2 Chronicles 23

¹A læ nà ghɨ ta Atalìyà saʼ ilaʼ i Judà sɨ a bèŋsɨ̀ ntufa, a nà ghɨ a bèŋsɨ̀ nsòmbo, Jèhòyadà ɨ tosɨ àtem a ŋweyn ɨ choʼnɨ sɨ ni iwo. Wu n-læ meyn yɨ mɨkâyn ŋêyn ɨ̀tu sugèyʼsɨ̀ vzɨ̀ a wu nà n-tisɨ sugèyʼsɨ̀ ɨvɨ, ma à ti Azalìyà ɨ wâyn Jèholàm nɨ̀ Ishmàyêl ɨ wâyn Jèhòhanàn nɨ̀ Azalìyà ɨ wâyn Obèd nɨ̀ Maseyà ɨ wâyn Adayà kɨ̀mɨ nɨ̀ Elishafàt ɨ wâyn Ziklì. ²Ɨtu sugèyʼsɨ̀ nâ wèyn ɨ̀ twâyn nɨn lu meyn ɨ jelɨ kɨ ntèʼsɨ Judà sɨ̀ jɨ̀m ɨ kasi gvì nɨ̀ ghelɨ Levì baʼsɨ̂ nɨ̀ chyeʼ sìsɨ̀ a sɨ nà n-tisɨ asas a ndosɨ kɨ ntèʼ sɨ̀ jɨ̀m. ³A nà ghɨ ta àŋena gvì a Jèlusalèm, ghelɨ Judà ɨ chfɨ̀nɨ̀ fòyn a ndo nɨ̀ Bôbo Fɨyini.

Àŋena nɨn chfɨ̀nɨ tî, Jèhòyadà ɨ bè sɨ̂ àŋena na, “Wâyn fòyn nɨn saʼ ìlaʼ yèynì kɨ̀ ta Bôbo Fɨyini nɨn læ chfɨ̀nɨ na woyn Devìt læ̀ nà ghɨ. ⁴À ti iwo zɨ̀ a yi n-kelɨ sɨ nì, yì gwotɨ ghelɨ ndo nɨ̀ Levì inôyn ì tal, ɨ choʼtɨ ngàŋsɨ ndô Fɨyini kɨ̀mɨ inôyn ì tal, a anôyn à moʼ àmòʼ kì a kɨ n-kelɨ sɨ fèl a ndô Fɨyini ɨtuʼ ilaʼ na chî àchfɨ̂ a mbàyn ndô Fɨyini. ⁵Anôyn a li-a chî ntoʼ, ali-a ɨ chî ɨ̀chfɨ mbàyn zɨ̀ a ɨwùyn achɨ a ndo, a ghelɨ Isìlæ̀ ghɨ li nô ghɨ̀ jɨ̀m na ghɨ ɨwe ɨ ndo nɨ̀ Bôbo Fɨyini. ⁶Wùl nɨn kelɨ wi sɨ zɨ a ndo nɨ̀ Bôbo Fɨyini a bu kɨ ngàŋsɨ ndo nɨ̀ Fɨyini sɨ nɨ̀ ghelɨ ndo nɨ̀ Levì ghì a ghɨ n-kelɨ sɨ nà felɨ̀ ɨlvɨ nâ ghè bòm ta ghɨ lem meyn àŋena sɨ a nyɨŋ, mɨtì ghelɨ ghɨ li ghì ɨ kelɨ sɨ nà chi kɨ ɨlwèʼ ghè a Bôbo bè sɨ̂ àŋena. ⁷Ghelɨ ndo nɨ̀ Levì nɨn kelɨ sɨ nà baʼsɨ sɨ̂ fòyn nô mɨ wo ta wù ndû nɨ̀ ɨ̀fwo iwòŋ nɨ̀ àŋena ma ghɨ baʼtɨ meyn, a zɨ̂ mɨ ndà a ndo nɨ̀ Bôbo Fɨyini ghɨ zue kɨ zue.

⁸Ghelɨ ndo nɨ̀ Levì baʼsɨ̂ nɨ̀ ghelɨ Judà ghɨ li nô ghɨ̀ jɨ̀m ɨ ni kɨ ta Jèhòyadà ɨ ngàŋ ndô Fɨyini nɨn bè. Jèhoyadà nɨn bu læ visi na wùl antêynɨ̀ ànòyn a ngàŋsɨ ndô Fɨyinisɨ̀ kèsa anòyn nɨ̀ ghelɨ Levì ghì a ghɨ nà n-felɨ̀ achi ɨtuʼ ilaʼ kfa kèsa ɨghî a ghɨ nà n-felɨ̀ wi achi nâ ghè. ⁹Àŋena nɨn faŋ tî, Jèhoyadà ɨ fu nkyàsɨ iwòŋ nɨ̀ àwoŋa fòyn Devìt ta wu nà n-ghɨ a ndo nɨ̀ Bôbo Fɨyini. ¹⁰Wù n-læ meyn lèm ghelɨ ghɨ kelɨ ɨ̀fwo iwòŋ nɨ̀ àŋena kɨ̀ a àŋena ɨwu ghɨ jɨŋ kal fòyn. Wu n-læ lèm ghelɨ ateyn kɨ̀ sɨ zɨ̀tɨ̀ abàs itsɨyn sɨ koʼ sɨ chem abàs ikuè a ndo nɨ̀ Bôbo Fɨyini ɨ jɨŋ kal kɨmɨ abaŋ ifu.

¹¹Jèhoyadà ŋêyn woyn ghɨlûmnɨ̀ nɨ̀ ŋweyn ɨ fi gvì nɨ̀ Jòwâsh ɨ wâyn fòyn Ahazìyà ɨ yisi ŋweyn sɨ a fòyn, ɨ fu ŋwàʼlɨ̀ tɨ̀saʼ nɨ̀ Bôbo Fɨyini sɨ̂ ŋweyn, ghelɨ byal ɨ bè na, “Mɨ̀chi mɨ̀ fòyn dyebtɨ.”

¹²A nà ghɨ ta Atalìyà yvɨ̀ ta ghelɨ nɨn byaytɨ, saŋlɨ-à sɨ̂ fòyn, wu nyɨŋ ndù a ndo nɨ̀ Bôbo Fɨyini alèʼ ghè a àŋena nà n-ghɨ ateyn. ¹³Wu n-ndu chem tî ɨ ki ndùsɨ̀ ɨ yeyn fòyn wu ti baʼsɨ̂ a ntoʼ ghè a ghɨ lèm sɨ̂ tɨfôyn tìtɨ̀ a ndo nɨ̀ Bôbo Fɨyini. Ghelɨ ghì a ghɨ nà n-tisɨ inôyn i ghêl nɨ̀ ɨghî a ghɨ nà n-toŋ tɨsoŋ ɨ ti kɨmɨ a ŋweyn a ngùŋ. Ghelɨ ilaʼ nâ ghèyn nô ghɨ̀ jɨ̀m ɨ saŋlɨ-à yem njàŋsɨ̀ toŋ tɨ̀soŋ. Ghelɨ ghì a ghɨ nà n-buʼ ɨfwo nà n-tisɨ̂ ìyem zɨ̀ a yi nà n-koʼsɨ Bôbo. Atalìyà ɨ kæ bàs ndzɨsɨ ŋweyn sɨ byal sɨ bè na ghɨ fsɨ meyn àdyaʼ à kema.

¹⁴Jèhòyadà ɨ ngàŋ ndô Fɨyini ɨ bè sɨ̂ ɨ̀tu sugèyʼsɨ̀ na àŋena li ndù nɨ̀ ŋweyn sɨ̂ sugèyʼ sìsɨ̀ a sɨ nà n-ti asɨ a ndo nɨ̀ Fɨyini fɨ, ɨ̀ zue nô mɨ ndà ta wù n-kɨŋ sɨ gàmtɨ ŋweyn. Wu n-be meyn kɨmɨ na ka àŋena nɨn zuè ŋweyn a ndo nɨ̀ Bôbo Fɨyini. ¹⁵Ta wù bè tî, ɨtu sugèyʼsɨ̀ nâ vzɨ̀ ɨ ghal ɨ ndù nɨ̀ Atalìyà a ntoʼ ɨchfɨ mbàyn ndo ɨ zue ŋweyn afu.

¹⁶Jèhòyadà ɨ kæ yɨ mɨkâyn ŋêyn fòyn nɨ̀ ghelɨ Judà na àŋena nɨn faŋ kɨ ghelɨ Bôbo Fɨyini. ¹⁷Àŋena nô ghɨ̀ jɨ̀m ɨ lù ɨ ndù a ndo nɨ̀ Fɨyini fɨ Bâl ɨ bebsɨ ndo àteyn, ɨ bɨ̀ytɨ̀ ɨ̀bwaŋ ifu nɨ̀ ɨ̀nfyèʼsɨ̀ ɨ Bâl ɨ zue Matàn ɨ ngàŋ ndo nɨ̀ Fɨyini fɨ Bâl asɨ abaŋ ateyn.

¹⁸Jèhòyadà nɨn lem meyn nchìsɨ̀ na sɨ na chî ndô Bôbo Fɨyini, a ghɨ ghelɨ ndo nɨ̀ Levì ghɨ kelɨ sɨ nà ni awo kì a fòyn Devìt nɨn læ bè na àŋena na ni-à. Àŋena nà n-kelɨ kɨmɨ sɨ nà nyoʼ tɨfu sɨ̂ Bôbo Fɨyini kɨ̀ ighel ta isaʼ i Mosìs nɨn bê, kelɨ kɨmɨ sɨ nà yem njàŋsɨ̀ saŋlɨ-à. ¹⁹Wu n-læ meyn lem kɨmɨ nchìsɨ̀ achfɨ̀ a mbàyn ndô Fɨyini ta ka wùl na zɨ̂ wì a ndo nɨ̀ Bôbo Fɨyini layn wi ta isaʼ i nɨn bê.

²⁰Jèhòyadà nɨn nì tî ɨ lì ɨ̀tu sugèyʼ sìsɨ̀ a sɨ nà n-tisɨ inôyn i sugèyʼsɨ̀ ɨvɨ nɨ̀ chyeʼsɨ nɨ̀ ghelɨ ghɨ tisɨnɨ baʼsɨ nɨ̀ ghelɨ ghɨ li ghì a ghɨ n-ghɨ ilaʼ afu nô ghɨ̀ jɨ̀m, àŋena lì fòyn a ndo nɨ̀ Bôbo Fɨyini ɨ ndù nɨ̀ ŋweyn a ntoʼ. Àŋena nɨn zɨ ɨchfɨ mbàyn abàs ikuè ɨ dùʼsɨ̀ fòyn achɨ a tɨ̂fòyn. ²¹Ghelɨ judà nô ghɨ̀ jɨ̀m ɨ nà saŋlɨ-à, ntèʼ àŋena ɨ kelɨ mbôynɨ̀ bòm ta ghɨ zuè meyn Atalìyà.