2 Chronicles 2

Sòlomòn ɨ baʼtɨ sɨ bàʼlɨ Ndô Fɨyini

¹Fòyn Sòlomòn nɨn læ meyn bàʼlɨ Ndô Fɨyini, ɨ bàʼlɨ kɨmɨ ntoʼ ŋweyn.

²Wù n-choʼtɨ meyn ghelɨ nkam mɨ̀vɨm nsòmbo na ghɨ na beyʼi ɨ̀fwo abàʼlɨ̀, ɨ choʼtɨ ghelɨ nkam mɨ̀vɨm nfama na ghɨ na chuyn ngòʼsɨ̀ a kfɨynsɨ. Wù n-choʼtɨ meyn kɨmɨ ghelɨ nkamsɨ̀ tal nɨ̀ ghelɨ ighɨ ntufa na ghɨ na tisɨ̂ ifêl.

³Fòyn Sòlomòn nɨ̀n ntum meyn ntum sɨ̂ Hilàm ɨ fòyn Tayà ɨ bè na, “Tum ɨnkâʼ mɨ̀ sedà sɨ̂ mà kɨ̀ ta wà n-læ tum sɨ̂ bò wom Devìt na wù baʼlɨ ntoʼ ŋweyn ateyn. ⁴Mɨ n-kɨŋ sɨ bàʼlɨ ndô Bôbo Fɨyini ɨ Fɨyini femfɨ sɨ lem sɨ a nyɨŋ sɨ̂ ŋweyn ta ka ghɨ na nyôʼ ìleŋ sɨ̂ ŋweyn ateyn yi lɨ̂mtɨ̀ foma. Ghɨ na tom àbayn a laynɨ-a ateyn kɨ̀ mɨlvɨ ɨ̀n jɨ̀m, fu tɨ̀fu tɨ nyoʼnɨtɨ nɨ̀ bɨsì bɨsì, fu aleŋ ɨlvɨ ikfa, fu kɨmɨ a mɨchi mɨ̀ ɨ̀tuʼ ilaʼ nɨ̀ mɨ̀chi mɨ̀ àyɨ ɨchfɨ njoŋ baʼsɨ̂ nɨ̀ mɨchi mɨ̀ ayɨ ɨ̀n lì sɨ koʼsɨ Bôbo Fɨyini ɨ Fɨyini fɨ ghesɨ̀nà. À n-ghɨ ìsaʼ ma yi faŋ meyn kɨ̀ samoʼ sɨ̂ ghelɨ Isìlæ̀.

⁵Mɨ n-bâʼlɨ̀ ndô Fɨyini yi koʼnɨ-à bòm ta Fɨyini fɨ ghesɨ̀na fɨ nɨn ngaŋtɨ̂ chwô mɨ̀yìnì nô ɨ̀n jɨ̀m. ⁶Mɨtì wùl ɨ̀ kàʼ wu bû bàʼlɨ̀ ndô sɨ̂ Fɨyini fɨ. Nô mɨ ìyvɨ-i zɨ̀ a yi ngaŋtɨ gòʼsɨ̀ kàʼ yi bû kfèyn sɨ̂ ŋweyn. Mɨ kfêynɨ̂ wi sɨ baʼlɨ ndo sɨ̂ ŋweyn mɨtì mɨ baʼlɨ̀ kɨ àlêʼ ta ka ghɨ na nyòʼ tɨ̀fu ateyn sɨ̂ ŋweyn

⁷Tum læ̂ wul ɨ̀felɨnɨ sɨ̂ mà, wu faytɨ̂ kya sɨ ni ifêl nɨ̀ àso ɨkwo a baŋnɨ-a nɨ̀ a fɨfâ, nɨ̀ ìdyayni baʼsɨ̀ nɨ̀ àkasa. Wù kelɨ sɨ nà faytɨ̂ kya sɨ tɨm ɨfwo nɨ̀ àmbyeyna kɨ bâŋ nyêm ndû ndu, nɨ̀ ali-a kɨ bâŋ baŋ, kɨ̀mɨ nɨ̀ a nyemnɨ-a. Wù n-kelɨ kɨmɨ sɨ nà faytɨ̂ kya sɨ nyàʼ awo a ngòʼsɨ̀ ta ka wù gvi nà fêl a Jèlusalèm nɨ̀ ɨlwêʼ ɨlvɨ-i a Judà. Wu n-gvi-à nà felɨ̀ ŋêyn ghelɨ̀ ghem ghì a bò wom ɨ Devìt nɨn læ choʼtɨ ghɨ faytɨ kya sɨ fèl ɨfwo nɨ̀ ɨ̀wu.

⁸Tum kɨmɨ ɨnkàʼ mɨ̀ sedà sɨ̂ mà, nɨ̀ ɨ̀nkàʼ mɨ̀ algùm baʼsɨ̂ nɨ̀ ɨ̀nkâʼ mɨ̀ àgùm ma mɨ lù a Lebanòn. Mɨ n-kya na ghelɨ̀ ghya nɨn faytɨ̂ kya sɨ gvèl ɨnkâ ɨ̀njùŋ, ghelɨ̀ ghem nɨn gvì-à nà felɨ̀ ŋêyn ghelɨ ghya. ⁹Mɨ n-kɨŋ ɨ̀nkâʼ mɨ dvɨ̂ kɨ tèyn bòm ta mɨ n-kɨŋ sɨ bàʼlɨ ndô Fɨyini yi ghaʼ kɨ tèyn fî jofà. ¹⁰Mɨ n-làʼ ghelɨ ghɨ felɨnɨ nɨ̀ và ghî a ghɨ n-gvel ɨnkâʼ nɨ̀ nkwòsɨ wîtsɨ̀ nkam ighɨ ì kæ̀, nɨ̀ nkwòsɨ àsaŋ a balèysɨ̀ nkam ighɨ ì kæ̀. Mɨ n-lâʼ kɨmɨ aŋena nɨ̀ nsàlsɨ mɨ̀lûʼsɨ̀ nkam mɨvɨm bò, baʼsɨ̂ nɨ̀ ɨ̀kfaŋ mɨ̀vɨ̂l mɨ̀ Olìfsɨ̀ nkam mɨvɨm bò.”

¹¹Hilàm ɨ fòyn Tayà ɨ nyàʼ ŋwàʼlɨ̀ sɨ̂ fòyn Sòlomòn bê na, “Bôbo Fɨyini lem meyn và sɨ a fòyn bòm ìkôŋ zɨ̀ a wù n-kelɨ sɨ̀ ghelɨ ŋweyn.”

¹²Hilàm nɨ̀n fi meyn bè na, “Ikoʼsɨ-i nɨn ghɨ sɨ̂ Bôbo Fɨyini ɨ Fɨyini fɨ ghelɨ Isìlæ̀ fifɨ a fɨ fàytɨ iyvɨ nɨ̀ nse. Wù fu meyn wayn sɨ̂ fòyn Devìt wu kelɨ ìtof fî kya àwo nô ajûŋ. Wayn àteyn nɨn bàʼlɨ̀ Ndô Fɨyini, fì bàʼlɨ̀ ntoʼ ŋweyn.

¹³Mɨ n-tum Hulam-Abì sɨ̂ và, a ghɨ wul kya ìfêl nô ajûŋ. ¹⁴Nà ŋweyn nɨn lù a Dân, bò ŋweyn ɨ ghɨ wul ɨ̀ Tayà. Wù yeʼi meyn sɨ na faytɨ ɨfwo nɨ̀ àso ɨkwo a baŋnɨ-a nɨ̀ a fɨfâ, faytɨ̂ nɨ̀ ìdyayni nɨ̀ àkasa, faytɨ̂ nɨ̀ ngòʼsɨ̀ nɨ̀ ɨ̀nkàʼ. Wù n-kya kɨmɨ sɨ tɨm ɨfwo nɨ̀ àmbyèyna kɨ bâŋ nyêm ndû ndu, nɨ̀ a li-a kɨ nyêm nyem nɨ̀ a li-a kɨ bâŋ baŋ, kɨ̀mɨ nɨ̀ àbâs a ndzɨsɨ ma ghɨ faytɨ meyn tɨm. Wu n-faytɨ̂ kya sɨ chuf tɨ̀nkì tɨ ɨfwo kɨ tɨ̀ jɨ̀m, ma ghɨ kæ fu nô mɨ ifêl ìkà sɨ̂ ŋweyn a wù fel kɨ̀ ta ghɨ bè. Wu n-gvi-à nà felɨ ŋêyn ghelɨ ghya ghî a ghɨ n-kya sɨ faytɨ ɨfwo nɨ̀ ɨ̀wu kɨ̀mɨ nɨ̀ ɨghɨ bò ìfèl nɨ̀ mà, ma à ti bò vâ ɨ Devìt/bôbo wom ɨ bò va ɨ Devìt.

¹⁵Fu læ̂ wît zɨ̀ nɨ̀ balì nɨ̀ mɨ̀vɨ̂l baʼsɨ̂ mɨ̀lû mzɨ̀ a wà tî chfɨ̀nɨ sɨ fu sɨ̂ ghelɨ ghɨ felɨnɨ nɨ̀ và a bô. ¹⁶Wa n-fu-a a ghèsɨ̀ gvel ɨnkàʼ mzɨ̀ a wà n-kɨŋ a Lebanòn ɨ̀ kul ɨ̀ màʼ a jvâ i ghaʼnɨ a mɨ kali fvɨ̀ a Jobà /ɨ tum a jvà ighaʼnɨ̀ a wà li a Jobà koʼ nɨ̀ ɨ̀mêyn a Jèlusalèm.”

¹⁷Fòyn Sòlomòn nɨn læ meyn taŋ ghelɨ ɨtum ghì a ghɨ nà n-ghɨ a Isìlæ̀ kɨ̀mɨ ta bò ŋweyn Devìt nɨn læ taŋ. Sòlomòn nɨn læ taŋ àŋena nà chɨ̂yntɨ̀ ghɨ nkam ɨvɨ nɨ̀ ghelɨ mɨ̀vɨm ɨ̀n tâyn njvàsɨ̀ tal nɨ̀ ghelɨ ighɨ ntufa. ¹⁸Wu n-taŋ tî ɨ choʼtɨ ghelɨ nkamsɨ mɨ̀vɨm nsòmbo na ghɨ na bèʼì ɨ̀fwo abàʼlɨ̀, ɨ choʼtɨ ghelɨ nkam mɨ̀vɨm nfama na ghɨ na zue ngòʼsɨ̀ a kfɨynsɨ, ɨ choʼtɨ ghelɨ nkamsɨ̀ tal nɨ̀ ghelɨ ighɨ ntufa na ghɨ na tisɨ̂ ghelɨ ghɨ felɨnɨ.