1 Samuel 27

Devìt ɨ ndu nà chî ŋêyn ghelɨ Fìlisìyà.

¹Devìt nɨ̀n kfaʼtɨ meyn kɨ sɨ a ŋweyn a ngeŋ na, “Sôl kàʼ a wù zue ma nô mɨ achi à kà (nô mɨ ɨlvɨ gha). Yi n-jôf na mà leʼ ndù nà chî a Fìlisìya. Mà kæ nì têyn, Sôl kɨŋ ma a Isìlæ̀ fàŋ tɨ yeyn a mà bœ sɨ a ŋweyn awu.

²Devìt ɨ taŋi tì ɨ lì ghelɨ iwoŋ nɨ̀ ŋweyn ighɨ ntufa ŋêyn àŋena dyaŋ ndu yeyn Akìsh ɨ fòyn Gât a ghɨ wâyn Môk. ³Àŋena dyàŋ tì ɨ nà sɨ chî a ntèʼ Gât alèʼ ghè a Akìsh nà n-chi ateyn. Àŋena nɨn læ ndù a ntèʼ Gât kɨ nɨ̀ àsas a ndosɨ nɨ̀ àŋena. Devìt ɨ ndù ŋêyn ghɨ̀ki ŋweyn ghɨ̀ bò a ghɨ Ahinòm ɨ wâyn wùl Jeslèl nɨ̀ Abigèl ɨ wâyn wùl ɨ̀ Kamèl a ghɨ wî nkfɨ Nabàl. ⁴A nà ghɨ ta Sôl yvɨ̀ na Devìt leʼ meyn ndù a Gât, wu faŋ ɨ nà bu kɨŋ wi ŋweyn.

⁵A læ nà ghɨ achi a li-a Devìt ɨ bè sɨ̂ Akìsh na, “Mɨ n-chwotɨ̂ và, wà kæ sɨ nà kôŋ mà wa dyèyn àlêʼ nô mɨ a ntèʼ ì kà ilaʼ afêyn sɨ̂ mà, ghesɨ̀ ghelɨ̀ ghem ndu nà chî ateyn. Yi n-jofɨ̀ wì na wùl ɨ̀ felɨnɨ nɨ̀ và na chî a ntoʼ ŋêyn fòyn amoʼ.

⁶Akìsh ɨ kæ fu ntèʼ Ziklàk sɨ̂ Devìt a na sɨ lum ghɨ ntèʼ tɨ̀foyn tɨ Judà sɨ zɨ̀tɨ achi nâ ghè sɨ chem layn. ⁷Devìt ɨ chi a Fìlisìyà sɨ a bèŋ nɨ̀ njoŋsɨ̀ kæ̀. ⁸Devìt nà n-faŋ wi tɨ̀ ndù tɨ̀ nu ghelɨ ntèʼ Geshù nɨ̀ ghelɨ Gilzì, nɨ̀ ghelɨ Amalèk. Ghelɨ nâ gheyn nà n-ghɨ ghelɨ ghì a ghɨ nà n-chi ilaʼ afu kɨ̀ sɨ zɨ̀tɨ̀ ɨtuʼ ɨ mu. Ilaʼ ateyn i nà n-kalì ndu chem a Shû nɨ̀ Ijìb. ⁹Devìt nà n-seʼ nû nô mɨ alèʼ à kà wù bû vìsi nô wul ɨ̀mòʼ afu tɨ̀ zue kèsa ghɨ̀lûmnɨ̀ ma ghɨ̀kì a. Wù nà n-zuetɨ̂ ghelɨ wu lì njɨ̀sɨ̀ nɨ̀ nyamsɨ mbòloʼsɨ nɨ̀ njàkâysɨ̀, nɨ̀ kàmelsɨ̀ baʼsɨ̂ nɨ̀ ndzɨsɨ àŋenasɨ. Wù nà n-lî tì wu kasi kfa ɨ ndu yeyn Akìsh.

¹⁰Akìsh nà n-bɨf nô mɨ achi à kà na, “Wà nì seʼ nù ghɨ̀ ndà layn a? Devìt ɨ bè na ghès nì seʼ nù ghelɨ Negèf a Judà bùla tì wu bè na ghès nì seʼ nù ghelɨ Negèf a Jelamìl faŋ tɨ̀ be tî wù be na ghès nì seʼ nù ghelɨ Negèf a Kên. ¹¹Devìt nà n-visî wì wul tɨ̀ zue kèsa ghɨ̀lûmnɨ̀ ma ghɨ̀kì-a. Wù nà n-nî tì ta wù kfàʼtɨ̀ na wùl sɨ ateyn kàʼ a wù leʼ ndù fèʼtɨ̀ a ntèʼ Gât na à ti iwo zɨ̀-ì a Devìt ŋêyn ghelɨ ŋweyn nì. À ti dzɨ zɨ̀ a wu nà nû ateyn kɨ sɨ ɨtuʼ ta wù zɨ̀tɨ̀ sɨ nà chî a Fìlisìyà. ¹²À ti iwo zɨ̀ a Akìsh nà n-yeʼtɨ ɨwuyn nɨ̀ Devìt bòm ta wu nà n-kfâʼtɨ̀ na, “Devìt ni meyn na ghelɨ Isìlæ̀ na kwo bâyn ŋweyn nô sɨ a ŋaŋ. Mɨ n-ni-à a wù faŋ nà felɨ̀ kɨ sɨ̂ mà nô ta ka wù læ kfɨ.