1 Samuel 26

Devìt ɨ fi leʼ na yi n-zue wi Sôl.

¹À n-læ nà ghɨ achi a li-a ghelɨ Zîf ghɨli ɨ fi ndù ɨ yeyn Sôl a Gibìyà ɨ bè sɨ̂ ŋweyn na, “Wà n-kya na Devìt nɨ̀n lêytɨ̀ a kfɨyn Hakilà afî a yì n-keʼnɨ nɨ̀ Jeshimòn a?”

²Sôl ɨ lu kɨ ɨlvɨ nâ ghè ɨ lì ghelɨ iwòŋ ghɨ to a Isìlæ̀ mkamsɨ̀ tal ŋêyn àŋena lu ɨ ndù sɨ kɨŋ Devìt a nse ìyum a Zîf. ³Sôl ŋêyn ghelɨ ŋweyn ɨ ndu faytɨ àlêʼ kì a ka àŋena bɨ ateyn a mbæ̀ dzɨ̀ a kfɨyn Hakilà ta yì n-kêʼnɨ̀ nɨ̀ Jeshimòn mɨtì Devìt ɨ faŋ kɨ̀ a nse ìyum. A nà sɨ ghɨ ta wù yeyn na Sôl jumtɨ meyn gvì nɨ̀ ŋweyn afu, ⁴wu tum ghelɨ àŋena nyaʼtɨ ndu ki yeyn samoʼ ma Sôl gvi meyn.

⁵Devìt ɨ fvɨ ndù aleʼ ghè a Sôl bɨ̀ ateyn, ɨ yeyn alêʼ kì a ŋêyn bò ndo ìwòŋ nɨ̀ ŋweyn Abnà ɨ wâyn Nê nà n-nyɨŋ ateyn. Wù nà n-nyɨŋ antêynɨ̀ ma ghelɨ iwoŋ nɨ̀ ŋweyn nyiŋi meyn jɨ̀ŋ kàli ŋweyn. ⁶Devìt ɨ bɨf sɨ̂ Ahimelèk ɨ wul ɨ̀ Hît ŋêyn Abishà ɨ waynà Jowàb nà àŋena ɨ ghɨ Zeluwà na, “A n-kàlì ndà ghesɨ̀ ŋweyn alèʼ ghè a Sôl bɨ̀ ateyn a? Abishà ɨ bè na, “Ghesɨ̀và nɨn kàlì amo.”

⁷A ni nà ghɨ nɨ̀ntuʼ Devìt ŋêyn Abishà ɨ lu ndù alèʼ ghè a Sôl bɨ̀ ateyn ŋêyn ghelɨ ŋweyn. Àŋena ndù tì ɨ yeyn Sôl wu nyiŋa buni-a antêynɨ̀ àlèʼ nâ ghè ma wù su meyn ìwoŋ i ŋweyn a nse a ngùŋ àtu nɨ̀ ŋweyn. Abnà ŋêyn ghelɨ iwòŋ ghɨli ɨ ghɨ ma ghɨ nyiŋi meyn jɨ̀ŋ kàli Sôl nà boŋ buni-a.

⁸Abishà ɨ chɨ̀mtɨ̀ ɨ bè sɨ̂ Devìt na, “Fɨyini fɨ fu meyn mbàynɨ̀ zyâ awu nɨ̀ và layn. Wà kæ bɨmi a mà tɨm ghàŋtɨ̀ ŋweyn a nse nɨ̀ ìwoŋ i ŋweyn yèynì kɨ ɨlvɨ ɨ̀mòʼ a ghɨ wi ingal ìbò.”

⁹Devìt ɨ bè sɨ̂ ŋweyn na, “Ka n-zuè ŋweyn. Wùl kàʼ wu bû zuè wùl ma à choʼ Bôbo ɨ̀ faŋ tɨ̀ kelɨ ngeʼ. ¹⁰Bôbo nɨn chi-à. À læ̀ zue kɨ Bôbo zuè ŋweyn. Wù kæ faŋ tɨ kfɨ iwòŋ a ɨlvɨ ŋweyn læ̂ kfeyn a wù kfɨ. ¹¹Mɨ n-jêm na Bôbo gamtɨ ma na ka mà zue wul ma à chòʼ ŋweyn ɨ̀ lèm sɨ a fòyn. Choʼ iwoŋ i ŋweyn zɨ̀ a ngùŋ àtu nɨ̀ ŋweyn ɨ lì àtem a mu kì afu ɨ gvì ghɨ lu.”

¹²Devìt ɨ choʼ iwoŋ ateyn ɨ lì àtem a mu kì a ngùŋ àtu nɨ̀ Sôl àŋena lù. Àŋena nɨn lì ɨfwo nâ vzɨ̀ nô wùl ɨ faŋ tɨ̀ yeyn ɨ nà kya wi iwo zɨ̀-i a yi gàyn ɨ faŋ mɨ tɨ̀ nùlɨ sɨ a mbunisɨ. Àŋena nô ghɨ̀ jɨ̀m na n-bunî kɨ buni bòmtà Bôbo nà n-ghɨ ma wù maʼ meyn mbunisɨ asɨ nɨ̀ àŋena nô sɨ a ŋaŋ.

¹³Devìt ɨ dyaŋ ndu timi atû kfɨ̀yn injɨyn izɨ-i ɨ nà sɨ ghɨ nô a ndyèyn sɨ̂ mbàynɨ̀ sɨ ŋweynsɨ (ɨ nà sɨ ghɨ nô àghaf a dyâ sɨ̂). ¹⁴Wu n-tìmi tî ɨ nà jâŋ bê sɨ̂ Abnà ɨ wâyn Nê ŋêyn ghelɨ iwòŋ ghɨli na, “Mɨ n-jâŋ và wa bimî wì a?”

Abnà ɨ bèynsɨ̀ na, “À n-ghɨ và ndà a wà n-jaŋ fòyn tèyn a?” ¹⁵Devìt ɨ bɨf sɨ̂ ŋweyn na, “Ba wà n-ghɨ kɨ nô wul ɨ̀ lûmnɨ̀ a ba? Wùl ɨ lvì nɨn fi ghɨ ta vâ a Isìlæ̀ afêyn a? Wà nì nà chî wì bò ìfèl nɨ̀ và, ɨ fòyn ta ghɨ̀ ghà? Ba wùl ni meyn gvì ma wu nà n-kaʼ a wù zue bò ìfèl nɨ̀ và, ɨ fòyn? ¹⁶Wà mom meyn ìwo yi jofɨ̀ wì. Mɨ n-bê sɨ̂ và sɨ izɨyn nɨ̀ Bôbo vzɨ̀ a wù nchi na zɨ̂ ghelɨ iwoŋ nɨ̀ và nɨn kelɨ sɨ kfɨtɨ bòm ta yi bû nì nà faytɨ chî bò ìfèl nɨ̀ zɨ̀ ɨ fòyn vzɨ̀ a Bôbo chòʼ meyn lèm. Ki kal ɨ yeyn na iwoŋ i fòynì nɨ̀ àtem a mu nɨ̀ ŋweyn kì a kɨ nì nà ghɨ a ngùŋ atu nɨ̀ ŋweyn nɨn ghɨ afu a?”

¹⁷Sôl ɨ yvɨ keli gyâ Devìt ɨ jaŋ bè na, “Wâyn wom Devìt, a ti n-ghɨ kɨ nô gyâ zyâ tì? Devìt ɨ byal bè na, “À n-ghɨ gyâ yem a bô.” ¹⁸Devìt ɨ fi bɨf na, “Bòm ghà ta wà nyɨŋ ibàm nɨ̀ mà ɨ wul ɨ̀ felɨnɨ nɨ̀ và sɨ zue-a? Mà bèbsɨ ghà sɨ̂ và na wà na kɨŋ sɨ zue ma a? ¹⁹Mɨ n-chwotɨ̂ na wà yvɨ̀tɨ ìwo zɨ̀ a wul ɨ̀ felɨnɨ nɨ̀ và nɨn bê a bôbo ɨ fòyn wom. À kæ sɨ nà ghɨ ma à nì Bôbo na wà na ghɨ mbàynɨ̀ yem, ma fu ìfu Bôbo fsɨ. Mɨtì à kæ sɨ nà ghɨ ma à nì ghelɨ Bôbo te àŋena. Àŋena saŋ meyn fvɨ̀sɨ̀ mà sɨ a ilaʼ nɨ̀ ghès ghê a Bôbo tî fu nà kɨŋ na mà ndu ilaʼ atum nà koʼsɨ̂ mɨyini mɨ̀ ɨ̀tum. ²⁰Mɨ n-chwotɨ̂ na ka wa n-vìsi ghɨ zue ma ilaʼ i yilu-ì a bu kɨ asɨ nɨ̀ và. Mɨ n-ghɨ kɨ ta mbùʼ mɨtì Fòyn Isìlæ̀ ɨ nyɨŋ a ma ibàm têyn ta wùl ni wu nà byem àwum-awum atû kfɨ̀yn sɨ zue.

²¹Sôl ɨ bèynsɨ̀ ɨ bè na, “Ma jas meyn, kasi gvi a wayn wom Devìt. Mɨ n-bu fì nî wì iwo i bzɨ-i sɨ̂ và bòm ta wà visi meyn mà faŋ tɨ̀ zuè layn. Ma ni meyn jas nô sɨ a ŋaŋ kɨ̀ ta àngù.

²²Devìt ɨ bè na, “Iwoŋ ì zæ yèynì afêyn, tum wul ìwoŋ nɨ̀ và ɨ̀lvɨ wù dyaŋ gvì fsɨ. ²³Bôbo nɨn mâʼtɨ̀ nô mɨ ndà vzɨ̂ a wù nî iwo zɨ̀ a yi n-ghɨ àtì-ati fî yvɨnɨ ŋweyn. Bôbo ni meyn fù vâ a ma awu layn mɨtì ma leʼ na mɨ n-ni wì iwo i bzɨ-i ili sɨ̂ wùl vzɨ̀ a wù chòʼ meyn ɨ̀ lèm. ²⁴Kɨ̀ ighel ta mà dyèyn meyn àtem a juŋà sɨ̂ và layn, mɨ n-jêm na Bôbo bôŋ ndyèyn àtem a juŋà sɨ̂ mà fvɨ̀sɨ̀ mà sɨ a ngeʼsɨ nô sɨ̀ jɨ̀m.

²⁵Sôl ɨ bè sɨ̂ Devìt na, “Mɨ n-jêm na Bôbo boysɨ vâ a wâyn wom Devìt. Mɨ n-kya na awo à kya nô à jɨ̀m na jèlɨ̀ kɨ a jûŋ.” Ta Sôl tàŋi tî, Devìt ɨ lù ɨ nà sɨ ndû sɨ a ŋweyn alèʼ, Sôl ɨ kasi kfa.