1 Samuel 8

Ghelɨ Isìlæ̀ ɨ nà sɨ kɨŋ fòyn

¹À nà n-ghɨ ta Samwèl dvɨ̀yn, wu lèm woyn ŋweyn sɨ a ghelɨ ghɨ saʼnɨ a Isìlæ̀. ²Wayn ɨwu àsɨ nà n-ghɨ Jowèl, ànkùmtɨ̀ a ghɨ Àbijà. Àŋena nà n-saʼ a ntèʼ Bæshebà, ³mɨtì chi wì ta bò àŋena. Àŋena nà n-kwo nyɨŋ kɨ ibàm i ɨkwo, ghɨ gvî yuyntɨ̂ kɨ yuyntɨ nsaʼsɨ sɨ̂ àŋena, àŋena fyeʼtɨ-à.

⁴Chyeʼsɨ Isìlæ̀sɨ̀ nô sɨ̀ jɨ̀m ɨ læ chɨ̀yntɨ̀ ɨ ndù ɨ yeyn Samwèl a ntèʼ Lamà, ⁵ɨ bè sɨ̂ ŋweyn na, “Wà sɨ ghɨ ma wà lema meyn, woyn ghya chî wì ta vâ. Ghès nɨn kɨŋ na wà lem fòyn wù na saʼ ghès kɨ̀mɨ ta tɨfôyntɨ̀ nɨn saʼ tɨlaʼ tɨlitɨ.”

⁶Mɨtì Samwèl ɨ nà saŋlɨ̂ wì kûm ìwo nâ zɨ̀ a àŋena bè tî na wu lem fòyn wù na saʼ àŋena ɨ kæ fu iwo ateyn sɨ̂ Bôbo ijèm. ⁷Bôbo ɨ bè sɨ̂ ŋweyn na, “Ni kɨ iwo zɨ̀ a àŋena bè. Àŋena bû nyàŋ vâ, àŋena kwo nyàŋ ma. Àŋena nì tì ma ghɨ ti bè na mà bu fì ghɨ wi fòyn àŋena. ⁸Àŋena sɨ ghɨ ma ghɨ n-læ meyn nyaŋ ma kɨ̀ sɨ zɨ̀tɨ̀ achi ta mà fvɨ̀sɨ àŋena a Ijìb sɨ koʼ sɨ chem layn. Àŋena nɨ̀n læ meyn nyaŋ ma ɨ nà koʼsɨ̂ kɨ mɨyini ɨ mɨ̂nlù. À na sɨ ghɨ lvɨ̂yn àŋena nî kɨmɨ tì sɨ̂ và. ⁹Ni læ ndù nɨ̀ iwo zɨ̀ a àŋena nɨn bê. Mɨtì wà se sɨ nì wa fu nfàsì-fàsì sɨ̂ àŋena ɨ faytɨ ɨ fèʼtɨ̀ ìnkì i nchînɨ̀ zɨ̀ a ka fòyn àteyn gvi nà chî sɨ̂ àŋena.”

¹⁰Samwèl ɨ fèʼtɨ̀ nô mɨ ghà ta Bôbo Fɨyini bè sɨ̂ ghelɨ ghì a ghɨ na n-bɨfɨ fòyn sɨ̂ ŋweyn tì. ¹¹Wù n-bè na, “À ti dzɨ zɨ̀ a ka fòyn vzɨ na saʼ zɨ̀ ateyn tèyn. Wu nì lî woyn woyn ghɨ lûmnɨ̀ nɨ̀ zɨ̀ ɨ̀ lèm sɨ a sugèyʼsɨ̀, a sugèyʼsɨ ateyn sɨ lisɨ na jelɨ̀ atû nyamsɨ kfaŋ, sɨ lisɨ jelɨ̀ atû mɨ̀nchaʼ a gufɨ̀ kɨmɨ nyamsɨ, sɨ lisɨ nyɨŋ ndû asɨ a fɨ̂nchaʼ ghè a wù n-jêl ateyn dyêyn ndû na Fòyn weyn n-gvî. ¹²Fòyn àteyn ɨ nì nà lî ghɨli wu lèm wul ɨ̀moʼ ɨ nà tisɨ̂ sugèyʼsɨ̀ nkam ɨ̀ lì ghɨli wu lèm wul ɨ̀moʼ ɨ nà tisɨ̂ sugèyʼsɨ̀ mɨ̀vɨm ɨ̀n tâyn. Ghɨli nì nà felɨ gveynsɨ ŋweyn, ɨfwo ɨ yɨnɨ koʼ, ghɨli kfì. Ghɨli nì nà faytɨ̂ ɨ̀fwo iwòŋ sɨ̂ sugèyʼsɨ ŋweynsɨ. ¹³Wu nì lî woyn ghɨki nɨ̀ zɨ̀ ghɨli a àŋena na faytɨ̂ mɨ̀yisi ɨ̀nlɨ̀mtɨnɨ̂ sɨ̂ ŋweyn, ɨ̀ lì ghɨli a ghɨ na kfê ɨ̀fwo ɨ yɨnɨ sɨ̂ ŋweyn kɨ̀ a dzɨsɨ a dzɨsɨ, ghɨli kaŋ kaŋ, ghɨli nyôʼ nyoʼ. ¹⁴Wu nì ghalɨ fsɨtɨ̂ gveynsɨ ɨfwo ɨ yɨnɨ sɨ jûŋsɨ̀ nɨ̀ zɨ̀ ɨ̀ fsɨ̀tɨ gveynsɨ mɨtàm nɨ̀ gveynsɨ olìfsɨ̀ ɨ̀ fù sɨ̂ ghelɨ ghɨ felɨnɨ nɨ̀ ŋweyn. ¹⁵Yì læ̀ nà kfî àsaŋ à ki-a wu kàyn na yì gwosɨ ɨlwêʼ ìvɨm ɨ̀ fu alêʼ àmòʼ wù fu sɨ̂ ghelɨ ghɨ felɨnɨ nɨ̀ ŋweyn. ¹⁶Wu nì fsɨtɨ̂ ghelɨ ghɨ felɨnɨ nɨ̀ zɨ̀ nô ghɨ̀ jɨ̀m, ɨ woyn ghɨ lûmnɨ̀ nɨ ghɨki, ɨ̀ fì ghal fsɨ̀tɨ woynda tɨ̂kuŋ nɨ̀ zɨ̀ ghî a ghɨ n-kelɨ adyaʼ a ghɨ na felɨ̀ sɨ̂ ŋweyn. Wu nì ghal fsɨtɨ kɨmɨ njàkâs sisɨ sɨ jûŋsɨ̀ ɨ̀ lèm a sɨ na felɨ̀ sɨ ŋweyn. ¹⁷Yì læ̀ nà lî nyâm sisɨ wu kàyn yi gwòsɨ̀ inôyn ìvɨm wu fsɨ anôyn àmòʼ ateyn. Nô zɨ̀ ɨ nì kasî kɨ ɨ̀kôs sɨ̂ ŋweyn. ¹⁸Ɨlvɨ nâ vzɨ̀ læ̀ kfeyna a yì na byal dzɨ̂ na Bôbo fsɨ zɨ sɨ awu nɨ̀ fòyn nâ wèyn a yì choʼ kɨ̀ nô sɨ a zɨ̀ a ngeŋ têyn, mɨtì a Bôbo faŋ tɨ̀ fì tɨ̀ bè iwo sɨ̂ zɨ̀ achi nâ ghè.”

¹⁹Mɨtì ghelɨ ateyn ɨ faŋ tɨ̀ yvɨtɨ iwo zɨ̀-ì a Samwèl nɨ̀n bê, ɨ bè kɨ na, “Ɨngaŋ! Ghes nɨn kɨŋ kɨ fòyn na wù na saʼ ghès, ²⁰ta ka ghèsɨ̀ nà boŋ ghɨ kɨmɨ ta tɨlaʼ tɨlitɨ, fòyn ɨ saʼ ghès, lî seʼ nɨ̀ ghès ɨtwaʼ iwòŋ kasi kfâ.”

²¹A nà sɨ ghɨ ta Samwèl yvɨ awo kì a ghelɨ ateyn bè, wu kasi ndù ɨ fèʼtɨ kɨ à jɨ̀m sɨ̂ Bôbo Fɨyini. ²²Bôbo ɨ bè sɨ̂ ŋweyn na, “Ni kɨ iwo zɨ̀-ì a àŋena nɨn kɨŋ ɨ̀ choʼ fòyn wù na saʼ àŋena.” Samwèl ɨ kæ bè sɨ̂ ghelɨ Isìlæ̀ na, àŋena kasi ɨ̀ kfa a àŋena ntèʼsɨ nà yvɨtɨ-à.