2 Chronicles 21

¹Jèhoshafàt nɨ̀n læ meyn kfa yeyn ghɨ̀bo ŋweyn ghɨ gvɨ̀mì ŋweyn a ntèʼ Devìt, Jèholàm ɨ wâyn ŋweyn ɨ dùʼì a ŋweyn achɨ. ²Jèholàm ɨ wâyn fòyn Jèhoshafàt nà n-kelɨ woyn ghɨ̂nì a ghɨ Àzlìyà nɨ̀ Jehiyèl nɨ̀ Zèkàliyà nɨ̀ Azàlìyahù nɨ̀ Mikèl kɨ̀mɨ nɨ̀ Shefàtayà. ³Bò àŋena nɨn læ meyn fu aso ɨkwo a baŋnɨ-a nɨ a fɨfâ sɨ̂ àŋena kɨ̀ sɨ idvɨ̀ nɨ̀ ɨ̀fwo ɨkwo ɨtwo baʼsɨ̂ nɨ̀ ntèʼsɨ a Judà ma ghɨ baʼlɨ meyn mbàyn jɨ̀ŋ kal. Mɨtì ɨ fu ɨfôyn sɨ̂ Jèholàm ta wu nà n-ghɨ wayn àsɨ/wayn ɨwû àsɨ nɨ̀ ŋweyn.

Jèholàm ɨ saʼ Judà

⁴À nà n-ghɨ ta Jèholàm yɨ ɨfôyn ɨ bò ŋweyn nà saʼ ìlaʼ ì jɨ̀m, wu nì ghɨ zuetɨ woynà ŋweyn nô ghɨ̀ jɨ̀m baʼsɨ̂ nɨ̀ ghelɨ ghɨ tisɨnɨ ghɨ li a Isìlæ̀. ⁵Jèholàm nɨn læ se sɨ yɨ ɨfôyn, ghɨ bèŋ mɨ̀vɨm ɨ̀n tal njvàsɨ̀ bò ɨ saʼ sɨ a bèŋsɨ̀ ntufa. ⁶Wù n-læ nà saʼ kɨ ta tɨfôyn tɨ Isìlæ̀tɨ̀ nɨn læ nà saʼ a. Wù n-læ meyn nà nî àwo a bɨ-a kì a fòyn Ahàb nɨn læ nà nî bòm ta wù n-læ meyn mala wâyn Ahàb ɨ nì mbɨ sɨ̂ Bôbo Fɨyini. ⁷Mɨtì ma Bôbo Fɨyini nɨn læ meyn yɨ mɨkâyn ŋêyn Devìt na wâyn ŋweyn læ̀ nà lum saʼ a kɨŋ wi sɨ bebsɨ isas i ndo nɨ̀ ŋweyn.

⁸A nà ghɨ ta Jèholàm nà n-saʼ ghelɨ Edòm ɨ to nɨ̀ àtu-a sɨ̂ ghelɨ Judà ɨ lèm fòyn àŋena. ⁹Fòyn Jèholàm ɨ lì sugèyʼsɨ ŋweynsɨ nô sɨ̀ jɨ̀m nɨ̀ ɨsîsɨ̀ a sɨ njelɨ̀ atû mɨ̀nchaʼ àŋena ndù sɨ nu ghelɨ Edòm. Àŋena nɨn ndù tî, ghelɨ Edòm ɨ jɨŋ kal àŋena a ni nà ghɨ nɨ̀ntuʼ, àŋena soli ɨ leʼ. ¹⁰Ghelɨ Edòm nɨn to nɨ̀ àtu-a sɨ̂ ghelɨ Judà sɨ koʼ sɨ chem layn.

Ghelɨ Libà nɨn læ to kɨmɨ nɨ̀ àtu-a sɨ̂ ghelɨ Judà kɨ̀mɨ ɨlvɨ nâ ghàyn bòm ta Jèholàm nà n-yvɨnɨ/koʼsɨ wi Bôbo Fɨyini ɨ Fɨyini fɨ ghɨ̀bo àŋena. ¹¹Wù n-læ meyn bàʼlɨ kɨmɨ ɨ̀lwêʼ vzɨ̀ a ghɨ n-koʼsɨ mɨ̀yìnì ateyn ilaʼ i kfɨynsɨ a Judà ɨ̀ jɨ̀ŋsɨ̀ ghelɨ Jèlusalèm nɨ̀ ghelɨ Judà ghɨ li ɨ nà koʼsɨ̂ mɨ̀yìnì ɨ nì mbɨ sɨ̂ Bôbo Fɨyini.

¹²Ilajà ɨ ngàŋ ndô Fɨyini ì ghaʼnɨ ɨ tum ŋwàʼlɨ sɨ̂ Jèholàm yi bê na,

“À ti iwo zɨ̀ a Bôbo Fɨyini ɨ Fɨyini fɨ bò vâ Devìt bè, ‘Wà n-yvɨnɨ̂ wì ma ta bò vâ Jèhoshafàt kèsa ta Asà ɨ fòyn Judà. ¹³Mɨtì wa n-nî kɨ ta tɨfôyn tɨ Isìlæ̀ jɨ̀ŋsɨ̀ ghelɨ Jèlusalèm nɨ̀ ghelɨ Judà ghɨ li àŋena na koʼsɨ̂ mɨ̀yìnì kɨ̀ ta ghelɨ ndo nɨ̀ Ahàb nɨn læ nà koʼsɨ. Wu n-zuetɨ meyn kɨmɨ woynà ghya, àŋena kelɨ nchinɨ̀sɨ jûŋsɨ̀ chwô và. ¹⁴À ti iwo zɨ̀ a Bôbo Fɨyini nɨn kɨŋ sɨ maʼ ngeʼ ì ghaʼnɨ atu nɨ̀ ghelɨ̀ ghya, nɨ̀ woyn ghya ghɨlûmnɨ̀ nɨ̀ ghɨki baʼsɨ̂ nô mɨ nɨ̀ gha ɨ̀lvɨ̀ ta wà n-kelɨ. ¹⁵Wa n-jɨ̀ŋ nɨ̀ ìkoʼi a wa ɨlvà a yi na lemâ kɨ lema ta mɨ̀chi nɨn chwô nô ta ka mɨ̀tu myâ fvɨ.’”

¹⁶Bôbo Fɨyini ɨ kæ nì na ghelɨ Fìlisìyà nɨ̀ ghelɨ Alàb ghì a ghɨ nà n-chi baʼsɨ sɨ̂ ghelɨ Kûsh na nû Jèholàm. ¹⁷Àŋena ghal Judà sɨ inù, ɨ bèʼì ɨ lù nɨ̀ ɨ̀fwo a ntoʼ nô ɨ̀ jɨ̀m, ɨ bèʼì woyn ntoʼ nɨ̀ ghɨ̀ki ntoʼ. Àŋena nɨn li meyn woyn ghɨlûmnɨ̀ nɨ̀ fòyn nô ghɨ̀ jɨ̀m ɨ fvɨ̀sɨ kɨ Ahazìyà akôs a wayn nɨ̀ fòyn.

¹⁸Awo nâ kèynà nɨn ghàyn têyn, Bôbo Fɨyini ɨ màʼ ìkoʼi ɨlvà nɨ̀ Jèholàm ma ghɨ kàʼ ghɨ bû chuʼ. ¹⁹Ikoʼi ateyni ɨ nà lemâ koʼ kɨ koʼ sɨ a bèŋsɨ̀ bò, mɨ̀tu mɨ̀ ŋweyn ɨ fvɨ̀ wu chi mɨchɨ ɨ̀n bò ɨ kfɨ ma wù yvɨ meyn ìyaf nô sɨ a ŋaŋ. Wù n-læ kfɨ, ghelɨ ŋweyn ɨ faŋ tɨ̀ dzɨ̀ ikfɨ i ŋweyn a dzɨ ghê a àŋena nɨn ndzɨ̀ iyi bò bò ŋweyn ateyn.

²⁰Ghɨ n-læ yisi Jèholàm sɨ a fòyn wu ghɨ bèŋsɨ̀ mɨ̀vɨm ɨ̀n tal njvàsɨ̀ bò wu saʼ sɨ a bèŋsɨ̀ nfama ɨ kfɨ. Wù n-læ kfɨ ghɨ gvɨ̀mì ŋweyn a ntèʼ Devìt mɨtì a ghɨ wi a ngvɨ̀misɨ nɨ̀ tɨ̀fôyntɨ̀. Wùl nɨn bu læ kumi ɨwuyn bòm ìkfɨ i Jèholàm.