2 Chronicles 22

Ghɨ yisi Ahazìyà sɨ a fòyn a Judà

¹A nà ghɨ ta Jèholàm kfɨ, ghelɨ Jèlusalèm ɨ yisi Ahazìyà akôs a wâyn ŋweyn sɨ a fòyn. A nà n-ghɨ tì ma anôyn a ghelɨ ghɨ choŋnɨ kì a kɨ n-gvi nɨ̀ ghelɨ Alàb nɨn zuetɨ meyn woyn ghɨlema nɨ̀ Jèholàm nô ghɨ̀ jɨ̀m. Azazìyà ɨ wâyn Jèholàm ɨ fòyn Judà ɨ nà sɨ saʼa.

²Ahazìyà nɨn læ zɨ̀tɨ sɨ saʼ Judà ghɨ bèŋsɨ̀ mɨ̀vɨm ɨ̀n bò njvàsɨ̀ bò, ɨ saʼ a Jèlusalèm sɨ a bèŋ. Nà Ahazìyà nà n-ghɨ Atalìyà ɨ wâyn wâyn Omlì.

³Ahazìyà nɨn li kɨ avɨ̀ nɨ̀ Ahàb bòm ta nà ŋweyn nà n-tebtɨ ŋweyn wu nî àwo a bɨ-a. ⁴Wu n-læ nì mbɨ asɨ nɨ̀ Bôbo Fɨyini kɨ̀ ta Ahàb nɨn læ nì bòm ta à nà n-ghɨ ta bò ŋweyn kfɨ, ghelɨ ɨ nà tebtɨ̂ ŋweyn wu lè dzɨ. ⁵Wù n-læ meyn yvɨtɨ sɨ̂ àŋena ɨ jùmtɨ̀ Jolàm ɨ wâyn Ahàb ɨ fòyn Isìlæ̀ ɨ seʼ nù Hazìyèl ɨ Fòyn Alàm a Lamot Gilèd. Àŋena nɨn seʼ tî, ghɨ lemsɨ Jolàm iwòŋ nâ ghè. ⁶Jolàm nɨn læ kfa iwòŋ afu, ɨ ndù a Jezlèl sɨ chuʼ ɨlwêʼ ɨ yafɨnɨ nɨ̀ ŋweyn, Ahazìyà ɨ wâyn Jèholàm ɨ fòyn Judà ɨ ndù afu sɨ toŋtɨ ŋweyn. ⁷A nà n-ghɨ ma Bôbo Fɨyini baʼtɨ meyn sɨ bebsɨ Ahazìyà toynɨ̂ imàʼtɨ̀ afî a wu n-màʼtɨ Jolàm. Wu n-ndù tî, ŋêyn Jolàm ɨ ndu yeyn Jehù ɨ wâyn Nimshì vzɨ̀ a Bôbo nɨn choʼ lèm sɨ a nyɨŋ sɨ bebsɨ isas i ndo nɨ̀ Ahàb. ⁸A nà ghɨ ta Jehù nɨn maʼ ngeʼsɨ atu nɨ̀ ghelɨ Ahàb, wu yeyn woyn ntoʼ ghɨlûmnɨ̀ ɨ Judà nɨ̀ woyn woyn Ahazìyà ɨ zuetɨ àŋena. ⁹Wu n-zuètɨ ɨ kæ làli ŋêyn ghelɨ iwòŋ nɨ̀ ŋweyn sɨ nà jelɨ̀ kɨŋ Ahazìyà, wu lèytɨ̀ a Samalìyà, ghɨ li gvì nɨ̀ ŋweyn sɨ̂ Jehù wu zue ŋweyn. Àŋena nɨn zue tî ɨ gvɨ̀mì bòm ta àŋena nɨn kfâʼtɨ̀ na wù na ghɨ wâyn Jèhoshafàt ma wù læ meyn nà koʼsɨ̂ Fɨyini nɨ̀ àtem a ŋweyna à jɨ̀mà. Wùl ɨ nà ghɨ wi a wù n-kfeynɨ sɨ lèm achɨ a tɨ̂fòyn ateyn.

Àtalìyà ŋêyn Jòwâsh

¹⁰A nà n-ghɨ ta Atalìyà ŋêyn Ahazìyà yeyn na wâyn ŋweyn kfɨ meyn, wu bè na ghɨ zuetɨ ghelɨ ntoʼ a ndo nɨ̀ Judà nô ghɨ̀ jɨ̀m. ¹¹Mɨtì Jèhoshebà ɨ wâyn wi nɨ̀ fòyn Jèholàm ɨ leʼsɨ Jòwâsh ɨ wâyn Ahazìyà ŋêyn nlì wayn nɨ̀ ŋweyn vzɨ̀ a wu nà n-kelɨ ŋweyn na ka ghɨ zue ɨ leytɨ̀ antêynɨ̀ ndo. ¹²Wu n-læ lèytɨ tî, wayn àteyn ɨ faŋ kɨ ŋêyn àŋena a ndo nɨ̀ Bôbo Fɨyini sɨ a bèŋsɨ̀ ntufa a ghɨ Atalìyà ɨ saʼ ilaʼ ateyn.