2 Kings 22
Ghɨ yeyn ŋwàʼlɨ̀ ìsaʼ nɨ̀ Bôbo Fɨyini
1Jòsayà nɨn læ koʼ ɨfôyn a Judà ghɨ bèŋsɨ̀ nfama ɨ saʼ sɨ a bèŋ mɨ̀vɨm ɨ̀n tal chì a Jèlusalèm. Izɨyn i nà ŋweyni nà n-ghɨ Jèdidà ɨ wâyn Adayà ɨ wul ɨ̀ Bozkàt. 2Wù n-læ li kɨ avɨ̀ nɨ̀ bò ŋweyn fòyn Devìt nî kɨ àwo kì a kɨ n-ghɨ àtì-ati asɨ nɨ̀ Bôbo Fɨyini. Wù n-bu læ kasi sɨ a ibàm awo ghè a wu nà n-nî kɨ ghɨ àtì-ati asɨ nɨ̀ Bôbo Fɨyini.
3À nà n-ghɨ a bêŋ njvàsɨ̀ nfama ta fòyn Jòsayà nɨ̀n saʼ Judà, wu tum Shafàn ɨ wul ɨ̀ nyaʼnɨ bò ŋweyn ɨ ghɨ Azalìyà ɨ wâyn Meshulàm na wù ndu a ndo nɨ̀ Bôbo Fɨyini. Wu n-bè na, 4“Ndu bè sɨ̂ Hìlkayà ɨ ngàŋ ndô Fɨyini i ngaŋtɨnɨ na wù taŋ ɨkwo vzɨ̀ a ghelɨ ghì a ghɨ n-chî ɨchfɨ ndô Fɨyini fsɨ̀tɨ sɨ̂ ghelɨ. 5Wù taŋ wu fu ɨkwo ateyn sɨ̂ ghelɨ ghì a ghɨ n-læ choʼ na ghɨ na tisɨ̂ ìfêl a ndô Fɨyini àŋena laʼ ghelɨ ghì a ghɨ n-kasî bâʼlɨ̀ ndô Fɨyini ateyn. 6Àŋena nɨn kelɨ sɨ laʼ ghelɨ ghì a ghɨ n-bayn ɨfwo nɨ̀ ghelɨ ghɨ baʼlɨnɨ. Àŋena nɨn kelɨ kɨmɨ sɨ yuyn ɨnkâʼ nɨ̀ ngòʼ sɨ chuynɨsɨ sɨ faytɨ ndô Fɨyini ateyn. 7Mɨtì, ghelɨ nâ ghèyn ɨ kelɨ wi sɨ nà fêʼtɨ̀ iwo zɨ̀ a àŋena nɨn nî nɨ̀ ɨ̀kwo ateyn bòm ta àŋena nɨn ghɨ ghelɨ ghɨ samsɨ̂ àŋena.”
8Hìlkayà ɨ ngàŋ ndô Fɨyini i ngaŋtɨnɨ ɨ bè sɨ̀ Shafàn ɨ wul ɨ̀ nyaʼnɨ na, “Ma yeyn meyn ŋwàʼlɨ̀ ìsaʼ a ndo nɨ̀ Bôbo Fɨyini .” Wu n-bè tî ɨ fu ŋwàʼlɨ̀ àteyn sɨ̂ Shafàn wu jàŋ. 9Shafàn ɨ wul ɨ̀ nyaʼnɨ nɨn jaŋ ŋwàʼlɨ̀ àteyn tì ɨ ndu bè sɨ̂ fòyn na, “Ghelɨ ghɨ felɨnɨ nɨ̀ và laʼ meyn fvɨ̀sɨ̀ ɨ̀kwo vzɨ̀ a wu n-ghɨ a ndo nɨ̀ Bôbo Fɨyini sɨ̂ ghelɨ ghɨ felɨnɨ nɨ̀ ghelɨ ghì a ghɨ n-tisɨ ifêl a ndô Fɨyini.” 10Wu n-bè tî ɨ fèʼtɨ̀ sɨ̂ fòyn na, “Hìlkayà ɨ ngàŋ ndô Fɨyini fu meyn ŋwàʼlɨ̀ sɨ̂ mà,” ɨ jàŋ ŋwàʼlɨ̀ àteyn asɨ nɨ̀ fòyn.
11A nà ghɨ ta fòyn yvɨ awo kì a ghɨ nyàʼ a ŋwàʼlɨ̀ ìsaʼ nɨ̀ Bôbo Fɨyini nâ ghè, wu bàytɨ̀ ndzɨsɨ a ŋweyn ɨwùyn. 12Wu n-bàytɨ tî ɨ bè sɨ̂ Hìlkayà ɨ ngàŋ ndô Fɨyini nɨ̀ Ahikàm ɨ wâyn Shafàn nɨ̀ Akbò ɨ wâyn Mìkayà kɨ̀mɨ nɨ̀ Shafàn ɨ wul ɨ̀ nyaʼnɨ nɨ̀ Asayà ɨ wul ɨ vzɨ̀ a wu n-gâmtɨ fòyn na, 13“Yì ndu bɨ̀f na Bôbo Fɨyini nɨn kɨŋ na ghesɨ̀ ghelɨ Judà nɨ̀ Isìlæ̀ ni gha kûm ìwo zɨ̀ a ghɨ nyàʼ a ŋwàʼlɨ̀ afêyn a ghɨ yèyn têyn a? Ɨtoŋ Bôbo Fɨyini nɨn yaf sɨ̂ ghesɨ̀nà nô sɨ a ŋaŋ bòm ta ghɨ̀bo ghesɨ̀na bu tî nà yvɨnɨ̂ àwo kì a ghɨ nyàʼ a ŋwàʼlɨ̀ nâ ghàyn kûm ghesɨ̀nà. Àŋena bu tî nà chî ta kɨ n-bê.”
14Hìlkayà ɨ ngàŋ ndô Fɨyini ŋêyn Ahikàm nɨ̀ Akbò nɨ̀ Shafàn baʼsɨ̂ nɨ̀ Asayà ɨ ndu yeyn Huldà ɨ nfèʼtɨ̀ ì ghaʼnɨ ì ki a ghɨ wî Shalùm ɨ wâyn Tikvà. Tikvà nà n-ghɨ wâyn Hahàs. Hahàs nà n-tôʼnɨ̀ nɨ̀ ndzɨ sìsɨ̀ a ghɨ nà n-mâʼ a ndo nɨ̀ Bôbo Fɨyini. Nfèʼtɨ̀ nâ yèyn nà n-chî a ntèʼ ifɨ ì lì a Jèlusalèm.
15Huldà ɨ bè sɨ̂ àŋena na, “Yì ndu bè sɨ̂ wùl ɨ̀ vzɨ̀ a wù tùm zɨ na, Bôbo Fɨyini ɨ Fɨyini fɨ Isìlæ̀ bè na, 16‘Mɨ nì-à a nô mɨ ngeʼ ì kà ta ghɨ nyàʼ a ŋwàʼlɨ̀ afî a ghɨ jàŋ sɨ̂ fòyn Judà koli ilaʼ yèynì nɨ̀ ghelɨ ghì a ghɨ n-chi ateyn. 17Ɨtoŋ wom nɨn yafɨ nô sɨ a ŋaŋ bòm ta àŋena chas meyn mà ɨ fàytɨ mɨyini nà nyôʼ ileŋ sɨ̂ ɨ̀mêyn. Ɨtoŋ wom yaf meyn nô sɨ a ŋaŋ ma na ghɨ sɨ maʼ ngeʼ ilaʼ afêyn ma wùl kàʼ wu bû kfɨ̀nɨ.’ 18Yì ndu bè sɨ̂ fòyn Judà vzɨ̀ a wù tùm zɨ na yì gvi bɨf iwo zɨ̀ a Bôbo Fɨyini nɨn kɨŋ na wù ni kûm ìsaʼ zɨ̀ a ghɨ jàŋ wù yvɨ na, Bôbo Fɨyini ɨ Fɨyini fɨ Isìlæ̀ fɨ̀ be na, 19ta wà tî kùmi ɨwuyn ɨ̀ ngvɨmlɨ ngêŋ zyâ asɨ nɨ̀ Fɨyini fɨ ta wà yvɨ iwo zɨ̀ a mà bè kûm ìlaʼ yèynì nɨ̀ ghelɨ ghì a ghɨ n-chi ateyn, na mɨ n-te ghelɨ ateyn fì bèbsɨ àŋena, wà bâs ndzɨ shyasɨ ɨ̀ dzɨ̀ sɨ̂ mà, ma yvɨ meyn ìdzɨ̂ ì zæ. À bè Bôbo Fɨyini. 20Mɨ nî-à a wà kfɨ ɨ̀ kfa ndù yeyn ghɨ̀bo ghya a ghɨ gvɨmi vâ nɨ̀ mbôynɨ̀. Wa læ̀ yeyn wi ngeʼ zɨ̀ a mɨ n-fu sɨ̂ ìlaʼ yèynì.
Ghelɨ ntum nâ ghì ɨ kæ kasi sɨ kfa nɨ̀ saʼgha àteyn sɨ̂ fòyn.