2 Kings 2

Elajà ɨ koʼ iyvɨ bula wù kfɨ

¹À nà n-ghɨ ta Bôbo Fɨyini nɨn kɨŋ sɨ lì sɨ koʼ nɨ̀ Elajà iyvɨ a nkeylɨ ŋêyn Elishà ɨ ghɨ ma ghɨ lù a Gilgàl, ²Elajà ɨ bè sɨ̂ Elishà na, “Timi chìtɨ ma afêyn. Bôbo Fɨyini tum meyn mà a Betèl.”

Mɨtì Elishà ɨ bè na samoʼ ta Bôbo Fɨyini nɨ̀n chi nô và Elajà ɨ chi-a, “Mɨ n-visî wì vâ.” Wu n-bè tî ŋêyn Elajà ɨ lu kàlì a Betèl.

³Anôyn a nfèʼtɨ̀ sɨ ghaʼnɨsɨ kì a kɨ nà n-ghɨ a Betèl ɨ ndu yeyn Elishà ɨ bɨf sɨ̂ ŋweyn na, “A wà ti n-kya na Bôbo Fɨyini nɨn lî lû nɨ̀ bò ìfèl nɨ̀ và layn a? Elishà ɨ bèynsɨ̀ ɨ bè sɨ̂ àŋena na, “Mɨ n-kya, mɨtì ka wùl fî bè ìwo ateyn.”

⁴Elajà ɨ bè sɨ̂ Elishà na, “Timi chìtɨ ma afêyn. Bôbo Fɨyini tum meyn mà a Jèlikò.”

Mɨtì Elishà ɨ bè na samoʼ ta Bôbo Fɨyini nɨ̀n chi nô và Elajà ɨ chi-a, “Mɨ n-visî wì vâ.” Wu n-bè tî ŋêyn Elajà ɨ lù ɨ ndù a Jèlikò.

⁵Anôyn a nfèʼtɨ̀ sɨ ghaʼnɨsɨ kì a kɨ nà n-ghɨ a Jèlikò ɨ ndu yeyn Elishà ɨ bɨf sɨ̂ ŋweyn na, “A wà ti n-kya na Bôbo Fɨyini nɨn lî lû nɨ̀ bò ìfèl nɨ̀ và layn a? Elishà ɨ bèynsɨ̀ ɨ bè sɨ̂ àŋena na, “Mɨ n-kya, mɨtì ka wùl fî bè ìwo ateyn.”

⁶Elajà ɨ fi bè sɨ̂ Elishà na, “Timi chìtɨ ma afêyn. Bôbo Fɨyini tum meyn mà a jvâ Jodàn.”

Mɨtì Elishà ɨ bè na, “Samoʼ ta Bôbo Fɨyini nɨ̀n chi nô và Elajà ɨ chi-a, “Mɨ n-visî wì vâ.” Wu n-bè tî ŋêyn Elajà ɨ lù ɨ ndù a jvâ Jodàn.

⁷Anôyn a nfèʼtɨ̀ sɨ ghaʼnɨsɨ a li-a mɨ̀vɨm ɨ̀n tâyn ɨ lù ɨ ndu timi sɨ a nje ɨ kèʼnɨ̀ àlêʼ kì a Elajà ŋêyn Elishà nɨn tì ateyn a jvâ Jodàn. ⁸Elajà ɨ lì àwaf a ŋweyn ɨ buʼnɨ ɨ leŋ atû mù a jvâ Jodàn, mû mɨ̀ ateyn ɨ gwòsɨ̀, ɨ̀n lì ɨ ndù ɨkœ ɨ two, ɨ̀n lì ɨ ndù ɨkœ nɨ̂nkœ̀, àŋena zɨ ɨ dyàŋ a kî jvà iyum.

⁹A nà ghɨ ta àŋena dyàŋ, Elajà ɨ bè sɨ̂ Elishà na, “Fèʼtɨ iwo zɨ̀ a ka mà ni sɨ̂ và jæ ta ka Bôbo Fɨyini li lù nɨ̀ mà.”

Elishà ɨ bè sɨ̂ ŋweyn na, “Mɨ n-kɨŋ na wà fu yòmtɨ àdyaʼ à kya sɨ̂ mà ta ka mà li alêʼ à kya.”

¹⁰Elajà ɨ bè sɨ̂ ŋweyn na, “Wà bɨfɨ meyn ìwo yi to nô sɨ a ŋaŋ sɨ nì. Mɨtì wà kæ nì yèyn ta Bôbo Fɨyini nɨ̀n lî lû nɨ̀ mà, a wà keli adyaʼ nâ kèynà, ɨ̀ faŋ tɨ̀ yeyn, wa bû kèli àdyaʼ ateyn a.”

¹¹Àŋena nà bêsɨ̀ ndû nɨ̀ àwo, fɨ̀nchaʼ fɨ iwòŋ fɨ ɨ gvɨ̀tɨ fvɨ̀ a àŋena ikèʼ a gûf nyamsɨ kfaŋ ɨvɨs ɨ balî a fɨ̂nchaʼ balî a nyamsɨ nâ ghè ɨ gwòsɨ̀ Elajà ŋêyn Elishà ɨ li koʼ nɨ̀ Elajà iyvɨ a nkeylɨ. ¹²Elishà ɨ yeyn iwo nâ yèynì ɨ nà byal bê nô nɨ̀ gyà i to na, “Bò ìfèl nɨ̀ mà, bò ìfèl nɨ̀ mà, mɨ n-yeyn mɨ̀nchaʼ mɨ̀ ìwòŋ nɨ̀ ghelɨ ghì a ghɨ n-nyɨŋ atû nyamsɨ kfaŋ a Isìlæ̀!” Elishà nɨ̂n bè tî ɨ faŋ tɨ̀ fì tɨ̀ yeyn Elajà iwo ateyn i ɨ fu ngeʼ sɨ̂ ŋweyn wu ghal bàs ndzɨsɨ ŋweyn.

¹³Wu n-bàs tî ɨ boŋ awaf a Elajà ta kɨ chem ɨ kasi ɨ ndu timi a mbæ̀ jvà Jodàn, ¹⁴ɨ lì àwaf a Elajà kì a kɨ nì chèm tî ɨ leŋ atû mù a jvâ Jodàn ɨ bɨf nâ, “Bôbo Fɨyini ɨ Fɨyini fɨ Elajà fìfɨ̀ ba a?” A nà ghɨ ta wù leŋ awaf nâ kì atû mù, mu mɨ̀ àteyn ɨ gwòsɨ̀ ɨ ndù ɨkœ ɨ two, ɨ̀n lì ɨ ndù ɨkœ nɨ̂nkœ̀ wu dyàŋ.

¹⁵Anôyn a nfèʼtɨ̀ sɨ ghaʼnɨsɨ kì a kɨ n-lù a Jèlikò ɨ yeyn iwo zɨ̀ a Elishà nì ɨ bè na, “Elishà sɨ kelɨ àdyaʼ kì a Elajà tî nà kelɨ-a.” Àŋena lù ɨ ndu yeyn ŋweyn ɨ tfɨŋsɨ ɨ̀tu àŋena a nse a ŋweyn asɨ. ¹⁶Àŋena nɨn tfɨ̀ŋsɨ tî ɨ bè sɨ̂ ŋweyn na, “Yeyna, ghès ghelɨ ghɨ felɨnɨ nɨ̀ và nɨn kelɨ ghelɨ mɨ̀vɨm ɨ̀n tâyn, àŋena kelɨ àdyaʼ. Visi àŋena ndu kɨŋ bò ìfèl nɨ̀ và. À kàʼ a à na ghɨ ma ayvɨs a Bôbo Fɨyini a li meyn bò ìfèl nɨ̀ và se sɨ ndù màʼ ŋweyn atû kfɨ̀yn î lì kèsa afoŋlɨ a li-a. Elishà ɨ bè sɨ̂ àŋena na, “Ɨ̀ngaŋ, ka yi n-tum àŋena.”

¹⁷Mɨtì àŋena faŋ ɨ nà to kɨ to Elishà ɨ wumi ghaʼ sɨ fì sɨ tuynsɨ, ɨ kæ be sɨ̂ àŋena na, “Yì tum læ̂ ghelɨ ateyn.” Àŋena tum ghelɨ mɨ̀vɨm ɨ̀n tâyn ghɨ kɨŋ Elajà sɨ a mɨchi ɨ̀n tal mɨtì ɨ faŋ tɨ̀ yeyn ŋweyn. ¹⁸A nà ghɨ ta àŋena kàsi kfa ndù yeyn Elishà a ntèʼ Jèlikò ghè a wù nà n-chi ateyn, wu bɨf sɨ̂ àŋena na, “Ba ma ti meyn bè sɨ̂ zɨ̀ na ka yi n-ndù?”

Elishà ɨ bèynsɨ̀ mu ɨ mbɨ̂ sɨ a mu ɨ̀n jùŋ a Jèlikò

¹⁹Ghelɨ Jèlikò nɨ̀n bê meyn sɨ̂ Elishà na, “Yeyna bô, ntèʼ yêyn nɨ̀n ghɨ kɨ nô àlèʼ a juŋà kɨ̀ ighel ta wà n-yeyn mɨtì mû mzɨ̀ a mɨ̀ n-ghɨ ateyn ɨ jofɨ̀ wì, ghɨ tôʼ àfo a nse kɨ koʼ wi.”

²⁰Elishà ɨ bè sɨ̂ àŋena na, “Yì we fɨngvaŋ akaŋ a fɨ-a ɨ̀ gvì fù sɨ̂ mà. Àŋena gvì nɨ̀ fɨ̀ngvaŋ fɨ ateynfɨ ɨ fu sɨ̂ ŋweyn.

²¹Wu lì fɨ̀ngvaŋ fɨ ateyn ɨ ndu sfɨ̀s isɨ i lɨmàlɨ̀mà ɨ bè na, “Bôbo Fɨyini bè na, ‘Ma ni meyn mu mɨ̀ àteyn na layn a. Mu mɨ̀ àteyn læ̀ bu zue wi wul kèsa sɨ nì na ka ɨfwo ɨ yɨnɨ na koʼa.’” ²²Sɨ zɨ̀tɨ̀ achi nâ ghè sɨ koʼ sɨ chem layn, mû nâ mzɨ̀ lum jôf kɨ jof kɨ̀ ighel ta Elishà nɨn læ bè.

Ghɨ lùʼsɨ̀ Elishà

²³Elishà nɨ̀n læ lù sɨ a Jèlikò ɨ koʼ a Betèl. A nà ghɨ ta wù n-jelɨ̀ ndû a dzɨ, woyn ghɨ lûmnɨ̀ ghɨ li ɨ fvɨ gvì a ntèʼ ɨ nà sɨ lûʼsɨ̀ ŋweyn byal bê na, “Lù sɨ afêyn a nkos àtu wèyn, lù sɨ afêyn a nkos àtu wèyn.” ²⁴Elishà ɨ bèynsɨ̀ ɨ ki àŋena ɨ te àŋena izɨyn nɨ̀ Bôbo Fɨyini. Wu n-tè tî, nyamsɨ abosɨ ɨ fvɨ̀ akù sɨ̀ bò ɨ zuetɨ woyn ghɨ lûmnɨ̀ antêynɨ̀ nɨ̀ àŋena mɨ̀vɨm ɨ̀n kæ̀ njvàsɨ̀ bò. ²⁵Wu n-lù a Betèl ɨ koʼ a kfɨ̂yn Kamèl ɨ chitɨ afu ɨ kasi ndù a Sàmalìyà.