, ‘Mɨ n-fu mbàynɨ̀ zya a wa awu a wà ni iwo zɨ̀ a wà n-kôŋ nɨ̀ nyeyn.’” Àŋena bè tì Devìt ɨ nyaʼtɨ ŋàŋlɨ̀ ɨ ndu teyn ighaŋ i ndzɨsɨ nɨ̀ Sôl.

⁵Ta Devìt tèyn tî iwo ateyn i nà sɨ fu ngeʼ sɨ̂ ŋweyn. ⁶Wu bè sɨ̂ ghelɨ ŋweyn na, “Mɨ n-jêm na ka Bôbo visi mà ni ìnkì iwo nâ zɨ̀-ì kèsa iwo i bzɨ-i ili sɨ̂ bò ìfèl nɨ̀ mà a ghɨ ɨvzɨ̂ a wù chòʼ meyn sɨ a fòyn.” ⁷Wu taŋi tì ɨ chɨ̀ylɨ̀ ghelɨ ŋweyn na ka àŋena nu Sôl. Sôl ɨ fvɨ̀ sɨ a ifò nâ ghè ɨ nà sɨ ndu-à.

⁸Devìt ɨ fvɨ̀ sɨ ifò nâ ghè ɨ byal ɨ jàŋ Sôl ɨ bè na, “Mbæ̀, bò ìfèl nɨ̀ mà.” Sôl ɨ bèynsɨ̀ sɨ ki Devìt ɨ suʼi nguʼtɨ ɨ kfɨsɨ ìkêʼ i ŋweyn a nse, ⁹ɨ bè sɨ̂ Sôl na, “À n-ghɨ bòm ghà ta ghelɨ nɨn bê na mɨ n-kfâyntɨ̀ sɨ ni iwo i bzɨ-i sɨ̂ và wa yvɨtɨ̂-a? ¹⁰Wà yeyn meyn kɨ̀ nô layn nɨ̀ àsɨ à kya na Bôbo we meyn và a ma awu antêynɨ̀ ìfò afêyn. Ghelɨ ghɨli ni meyn nà tusɨ̂ mà na mà zue vâ, ma leʼ ɨ̀ bè sɨ̂ àŋena na mà kàʼ ma bû nì ìwo i bzɨ-i sɨ̂ bò ìfèl nɨ̀ mà bòm ta wù n-ghɨ ma à chòʼ Bôbo. ¹¹Yeyn kɨ ighaŋ i dàla nɨ̀ và a ma awu a mbæ̀! Ma ni meyn sɨ teyn ighaŋ i dàla nɨ̀ và mɨtì fàŋ tɨ zue vâ. Wà kàʼ a wà yeyn kɨ̀ nô samoʼ lvɨ̂yn na ɨwu ɨ̀wom nɨ̀ n-ghɨ mɨtì wa byem mà sɨ zue. ¹²Mɨ n-jêm na Bôbo ki antêynɨ̀ nɨ̀ ghesɨ̀và yèyn wul vzɨ̀ a wù jas, ɨ̀ sɨ̀sɨ̀ awo a bɨ-a kì a wà nì sɨ̂ mà, mɨtì awu à kema ghɨ wi sɨ kum vâ. ¹³Ngàyn ìlì nɨn ghɨ na, ‘Fɨkâʼ fɨ bɨfɨ nɨn kolâ kɨ mɨ̀tam ɨ̀nbɨ̂.’ À ti iwo zɨ̀ a awu à kema nɨn kùm wì vâ.”

¹⁴“Fòyn Isìlæ̀ ti fvɨ̀ sɨ nu nô ndà? Wà nyɨŋ nô ibàm nɨ̀ ndà? Wà n-nyɨŋ ibàm nɨ̀ àkfɨ a bɨ-a? Kɨ̀ nô nkàyn mbùʼ ta ma têyn? ¹⁵Mɨ n-jêm na Bôbo ki antêynɨ̀ nɨ̀ ghesɨ̀và yèyn wul vzɨ̀ a wù jas. Mɨ n-jêm na wù ki ànjɨ̀ŋ à kema gàmtɨ̀ ghal fsɨ ma sɨ a wa awu ɨ̀ nì mà layn nsaʼ.”

¹⁶Devìt ɨ taŋi mèsì, Sôl ɨ bɨf sɨ̂ ŋweyn nâ, “A à n-ghɨ kɨ nô gyâ zyâ tì a wâyn wom Devìt?” Ta wù bɨ̀f tî ɨ̀ byal dzɨ̀ ɨ bè na, ¹⁷“Wà n-ghɨ kɨ nô wul àtì-ati chwô mà. Wà toʼnɨ meyn nɨ̀ mà mɨtì ma nyâblɨ̀ nɨ̀ và. ¹⁸Wà feʼtɨ meyn ìwo i juŋì zɨ̀ a wà nì sɨ̂ mà kɨ̀ lvɨ̂yn tèyn. Bôbo ni meyn we mà kɨ̀ nô ɨwu nɨ̀ và mɨtì wà faŋ tɨ zue ma. ¹⁹A wùl ti kàʼ a wù yeyn mbàynɨ̀ ŋweyn ɨ̀ vìsi a yì lu bula wù nî ìwo i bzɨ-i sɨ̂ ɨ̀nyeyn a? Mɨ n-jêm na Bôbo maʼtɨ vâ nô a jûŋ bòm dzɨ zɨ̀ a wà tòʼnɨ nɨ̀ mà ateyn layn. ²⁰Mɨ n-kya samoʼ na wà na ghɨ fòyn Isìlæ̀, ɨfôyn vâ ɨ ghɨ sɨ faŋ kɨ samoʼ. ²¹Chfɨ̀nɨ læ̂ mà lvɨ̂yn sɨ izɨyn nɨ̀ Bôbo Fɨyini na wa n-zuetɨ̂ wì woyn ghem sɨ nì na izɨyn ì yemi le sɨ isas i ndo nɨ̀ bò wom.”

²²Sôl ɨ taŋi tì Devìt ɨ chfɨ̀nɨ̀ sɨ ni iwo zɨ̀ a Sôl bè. Nô mɨ ɨlvɨ gha Sôl ɨ kasi kfa mɨtì Devìt ŋêyn ghelɨ ŋweyn ɨ kasi ndù kɨ alèʼ a leytɨna nɨ àŋena afî.