2 Kings 21

Mànasè ɨ koʼ ɨfôyn a Judà

¹Mànasè nɨn læ koʼ ɨfôyn a Judà ghɨ bèŋ njvàsɨ̀ bò ɨ saʼ sɨ a bèŋsɨ̀ mɨ̀vɨm ɨ̀n tâyn njvàsɨ̀ tâyn chî a Jèlusalèm. Izɨyn i nà ŋweyni nà n-ghɨ Hefzibà. ²Mànasè nɨn læ meyn nì mbɨ asɨ nɨ̀ Bôbo Fɨyini. Wu nà n-nî àwo a chaʼnɨnɨ-a kì a ghelɨ tɨlaʼ ghì a Bôbo Fɨyini nɨn læ saŋ fvɨ̀sɨ asɨ nɨ̀ ghelɨ Isìlæ̀ nà n-nî. ³Wù n-læ meyn kasi bàʼlɨ̀ ɨ̀lwêʼ ɨ mɨ̂yìni vzɨ̀ a bò ŋweyn Hèzèkayà nɨn læ bɨ̀ytɨ, ɨ bàʼlɨ kɨmɨ ɨ̀bwaŋ ifu sɨ̂ mɨyini mɨ̀ Bâl nɨ̀ ɨ̀tôʼ vzɨ̀ a Ashelà ɨ fɨyini fɨ kifɨ nɨ̀ àŋena nà n-ti atu àteyn. Wu nà n-koʼsɨ̂ nô mɨ ghà ta kɨ n-bayn iyvɨ. ⁴Mànasè nɨn baʼlɨ meyn ɨ̀bwaŋ ifu sɨ̂ mɨyini a ndô Fɨyini a Jèlusalèm ma Bôbo Fɨyini nɨ̀n bê meyn na, “Ghɨ læ̀ na koʼsɨ̂ kɨ mà a Jèlusalèm.” ⁵Wù n-baʼlɨ meyn ɨ̀bwaŋ ifu ɨlwèʼ ghè a ghɨ nà n-gvî duʼì ateyn ɨchfɨ ndô Fɨyini ghɨ nà fu tɨ̀fu ateyn sɨ̂ ɨ̀fwo vzɨ̀ a wu n-bayn iyvɨ nô ɨ̀ jɨ̀m. ⁶Mànasè nɨn læ meyn nyòʼ wayn ŋweyn ɨ lûmnɨ̀ sɨ a ifu ibal i Ben Hinòm. Wu n-læ nà fyeŋ fɨ̀nyaʼ fêʼtɨ̀ àwo kì a kɨ n-ghɨ sɨ jæ sɨ gàyn, kfɨlɨ àvɨ̂ŋ, bɨf àwo sɨ̂ nkfɨsɨ nsesɨ nɨ̀ ɨ̀yvɨs ɨ bɨ. Wù n-ni meyn chwòsɨ̀ mbɨ asɨ nɨ̀ Bôbo Fɨyini ɨtoŋ Bôbo Fɨyini ɨ yaf.

⁷Mànasè nɨn læ meyn faytɨ ànfèʼsɨ̀ a Ashelà ɨ tom a ndô Fɨyini ma Fɨyini fɨ nɨn bê meyn sɨ̂ Devìt ŋêyn wâyn ŋweyn ɨ Sòlomòn na, “Ghɨ læ̀ nà koʼsɨ̂ kɨ mà a ndô Fɨyini afêyn, koʼsɨ̂ a Jèlusalèm a ghɨ àlêʼ kì a mà choʼ antêynɨ̀ àsas a ndosɨ a Isìlæ̀ na ghɨ na koʼsɨ̂ mà ateyn kɨ̀ sɨ a mɨlvɨ ɨ̀n jɨ̀m. ⁸Ghelɨ Isìlæ̀ kæ nà lêm tɨ̀saʼ temtɨ nɨ̀ àwo kì nô à jɨ̀m a mɨ n-læ bè toynɨ̂ a Mosìs ɨ wul ɨ̀ felɨnɨ nɨ̀ mà, a mà læ faŋ tɨ̀ fì tɨ̀ fvɨ̀sɨ àŋena sɨ a ilaʼ afêyn a mɨ n-fu sɨ̂ ghɨ̀bo àŋena têyn.” ⁹Mɨtì ghelɨ Isìlæ̀ ɨ faŋ tɨ̀ yvɨ̀nɨ Bôbo Fɨyini. Mànasè ɨ nì ghelɨ Judà nɨ̀ ghelɨ Jèlusalèm ɨ nì mbɨ chwô ghelɨ tɨlaʼ ghì a Bôbo Fɨyini nɨn læ saŋ fvɨ̀sɨ ilaʼ nâ ghè asɨ nɨ̀ ghelɨ Isìlæ̀.

¹⁰Bôbo Fɨyini ɨ kæ taŋi sɨ toynɨ a nfèʼtɨ̀ sɨ ghaʼnɨsɨ nɨ̀ ɨ̀nfeynfɨ ɨ bè na, ¹¹“Mànasè ɨ fòyn Judà nɨ̀n læ meyn nì mbɨ sɨ chaʼnɨnɨ nâ sèynsɨ̀. Wù n-ni meyn àwo a bɨ-a kɨ chwô akî a ghelɨ Amò ghì a ghɨ nà n-chi afu sɨ asɨ nɨn læ nì, ɨ nì ghelɨ Judà ɨ nà koʼsɨ̂ ɨ̀nfyèʼsɨ̀ vzɨ̀ a wù fàytɨ. ¹²À ti iwo zɨ̀ a Bôbo Fɨyini, ɨ Fɨyini fɨ Isìlæ̀ bè na, “Mɨ n-fu ngeʼ sɨ̂ ghelɨ Jèlusalèm ŋêyn ghelɨ Judà a nô mɨ ndà na yvɨ ìwo kûm ngeʼ àteyn wu nà chɨŋtɨ̂ faynà. ¹³Mɨ nì fu ngeʼ sɨ̂ ghelɨ Jèlusalèm yi ghɨ kɨ ighel ta ɨzɨ̂ a mɨ n-læ fu sɨ̂ ghelɨ Sàmalìyà baʼsɨ̂ nɨ̀ ghelɨ ndo nɨ̀ Ahàb. Mɨ nì mesì ghelɨ sɨ a Jèlusalèm kɨ̀ ta wùl nɨ̀n mesì ɨfwo ɨ yɨnɨ sɨ akaŋ wu kfɨsɨ. ¹⁴Mɨ nì bêyn jɨm sɨ̂ ghelɨ̀ ghem ghì a ghɨ fàŋ a Judà ɨ̀ fu àŋena ɨwu nɨ̀ mbàynɨ̀ sɨ àŋenasɨ. mbàynɨ̀sɨ àŋenasɨ nô sɨ̀ jɨ̀m ɨ nì tɨm yɨ àŋena ɨ̀ bèʼì lù nɨ̀ ɨ̀fwo àŋena. ¹⁵Mɨ n-nì tèyn bòm ta àŋena nî meyn mbɨ a ma asɨ ɨtoŋ wom yaf kɨ̀ sɨ zɨ̀tɨ̀ ɨtuʼ ghê a mà fvɨ̀sɨ ghɨ̀bo àŋena sɨ a Ijìb sɨ koʼ sɨ chem layn.”

¹⁶Mànasè nɨ̀n læ meyn nì na ghelɨ Judà na koʼsɨ̂ ɨ̀nfyèʼsɨ̀ a ghɨ mbɨ asɨ nɨ̀ Bôbo Fɨyini ɨ fi zuetɨ ghelɨ kɨ Jèlusalèm ì jɨ̀m bula àŋena bebsɨ ìwo.

¹⁷Awo a li-a kì a kɨ n-læ gàyn ta fòyn Mànasè nà n-saʼ nɨ̀ àwo kì a wù n-læ nì nô à jɨ̀m baʼsɨ̂ nɨ̀ mbɨ sìsɨ̀ a wu n-læ nì nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Judàtɨ̀. ¹⁸Mànasè nɨn læ kfɨ ɨ kfa ndu yeyn ghɨ̀bo ŋweyn, ghɨ gvɨ̀mì ŋweyn a gvêyn ntoʼ ghɨ toŋtɨ̂ na gvêyn Uzà, wâyn ŋweyn Amòn ɨ koʼ ɨfôyn.

Amòn ɨ koʼ ɨfôyn a Judà

¹⁹Amòn nɨn læ koʼ ɨfôyn ghɨ bèŋsɨ̀ mɨ̀vɨm ɨ̀m bò njvàsɨ̀ bò ɨ saʼ sɨ a bèŋsɨ̀ bò chî a Jèlusalèm. Izɨyn i nà ŋweyn i nà n-ghɨ Mèshulemèt ɨ wâyn Halùz. Mèshulemèt nà n-ghɨ wul ɨ̀ Jotbà. ²⁰Wù n-ni meyn mbɨ asɨ nɨ̀ Bôbo Fɨyini kɨ̀ ta bò ŋweyn Mànasè nɨn læ nì. ²¹Wù n-læ li kɨ avɨ̀ nɨ̀ bò ŋweyn ɨ nà koʼsɨ̂ ɨ̀nfyèʼsɨ̀ vzɨ̀ a bò ŋweyn nà n-koʼsɨ. ²²Wù n-chasɨ meyn Bôbo Fɨyini ɨ Fɨyini fɨ ghɨ̀bo ŋweyn. Wù n-bu læ nà yvɨnɨ tɨ̀saʼ tɨ Bôbo Fɨyini.

²³Chyeʼsɨ ŋweynsɨ ɨ kul mɨ̀nàŋ ɨ zue ŋweyn a ntoʼ. ²⁴Ghɨ n-zue fòyn Amòn tì ghelɨ Judà ɨ zuetɨ ghelɨ ghì nô ghɨ̀ jɨ̀m a ghɨ n-kul mɨ̀nàŋ ɨ zue fòyn ɨ lèm wâyn ŋweyn Jòsayà sɨ a fòyn.

²⁵Awo a li-a kì a kɨ n-læ gàyn ta fòyn Amòn nɨn saʼ nɨ̀ àwo kì a wu n-læ nì nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̂fôyn tɨ Judàtɨ̀. ²⁶Ghɨ n-læ gvɨ̀mi ŋweyn isè nɨ̀ ŋweyn a gvêyn ghè a ghɨ n-toŋtɨ̂ na gvêyn Uzà, wâyn ŋweyn Jòsayà ɨ koʼ ɨfôyn.