1 Samuel 7

¹Ghelɨ Kiliyat-jelìm ɨ gvì ɨ lì ɨ koʼ nɨ̀ àntayntayn a mɨ̂kàyn nɨ̀ Bôbo a ndo nɨ̀ Àbinadàb atû kfɨ̀yn. Ta ghɨ ndù tî ɨ choʼ Èlezà ɨwayn Àbinadàb na wù na kinî-à.

Samwèl ɨ zɨ̀tɨ̀ sɨ saʼ a Isìlæ̀

²Àntayntayn ateyn a nɨ̀n læ meyn chi a Kiliyat Jelìm nô sɨ a ndèyn. Kɨ n-læ chi bèŋ mɨ̀vɨm ɨ̀m bò. Ghelɨ Isìlæ̀ ɨ nà sɨ dzɨ-à kasî leʼ ndû sɨ̂ Bôbo na wù gamtɨ àŋena.

³A læ nà ghɨ achi a li-a Samwèl ɨ bè sɨ̂ ghelɨ Isìlæ̀ na, “Yi na kɨŋ sɨ kasi sɨ gvi sɨ̂ Bôbo Fɨyini kɨ̀ nô nɨ̀ mɨ̀tem mzɨ̂ ɨ̀n jɨ̀m, yi màʼì mɨyini mɨ̀ ɨ̀tum mèyn a yi n-koʼsɨ têyn baʼsɨ̂ nɨ̀ ɨ̀nfyèʼsɨ Ashtolèt nɨ̀ zɨ̀ wêyn. Yi maʼì yi fu ngêŋ sisɨ sɨ̂ Bôbo Fɨyini ɨ nà felɨ̀ kɨ sɨ̂ ŋweyn ta ka wù bœsɨ zɨ sɨ ɨwu nɨ̀ ghelɨ Fìlisìyà.” ⁴Ghelɨ Isìlæ̀ ɨ yvɨ tî nô mɨ ɨlvɨ gha ɨ màʼì ɨ̀nfyèʼsɨ Bâl nɨ̀ ɨ̀nfyèʼsɨ Ashtolèt vzɨ̀ ɨ nà sɨ koʼsɨ̂ kɨ Bôbo Fɨyini.

⁵Samwèl ɨ fi bè sɨ̂ ghelɨ ghɨ tisɨnɨ nɨ̀ àŋena na, “Yì yvɨŋtɨ ghelɨ Isìlæ̀ nô ghɨ̀ jɨ̀m a ntèʼ Misbà mà jem sɨ̂ Bôbo Fɨyini a yi alèʼ.” ⁶Àŋena yvɨ̀ŋtɨ̀ a Misbà ɨ tu mu ɨ sfɨ̀s a nse asɨ nɨ̀ Bôbo Fɨyini ɨ fi bam ɨchfɨ̂ sɨ achi a fɨ̂blɨ̀-à, loyn ilêsɨ̀ ifu bê na, “Ghèsɨ ni meyn mbɨ sɨ̂ và a Bôbo.” Misbà ti n-ghɨ àlêʼ kì a Samwèl nɨ̀n læ zɨ̀tɨ sɨ tisɨ ghelɨ Isìlæ̀ ateyn.

⁷À nà n-ghɨ ta ghelɨ Fìlisìyà yvɨ na ghelɨ Isìlæ̀ yvɨŋtɨ meyn a ntèʼ Misbà, ghelɨ ghɨ tisɨnɨ nɨ̀ àŋena ɨ lì sugèyʼsɨ àŋena ɨ fvɨ̀ ɨ ndù sɨ nu ghelɨ Isìlæ̀. Àŋena se sɨ ndu tî ghelɨ Isìlæ̀ ɨ yvɨ na àŋena nɨn gvî-à ɨ nà sɨ fâyn nô sɨ a ŋaŋ, ⁸ɨ kæ be sɨ̂ Samwèl na, “Ghès nɨn chwotɨ̂ và, wa jêm kɨ jem sɨ̂ Bôbo, ɨ Fɨyini fɨ ghesɨ̀nà na fɨ bœsɨ ghesɨ̀nà sɨ a ɨwu nɨ̀ ghelɨ Fìlisìyà ghèyn.” ⁹Samwèl ɨ sɨ wayn njɨ̀, yi bu nyoŋa ɨ nyòʼ kɨ ì jɨ̀m sɨ ifu sɨ̂ Bôbo ɨ faŋ ɨ nà jêm kɨ jem sɨ̂ Bôbo kûm ghelɨ Isìlæ̀. Bôbo bèynsɨ̀ ìjêm i ŋweyn.

¹⁰Samwèl nà n-fu ifu nâ zɨ̀-ì sɨ̂ Bôbo tî, ghelɨ Fìlisìyà ɨ baʼsɨ̂ gvî kɨmɨ sɨ nu ghelɨ Isìlæ̀ ɨlvɨ nâ ghè. Mɨtì Bôbo nì achi nâ ghè ivɨ i nà byaytɨ̂ nô sɨ a ŋaŋ faynsɨ̀ ghelɨ Fìlisìyà. Ifayni ateyn i nì àŋena jɨŋi. Nô mɨ ɨlvɨ gha ghelɨ Isìlæ̀ ɨ tɨm yɨ àŋena. ¹¹Sugèyʼsɨ Isìlæ̀ sɨ fvɨ̀ a ntèʼ Misbà ɨ nyɨŋ ibàm nɨ̀ àŋena têyn ɨ ndu chwò Betkà ɨ kàli chem nô isas i ntèʼ, nyɨŋ tì zuetɨ̂ ndû kɨ ndu nɨ̀ àŋena.

¹²Samwèl ɨ lì ngòʼ î lì ɨ lèm alèʼ ghè a ntèʼ Misbà nɨ̀ ntèʼ Shên nà n-lêm ighami ateyn ɨ chfɨ̀ ìzɨyn i ngòʼ ateyn na Èbènezà, ma wù ti n-bê na, “Bôbo Fɨyini gamtɨ meyn ghesɨ̀nà ɨ̀ koʼ chèm layn.”

¹³À ti ta ghelɨ Isìlæ̀ nɨ̀n læ tɨm yɨ ghelɨ Fìlisìyà kɨ̀ sɨ amoʼ. Àŋena læ faŋ tɨ̀ fì tɨ̀ tòm avɨ a nse Isìlæ̀. Bôbo fi nì àŋena faŋ nà jɨ̂ŋ kɨ jɨŋ nô ta ka Samwèl læ kfɨ. ¹⁴Bôbo nɨ̀n læ meyn nì ntèʼ sîsɨ̀ nô sɨ̀ jɨ̀m a ghelɨ Fìlisìyà nɨn læ ghaytɨ fsɨ sɨ̂ ghelɨ Isìlæ̀ kɨ̀ sɨ zɨ̀tɨ̀ a ntèʼ Eklòn sɨ ndù sɨ chem a ntèʼ Gât ɨ kasi ndù sɨ̂ àŋena. Àŋena fi ghaytɨ fsɨ ɨlwêʼ vzɨ̀ a wu nà n-baʼsɨ a ntèʼsɨ nâ ghàyn sɨ̂ ghelɨ Fìlisìyà. Ghelɨ Isìlæ̀ ŋêyn ghelɨ Amò ɨ kasi nà sɨ chî kɨ nô nɨ̀ mbôynɨ̀.

¹⁵Samwèl nɨ̀n læ meyn faŋ kɨ sɨ a wul ɨ tisɨnɨ a Isìlæ̀ sɨ yaʼi ta ka wù læ kfɨ. ¹⁶À nà n-gvî nô mɨ a bêŋ ì kà wu lù a Lamà ɨ ndù a Betèl ɨ̀ lù a Betèl wu ndù a Gilgàl ɨ læ jelɨ kɨ têyn ɨ ndu chem a ntèʼ Misbà, saʼ fu ndû kɨ nɨ̀ nsaʼsɨ ghêl sɨ̀ ɨlwèʼ nâ ghàyn. ¹⁷Wù nà n-jelɨ mesì ntèʼ nâ sèynsɨ̀ nô mɨ ɨlvɨ gha ɨ̀ kasi kfa sɨ a Lamà wu nà bu saʼ fu kɨ nsaʼ sɨ ghêl. Wù n-baʼlɨ meyn àbaŋ ifu a Lamà sɨ̂ Bôbo Fɨyini.