2 Chronicles 28

Ahàz ɨ saʼ Judà

¹Ahàz nɨn læ koʼ ɨfôyn ghɨ bèŋsɨ̀ mɨ̀vɨm ɨ̀n bò ɨ saʼ sɨ a bèŋsɨ̀ njvàsɨ̀ ntufa. Wu n-bu læ nà nî àwo àti-ati asɨ nɨ̀ Bôbo Fɨyini ta Devìt ɨ bò ŋweyn nà n-chi. ²Wu n-læ nà jelɨ̀ avɨ̀ nɨ̀ tɨ̀fôyn tɨ Isìlæ̀tɨ̀ ɨ faytɨ kɨmɨ ɨ̀nfyèʼsɨ̀ ɨ nà koʼsɨ mɨ̀yìnì mɨ̀ Bâl ateyn. ³Wu nà n-nyôʼ tɨ̀fu tɨ nyoʼnɨtɨ ibal i Ben Hinòm, ni-à woyn ghɨlûmnɨ̀ nɨ̀ ŋweyn ɨ nyôʼ sɨ ifu sɨ̂ ɨ̀nfyèʼsɨ̀ a ghɨ àwo a chaʼnɨnɨ-a kì a ghelɨ ghì a Bôbo nɨn læ saŋ fvɨ̀sɨ ilaʼ nâ ghè nà n-nî. ⁴Wu nà n-fu tɨ̀fu nyôʼ ìleŋ atû kfɨynsɨ nɨ̀ ìsas i ɨnkàʼ mɨ yvɨ̂tɨ̀ kɨ tèyn a ghɨ ɨ̀lwêʼ ɨ mɨyìnì.

⁵À ti iwo zɨ̀ a Bôbo Fɨyini ɨ Fɨyini fɨ ŋweyn fɨ nɨn læ fu ŋweyn awu nɨ̀ fòyn Alàm, ghelɨ Alàm ɨ tɨm yɨ ŋweyn, ɨ bèʼi lù nɨ̀ ghelɨ ŋweyn ghì a ghɨ yɨ̀ iwòŋ kɨ̀ sɨ idvɨ̀ ɨ ndù nɨ̀ àŋena a Dàmaskùs.

Bôbo Fɨyini nɨn fu meyn kɨmɨ ŋweyn sɨ̂ fòyn Isìlæ̀ wu ni kɨmɨ ngeʼ ì ghaʼnɨ sɨ̂ ŋweyn. ⁶Bekà ɨ wâyn Lèmalìyà nɨ̀n læ zuetɨ sugèyʼsɨ̀ nkam ɨvɨ nɨ̀ nkamsɨ mɨ̀vɨm ɨ̀n bò a Judà kɨ̀ achi a mòʼ bòm ta ghelɨ Judà nɨn visi meyn Bôbo Fɨyini ɨ Fɨyini fɨ ghɨ̀bo àŋena. ⁷Ziklì ɨ wul ɨ̀ ndo nɨ̀ Efɨ̀là a ghɨ ghɨ̀bo ndo ìwòŋ nɨn zue meyn Maseyà ɨ wâyn fòyn Ahàz nɨ̀ Azlikàm ɨ wul ɨ̀ vzɨ̀ a wù n-tisɨ ntoʼ nɨ̀ Elkanà vzɨ̀ a wù tî nà ghɨ ànkùmtɨ̀ a fòyn. ⁸Sugèyʼsɨ Isìlæ̀sɨ̀ nɨn læ meyn ghaytɨ ghelɨ antêynɨ̀ woyn nɨ̀ àŋena. Ghɨki nà n-ghɨ nkam ighɨ ì bò, woyn ghɨlûmnɨ̀ nɨ̀ woyn ghɨ̂ki. Àŋena nɨn li meyn kɨmɨ ɨ̀fwo sɨ idvɨ̀ ɨ ndù nɨ̀ ɨ̀ŋweyn a Sàmalìyà.

⁹Nfèʼtɨ̀ ì ghaʼnɨ nɨ̀ Bôbo Fɨyini î lì izɨyn i ŋweyni ɨ ghɨ Odèd nà n-chî a Sàmalìyà wu ndù sɨ yeyn sugèyʼ sìsɨ̀ a sɨ n-læ kasi kfa ɨ bè sɨ̂ àŋena na à n-ghɨ bòm ta Bôbo Fɨyini ɨ Fɨyini fɨ ghɨ̀bo ghi na nyôʼsɨ̀ ɨtoŋ sɨ̂ ghelɨ Judà ɨ fu àŋena a yi ɨwu. Mɨtì yi zuetɨ meyn àŋena chwò àleŋ Fɨyini fɨ yeyn. ¹⁰Yì sɨ baʼtɨ̂ sɨ li ghɨ̀lûmnɨ̀. ¹¹Yì yvɨtɨ iwo zɨ̀ a mɨ n-bê ɨ̀ vìsi ghelɨ ŋweyn ghì a ghɨ tî ghàytɨ têyn ɨ̀ kàsi kfa ba à n-ghɨ woynà ghi-a, a bu tì a ɨtoŋ ɨ yafɨnɨ nɨ̀ Bôbo fe a yi atu.

¹²Chyeʼsɨ Eflèm sɨ lisɨ ɨ timi ɨ tuynsɨ ìwo zɨ̀ a sugèyʼsɨ Isìlæ̀sɨ̀ nì. À nà n-ghɨ Azalìyà ɨ wâyn Jèhòhanàn nɨ̀ Bèlèkayà ɨ wâyn Mèshilemòt nɨ̀ Jèhìzkaya ɨ wâyn Shalùm baʼsɨ̂ nɨ̀ Amasà ɨ wâyn Hadlayì. ¹³Àŋena nɨn bè na ka yì gvi nɨ̀ ghelɨ ghèyn a yi n-ghàytɨ iwòŋ afêyn. Ghesɨ̀nà sɨ ghɨ ma ghɨ ni meyn mbɨ asɨ nɨ̀ Bôbo Fɨyini wù yafsɨ ɨ̀toŋ sɨ̂ ghesɨ̀nà, yi na kɨŋ sɨ kfeynsɨ mbɨ ì lì.”

¹⁴Ta àŋena bè tî, sugèyʼsɨ Isìlæ̀sɨ̀ ɨ visi ghelɨ ghì a àŋena nɨn ghaytɨ iwòŋ ɨ kasi fu ɨfwo vzɨ̀ a àŋena nɨn li gvì nɨ̀ ɨ̀ŋweyn sɨ̂ chyeʼsɨ asɨ nɨ̀ ghelɨ ghɨ̀ jɨ̀m. ¹⁵Ghɨlûmnɨ̀ ghì a ghɨ n-choʼtɨ/njàŋ azɨyn a àŋena ɨ lì ndzɨsɨ ɨfwo ghè a ghɨ gvi nɨ̀ ɨ̀ŋweyn ɨ fu sɨ̂ ghelɨ ghì a ndzɨsɨ àŋena nà n-ghɨ ma sɨ baytɨ meyn nɨ̀ gvɨsɨ ɨ fu kɨmɨ ɨ̀fwo ɨ yɨnɨ nɨ̀ mɨ̀lùʼ ɨ fi yoʼtɨ ɨ̀lwêʼ ɨ yafɨnɨ nɨ̀ àŋena. Ghelɨ ghì a ghɨ nà n-kaʼ ghɨ bû jèl ɨ koʼsɨ àŋena atû njàkâysɨ̀ ɨ kasi ndù nɨ̀ àŋena ilaʼ i Judà a ntèʼ Jèlikò ɨ ntèʼ àsùm. Ghelɨ Isìlæ̀ ɨ kasi ndù a Sàmalìyà.

¹⁶À n-læ nà ghɨ achi a li-a, fòyn Judà ɨ tum ntum sɨ̂ fòyn Asilìyà ɨ bè na wù gamtɨ ŋweyn. ¹⁷A nà n-ghɨ tì ma sugèyʼsɨ Edòmsɨ fi meyn gvì nà nû ghelɨ Judà ɨ beʼi lù nɨ̀ ghelɨ. ¹⁸A nà n-ghɨ kɨmɨ ɨlvɨ nâ ghè, ghelɨ Fìlisìyà ɨ nù ntèʼsɨ isas i kfɨyn nɨ̀ ntèʼsɨ a nse iyum a Judà. Àŋena nɨn nu meyn fsɨtɨ ntèʼ Bet Shemèsh nɨ̀ ntèʼ Ayjalòn kɨ̀mɨ nɨ̀ ntèʼ Gedelòt baʼsɨ̂ nɨ̀ ntèʼ Sokò nɨ̀ ɨyî Timnà nɨ̀ ɨyî Gimzò baʼsɨ̂ nɨ̀ mɨ̀ntèʼtɨ̂ ɨ̀n lì a mɨ̀ n-baʼsɨ ateyn ɨ nà chî ateyn. ¹⁹Bôbo Fɨyini nɨn læ suʼsɨ ilaʼ i Judà bòm Ahàz ɨ fòyn Judà sɨ awo a bɨ-a ghè a wù nà n-tôʼ a Judà fî yvɨ ìwo zɨ̀ a Bôbo Fɨyini nɨn bê. ²⁰Tiglat Bìlesà ɨ fòyn Asìlìyà ɨ gvi kwo fu ngeʼ sɨ̂ Ahàz ɨ fòyn Judà a ghɨ wi i gâmtɨ̀. ²¹Ahàz nɨn li meyn ɨ̀fwo ɨkwo ɨlvɨ a ndo nɨ̀ Bôbo Fɨyini nɨ̀ ɨlvɨ a ntoʼ kɨ̀mɨ nɨ̀ ɨlvɨ a ndosɨ nɨ̀ ghelɨ ghɨ tisɨnɨ ɨ fu sɨ̂ fòyn Asilìyà mɨtì wu faŋ tɨ̀ gàmtɨ ŋweyn.

²²A nà ghɨ ta Ahàz nɨn ghɨ a ngeʼ, wu nà kwo nì mbɨ sɨ̂ Bôbo Fɨyini chwô ta wu nà n-nî/Ahàz nà n-kwo yvɨnɨ̂ wì Bôbo Fɨyini sakos ɨlvɨ ta wu nà n-ghɨ a ngeʼ chwô ta wu nà n-ghɨ wi a ngeʼ. ²³Wù n-læ meyn fu ifu i nyoʼnɨ-i sɨ̂ mɨ̀yìnì mɨ̀ ghelɨ Dàmaskùs mzɨ̀ a ghɨ n-læ tɨm yɨ ŋweyn iwòŋ bòm ta wu nà n-kfâʼtɨ̀ ta mɨ̀yìnì nâ mèyn nɨ̀n gàmtɨ tɨ̀fôyntɨ Alàm wu kæ fu ifu sɨ̂ ɨ̀mêyn na mɨ̀ boŋ gàmtɨ̀ ŋweyn. Mɨtì a nà kwo ghɨ ìwo zɨ̀ a yi fèsɨ ŋweyn ŋêyn ghelɨ Isìlæ̀.

²⁴Ahàz nɨn yvɨŋtɨ meyn ɨ̀fwo vzɨ̀ a wu nà n-ghɨ a ndo nɨ̀ Bôbo Fɨyini ɨ zuelɨ, ɨ kɨŋ fòtɨ̀ àchfɨ̂ a ndo nɨ̀ Bôbo ɨ bàʼlɨ̀ ɨ̀bwaŋ ifu sɨ̂ mɨ̀yìnì nô mɨ a wo a Jèlusalèm. ²⁵Wu n-læ meyn bàʼlɨ̀ ɨ̀lwêʼ sɨ nà nyoʼ tɨfu koʼsɨ̂ mɨ̀yìni kɨ ntèʼ sɨ̀ jɨ̀m a Jèlusalèm. Wu n-nì tî ɨtoŋ Bôbo Fɨyini ɨ Fɨyini fɨ ghɨ̀bo ŋweynfɨ ɨ yaf.

²⁶Awo a li-a kì a wu n-læ nì ta wu nà n-saʼ a Judà kɨ̀ a n-zɨ̀tɨ sɨ chem a ngòʼsɨ nɨn ghɨ ma ghɨ nyaʼ meyn a ŋwàʼlɨ̀ nɨ̀ tɨ̀fôyntɨ Judàtɨ̀ nɨ̀ ɨtɨ Isìlæ̀tɨ̀. ²⁷Ahàz nɨn læ kfa yeyn ghɨ̀bo ŋweyn ghɨ gvɨ̀mì ŋweyn a ntèʼ Jèlusalèm mɨtì a ghɨ wi a ngvɨ̀misɨ nɨ̀ tɨ̀fôyn tɨ Isìlæ̀tɨ̀. Wu n-kfɨ tî, Hèzèkayà ɨ wâyn ŋweyn ɨ koʼ ɨfôyn/achɨ.