2 Kings 6

Elishà ɨ nì njàm ɨ fvɨ koʼ ɨ nà leŋâ atû mù

¹À n-læ meyn nà ghɨ achi a li-a anôyn nfèʼtɨ̀sɨ ghaʼnɨsɨ kì a Elishà nà n-yeʼi ɨ bè sɨ̂ Elishà na, “Alêʼ kì a ghesɨ̀nà nɨn gvî chɨ̂yntɨ̀ ateyn nɨn læ̂ nô sɨ a ŋaŋ.” ²Ghesɨ̀nà ndu a mbæ̀ jvà Jodàn alèʼ ghè a nô mɨ ndà kàʼ a wù gvel fɨkâʼ, a ghesɨ̀nà baʼlɨ alêʼ afu kɨ kfeynɨ-à sɨ nà gvî chɨ̂yntɨ̀ ateyn.”

Wu bè na, “Yì ndu.”

³Wul antêynɨ̀ nɨ̀ àŋena ɨ kæ be sɨ̂ ŋweyn na, “Ghès nɨn chwotɨ̂ na wà gvi ghesɨ̀nà ndu.”

Elishà ɨ bɨmi, ⁴ɨ lù ŋêyn àŋena.

Àŋena ndù a mbæ̀ jvà Jodàn ɨ zɨ̀tɨ̀ ɨ nà sɨ gvelɨ̀ ɨ̀nkâʼ. ⁵Wul a àŋena antêynɨ̀ ɨ se sɨ gvelɨ fɨkâʼ, njàm ɨ choʼa ɨ chem a jvâ. Wul àteyn ɨ byal dzɨ̀ na, “Bò ìfèl nɨ̀ mà! Njàm àteyn nɨn ghɨ ma mà lòyn loyn.”

⁶Elishà ɨ wul ɨ̀ Fɨyini ɨ bɨf na, “Yì chèm wo?” Wu dyèyn àlêʼ kì a yì chèm ateyn Elishà ɨ teyn àntɨ̀mlɨ a fɨ̂kàʼ ɨ màʼ afu njàm àteyn ɨ fvɨ koʼ ɨ nà leŋ atû mù. ⁷Elishà ɨ bè sɨ̂ ŋweyn na, “Fvɨ̀sɨ njàm àteyn.” Wùl àteyn ɨ fvɨ̀sɨ̀ njàm àteyn sɨ a jvâ.

Ghɨ tɨm yɨ sugèyʼsɨ Alàm

⁸Fòyn Alàm nɨ̀n læ meyn nà tɨm ìwoŋ ŋêyn ghelɨ Isìlæ̀, ɨ taŋi ŋêyn chyeʼsɨ ŋweynsɨ ɨ fèʼtɨ̀ àlêʼ kì a ka ŋêyn sugèyʼsɨ ŋweynsɨ ndu bɨ̀ ateyn.

⁹Elishà ɨ wul ɨ̀ Fɨyini ɨ tum ntum sɨ̂ fòyn Isìlæ̀ na, wù na tofa ka wu n-chwò alèʼ nâ ghè bòm ta ghelɨ Alàm nɨn ndû sɨ bɨ̀ ateyn. ¹⁰Wu n-bê tî, fòyn ɨ tum ghelɨ ghɨ ndù ɨ nà chî àlêʼ kì a Elishà fèʼtɨ̀. Elishà nà n-fu nfàsì nfàsì sɨ̂ fòyn kɨ̀ mɨlvɨ ɨ̀n jɨ̀m na wù na tôʼnɨ̀-à ɨlwèʼ nâ ghè.

¹¹Iwo ateyn i ɨ yaf fòyn Alàm nô sɨ a ŋaŋ, wu tum jàŋ ghelɨ ghɨ felɨnɨ nɨ̀ ŋweyn ɨ bè sɨ̂ àŋena na, “Yì feʼtɨ sɨ̂ mà na à n-ghɨ ndà a ghesɨ̀nà antêynɨ̀ a wù n-lî awo a ghesɨ̀nà ndû fêʼtɨ̀ sɨ̂ fòyn Isìlæ̀ a?”

¹²Wùl ɨ̀ felɨnɨ nɨ̀ ŋweyn ɨ bè na, “À n-fêʼtɨ̀ wì wul a ghès antêynɨ̀ a Mbæ̀, à n-fêʼtɨ̀ Elishà ɨ nfèʼtɨ̀ ì ghaʼnɨ zɨ̀ a yì n-ghɨ a Isìlæ̀ fêʼtɨ̀ àwo kì sɨ̂ fòyn Isìlæ̀ a wà n-bê nô mɨ a wa nchi.”

¹³Fòyn ɨ bè na, “Yì ndu kɨŋ yèyn na wù n-chî wo a ta ka mà tum ghelɨ ghɨ ndu ghal gvì nɨ̀ ŋweyn a.” Àŋena ndu kɨŋ yeyn ɨ kasi gvi fèʼtɨ̀ na wù n-chî a Dotàn. ¹⁴Fòyn ɨ tum sugèyʼsɨ̀ nɨ̀ nyamsɨ kfaŋsɨ nɨ̀ mɨ̀nchaʼ mɨ̀ ìwòŋ kɨ̀ sɨ idvɨ afu. Sugèyʼ sɨ ateynsɨ nɨ̂n ndù afu nɨ̀ntuʼ ɨ jɨŋ kali ntèʼ àteyn.

¹⁵Wul ɨ̀ felɨnɨ nɨ̀ Elishà ɨ wùl ɨ̀ Fɨyini ɨ bɨs ɨ fvɨ̀ abe ɨ yeyn ma sugèyʼsɨ̀ nɨ̀ nyamsɨ kfaŋsɨ nɨ̀ mɨ̀nchaʼ mɨ̀ ìwoŋ jɨŋ meyn kàli ntèʼ. Wu dzɨ̀ sɨ̂ Elishà ɨ bɨf na, “Bô, ghesɨ̀và ti n-nì ghà?”

¹⁶Nfèʼtɨ̀ ì ghaʼnɨ nâ zɨ̀ ɨ bè sɨ̂ ŋweyn na, “Ka wa n-fàyn, sugèyʼsɨ ghesɨ̀nàsɨ nɨn chwô ɨsɨ àŋenasɨ.”

¹⁷Elishà ɨ jèm bê na, “Bôbo Fɨyini, yasi asɨ a ŋweyn, wù yeyn iwo nâ yèynì.” Bôbo Fɨyini ɨ yàsì àsɨ a wûl ɨ̀ felɨnɨ nɨ̀ ŋweyn wu se sɨ ki ɨ yeyn ma nyamsɨ kfaŋsɨ luyn meyn a kfɨyn mɨ̀nchaʼ mɨ̀ ìwòŋ jɨŋ kàli Elishà balî ta ɨvɨs.

¹⁸A nà ghɨ ta sugèyʼsɨ Alàmsɨ̀ nɨn gvî sɨ keʼ Elishà, wu jèm sɨ̂ Bôbo Fɨyini bê na, “Maʼ ànfèf asɨ nɨ̀ sugèyʼ sèynsɨ̀.” Wu n-jèm tî, Bôbo Fɨyini ɨ màʼ ànfèf asɨ nɨ̀ àŋena kɨ̀ ta wù bè.

¹⁹Elishà ɨ bè sɨ̂ àŋena na, “Yi le meyn dzɨ. Yi n-yeyn wi wul ɨ vzɨ̀ a yi n-kɨŋ a ntèʼ afêyn, mɨ n-ndù dyêyn wul àteyn sɨ̂ zɨ̀.” Wu n-bè tî ɨ lì ɨ ndù nɨ̀ àŋena a Sàmalìyà.

²⁰Àŋena nɨn zɨ a ntèʼ nâ ghè nô mɨ ɨlvɨ gha, Elishà ɨ jèm bê na, “Bôbo Fɨyini yàsi asɨ a ghelɨ ghèyn àŋena na yeyn ɨ̀lwêʼ.” Wu n-jèm tî, Bôbo Fɨyini ɨ yàsì àsɨ a àŋena, àŋena se sɨ ki ɨ yeyn ghɨ a Sàmalìyà.

²¹Fòyn Isìlæ̀ ɨ yeyn àŋena ɨ bɨf sɨ̂ Elishà na, “Bô, mà zuetɨ̀ àŋena? Mà zuetɨ ghelɨ nâ ghèyn a?”

²²Elishà ɨ bè na, “Ka wa n-zuètɨ àŋena. A wà ti ghàytɨ ghelɨ iwòŋ ɨ̀ kfa nɨ̀ àŋena a wà zuetɨ a? Fu ɨfwo ɨ yɨnɨ nɨ̀ mu àŋena yɨ ɨ̀ nyvɨ ɨ̀ kàsi kfa ndù yeyn bò ìfèl nɨ̀ àŋena.” ²³Elishà nɨn taŋi tî fòyn ɨ bè ghɨ kfè ɨ̀fwo ɨ yɨnɨ sɨ̂ àŋena wu dvɨ̂ kɨ tèyn, àŋena yɨ ɨ fi nyvɨ fòyn ɨ bè na àŋena kasi nâ kfa. Àŋena kasi kfa ɨ ndu yeyn bò ìfèl nɨ̀ àŋena. À ti iwo zɨ̀ a yi n-nì sugèyʼsɨ Alàmsɨ̀ ɨ nà bu fì tɨm wi iwoŋ a Isìlæ̀.

Sugèyʼsɨ Alàmsɨ̀ ɨ jɨ̀ŋ ɨ kali ntèʼ Sàmalìyà

²⁴Ghelɨ Alàm nɨn læ meyn chi sɨ a ndèyn bula ghɨ fî tɨm iwoŋ a Isìlæ̀ mɨtì a læ nà ghɨ ɨtuʼ fɨli Ben-hadàd ɨ fòyn Alàm ɨ yvɨ̀ŋtɨ̀ sugèyʼsɨ̀ nô sɨ̀ jɨ̀m ŋêyn àŋena koʼ ndu jɨŋ kali Sàmalìyà, ²⁵ɨ chi afu nô sɨ a ndyeyn ìdyà, jeŋ ì bemnɨ ɨ ku a Sàmalìyà. Yi n-ku tî, ghɨ nà beyʼlɨ̂ àtu a njàkâs sɨ aso ɨkwo a fɨfâ kɨ dɨlɨ̀ chem ndû kìlù ìmòʼ, beyʼlɨ̂ àwu anlàynlàyn sɨ aso ɨkwo a fɨfâ kɨ dɨlɨ chem àbeʼ a kilù.

²⁶Fòyn Isìlæ̀ ɨ nà jelɨ̀ kal atû mbàyn wùl ɨ wi ɨ dzɨ̀ na, “Mbæ̀, gàmtɨ ma a bô.”

²⁷Fòyn ɨ bɨf na, “Bôbo Fɨyini kæ faŋ tɨ̀ gàmtɨ vâ, ma gàmtɨ̀ ti vâ a? Mɨ n-kelɨ wi asaŋ, kelɨ wi mɨlûʼ sɨ gàmtɨ vâ ateyn. ²⁸Ngeʼ zyâ nɨn ghɨ ghà?”

Wu bèynsɨ̀ ɨ bè na, “Wùl ɨ wi wèyn tî bè sɨ̂ mà na, ‘Li fu wayn ɨ lûmnɨ̀ nɨ̀ và ghɨ kfɨlɨ layn, à læ̂ nà ghɨ a libɨs ghɨ kfɨl ɨ wôm.’ ²⁹Wù tî bè tì ma fu ɨ wôm ghɨ kfê ɨ̀ kfɨl. Ɨtuʼ layn ma bê sɨ̂ ŋweyn na, ‘Fu wayn ɨ lûmnɨ̀ nɨ̀ và ghɨ kfɨl,’ mɨtì ma wù sɨ ghɨ ma wù leytɨ meyn wayn àteyn.”

³⁰Fòyn ɨ yvɨ iwo zɨ̀ a wùl ɨ wi àteyn bè ɨ bàytɨ̀ ndzɨsɨ sɨ a ŋweyn ɨwùyn ɨ nà jelɨ̀ kal atû mbàyn, ghelɨ yeyn a ma wù nì màʼ fɨ̀ntsɨ antêynɨ̀ ndzɨsɨ nɨ̀ ŋweyn. ³¹Wu bè na, “Mɨ n-jêm na njvâ Bôbo Fɨyini ku ma ɨlvɨ ta mà faŋ tɨ̀ teyn atu a Elishà ɨ wâyn Shafàt layn.”

³²À nà n-ghɨ tì Elishà ɨ duʼ a ŋweyn a ndo ŋêyn chyeʼsɨ. Fòyn ɨ tum wul na wù na ndû sɨ asɨ, mɨtì wùl àteyn ɨ se sɨ ndù sɨ chem a ndo nɨ̀ Elishà, ma Elishà bê meyn sɨ̂ chyeʼsɨ ŋweynsɨ na, “Yì yeyn læ̂ ta nzue wùl ɨ̀ wèyn tùm wul na wù gvi tèyn atu à kema. Yi yeyn ta wù n-gvî yi kɨ̀ŋ ndo, ka yi n-vìsi wù zɨ a ndo. Nô fòyn nɨ̀ ngêŋ ŋweyn nɨn gvî a ŋweyn ibàm.”

³³Wu nà n-bu taŋî kɨ sɨ̂ àŋena, wùl ɨ̀ ntum àteyn ɨ kàli gvì ɨ yeyn ŋweyn ɨ bè na, “Fòyn bè na, “Ngeʼ yèyn nɨn ghɨ tèyn ma à gvì nɨ̀ Bôbo Fɨyini. Mà ti kàʼ ti ma faŋ nà bu chîtɨ̀ kɨ ŋweyn na wù gvi nɨ̀ ìgâmtɨ̀-a?