2 Kings 5

Elishà ɨ chuʼ Namàn

¹Wùl ɨ̀lvɨ nɨn læ meyn nà ghɨ iziyn i ŋweyn i ɨ ghɨ Namàn. Wu nà n-ghɨ àtu a sugèyʼsɨ̀ nɨ̀ fòyn Alàm koʼnɨ̂ asɨ nɨ̀ bò ìfèl nɨ̀ ŋweyn, ghɨ fî ngvɨmlɨ̂ ŋweyn nô sɨ a ŋaŋ bòm ta Bôbo Fɨyini nɨ̀n læ meyn nì wu tɨm yɨ tɨwoŋ sɨ̂ fòyn Alàm. Namàn nà n-ghɨ nô sugèyʼ i bemnɨ mɨtì kelɨ ànsàsì.

²À nà n-ghɨ tì ma sugèyʼsɨ Alàmsɨ̀ nɨn læ meyn seʼ ɨ nù ghelɨ Isìlæ̀ achi a li-a ɨ ghal ɨ kfa nɨ̀ wâyn wùl ɨ̀ Isìlæ̀ ɨ wi wu nà fêl sɨ̂ wî Namàn. ³A læ nà ghɨ achi a li-a, wayn ɨ wi nâ vzɨ̀ ɨ bè sɨ̂ nà ìfèl nɨ̀ ŋweyn na, “Bò ìfèl nɨ̀ ma nà n-ndû yeyn nfèʼtɨ̀ ì ghaʼnɨ zɨ̀ a yì n-chi a Sàmalìyà a wù chuʼ ànsàsì a ŋweyn kèyn.”

⁴A nà ghɨ ta Namàn yvɨ ɨ ndu yeyn fòyn Silìyà ɨ fèʼtɨ̀ ìwo zɨ̀ a wayn wùl ɨ̀ Isìlæ̀ nâ vzɨ̀ bè. ⁵Fòyn Alàm ɨ bè na, “Yi na ghɨ mɨ ti wa ndù. Mɨ n-nyàʼ ŋwàʼlɨ̀ a wà ndu fù sɨ̂ fòyn Isìlæ̀.” Namàn ɨ kæ li aso ɨkwo a fɨfâ kɨ dɨlɨ̀ chem ndû kilùsɨ̀ ighɨ ì tal nɨ̀ kilùsɨ̀ mɨ̀vɨm ɨ̀n kæ̀ nɨ̀ àso ɨkwo a baŋnɨ-a kɨ dɨlɨ̀ chem ndû kilùsɨ̀ mɨ̀vɨm nsòmbo baʼsɨ̂ nɨ̀ tɨ̀nkì tɨ ndzɨsɨ ìvɨm sɨ lù. ⁶Ŋwàʼlɨ̀ zɨ̀ a wù n-læ ndu nɨ̀ ɨ̀nyeyn sɨ̂ fòyn Isìlæ̀ nà n-ghɨ ma ghɨ nyàʼ ateyn na, “Mà tùm wùl ɨ̀ felɨnɨ nɨ̀ mà ɨ Namàn nɨ̀ ŋwàʼlɨ̀ yèyn na wà gamtɨ chùʼ ànsàsì a ŋweyn kèyn.”

⁷À nà n-ghɨ ta fòyn Isìlæ̀ jaŋ ŋwàʼlɨ̀ àteyn, iwo ateyn i ɨ fu ngeʼ sɨ̂ ŋweyn wu bàytɨ̀ ndzɨsɨ ŋweyn ɨ bè na, “Mɨ n-ghɨ wi Fɨyini. Mà kàʼ ma bû zuè wul ma mà kàʼ ma bû làysɨ wul sɨ ikfɨ. Wùl ɨ̀ wèyn jèlɨ̀ ti sɨ tum wul wu koʼî nɨ̀ ansàsì-a sɨ nà bê na mà chuʼ a? Wùl nâ wèyn nɨ̀n yvɨtɨ̂ ɨ̀chfɨ̂ wom.”

⁸Elishà ɨ yvɨ na fòyn Isìlæ̀ baytɨ meyn ndzɨsɨ sɨ a ŋweyn ɨwùyn, wu tum bɨf sɨ̂ ŋweyn na, “Wà bàytɨ̀ ndzɨ shyasɨ bòm ghà? Bè-a wùl àteyn gvi yèyn ma a ka wu kèli na nfèʼtɨ̀ ì ghaʼnɨ nɨn ghɨ a Isìlæ̀.” ⁹Wu n-bè tî, Namàn ɨ lì nyamsɨ kfaŋ nɨ̀ ŋweyn nɨ̀ mɨ̀nchaʼ mɨ̀ ìwòŋ ɨ ndu timi ɨchfɨ ndo nɨ̀ Elishà. ¹⁰Elishà ɨ tum wul na wù fvɨ bè sɨ̂ ŋweyn na, “Ndu su ɨwûyn va a jvâ Jodàn ìngal nsòmbo a ka wà to a ɨwuyn vâ kasi nà ghɨ kɨ ta wu tî nà ghɨ.”

¹¹Mɨtì Namàn ɨ lù nɨ̀ ɨ̀toŋ ɨ yafɨnɨ bê na, “Mà nà kfâʼ na wu n-fvɨ̂ gvî yeyn mà ɨ̀ jàŋ ìzɨyn i Bôbo Fɨyini ɨ Fɨyini fɨ ŋweyn ɨ̀ làysɨ̀ àwu a ma atu, ɨ̀ chùʼ ànsàsì kèyn a ma ɨwùyn. ¹²A jvà Abanà nɨ̀ jvâ Fabà a Dàmaskùs nɨn jofɨ̀ chwô wì jvasɨ Isìlæ̀ a? A mà ti nà n-ndû sû ɨwuyn wom ateyn ma bû to a?” Wu taŋi tì ɨ kasi ɨ nà kfâ ma ɨtoŋ ŋweyn yafɨ meyn nô sɨ a ŋaŋ.

¹³Ghelɨ ghɨ felɨnɨ nɨ̀ Namàn ɨ ndu bɨf sɨ̂ ŋweyn na, “Bô, ba nfèʼtɨ̀ ì ghaʼnɨ nà n-bê na wà ni iwo i to-i ma wà ni meyn nì a? Wù kùmi bè kɨ̀ na, wà ndu sù ɨ̀wûyn va a jvâ ɨ̀ to!” ¹⁴Àŋena taŋi tì wu lu ndu a jvâ Jodàn ɨ limi ateyn ìngal nsòmbo kɨ̀ ta Elishà ɨ wul ɨ̀ Fɨyini nɨn bè, ɨ to ɨwuyn ŋweyn ɨ nà kasi leyn kɨ ta ɨwuyn wayndà ɨ̀kùŋ.

¹⁵Namàn nɨn to tî, ŋêyn ghelɨ ghɨ felɨnɨ nɨ̀ ŋweyn nô ghɨ̀ jɨ̀m ɨ kasi ndu yeyn Elishà ɨ wul ɨ̀ Fɨyini, Namàn ɨ fvɨ timi a ŋweyn asɨ ɨ bè na, “Ma keli meyn lvɨ̂yn na Fɨyini fɨ nɨn ghɨ wi nô alèʼ a li-a a mbzɨ a bu kɨ a Isìlæ̀. Mɨ n-chwotɨ̂ a bôbo na wà fsɨ ifu i wûl ɨ̀ felɨnɨ nɨ̀ và.”

¹⁶Nfèʼtɨ̀ ì ghaʼnɨ ɨ bè sɨ̂ ŋweyn na, “Samoʼ ta Bôbo Fɨyini fìfɨ̀ a mɨ n-koʼsɨ nɨn chi, mɨ n-fsɨ wi afo sɨ̂ và. Wu n-bè tî Namàn ɨ chwotɨ ŋweyn wu teyn na yi n-fsɨ wi.

¹⁷Namàn ɨ bè na, “Wà kæ faŋ mɨ tɨ̀ fsɨ ifu ateyn, wa fu wul ɨ̀ felɨnɨ nɨ̀ và nɨ̀ nsesɨ ma njàkâysɨ̀ kàʼ a sɨ beʼi sɨ̀ bò. Wa n-fu-a a mà ndu bàʼlɨ̀ àbaŋ ifu ateyn bòm ta mà læ̀ bu fu wi ifu i nyoʼnɨ-i nɨ̀ tɨ̀fu tɨ litɨ sɨ̂ fɨyini fɨ lûfɨ̀ a bu kɨ sɨ̂ Bôbo Fɨyini. ¹⁸Mɨtì mɨ n-jêm na Bôbo Fɨyini lesɨ fù ma ɨ wul ɨ̀ felɨnɨ nɨ̀ và sɨ iwo ghàyn tèyn ìmòʼ: Na ghesɨ̀ bò ìfèl nɨ̀ ma ni-a se sɨ zɨ sɨ koʼsɨ Limòn ɨ fɨyini fɨ ghelɨ Silìyà, wù nguʼ sɨ koʼsɨ wu yeʼtɨ a ma ɨwùyn ma boŋ nguʼ. Ma kæ læ̀ nguʼ alvɨ sɨ koʼsɨ Limòn, Bôbo Fɨyini ɨ lèsɨ̀ ɨ fu ma ɨ wul ɨ̀ felɨnɨ nɨ̀ và.”

¹⁹Elishà ɨ be sɨ̂ ŋweyn na, “Kfa nɨ̀ mbôynɨ̀.”

A nà ghɨ ta Namàn lù, bèʼì jèl nô tèyn, ²⁰Gèhazì ɨ wul ɨ̀ felɨnɨ nɨ̀ Elishà ɨ wul ɨ̀ Fɨyini ɨ kfàʼtɨ kɨ sɨ a ŋweyn a ngeŋ na, “Bò ìfèl nɨ̀ ma ni meyn bòynɨ chwòsɨ̀ sɨ̂ Namàn, ɨ wul ɨ̀ Alàm wèyn. Wù ni meyn nà kelɨ sɨ fsɨ afo kì a wù nì gvì nɨ̀ ànkeyna. Samoʼ ta Bôbo Fɨyini nɨn chi, mɨ nyɨŋ ndû fsɨ àfo sɨ̂ ŋweyn.”

²¹Gèhazì nɨn kfàʼtɨ tî nô mɨ ɨlvɨ gha ɨ nyɨŋ ndù ibàm nɨ̀ Namàn. A nà ghɨ ta Namàn yèyn ta wù n-nyɨŋ gvî a ŋweyn ibàm ɨ suʼi sɨ a fɨnchaʼ fɨ iwòŋ ɨ ndù kòynɨ̀ nɨ̀ ŋweyn ɨ bɨf sɨ̂ ŋweyn na, “À gàyn ghà?”

²²Gèhazì ɨ bè na, “Iwo i bû gàyn. Bò ìfèl nɨ̀ mà bè na mà gvi bè sɨ̂ và na, ‘Tɨkuŋtɨ lû meyn anòyn nɨ̀ nfèʼtɨ̀sɨ ghaʼnɨsɨ tɨ̀ bò ɨ̀ gvì sɨ mùtɨ ma ma ghɨ lù ilaʼ i kfɨ̀ynsɨ a Eflèm. Mɨ n-chwotɨ̂ na wà fu aso ɨkwo a fɨfâ sɨ̂ àŋena kɨ dɨlɨ̀ chem ndû kilùsɨ̀ mɨ̀vɨm ɨ̀n tal njvàsɨ̀ kæ̀ baʼsɨ̂ nɨ̀ tɨ̀nkì tɨ ndzɨsɨ tɨ̀ bò.’”

²³Namàn ɨ bè sɨ̂ ŋweyn na, “Yi na ghɨ mɨ ti wa fsɨ aso ɨkwo a fɨfâ kɨ dɨlɨ̀ chem kilùsɨ̀ mɨ̀vɨm ntufà njvàsɨ̀ nfama.” Wu n-bè tî ɨ chwotɨ Gèhazì na wù fsɨ ɨkwo ateyn, ɨ we ɨ̀kwo ateyn a bò sɨ̀ bò ɨ kul baʼsɨ nɨ̀ tɨ̀nkì tɨ ndzɨsɨ tɨ̀ bò. Wu n-kul tî ɨ bè ghelɨ ghɨ felɨnɨ nɨ̀ ŋweyn ghɨ̀ bò ɨ bèʼi ɨ nà n-ndû asɨ Gèhazì ɨ gvî ibàm. ²⁴Gèhazì nɨn gvi meyn chem a kfɨyn ghê a Elishà nɨn chi ateyn ɨ fsɨ ɨfwo ateyn sɨ̂ ghelɨ ghɨ felɨnɨ nâ ghì ɨ ndu lèytɨ̀ a ndo, ɨ tsɨynsɨ ghelɨ ateyn, àŋena lù. ²⁵Àŋena nɨn lù tî wu zɨ timi asɨ nɨ̀ bò ìfèl nɨ̀ ŋweyn.

Elishà ɨ bɨf sɨ̂ ŋweyn na, Wà nì nà ghɨ wo a Gèhazì?”

Gèhazì ɨ bè na, “Wul ɨ̀ felɨnɨ nɨ̀ và bu nì ndù alèʼ.”

²⁶Mɨtì Elishà ɨ bè sɨ̂ ŋweyn na, “Wà n-kya wi na ayvɨs à kema ni meyn nà ghɨ alèʼ ghè a wùl ɨ̀ vzɨ̀ nì sùʼi sɨ atû fɨ̀nchaʼ fɨ iwòŋ ɨ̀ nà gvî sɨ kòynɨ zɨ̂ ŋweyn â? Ɨwêyn nɨn ghɨ wi ɨ̀lvɨ ɨ jûŋ sɨ nà fsɨ ɨkwo kèsa ndzɨsɨ kèsa gveynsɨ olìfsɨ̀ nɨ̀ gveynsɨ gɨ̀lêbsɨ̀ nɨ̀ bzɨsɨ nɨ̀ nyamsɨ baʼsɨ̂ nɨ̀ ghelɨ ghɨ felɨnɨ ghɨ lûmnɨ̀ nɨ̀ ghɨki.

²⁷Ansàsì kì a kɨ tî kù Namàn nɨn ku và nɨ̀ wôyn ghya kɨ̀ samoʼ.” Gèhazì ɨ lù sɨ a ŋweyn asɨ nô mɨ ɨlvɨ gha, ànsàsì-à ɨ ku ŋweyn wu nà fɨfɨ kɨ tèyn mbvɨ.