2 Chronicles 3

Fòyn Sòlomòn ɨ bàʼlɨ̀ ndô Fɨyini

¹Fòyn Sòlomòn nɨ̀n læ meyn zɨtɨ sɨ bàʼlɨ ndô Bôbo Fɨyini a Jèlusalèm a kfɨyn Molìyà, alèʼ ghè a Bôbo Fɨyini nɨn fvɨ̀ ikèʼ nɨ̀ bò ŋweyn Devìt ateyn. Bôbo Fɨyini nɨn n-fvɨ tî wu yuyn alêʼ ateyn a ghɨ alêʼ kì a Alunà ɨ wul ɨ̀ Jebùs nà leŋ asaŋ alèʼ nâ ghàyn. ²Wù n-læ zɨ̀tɨ sɨ bàʼlɨ̀ a mɨchi ɨ̀n bò akùmtɨ̀ a njoŋ a bêŋ, ma à sɨ ghɨ bèŋsɨ̀ kæ̀ ta wù n-saʼ.

³Achɨ a ndô Fɨyini kì a Sòlomòn nɨn læ we nà n-dyêf chem ntàmsɨ̀ mɨ̀vɨm ɨ̀n bò nɨ̀ ntàmsɨ̀ nsòmbo, ghaʼ chem ntàmsɨ̀ bulamòʼ ma wù fèʼ ɨfyèʼ ghè a ghɨ nà n-lum fèʼ ɨfwo ateyn. ⁴Ajeŋ ɨchfɨ ndô nɨ̀ Bôbo Fɨyini nà n-dyefɨ̀ chem ntàmsɨ̀ bulamòʼ, njetɨ̂ chem ntàmsɨ̀ mɨ̀vɨm ɨ̀n tâyn nɨ̀ ntàmsɨ̀ kæ̀, ma wù lom meyn àntêynɨ̀ ateyn nɨ̀ àso ɨkwo a baŋnɨ-a kɨ kelɨ wi ilɨŋ. ⁵Sòlomòn nɨ̀n læ bayn ɨwuyn ndô Fɨyini nɨ̀ fɨ̀kàʼ fɨ agùmfɨ ɨ lom nɨ̀ àso ɨkwo a baŋnɨ-a a juŋà ɨ fi nyòtɨ̀ ɨ̀wuyn ndo ateyn nɨ̀ ɨ̀fwo wu ghɨ ta ɨywaŋ a ghɨ bo wòmnɨ̀ wu na ghɨ ta nchaʼsɨ. ⁶Wu n-nyòtɨ ndô Fɨyini nɨ̀ mɨ̀ngòʼtɨ̀ ɨ̀njùŋ baʼsɨ̂ nɨ̀ àso ɨkwo a baŋnɨ-a ma kɨ lù a Bavèm, ⁷ɨ lom ɨnkâʼ mɨ̀ ìkaŋʼ nɨ̀ tɨ̀wuwutɨ nɨ̀ ɨ̀wuyn ndo baʼsɨ̂ nɨ̀ ɨ̀byâʼ ateyn nɨ̀ àso ɨkwo a baŋnɨ-a. Wu n-chuf meyn ɨ̀nfyèʼsɨ̀ chelùbsɨ̀ ɨwuyn ndo.

⁸Sòlomòn nɨ̀n baʼlɨ meyn àlêʼ kì a kɨ layn gòʼsɨ̀ a ndô Fɨyini kɨ dyêf chem ntàmsɨ̀ bulamòʼ ghaʼ chem kɨmɨ ntàmsɨ̀ bulamòʼ kɨ̀ ighel ta ighaʼ i ndô Fɨyini nɨn ghɨ. Wu n-lom meyn àntêynɨ̀ ateyn nɨ̀ àso ɨkwo abaŋnɨ-a /kɨ kelɨ wi ilɨŋ, dɨlɨ̀ chem ndû kilusɨ̀ nkamsɨ mɨ̀vɨm ɨ̀n bò. ⁹Mbayn sìsɨ̀ a ghɨ faytɨ nɨ̀ àso ɨkwo a baŋnɨ-a nà n-dɨlɨ̀ chem ndû kilò ìmòʼ. Wu n-læ lom kɨmɨ ɨ̀wuyn ndo ìyvɨ̀ nɨ̀ aso ɨkwo a baŋnɨ-a. ¹⁰Wù n-faytɨ meyn ɨ̀nfèyʼsɨ chelùbsɨ̀ ɨ̀bwò ɨ lom nɨ̀ àso ɨkwo a baŋnɨ-a ɨ tom alèʼ ghè a kɨ layn gòʼsɨ̀. ¹¹Tɨwô tɨ chelùb nâ sìsɨ̀ nà dyefɨ̀ chem ntàmsɨ̀ njvà ìmòʼ nɨ̀ àbeʼa. Iwô i chelùb ì mòʼi nà n-dyefɨ̀ chwô ntàmsɨ̀ bò koʼ kûm ɨ̀wuyn ndô Fɨyini, iwô ateyn nɨ̀ îlì ɨ dyefɨ̀ ghɨ kɨmɨ tì ndû kûm ìwô ateyn nɨ i li zɨ̀. ¹²Ànkùmtɨ̀ a chelùb à nà n-ghɨ iwô ateyn ì mòʼi ɨ dyefɨ̀ chem ndù kɨmɨ ntàmsɨ tal koʼ kûm ɨwuyn ndô Fɨyini abàs ali-a, iwô i li ɨ dyefɨ̀ chwô kɨmɨ ntàmsɨ̀ bò koʼ kûm ìwô i chelùb iyi asɨ-i zɨ̀. ¹³Tɨwô tɨ chelùb nâ tèyntɨ nà n-chɨ̂yntɨ̀ dyefɨ̀ chem ntàmsɨ̀ njvà ìmòʼ nɨ̀ àbeʼa ma nô mɨ chelùb ìkà timi meyn kèʼnɨ̀ ìlì. Chelùb sɨ ateynsɨ nà ti ki ndùsɨ̀ nɨ̀ ɨchfɨ ndo ìghaʼnɨ̀ nɨ̀ Bôbo Fɨyini.

¹⁴Sòlomòn nɨn læ meyn bè ghɨ tɨm chelùbsɨ àbàs a ndzɨsɨ ghè a ghɨ n-ghaŋsɨ ɨchfɨ alêʼ a laynɨ-a nɨ̀ ambyeyna kɨ nyêm nyem, nɨ̀ ali-a kɨ bâŋ nyêm ndû ndu nɨ̀ ali-a kɨ bâŋ baŋ baʼsɨ̂ nɨ̀ àbâs a ndzɨsɨ-a ma ghɨ faytɨ meyn tɨm.

¹⁵Wù n-faytɨ meyn ɨ̀tôʼ ɨ̀ bwò ɨ tomtɨ ɨchfɨ ndô nɨ̀ Bôbo Fɨyini wu chɨ̂yntɨ dyefɨ̀ chem ntàmsɨ̀ njvàsɨ̀ ntufa, ɨfwo vzɨ̀ a wu n-ghɨ atû ɨ̀tòʼ nâ ghè ɨ ghɨ ta ɨbyalì dyefɨ̀ chem ndù ntàmsɨ̀ bò nɨ̀ àbeʼa. ¹⁶Wù n-faytɨ meyn nchaʼsɨ ɨ lèm àtû ɨ̀tòʼ nâ ghè, ɨ faytɨ ɨ̀fwo wu ghɨ ta mɨtam mɨ̀ bòmenglanèt ɨvɨ ɨ kulɨ ghaŋsɨ a nchaʼsɨ nâ ghè. ¹⁷Wù n-tom meyn ɨ̀tôʼ nâ vzɨ̀ ɨchfɨ ndô Fɨyini , àmòʼa ti ɨkœ nɨ̂n kœ̀ ali-a ti ɨkœ ɨtwo. Wu n-fu meyn ìzɨyn ateyn nɨ akî a kɨ n-ti abàs ɨkœ nɨ̂n kœ̀ na Jakìn bê na à bàʼlɨ̀ Bôbo Fɨyini, ɨ fu izɨyn ateyn nɨ akî a kɨ n-ti ɨkoe ɨtwo na Bowàz bê na Bôbo Fɨyini nɨn kelɨ àdyaʼ.