2 Chronicles 27

Jotàm ɨ saʼ Judà

¹Jotàm nɨn læ koʼ ɨfôyn a Isìlæ̀ ghɨ bèŋsɨ̀ mɨ̀vɨm ɨ̀n bò njvàsɨ̀ tâyn ɨ saʼ sɨ a bèŋsɨ̀ njvàsɨ̀ ntufa. Izɨyin i nà Jotàm nà n-ghɨ Jèlushà. ²Wù n-læ meyn jèlɨ kɨ avɨ̀ nɨ̀ bò ŋweyn nî kɨ àwo kì a kɨ n-ghɨ àtì-ati asɨ nɨ̀ Bôbo Fɨyini mɨtì wù n-bu læ nyòʼ ileŋ a ndo nɨ̀ Bôbo Fɨyini sɨ ni mbɨ mɨtì, ghelɨ Judà ɨ nà nî kɨ mbɨ. ³Jotàm nɨn læ meyn kasi bàʼlɨ̀ ɨ̀chfɨ mbàyn ndô Fɨyini vzɨ̀ a wu nà n-ghɨ abàs ikuè, ɨ bàʼlɨ kɨmɨ ɨ̀lwêʼ ɨlvɨ a mbàyn nâ ghè a kfɨ̂yn Ofèl. ⁴Wu n-læ meyn bàʼlɨ̀ ntèʼsɨ ilaʼ i kfɨynsɨ a Judà, ɨ bàʼlɨ kɨmɨ ɨ̀lwêʼ sɨ lèytɨ̀ nɨ̀ nchisɨ akù.

⁵Jotàm ŋêyn sugèyʼsɨ ŋweynsɨ nɨn læ meyn seʼ nù ghelɨ Amòn iwòŋ ɨ yɨ àŋena. Àŋena ɨ fu ɨfwo sɨ̂ ŋweyn sɨ a bêŋsɨ̀ tal a ghɨ àso ɨkwo a fɨfâ kilùsɨ̀ nkamsɨ̀ tal nɨ̀ ìghɨ nɨ̀ kilùsɨ̀ litàsɨ wît nkamsɨ̀ bò nɨ̀ ìghɨ ì bò kɨ̀mɨ nɨ̀ àsaŋ a balì kilùsɨ̀ litàsɨ̀ nkamsɨ̀ bò nɨ̀ ìghɨ ì bò.

⁶Jotàm nɨn læ meyn lema ɨ nà to bòm ta wu nà n-jelɨ̀ kɨ ta Bôbo Fɨyini ɨ Fɨyini fɨ ŋweynfɨ nà n-kɨŋ.

⁷Awo a li-a kì a kɨ n-læ gàyn ta Jotàm nà n-saʼ teyn ta iwoŋi nɨn ghɨ ma ghɨ nyaʼ meyn lèm a ŋwàʼlɨ̀ nɨ̀ tɨ̀fôyntɨ Isìlæ̀ nɨ̀ ɨtɨ Judàtɨ̀. ⁸Wu n-læ koʼ ɨfôyn ghɨ bèŋsɨ̀ mɨ̀vɨm ɨ̀n bò njvàsɨ̀ tâyn ɨ saʼ sɨ a bèŋsɨ njvàsɨ̀ ntufa. ⁹Jotàm nɨn læ kfɨ ghɨ gvɨ̀mì ŋweyn a ntèʼ Devìt, wâyn Ahàz ɨ koʼ ɨfôyn.