1 Samuel 4

¹Bôbo nà n-bê nô mɨ na gha sɨ̂ Samwèl, wu kasi fèʼtɨ̀ sɨ̂ ghelɨ Isìlæ̀ nô ghɨ̀ jɨ̀m.

Ghelɨ Fìlisìyà ɨ ghal fsɨ antayntayn a mɨ̂kàyn nɨ̀ Fɨyini fɨ̀

À nà n-ghɨ ɨtuʼ nâ ghè, ghelɨ Isìlæ̀ ɨ tɨm iwoŋ ŋêyn ghelɨ Fìlisìyà. Sugèyʼsɨ Isìlæ̀ sɨ nɨn læ bɨ̀ alèʼ a li-a a ntèʼ Ebènezà ɨ sɨ Filìstâyn sɨ bɨ̀ a ntèʼ î lì ghɨ toŋtɨ̂ na Afèk. ²Sugèyʼsɨ Filìstâyn sɨ fvɨ̀ ɨ nù ɨ zuetɨ ɨ sɨ Isìlæ̀ sɨ̀ nkamsɨ̀ kæ̀ ɨ yɨ iwoŋ ateyn. ³A nà sɨ ghɨ ta iwoŋ ateyn i mæ̀, sugèyʼsɨ Isìlæ̀ sɨ kasi kfa. Chyeʼsɨ Isìlæ̀ sɨ nà sɨ bɨf nâ, “Bòm ghà ta Bôbo vìsi na ghelɨ Fìlisìyà tɨm ɨ̀ yɨ̀ ghesɨ̀nà layn a? Yi n-jofɨ̀ na ghesɨ̀nà tum ghɨ ndu a Shilò, ɨ̀ lì gvì nɨ̀ àntayntayn a mɨkàyn nɨ̀ Bôbo kì. Ghesɨ̀nà kæ seʼ iwoŋ nɨ̀ ànkeyna, a Bôbo na ghɨ ghesɨ̀nà amoʼ ɨ̀ gàmtɨ̀ ghesɨ̀nà ta ka ghesɨ̀nà tɨm yɨ mbàynɨ̀ sɨ ghesɨ̀nà.”

⁴Àŋena kæ tum ghelɨ na ghɨ ndu a Shilò ɨ̀ lì gvì nɨ̀ àntayntayn a mɨ̂kàyn nɨ̀ Bôbo ɨ bò ɨ̀dwaʼ ɨ̀ jɨ̀m, ɨ̂ŋweyn vzɨ̀ a wù nduʼ ma nchìsɨ jɨŋ meyn kàl ŋweyn. Ghɨ ndu lì ɨ se sɨ gvì Ofɨ̀nì nɨ̀ Finighàs, ɨ woyn Eli ɨ jumtɨ gvì nɨ̀ ànkeyn a.

⁵A nà ghɨ ta ghɨ gvì chem nɨ̀ ànkeyna alèʼ ghè a ghɨ bɨ̀ ateyn nô mɨ ɨlvɨ gha ghelɨ Isìlæ̀ nô ghɨ̀ jɨ̀m ta ghɨ nà n-ghɨ afu ɨ nà sɨ saŋlɨ̂-à byaytɨ̂ nô tèyn ɨlweʼ ɨ neʼà. ⁶Ghelɨ Fìlisìyà ɨ yvɨ ta ghɨ n-byaytɨ ɨ nà sɨ bɨf nâ, “Ghelɨ Isìlæ̀ ti n-byaytɨ ghà teyn a?” A nà sɨ ghɨ ta àŋena yvɨ na ghelɨ Isìlæ̀ gvi meyn nɨ̀ àntayntayn a mɨ̂kàyn nɨ̀ Bôbo afu, ⁷ghelɨ Fìlisìyà ɨ nà sɨ faynà bê na, “Mɨ̀yìnì gvi meyn alèʼ ghè a ghelɨ Isìlæ̀ bɨ̀ ateyn”, fî bê kɨmɨ na, “Ngeʼ koli meyn ghesɨ̀nà bem kɨ tèyn bòm ta ìnkì iwo ta iyeyni bû tìmi gàyn. ⁸Ngeʼ koli meyn ghesɨ̀nà, bem kɨ tèyn. A ti n-fsɨ ndà ghesɨ̀nà sɨ awu nɨ̀ mɨyini ɨ̂mbemnɨ̂ nɨ̀ ghelɨ Isìlæ̀ nâ mèyn a? À n-ghɨ kɨmɨ mɨyini mzɨ̀ a mɨ n-læ màʼ tɨkoʼi tɨ kaynɨtɨ tɨ zuetɨ ghelɨ Ijìb a nse ìyum. ⁹Ghesɨ̀nà kul mɨtem ɨ̀ bàʼtɨ ngeŋsɨ ghesɨ̀nà ta ghɨ̀lûmnɨ̀ a ghelɨ Fìlisìyà. Ghesìnà kæ dɨm a ghesɨ̀nà kasi sɨ ɨkòs sɨ̂ ghelɨ Isìlæ̀ ghèyn kɨ̀ ta àŋena nɨn ghɨ sɨ̂ ghesɨ̀nà lvɨ̂yn. Ghesìnà baʼtɨ kɨ̀ nô ta ghɨ̀lûmnɨ̀ ɨ̀ nù.”

¹⁰Ta àŋena tàŋi tî ɨ nù nô nɨ̀ àdyaʼa ɨ zuetɨ ghelɨ Isìlæ̀ nô sɨ idvɨ̀. Àŋena nɨ̂n læ meyn zuetɨ sugèyʼsɨ Isìlæ̀ nkam mɨ̀vɨm ɨ̀n tal. Nô mɨ ndà ta wù faŋ ɨ nà nyɨŋa kfa ndu kɨ dzɨ a ŋweyn abe. ¹¹Ghelɨ Fìlisìyà nɨ̂n ghal meyn fsɨ àntayntayn a mɨ̂kàyn nɨ̀ Fɨyini fɨ̀ nâ kì ɨ fi zuetɨ kɨmɨ woyn Eli, ma à ti Ofɨ̀nì nɨ̀ Finighàs.

Eli ɨ kfɨ

¹²Wùl isas i ndo nɨ̀ Benjamìn ɨ̀lvì nɨn leʼ meyn ɨtwaʼ iwòŋ kɨ̀mɨ achi nâ ghè ɨ ndù a Shilò ma wù baytɨ meyn ndzɨsɨ ŋweyn ɨ̀ fì fuʼ abɨ̂l a ŋweyn atu. ¹³Ta wù lèʼ tî ɨ̀ se sɨ gvì Eli duʼ a ŋweyn achɨ a mbæ̀ dzɨ̀ chîtɨ̀ saʼgha kûm ìwoŋ. Wu nà n-duʼ tì faynà, kayn kɨ ìwo zɨ̀-ì a yi kaʼ a yi gayn nɨ̀ àntayntayn a mɨ̂kàyn nɨ̀ Fɨyini fɨ̀. Wùl ìsas i ndo nɨ̀ Benjamèyn vzɨ̀ ɨ gvi fèʼtɨ̀ saʼgha kûm ìwoŋ ateyn, nô ntèʼ ì jɨ̀m ɨ dzɨ̀ nô sɨ a ŋaŋ.

¹⁴Eli yvɨ tî ta ghelɨ nɨn dzɨ̂nɨ̀ ɨ kæ bɨf nâ, “Ghelɨ nɨn dzɨ̂nɨ̀ tèyn a gâyn ghà a?” Wul ɨ̀ ntum vzɨ̀ ɨ nyɨŋ ndu fèʼtɨ̀ ìwo zɨ̀ a yi gàyn sɨ̂ ŋweyn. ¹⁵A ghɨ tì ma Eli sɨ ghɨ bèŋ mɨ̀vɨm bulamoʼ njvàsɨ̀ nfama, ma wù fi meyn fèf. ¹⁶Wùl àteyn nɨ̂n bè sɨ̂ Eli na, “À n-ghɨ mà ma mà leʼ kɨ̀ nô asɨ iwòŋ. Mà lèʼ kɨ̀ nô layn.” Eli bɨf sɨ̂ ŋweyn nâ, “À gàyn ghà afu a wayn wom?” ¹⁷Wùlɨ̀ vzɨ̀ a wù gvì nɨ̀ saʼgha àteyn ɨ bèynsɨ̀ ɨ bè na, “Sugèyʼsɨ Fìlisìyà sɨ tɨm meyn yɨ ghesɨ̀nà ɨ zuètɨ sugeyʼsɨ ghesɨ̀nà sɨ dvɨ̂ kɨ tèyn, sɨ lisɨ leʼnɨ. Ghɨ zuetɨ kɨ̀mɨ woyn ghya ghì ghɨ̀bò ɨ Ofɨ̀nì nɨ̀ Finighàs ɨ̀ fì ghal fsɨ àntayntayn a mɨ̂kàyn nɨ̀ Fɨyini fɨ̀.”

¹⁸Eli yvɨ gvì nɨ̀ iwo zɨ̀ a yi gàyn nɨ̀ àntayntayn a mɨ̂kàyn nɨ̀ Fɨyini fɨ̀ têyn ɨ fe kɨ àtèl-atel ɨwuyn mbàyn ɨ kòl ɨ̀toŋ ŋweyn ɨ kfɨ kɨ kfɨ. Eli nà n-ghɨ tì ma wù dvɨyn meyn, fî keli ɨ̀wuyn nô sɨ a ŋaŋ ma wù saʼ meyn Isìlæ̀ sɨ a bèŋsɨ̀ mɨ̀vɨm ɨ̀n kæ̀.

¹⁹A ghɨ tì wî wâyn Eli vzɨ̀ a ghɨ nà n-toŋtɨ na Finighàs ɨ ghɨ ma wù gufɨ meyn tɨ̀msɨ. Wu yvɨ gvì nô mɨ ɨlvɨ gha têyn na ghɨ ghal meyn fsɨ àntayntayn a mɨ̂kàyn nɨ̀ Fɨyini fɨ̀, bò lum nɨ̀ ŋweyn fî kfɨ lûm ŋweyn boŋ kfɨ, wàyn ɨ zɨ̀tɨ̀ kɨ zɨtɨ sɨ lum ŋweyn. Wu se sɨ bzɨ ɨ kfɨ. ²⁰À nà n-ghɨ ta ghɨ̀kì ghî a ghɨ nà n-kini ŋweyn yèyn ta wù n-kfɨ ndû àŋena nà sɨ kfɨmtɨ̂ ŋweyn bê na, “Ka wa n-fàyn. Wà bzɨ meyn wayn ɨ lûmnɨ̀.” Mɨtì wu faŋ tɨ zɨ iwo ɨ faŋ mɨ tɨ̀ bè iwo sɨ̂ àŋena, ²¹ɨ chfɨ̀ kɨ izɨyn i wayn na Ikabòd, ma wù ti bè na, “Adyaʼ a Fɨyini-a lu meyn sɨ a Isìlæ̀.” Wu n-chfɨ izɨyn nâ yèynì têyn bòm ta ghelɨ Fìlisìyà ghal fsɨ àntayntayn a mɨ̂kàyn nɨ̀ Fɨyini fɨ̀, bò lum nɨ̀ ŋweyn kfɨ nô lum ŋweyn fî boŋ kfɨ. ²²Wu kæ bè na, “Adyaʼ a Fɨyini-a lu meyn sɨ a Isìlæ̀ bòm ta ghɨ ghal meyn fsɨ àntayntayn a mɨ̂kàyn nɨ̀ ŋweyn sɨ awu nɨ̀ ghelɨ Isìlæ̀.”