2 Kings 16

Ahàz ɨ koʼ ɨfôyn Judà

¹Ahàz ɨ wâyn Jotàm nɨn læ koʼ ɨfôyn a Judà ma à sɨ ghɨ bèŋsɨ̀ njvàsɨ̀ nsòmbo ta Bekà ɨ wâyn Lèmalìyà nɨn saʼ Isìlæ. ²Ahàz nɨn læ koʼ ɨfôyn ghɨ bèŋsɨ̀ mɨ̀vɨm ɨ̀m bò ɨ saʼ sɨ a bèŋsɨ̀ njvàsɨ̀ ntufa chî a Jèlusalèm. Wù n-bu læ nà nî àwo kì a kɨ n-ghɨ àtì-ati asɨ nɨ̀ Bôbo Fɨyini ta bò bò ŋweyn Devìt nà n-nî. ³Wu n-læ nà n-nî kɨ àwo a bɨ-a ta tɨfôyn tɨ Isìlæ̀ ɨ fi nyòʼ wâyn ŋweyn ɨ lûmnɨ̀ sɨ a ifu sɨ̂ mɨyini. Wu nà n-nî kɨ àwo a chaʼnɨnɨ-a kì a ghelɨ tɨlaʼ ghì a Bôbo Fɨyini nɨn læ saŋ fvɨ̀sɨ asɨ nɨ̀ ghelɨ Isìlæ̀ nà n-nî. ⁴Wu nà n-fu tɨ̀fu, nyôʼ ìleŋ ɨlwèʼ ghè a ghɨ n-koʼsɨ mɨyini ateyn. Ɨlwêʼ ateyn nà n-ghɨ a kfɨynsɨ, ghɨ kɨmɨ asas ɨnkàʼ a ghaʼlɨnɨ-a

⁵Lezìn ɨ fòyn Alàm ŋêyn Bekà ɨ fòyn Isìlæ̀ ɨ kæ koʼ sɨ nu ghelɨ Jèlusalèm. Àŋena nɨ̂n koʼ tî ɨ jɨŋ kali ntèʼ àteyn mɨtì ɨ faŋ tɨ̀ to tɨ̀ chwo fòyn Ahàz. ⁶À nà n-ghɨ ɨtuʼ ta fòyn Lezìn nɨn saʼ Alàm wu kasi ghal ɨ fsɨ ntèʼ Elàt, ɨ saŋ fvɨ̀sɨ̀ ghelɨ Judà sɨ afu, ghelɨ Edòm ɨ kæ ndù sɨ nà chi afu sɨ koʼ sɨ chem layn.

⁷Ahàz ɨ tum ntum sɨ̂ Tigla Bìlesà ɨ fòyn Asilìyà ɨ̀ bè sɨ̂ ŋweyn na, “Mɨ n-ghɨ wul ɨ̀ felɨnɨ nɨ̀ và ngvɨmlɨ̂ và. Mɨ n-chwotɨ̂ na wà koʼ gvi ghal fsɨ ma sɨ awu nɨ̀ fòyn Alàm nɨ̀ fòyn Isìlæ̀ ta àŋena nɨn nû ma.” ⁸Ahàz nɨn li meyn àso ɨkwo a fɨfâ nɨ̀ aso ɨkwo a baŋnɨ-a kì a kɨ nà n-ghɨ a ndo nɨ̀ Bôbo Fɨyini nɨ̀ a kî a kɨ nà n-ghɨ ɨlwèʼ ghè a ghɨ n-lêm ɨfwo ateyn a ntoʼ ɨ tum na ghɨ ndu fù sɨ̂ fòyn Asilìyà sɨ a ifu. ⁹Tigla Bìlesà ɨ fòyn Asilìyà ɨ yvɨ iwo zɨ̀ a Ahàz bè ɨ lì sugèyʼ sɨ ŋweyn ŋêyn àŋena ɨ ndu tɨm yɨ Dàmaskùs ɨ ghaytɨ ɨ ndù nɨ̀ ghelɨ ateyn a Kîl, ɨ zue fòyn Lezìn.

¹⁰Fòyn Ahàz ɨ kæ ndù a Dàmaskùs sɨ yeyn Tigla Bìlesà ɨ fòyn Asilìyà. Wu n-ndù tî ɨ yeyn abaŋ ifu a li-a afu ɨ tum ɨfyêʼ ateyn nɨ̀ dzɨ̀ zɨ̂ a ghɨ bàʼlɨ̀ ateyn sɨ̂ Yulìyà ɨ ngàŋ ndô Fɨyini na wù baʼlɨ abaŋ ifu a li-a kɨ ghɨ kɨ tì. ¹¹Yulìyà ɨ ngàŋ ndô Fɨyini ɨ bàʼlɨ̀ àbaŋ ifu kɨ̀ ɨfyèʼ nâ ghè a fòyn Ahàz tum ɨ mèsì àbàŋ ifu ateyn jæ ta ka fòyn Ahàz kasî kfa. ¹²A nà ghɨ ta fòyn kàsi kfa sɨ a Dàmaskùs ɨ̀ yeyn abaŋ ifu nâ kì, wu ndù a ngùŋ àteyn ɨ fu tɨfu atû àteyn. ¹³Wu n-læ fu ifu i nyoʼnɨ-i nɨ̀ ìfu i ɨfwo ɨ yɨnɨ nɨ̀ i ìfu i nyvɨnɨ-i ɨ fi mɨ̀sì mɨ̀luŋ mɨ̀ nyàm ìfu zɨ̀ a wù fù sɨ a ifu sɨ nà chi nɨ̀ mbôynɨ̀ abaŋ ifu nâ ghè. ¹⁴Abaŋ ifu kì a ghɨ n-faytɨ nɨ̀ ìdyayn i nà n-ti àntêynɨ̀ àntêynɨ̀ nɨ̀ ndô Fɨyini nɨ̀ àbaŋ ifu a fɨ-a, Ahàz ɨ lìsì ɨ lèm abàs ikuè alèʼ ghè a abaŋ ɨfu a fɨ-a kì nà n-ti ateyn.

¹⁵Fòyn Ahàz nɨ̀n be meyn sɨ̂ Yulìyà ɨ ngàŋ ndô Fɨyini na wù n-kelɨ sɨ nà fu ifu i nyoʼnɨ-i zɨ̀ a ghɨ n-fu nɨ̀ bɨsì bɨsì, fu ìfu ɨfwo ɨ yɨnɨ aleŋ ɨlvɨ ikfa. Wù n-kelɨ sɨ nà fu ifu i nyoʼnɨ-i, nɨ̀ ìfu ɨfwo ɨ yɨnɨ nɨ̀ fòyn fî fu kɨmɨ ìfù i nyoʼnɨ-i nɨ̀ ghelɨ Isìlæ̀ nô ghɨ̀ jɨ̀m nɨ̀ ìfu ɨfwo ɨ yɨnɨ nɨ̀ àŋena baʼsɨ̂ nɨ̀ ìfu i nyvɨnɨ-i atû àbàŋ ifu a fɨ-a. Wù n-kelɨ sɨ nà mɨsi mɨluŋ mɨ̀ tɨ̀fu tɨ nyoʼnɨtɨ nɨ̀ tɨ̀fu tɨ litɨ atû àbaŋ ifu a fɨ-a nâ ghè. Fòyn Ahàz nɨ̀n be meyn na Yulìyà visi àbaŋ ifu kì a ghɨ fàytɨ nɨ̀ ìdyayn i tî wù na ndû kinî àwo a ŋweyn ateyn.” ¹⁶Yulìyà ɨ ngàŋ ndô Fɨyini nɨn ni meyn kɨ ighel ta fòyn Ahàz bè.

¹⁷Fòyn Ahàz nɨn choʼtɨ meyn lìsì ɨ̀fwo vzɨ̀ ɨwùyn afo ghè a ghɨ n-tom mu ateyn ɨ chàʼsɨ̀ ɨ̀kfaŋ ɨ ghaʼlɨnɨ vzɨ̀ a wu nà n-ghɨ atû àteyn. Wù n-chaʼsɨ meyn àfo a mu a ghaʼnɨ-a kì sɨ atû ɨ̀nfyèʼsɨ̀ ɨ nyâmsɨ̀ ghê a ghɨ faytɨ nɨ̀ ìdyayn i tî ɨ tom atû àlèʼ ma ghɨ bàʼlɨ̀ nɨ̀ ngòʼsɨ̀. ¹⁸Wù n-læ meyn bɨ̀ytɨ̀ àlêʼ kì a ghɨ n-læ bàʼlɨ na ghelɨ na ndû duʼì ateyn a ndô Fɨyini achi ɨtuʼ ilaʼ koʼsɨ̂ Bôbo Fɨyini ɨ fèyn ɨ̀chfɨ ajeŋ vzɨ̀ a fòyn nà n-zɨ ateyn a ndô Fɨyini. Wu n-læ nì awo nâ kèynà têyn ta ka fòyn Asilìya na saŋlɨ-a.

¹⁹Awo a li-a kì a kɨ n-læ gàyn ɨtuʼ ta fòyn Ahàz nà n-saʼ nɨ̀ àwo kì nô à jɨ̀m wù n-læ nì nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Judàtɨ̀. ²⁰Fòyn Ahàz nɨn læ kfɨ ɨ kfa ndu yeyn ghɨ̀bo ŋweyn ghɨ gvɨ̀mì ŋweyn a ngvɨ̀misɨ nɨ̀ ghɨ̀bo ŋweyn a ntèʼ nɨ̀ Devìt, wâyn ŋweyn Hèzèkayà ɨ koʼ ɨfôyn.