1 Samuel 3

Bôbo Fɨyini ɨ jàŋ Samwèl

¹Samwèl nà n-ghɨ wayndà, bu felɨ̀ kɨ sɨ Fɨyini fɨ isas nɨ̀ Eli. A ghɨ a mɨ̂chi nâ ghè tì Bôbo nyâŋsɨ̀ taŋî wì sɨ̂ ghelɨ, nyâŋsɨ̀ fvɨ̂ wì ikèʼ nɨ̀ ghelɨ a ndayn.

²A læ nà ghɨ nɨ̀ntuʼ achi a li-a Eli nyɨŋ kɨ alèʼ ghè a wu nà n-lum kfâ nyiŋì ateyn ma wù sɨ fefà, ³Samwèl ɨ boŋ nyɨŋ sɨ alèʼ a laynɨ-a ghê a àntayntayn a mɨ̂kàyn nɨ̀ Fɨyini fɨ nà n-ti ateyn. A ni nà ghɨ a nlâyn ɨ̀tùʼ lâm zɨ̀ a yi nà n-nî yi nà bayn afu bu bayn kɨ bayn, ⁴Bôbo jàŋ Samwèl. Samwèl ɨ bèynsɨ̀ na, “Wù yvɨ meyn.” ⁵Ta wù bèynsɨ̀ tî ɨ̀ nyɨŋ ndù sɨ̂ Eli ɨ̀ bè sɨ̂ ŋweyn na, “Mà wêyn, wà jaŋ meyn mà.” Mɨtì Eli bè sɨ̂ ŋweyn na, “Ma bû jàŋ và a wayn wom, kasi ndu nyìŋi sɨ a wa alèʼ. Samwèl ɨ kasi ndu nyìŋì.”

⁶Kɨ̀ têyn Bôbo fi jàŋ, “Samwèl.” Samwèl ɨ fi làlì ɨ ndu yeyn Eli ɨ bè sɨ̂ ŋweyn na, “Mà wêyn, wà jaŋ meyn mà.” Eli fi be kɨ na, “Ma bû jàŋ và a wayn wom, kasi ndu nyìŋi sɨ a wa alèʼ.”

⁷A nà n-ghɨ tì Samwèl ɨ bu duʼ tɨ̀ nà kya gyâ Bôbo bòm ta Bôbo nà n-bu duʼ tɨ̀ fàytɨ tɨ̀ dyèyn ngêŋ ŋweyn sɨ̂ Samwèl. ⁸Bôbo fi jàŋ Samwèl na à na sɨ ghɨ ìngal ìtal. Samwèl ɨ fi ndù sɨ̂ Eli ɨ bè sɨ̂ ŋweyn na, “Mà wêyn, wà jaŋ meyn mà.” No mɨ ɨlvɨ gha Eli keli na à n-ghɨ tì a jâŋ Bôbo jâŋ Samwèl. ⁹Wu kæ bè sɨ̂ Samwèl na, “Kasi ndu nyìŋi kɨ nyiŋi. Wù kæ fì jàŋ và, wa bè na, ‘Taŋi a Bôbo, wùl ɨ̀ felɨnɨ nɨ̀ và nɨ̀n yvɨtɨ-à.’” Samwèl ɨ kasi ndu nyìŋì.

¹⁰Bôbo fi jàŋ Samwèl kɨ̀ ta wù nì nà jâŋ sɨ asɨ tì na, “Samwèl, Samwèl.” Samwèl ɨ bèynsɨ̀ ɨ bè na, “Taŋi a Bôbo, wùl ɨ̀ fèlɨnɨ nɨ̀ và nɨ̀n yvɨtɨ-à.”

¹¹Bôbo kæ be sɨ̂ Samwèl na, “Yeyna, mɨ n-kɨŋ sɨ ni iwo ilaʼ i Isìlæ̀ na à na yvɨ mɨ ndà wu nà chɨŋtɨ̂ fayn à. ¹²Mɨ n-nî nô mɨ ghà ta mà sɨ ghɨ ma ma bê meyn na mɨ n-nî sɨ̂ Eli ŋêyn ìsas i ndo nɨ̀ ŋweyn i, nô ìwo i nɨn faŋ wi. ¹³Mà sɨ ghɨ ma ma fu meyn nfàsì nfàsì sɨ̂ Eli kûm ngeʼ zɨ̀ a mɨ n-ghɨ sɨ fu sɨ̂ ìsas i ndo nɨ̀ ŋweyn i bòm ta woyn ŋweyn ti meyn nà telɨ̂ Fɨyini mɨtì wu tisɨ̂ wì àŋena. ¹⁴Mà sɨ ghɨ ma ma lem meyn sɨ ikàyntɨ̀ na mà kàʼ ma bû lèsɨ̀ fu mbɨsɨ Eli ŋêyn woyn ŋweyn. Àŋena kòŋ a ghɨ fu tɨfu sɨ̂ mà kɨ tɨ̀nki tɨ̀ jɨ̀m.”

¹⁵Samwèl ɨ kasi ndu nyìŋì. Ɨtuʼ layn mèsì, wu làlì ɨ choʼtɨ àchfɨ̂ a ndô Fɨyini kɨ̀ ta wu nà lum choʼtɨ. Mɨtì ɨ nà sɨ fâyn sɨ fèʼtɨ̀ iwo zɨ̀ a Bôbo tî kfa bè sɨ̂ Eli. ¹⁶Kɨ̀ têyn Eli jàŋ ŋweyn ɨ bè na, “Wayn wom Samwèl.” Samwèl ɨ bèynsɨ̀ na, “Mà wêyn.”

¹⁷Eli ɨ bɨf sɨ̂ ŋweyn nâ, “Bôbo tî kfa bè na gha sɨ̂ và a? Fèʼtɨ nô mɨ ghà sɨ̂ mà ta Bôbo tî bè sɨ̂ và. Ka n-lèytɨ̀ ìwo sɨ̂ mà. Wà lèytɨ̀ kɨ iwo ìmòʼ, a njva Fɨyini ku vâ.” ¹⁸Samwèl ɨ fèʼtɨ̀ nô mɨ ghà sɨ Eli ɨ faŋ tɨ̀ lèytɨ̀ iwo. Eli kæ bè na “À n-ghɨ ŋweyn Bôbo Fɨyini. Wù ni kɨ̀ iwo zɨ̀-ì a yi n-kfeynɨ sɨ̂ ŋweyn.”

¹⁹Samwèl ɨ nà sɨ lemâ koʼa, Bôbo tisɨ̂ ŋweyn, nô mɨ ghà ta wù n-bê ɨ kfeyn kɨ kfeyn. ²⁰Nô ghelɨ Isìlæ̀ ghɨ̀ jɨ̀m kɨ̀ sɨ zɨ̀tɨ̀ a ntèʼ Dan sɨ kàlì sɨ chem a ntèʼ Bashibà nà n-kya na Samwèl nɨ̀n ghɨ kɨ nô nkàyntɨ̀ nfèʼtɨ̀ ɨ̀ghaʼnɨ nɨ̀ Bôbo. ²¹Bôbo Fɨyini ɨ faŋ ɨ nà lum fvɨ̂ kɨ fvɨ a Shilò, dyêyn ngêŋ ŋweyn sɨ̂ Samwèl toynɨ̂ awo afî a wu nà n-bê. Samwèl ɨ kasî fêʼtɨ̀ ntum ateyn sɨ̂ ghelɨ Isìlæ̀ nô ghɨ̀ jɨ̀m.