2 Kings 1

Nfèʼtɨ̀ Elajà ŋêyn fòyn Ahàzayà

¹À n-læ nà ghɨ ta fòyn Ahàb kfɨ, ghelɨ Mowàb ɨ to nɨ̀ àtu a sɨ̂ ghelɨ Isìlæ̀. ²A læ nà ghɨ achi a li-a fòyn Ahàzayà ɨ fe kàlì a ndo ìyvɨ̀ a ŋweyn a ntoʼ a Sàmalìyà ɨ lem. Wu n-fe tî, ɨ tum ghelɨ ntum ɨ bè sɨ̂ àŋena na, “Yì ndu yeyn Bal-zebùb ɨ fɨyini fɨ ghelɨ Eklòn ɨ̀ fyèŋtɨ ɨ̀ yeyn na a mɨ ti n-to sɨ alemtɨ afêyn a.”

³Mɨtì nchì Bôbo Fɨyini ɨ bè sɨ̂ Elajà ɨ wul ɨ̀ Tishbè na, “Ndu koli ghelɨ ntum nɨ̀ fòyn Sàmalìyà ɨ bɨf sɨ̂ àŋena na, ‘Yì ti ndû sɨ fyeŋtɨ awo sɨ̂ Bal-zebùb ɨ fɨyini fɨ Eklòn na Fɨyini fɨ nɨn ghɨ wi a Isìlæ̀ ma?’ ⁴Ta wù nì iwo nâ yèynì, Bôbo Fɨyini bê meyn na wu n-làlì wì sɨ ɨkuyn ikoʼi nâ ghàyn, wù n-kelɨ sɨ kfɨ. Elajà ɨ taŋi tì ɨ lu kɨ lu.

⁵Ghelɨ ntum nâ ghì ɨ kasi ndù ɨ yeyn fòyn wu bɨf sɨ̂ àŋena na, “Yì kàsi nyàŋsɨ kfa tèyn bòm ghà?”

⁶Àŋena bè sɨ̂ ŋweyn na, “Ghès nì kòynɨ̀ nɨ̀ wùl a dzɨ wù bê sɨ̂ ghes na, ghèsɨ̀ kasi ndù bè sɨ̂ fòyn vzɨ̀ a wù tùm ghes na Bôbo Fɨyini bɨfɨ na, ‘Wà tum na ghɨ ndu fyèŋtɨ àwo sɨ̂ Bal-zebùb ɨ fɨyini fɨ ghelɨ Eklòn na Fɨyini fɨ nɨn ghɨ wi a Isìlæ̀ ma? Ta wà nì iwo nâ yèynì, wa n-làlì wì sɨ a ɨkuyn ikoʼi afî a wà n-nyɨŋ ateyn tì, wa n-kfɨ kɨ kfɨ.’”

⁷Fòyn ɨ bɨf sɨ̂ àŋena na, “À n-ghɨ ìnkì i wûl ì kà a yì nì kòynɨ̀ nɨ̀ ŋweyn wù bê àwo nâ kèynà sɨ̂ zɨ̀ a?”

⁸Àŋena bèynsɨ̀ ɨ be sɨ̂ fòyn na, “Wù nà ghɨ ma wù màʼ ndzɨsɨ ma ghɨ faytɨ nɨ̀ ìwî i nyâmì ɨ̀ kul akue ma ghɨ fàytɨ nɨ̀ gvɨ̂ nyàm.

Fòyn ɨ be kɨ na, “À n-ghɨ Elajà ɨ wul ɨ̀ Tîshbè.”

⁹Fòyn nɨ̂n bè tî ɨ tum atu a sugèyʼsɨ̀ ŋêyn sugèyʼ sìsɨ̀ a wù n-tisɨ mɨ̀vɨm ɨ̀n tâyn na àŋena ndu yeyn Elajà. Atu a sugèyʼsɨ̀ nâ kì ɨ koʼ ndu yeyn Elajà wu duʼ atû kfɨ̀yn ɨ be sɨ̂ ŋweyn na, “Wùl ɨ̀ Fɨyini, fòyn bè na wà kali gvì.”

¹⁰Elajà ɨ bè sɨ̂ àtu a sugèyʼsɨ̀ nâ kì na, “Mà kæ nà ghɨ wul ɨ̀ Fɨyini, ɨvɨs ɨ lù iyvɨ ɨ suʼi nyòʼ và baʼsɨ̂ nɨ̀ ghelɨ ghèyn mɨ̀vɨm ɨ̀n tâyn a wà n-tisɨ têyn.” Elajà nɨn taŋi tî, ɨvɨs ɨ lù iyvɨ ɨ suʼi nyòʼ àtu a sugèyʼsɨ̀ nâ kì baʼsɨ̂ nɨ̀ sugèyʼ sìsɨ̀ mɨ̀vɨm ɨ̀n tâyn.

¹¹Fòyn ɨ fi tum atu a sugèyʼsɨ̀ a li-a ŋêyn sugèyʼ sìsɨ̀ a kɨ n-tisɨ mɨ̀vɨm ɨ̀n tâyn sɨ̂ Elajà. Atu a sugèyʼsɨ̀ nâ kì ɨ ndu yeyn Elajà ɨ̀ bè sɨ̂ ŋweyn na, “Wùl ɨ̀ Fɨyini, fòyn bè na wà kali gvì kɨ̀ lvɨ̂yn tèyn.”

¹²Elajà ɨ bè sɨ̂ àtu a sugèyʼsɨ̀ nâ kì na, “Mà kæ nà ghɨ wul ɨ̀ Fɨyini, ɨvɨs ɨ lù iyvɨ ɨ suʼi nyòʼ và baʼsɨ̂ nɨ̀ ghelɨ ghèyn mɨ̀vɨm ɨ̀n tâyn a wà n-tisɨ têyn.” Elajà nɨn taŋi tî ɨvɨs ɨ lù iyvɨ ɨ suʼi nyòʼ àtu a sugèyʼsɨ̀ nâ kì baʼsɨ̂ nɨ̀ sugèyʼ sìsɨ̀ mɨ̀vɨm ɨ̀n tâyn.

¹³Fòyn ɨ fi tum kɨ tum atu a sugèyʼsɨ̀ a li-a baʼsɨ̂ nɨ̀ sugèyʼ sìsɨ̀ a wù n-tisɨ mɨ̀vɨm ɨ̀n tâyn, atu a sugèyʼsɨ̀ nâ kèynà ɨ koʼ ɨ yeyn Elajà ɨ tɨm alvɨ a ŋweyn asɨ ɨ chwotɨ ŋweyn ɨ bè na, “Wùl ɨ̀ Fɨyini, mɨ n-chwotɨ̂ và a bôbo na ka wa n-zuè ma ghesɨ̀ ghelɨ ghɨ felɨnɨ nɨ̀ và ghêyn mɨ̀vɨm ɨ̀n tâyn. ¹⁴Yeyn læ̂, ɨvɨsɨ lu meyn iyvɨ sùʼi nyòʼ ɨ̀tu sugèyʼsɨ̀ ɨ̀ bwò nɨ̀ sùgèyʼ sìsɨ̀ a àŋena nɨn tisɨ. Mɨtì ma na chwotɨ̂ và na ka wa n-zuè ma.”

¹⁵Nchì Bôbo Fɨyini ɨ bè sɨ̂ Elajà na, “Ka wa n-fàyn, lu kàli zɨ̂ ŋweyn.” Nchì àteyn nɨ̂n bè tî, Elajà ɨ lu kàlì ŋêyn àtu a sugèyʼsɨ̀ nâ kì sɨ yeyn fòyn.

¹⁶Elajà ɨ bè sɨ̂ fòyn na Bôbo Fɨyini bɨfɨ na, “Wà tum na ghɨ ndu fyèŋtɨ àwo sɨ̂ Bal-zebùb ɨ fɨyini fɨ ghelɨ Eklòn na Fɨyini fɨ nɨn ghɨ wi a Isìlæ̀ ma? Ta wà nì iwo nâ yèynì, wa n-làlì wì sɨ a ɨkuyn ikoʼi afî a wà n-nyɨŋ ateyn tì, wa n-kfɨ kɨ kfɨ.” ¹⁷Elajà nɨ̂n tàŋi tî fòyn Ahàzayà ɨ kfɨ kɨ ighel ta Bôbo Fɨyini nɨn læ bè sɨ̂ Elajà.

Wu n-kfɨ, wâynà ŋweyn Jolàm ɨ koʼ ɨfôyn bòm ta fòyn Ahazayà nà n-kelɨ wi wayn ɨ lûmnɨ̀. Jolàm nɨ̀n læ koʼ ɨfôyn ma à sɨ ghɨ bèŋ sɨ̀ bò ta Jèholàm, ɨ wâyn Jèhoshafàt nɨ̀n saʼ Judà. ¹⁸Awo a li-a kì a Ahàzaya nɨ̀n læ nì nɨ̀ awo kì nô à jɨ̀m a kɨ n-læ gàyn ɨtuʼ ta wù nà n-saʼ nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Isìlæ̀tɨ̀.